೧. ಲಸುಣವಗ್ಗೋ

೧. ಪಠಮಸಿಕ್ಖಾಪದಂ

ಇಮೇ ಖೋ ಪನಾಯ್ಯಾಯೋ ಛಸಟ್ಠಿಸತಾ ಪಾಚಿತ್ತಿಯಾ

ಧಮ್ಮಾ ಉದ್ದೇಸಂ ಆಗಚ್ಛನ್ತಿ.

೭೯೩. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರೇನ ಉಪಾಸಕೇನ ಭಿಕ್ಖುನಿಸಙ್ಘೋ ಲಸುಣೇನ ಪವಾರಿತೋ ಹೋತಿ – ‘‘ಯಾಸಂ ಅಯ್ಯಾನಂ ಲಸುಣೇನ ಅತ್ಥೋ, ಅಹಂ ಲಸುಣೇನಾ’’ತಿ. ಖೇತ್ತಪಾಲೋ ಚ ಆಣತ್ತೋ ಹೋತಿ – ‘‘ಸಚೇ ಭಿಕ್ಖುನಿಯೋ ಆಗಚ್ಛನ್ತಿ, ಏಕಮೇಕಾಯ ಭಿಕ್ಖುನಿಯಾ ದ್ವೇತಯೋ ಭಣ್ಡಿಕೇ ದೇಹೀ’’ತಿ. ತೇನ ಖೋ ಪನ ಸಮಯೇನ ಸಾವತ್ಥಿಯಂ ಉಸ್ಸವೋ ಹೋತಿ. ಯಥಾಭತಂ ಲಸುಣಂ ಪರಿಕ್ಖಯಂ ಅಗಮಾಸಿ. ಭಿಕ್ಖುನಿಯೋ ತಂ ಉಪಾಸಕಂ ಉಪಸಙ್ಕಮಿತ್ವಾ ಏತದವೋಚುಂ – ‘‘ಲಸುಣೇನ, ಆವುಸೋ, ಅತ್ಥೋ’’ತಿ. ‘‘ನತ್ಥಾಯ್ಯೇ. ಯಥಾಭತಂ ಲಸುಣಂ ಪರಿಕ್ಖೀಣಂ. ಖೇತ್ತಂ ಗಚ್ಛಥಾ’’ತಿ. ಥುಲ್ಲನನ್ದಾ ಭಿಕ್ಖುನೀ ಖೇತ್ತಂ ಗನ್ತ್ವಾ ನ ಮತ್ತಂ ಜಾನಿತ್ವಾ ಬಹುಂ ಲಸುಣಂ ಹರಾಪೇಸಿ. ಖೇತ್ತಪಾಲೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ನ ಮತ್ತಂ ಜಾನಿತ್ವಾ ಬಹುಂ ಲಸುಣಂ ಹರಾಪೇಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತಸ್ಸ ಖೇತ್ತಪಾಲಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ನ ಮತ್ತಂ ಜಾನಿತ್ವಾ ಬಹುಂ ಲಸುಣಂ ಹರಾಪೇಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ನ ಮತ್ತಂ ಜಾನಿತ್ವಾ ಬಹುಂ ಲಸುಣಂ ಹರಾಪೇತೀತಿ [ಹರಾಪೇಸೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ನ ಮತ್ತಂ ಜಾನಿತ್ವಾ ಬಹುಂ ಲಸುಣಂ ಹರಾಪೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

‘‘ಭೂತಪುಬ್ಬಂ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಅಞ್ಞತರಸ್ಸ ಬ್ರಾಹ್ಮಣಸ್ಸ ಪಜಾಪತಿ ಅಹೋಸಿ. ತಿಸ್ಸೋ ಚ ಧೀತರೋ – ನನ್ದಾ, ನನ್ದವತೀ, ಸುನ್ದರೀನನ್ದಾ. ಅಥ ಖೋ, ಭಿಕ್ಖವೇ, ಸೋ ಬ್ರಾಹ್ಮಣೋ ಕಾಲಙ್ಕತ್ವಾ ಅಞ್ಞತರಂ ಹಂಸಯೋನಿಂ ಉಪಪಜ್ಜಿ. ತಸ್ಸ ಸಬ್ಬಸೋವಣ್ಣಮಯಾ ಪತ್ತಾ ಅಹೇಸುಂ. ಸೋ ತಾಸಂ ಏಕೇಕಂ ಪತ್ತಂ ದೇತಿ. ಅಥ ಖೋ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ‘‘ಅಯಂ ಹಂಸೋ ಅಮ್ಹಾಕಂ ಏಕೇಕಂ ಪತ್ತಂ ದೇತೀ’’ತಿ ತಂ ಹಂಸರಾಜಂ ಗಹೇತ್ವಾ ನಿಪ್ಪತ್ತಂ ಅಕಾಸಿ. ತಸ್ಸ ಪುನ ಜಾಯಮಾನಾ ಪತ್ತಾ ಸೇತಾ ಸಮ್ಪಜ್ಜಿಂಸು. ತದಾಪಿ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಅತಿಲೋಭೇನ ಸುವಣ್ಣಾ ಪರಿಹೀನಾ. ಇದಾನಿ ಲಸುಣಾ ಪರಿಹಾಯಿಸ್ಸತೀ’’ತಿ.

[ಜಾ. ೧.೧.೧೩೬ ಸುವಣ್ಣಹಂಸಜಾತಕೇಪಿ] ‘‘ಯಂ ಲದ್ಧಂ ತೇನ ತುಟ್ಠಬ್ಬಂ, ಅತಿಲೋಭೋ ಹಿ ಪಾಪಕೋ;

ಹಂಸರಾಜಂ ಗಹೇತ್ವಾನ, ಸುವಣ್ಣಾ ಪರಿಹಾಯಥಾ’’ತಿ.

ಅಥ ಖೋ ಭಗವಾ ಥುಲ್ಲನನ್ದಂ ಭಿಕ್ಖುನಿಂ ಅನೇಕಪರಿಯಾಯೇನ ವಿಗರಹಿತ್ವಾ ದುಬ್ಭರತಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೭೯೪. ‘‘ಯಾ ಪನ ಭಿಕ್ಖುನೀ ಲಸುಣಂ ಖಾದೇಯ್ಯ ಪಾಚಿತ್ತಿಯ’’ನ್ತಿ.

೭೯೫. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಲಸುಣಂ ನಾಮ ಮಾಗಧಕಂ ವುಚ್ಚತಿ.

‘‘ಖಾದಿಸ್ಸಾಮೀತಿ ಪಟಿಗ್ಗಣ್ಹಾ’’ತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಚಿತ್ತಿಯಸ್ಸ.

೭೯೬. ಲಸುಣೇ ಲಸುಣಸಞ್ಞಾ ಖಾದತಿ, ಆಪತ್ತಿ ಪಾಚಿತ್ತಿಯಸ್ಸ. ಲಸುಣೇ ವೇಮತಿಕಾ ಖಾದತಿ, ಆಪತ್ತಿ ಪಾಚಿತ್ತಿಯಸ್ಸ. ಲಸುಣೇ ಅಲಸುಣಸಞ್ಞಾ ಖಾದತಿ, ಆಪತ್ತಿ ಪಾಚಿತ್ತಿಯಸ್ಸ.

ಅಲಸುಣೇ ಲಸುಣಸಞ್ಞಾ ಖಾದತಿ, ಆಪತ್ತಿ ದುಕ್ಕಟಸ್ಸ. ಅಲಸುಣೇ ವೇಮತಿಕಾ ಖಾದತಿ, ಆಪತ್ತಿ ದುಕ್ಕಟಸ್ಸ. ಅಲಸುಣೇ ಅಲಸುಣಸಞ್ಞಾ ಖಾದತಿ, ಅನಾಪತ್ತಿ.

೭೯೭. ಅನಾಪತ್ತಿ ಪಲಣ್ಡುಕೇ, ಭಞ್ಜನಕೇ, ಹರೀತಕೇ, ಚಾಪಲಸುಣೇ, ಸೂಪಸಮ್ಪಾಕೇ, ಮಂಸಸಮ್ಪಾಕೇ, ತೇಲಸಮ್ಪಾಕೇ, ಸಾಳವೇ, ಉತ್ತರಿಭಙ್ಗೇ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಠಮಸಿಕ್ಖಾಪದಂ ನಿಟ್ಠಿತಂ.

೨. ದುತಿಯಸಿಕ್ಖಾಪದಂ

೭೯೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಸಮ್ಬಾಧೇ ಲೋಮಂ ಸಂಹರಾಪೇತ್ವಾ ಅಚಿರವತಿಯಾ ನದಿಯಾ ವೇಸಿಯಾಹಿ ಸದ್ಧಿಂ ನಗ್ಗಾ ಏಕತಿತ್ಥೇ ನಹಾಯನ್ತಿ. ವೇಸಿಯಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಸಮ್ಬಾಧೇ ಲೋಮಂ ಸಂಹರಾಪೇಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತಾಸಂ ವೇಸಿಯಾನಂ ಉಜ್ಝಾಯನ್ತೀನಂ ಖಿಯ್ಯನ್ತೀನಂ ವಿಪಾಚೇನ್ತೀನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಸಮ್ಬಾಧೇ ಲೋಮಂ ಸಂಹರಾಪೇಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಸಮ್ಬಾಧೇ ಲೋಮಂ ಸಂಹರಾಪೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಸಮ್ಬಾಧೇ ಲೋಮಂ ಸಂಹರಾಪೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೭೯೯. ‘‘ಯಾ ಪನ ಭಿಕ್ಖುನೀ ಸಮ್ಬಾಧೇ ಲೋಮಂ ಸಂಹರಾಪೇಯ್ಯ, ಪಾಚಿತ್ತಿಯ’’ನ್ತಿ.

೮೦೦. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಸಮ್ಬಾಧೋ ನಾಮ ಉಭೋ ಉಪಕಚ್ಛಕಾ, ಮುತ್ತಕರಣಂ.

ಸಂಹರಾಪೇಯ್ಯಾತಿ ಏಕಮ್ಪಿ ಲೋಮಂ ಸಂಹರಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ. ಬಹುಕೇಪಿ ಲೋಮೇ ಸಂಹರಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ.

೮೦೧. ಅನಾಪತ್ತಿ ಆಬಾಧಪಚ್ಚಯಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದುತಿಯಸಿಕ್ಖಾಪದಂ ನಿಟ್ಠಿತಂ.

೩. ತತಿಯಸಿಕ್ಖಾಪದಂ

೮೦೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ದ್ವೇ ಭಿಕ್ಖುನಿಯೋ ಅನಭಿರತಿಯಾ ಪೀಳಿತಾ ಓವರಕಂ ಪವಿಸಿತ್ವಾ ತಲಘಾತಕಂ ಕರೋನ್ತಿ. ಭಿಕ್ಖುನಿಯೋ ತೇನ ಸದ್ದೇನ ಉಪಧಾವಿತ್ವಾ ತಾ ಭಿಕ್ಖುನಿಯೋ ಏತದವೋಚುಂ – ‘‘ಕಿಸ್ಸ ತುಮ್ಹೇ, ಅಯ್ಯೇ, ಪುರಿಸೇನ ಸದ್ಧಿಂ ಸಮ್ಪದುಸ್ಸಥಾ’’ತಿ? ‘‘ನ ಮಯಂ, ಅಯ್ಯೇ, ಪುರಿಸೇನ ಸದ್ಧಿಂ ಸಮ್ಪದುಸ್ಸಾಮಾ’’ತಿ. ಭಿಕ್ಖುನೀನಂ ಏತಮತ್ಥಂ ಆರೋಚೇಸುಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ತಲಘಾತಕಂ ಕರಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ತಲಘಾತಕಂ ಕರೋನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ತಲಘಾತಕಂ ಕರಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೦೩. ‘‘ತಲಘಾತಕೇ ಪಾಚಿತ್ತಿಯ’’ನ್ತಿ.

೮೦೪. ತಲಘಾತಕಂ ನಾಮ ಸಮ್ಫಸ್ಸಂ ಸಾದಿಯನ್ತೀ ಅನ್ತಮಸೋ ಉಪ್ಪಲಪತ್ತೇನಪಿ ಮುತ್ತಕರಣೇ ಪಹಾರಂ ದೇತಿ, ಆಪತ್ತಿ ಪಾಚಿತ್ತಿಯಸ್ಸ.

೮೦೫. ಅನಾಪತ್ತಿ ಆಬಾಧಪಚ್ಚಯಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ತತಿಯಸಿಕ್ಖಾಪದಂ ನಿಟ್ಠಿತಂ.

೪. ಚತುತ್ಥಸಿಕ್ಖಾಪದಂ

೮೦೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಾ ಪುರಾಣರಾಜೋರೋಧಾ ಭಿಕ್ಖುನೀಸು ಪಬ್ಬಜಿತಾ [ಅಞ್ಞತರೋ ಪುರಾಣರಾಜೋರೋಧೋ ಭಿಕ್ಖುನೀಸು ಪಬ್ಬಜಿತೋ (ಸ್ಯಾ.)] ಹೋತಿ. ಅಞ್ಞತರಾ ಭಿಕ್ಖುನೀ ಅನಭಿರತಿಯಾ ಪೀಳಿತಾ ಯೇನ ಸಾ ಭಿಕ್ಖುನೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ಭಿಕ್ಖುನಿಂ ಏತದವೋಚ – ‘‘ರಾಜಾ ಖೋ, ಅಯ್ಯೇ, ತುಮ್ಹೇ ಚಿರಾಚಿರಂ ಗಚ್ಛತಿ. ಕಥಂ ತುಮ್ಹೇ ಧಾರೇಥಾ’’ತಿ? ‘‘ಜತುಮಟ್ಠಕೇನ, ಅಯ್ಯೇ’’ತಿ. ‘‘ಕಿಂ ಏತಂ, ಅಯ್ಯೇ, ಜತುಮಟ್ಠಕ’’ನ್ತಿ? ಅಥ ಖೋ ಸಾ ಭಿಕ್ಖುನೀ ತಸ್ಸಾ ಭಿಕ್ಖುನಿಯಾ ಜತುಮಟ್ಠಕಂ ಆಚಿಕ್ಖಿ. ಅಥ ಖೋ ಸಾ ಭಿಕ್ಖುನೀ ಜತುಮಟ್ಠಕಂ ಆದಿಯಿತ್ವಾ ಧೋವಿತುಂ ವಿಸ್ಸರಿತ್ವಾ ಏಕಮನ್ತಂ ಛಡ್ಡೇಸಿ. ಭಿಕ್ಖುನಿಯೋ ಮಕ್ಖಿಕಾಹಿ ಸಮ್ಪರಿಕಿಣ್ಣಂ ಪಸ್ಸಿತ್ವಾ ಏವಮಾಹಂಸು – ‘‘ಕಸ್ಸಿದಂ ಕಮ್ಮ’’ನ್ತಿ? ಸಾ ಏವಮಾಹ – ‘‘ಮಯ್ಹಿದಂ ಕಮ್ಮ’’ನ್ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಜತುಮಟ್ಠಕಂ ಆದಿಯಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಜತುಮಟ್ಠಕಂ ಆದಿಯತೀತಿ [ಆದಿಯೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಜತುಮಟ್ಠಕಂ ಆದಿಯಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೦೭. ‘‘ಜತುಮಟ್ಠಕೇ [ಜತುಮಟ್ಟಕೇ (ಸೀ.)] ಪಾಚಿತ್ತಿಯ’’ನ್ತಿ.

೮೦೮. ಜತುಮಟ್ಠಕಂ ನಾಮ ಜತುಮಯಂ ಕಟ್ಠಮಯಂ ಪಿಟ್ಠಮಯಂ ಮತ್ತಿಕಾಮಯಂ.

ಆದಿಯೇಯ್ಯಾತಿ ಸಮ್ಫಸ್ಸಂ ಸಾದಿಯನ್ತೀ ಅನ್ತಮಸೋ ಉಪ್ಪಲಪತ್ತಮ್ಪಿ ಮುತ್ತಕರಣಂ ಪವೇಸೇತಿ, ಆಪತ್ತಿ ಪಾಚಿತ್ತಿಯಸ್ಸ.

೮೦೯. ಅನಾಪತ್ತಿ ಆಬಾಧಪಚ್ಚಯಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಚತುತ್ಥಸಿಕ್ಖಾಪದಂ ನಿಟ್ಠಿತಂ.

೫. ಪಞ್ಚಮಸಿಕ್ಖಾಪದಂ

೮೧೦. ತೇನ ಸಮಯೇನ ಬುದ್ಧೋ ಭಗವಾ ಸಕ್ಕೇಸು ವಿಹರತಿ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ. ಅಥ ಖೋ ಮಹಾಪಜಾಪತಿ ಗೋತಮೀ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಅಧೋವಾತೇ ಅಟ್ಠಾಸಿ – ‘‘ದುಗ್ಗನ್ಧೋ, ಭಗವಾ, ಮಾತುಗಾಮೋ’’ತಿ. ಅಥ ಖೋ ಭಗವಾ – ‘‘ಆದಿಯನ್ತು ಖೋ ಭಿಕ್ಖುನಿಯೋ ಉದಕಸುದ್ಧಿಕ’’ನ್ತಿ, ಮಹಾಪಜಾಪತಿಂ ಗೋತಮಿಂ ಧಮ್ಮಿಯಾ ಕಥಾಯ ಸನ್ದಸ್ಸೇಸಿ ಸಮಾದಪೇಸಿ ಸಮುತ್ತೇಜೇಸಿ ಸಮ್ಪಹಂಸೇಸಿ. ಅಥ ಖೋ ಮಹಾಪಜಾಪತಿ ಗೋತಮೀ ಭಗವತಾ ಧಮ್ಮಿಯಾ ಕಥಾಯ ಸನ್ದಸ್ಸಿತಾ ಸಮಾದಪಿತಾ ಸಮುತ್ತೇಜಿತಾ ಸಮ್ಪಹಂಸಿತಾ ಭಗವನ್ತಂ ಅಭಿವಾದೇತ್ವಾ ಪದಕ್ಖಿಣಂ ಕತ್ವಾ ಪಕ್ಕಾಮಿ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಭಿಕ್ಖುನೀನಂ ಉದಕಸುದ್ಧಿಕ’’ನ್ತಿ. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ – ‘‘ಭಗವತಾ ಉದಕಸುದ್ಧಿಕಾ ಅನುಞ್ಞಾತಾ’’ತಿ ಅತಿಗಮ್ಭೀರಂ ಉದಕಸುದ್ಧಿಕಂ ಆದಿಯನ್ತೀ ಮುತ್ತಕರಣೇ ವಣಂ ಅಕಾಸಿ. ಅಥ ಖೋ ಸಾ ಭಿಕ್ಖುನೀ ಭಿಕ್ಖುನೀನಂ ಏತಮತ್ಥಂ ಆರೋಚೇತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಕಥಞ್ಹಿ ನಾಮ ಭಿಕ್ಖುನೀ ಅತಿಗಮ್ಭೀರಂ ಉದಕಸುದ್ಧಿಕಂ ಆದಿಯಿಸ್ಸತೀತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಅತಿಗಮ್ಭೀರಂ ಉದಕಸುದ್ಧಿಕಂ ಆದಿಯತೀ’’ತಿ [ಆದಿಯೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಅತಿಗಮ್ಭೀರಂ ಉದಕಸುದ್ಧಿಕಂ ಆದಿಯಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೧೧. ‘‘ಉದಕಸುದ್ಧಿಕಂ ಪನ ಭಿಕ್ಖುನಿಯಾ ಆದಿಯಮಾನಾಯ ದ್ವಙ್ಗುಲಪಬ್ಬಪರಮಂ ಆದಾತಬ್ಬಂ. ತಂ ಅತಿಕ್ಕಾಮೇನ್ತಿಯಾ ಪಾಚಿತ್ತಿಯ’’ನ್ತಿ.

೮೧೨. ಉದಕಸುದ್ಧಿಕಂ ನಾಮ ಮುತ್ತಕರಣಸ್ಸ ಧೋವನಾ ವುಚ್ಚತಿ.

ಆದಿಯಮಾನಾಯಾತಿ ಧೋವನ್ತಿಯಾ.

ದ್ವಙ್ಗುಲಪಬ್ಬಪರಮಂ ಆದಾತಬ್ಬನ್ತಿ ದ್ವೀಸು ಅಙ್ಗುಲೇಸು ದ್ವೇ ಪಬ್ಬಪರಮಾ ಆದಾತಬ್ಬಾ.

ತಂ ಅತಿಕ್ಕಾಮೇನ್ತಿಯಾತಿ ಸಮ್ಫಸ್ಸಂ ಸಾದಿಯನ್ತೀ ಅನ್ತಮಸೋ ಕೇಸಗ್ಗಮತ್ತಮ್ಪಿ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

೮೧೩. ಅತಿರೇಕದ್ವಙ್ಗುಲಪಬ್ಬೇ ಅತಿರೇಕಸಞ್ಞಾ ಆದಿಯತಿ, ಆಪತ್ತಿ ಪಾಚಿತ್ತಿಯಸ್ಸ. ಅತಿರೇಕದ್ವಙ್ಗುಲಪಬ್ಬೇ ವೇಮತಿಕಾ ಆದಿಯತಿ, ಆಪತ್ತಿ ಪಾಚಿತ್ತಿಯಸ್ಸ. ಅತಿರೇಕದ್ವಙ್ಗುಲಪಬ್ಬೇ ಊನಕಸಞ್ಞಾ ಆದಿಯತಿ, ಆಪತ್ತಿ ಪಾಚಿತ್ತಿಯಸ್ಸ.

ಊನಕದ್ವಙ್ಗುಲಪಬ್ಬೇ ಅತಿರೇಕಸಞ್ಞಾ, ಆಪತ್ತಿ ದುಕ್ಕಟಸ್ಸ. ಊನಕದ್ವಙ್ಗುಲಪಬ್ಬೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಊನಕದ್ವಙ್ಗುಲಪಬ್ಬೇ ಊನಕಸಞ್ಞಾ, ಅನಾಪತ್ತಿ.

೮೧೪. ಅನಾಪತ್ತಿ ದ್ವಙ್ಗುಲಪಬ್ಬಪರಮಂ ಆದಿಯತಿ, ಊನಕದ್ವಙ್ಗುಲಪಬ್ಬಪರಮಂ ಆದಿಯತಿ, ಆಬಾಧಪಚ್ಚಯಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಞ್ಚಮಸಿಕ್ಖಾಪದಂ ನಿಟ್ಠಿತಂ.

೬. ಛಟ್ಠಸಿಕ್ಖಾಪದಂ

೮೧೫. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಆರೋಹನ್ತೋ ನಾಮ ಮಹಾಮತ್ತೋ ಭಿಕ್ಖೂಸು ಪಬ್ಬಜಿತೋ ಹೋತಿ. ತಸ್ಸ ಪುರಾಣದುತಿಯಿಕಾ ಭಿಕ್ಖುನೀಸು ಪಬ್ಬಜಿತಾ ಹೋತಿ. ತೇನ ಖೋ ಪನ ಸಮಯೇನ ಸೋ ಭಿಕ್ಖು ತಸ್ಸಾ ಭಿಕ್ಖುನಿಯಾ ಸನ್ತಿಕೇ ಭತ್ತವಿಸ್ಸಗ್ಗಂ ಕರೋತಿ. ಅಥ ಖೋ ಸಾ ಭಿಕ್ಖುನೀ ತಸ್ಸ ಭಿಕ್ಖುನೋ ಭುಞ್ಜನ್ತಸ್ಸ ಪಾನೀಯೇನ ಚ ವಿಧೂಪನೇನ ಚ ಉಪತಿಟ್ಠಿತ್ವಾ ಅಚ್ಚಾವದತಿ. ಅಥ ಖೋ ಸೋ ಭಿಕ್ಖು ತಂ ಭಿಕ್ಖುನಿಂ ಅಪಸಾದೇತಿ – ‘‘ಮಾ, ಭಗಿನಿ, ಏವರೂಪಂ ಅಕಾಸಿ. ನೇತಂ ಕಪ್ಪತೀ’’ತಿ. ‘‘ಪುಬ್ಬೇ ಮಂ ತ್ವಂ ಏವಞ್ಚ ಏವಞ್ಚ ಕರೋಸಿ, ಇದಾನಿ ಏತ್ತಕಂ ನ ಸಹಸೀ’’ತಿ – ಪಾನೀಯಥಾಲಕಂ ಮತ್ಥಕೇ ಆಸುಮ್ಭಿತ್ವಾ ವಿಧೂಪನೇನ ಪಹಾರಂ ಅದಾಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಭಿಕ್ಖುಸ್ಸ ಪಹಾರಂ ದಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಭಿಕ್ಖುಸ್ಸ ಪಹಾರಂ ಅದಾಸೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಭಿಕ್ಖುಸ್ಸ ಪಹಾರಂ ದಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೧೬. ‘‘ಯಾ ಪನ ಭಿಕ್ಖುನೀ ಭಿಕ್ಖುಸ್ಸ ಭುಞ್ಜನ್ತಸ್ಸ ಪಾನೀಯೇನ ವಾ ವಿಧೂಪನೇನ ವಾ ಉಪತಿಟ್ಠೇಯ್ಯ, ಪಾಚಿತ್ತಿಯ’’ನ್ತಿ.

೮೧೭. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಭಿಕ್ಖುಸ್ಸಾತಿ ಉಪಸಮ್ಪನ್ನಸ್ಸ.

ಭುಞ್ಜನ್ತಸ್ಸಾತಿ ಪಞ್ಚನ್ನಂ ಭೋಜನಾನಂ ಅಞ್ಞತರಂ ಭೋಜನಂ ಭುಞ್ಜನ್ತಸ್ಸ.

ಪಾನೀಯಂ ನಾಮ ಯಂ ಕಿಞ್ಚಿ ಪಾನೀಯಂ.

ವಿಧೂಪನಂ ನಾಮ ಯಾ ಕಾಚಿ ಬೀಜನೀ.

ಉಪತಿಟ್ಠೇಯ್ಯಾತಿ ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ.

೮೧೮. ಉಪಸಮ್ಪನ್ನೇ ಉಪಸಮ್ಪನ್ನಸಞ್ಞಾ ಪಾನೀಯೇನ ವಾ ವಿಧೂಪನೇನ ವಾ ಉಪತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನೇ ವೇಮತಿಕಾ ಪಾನೀಯೇನ ವಾ ವಿಧೂಪನೇನ ವಾ ಉಪತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನೇ ಅನುಪಸಮ್ಪನ್ನಸಞ್ಞಾ ಪಾನೀಯೇನ ವಾ ವಿಧೂಪನೇನ ವಾ ಉಪತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ.

ಹತ್ಥಪಾಸಂ ವಿಜಹಿತ್ವಾ ಉಪತಿಟ್ಠತಿ, ಆಪತ್ತಿ ದುಕ್ಕಟಸ್ಸ. ಖಾದನೀಯಂ ಖಾದನ್ತಸ್ಸ ಉಪತಿಟ್ಠತಿ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಸ್ಸ ಉಪತಿಟ್ಠತಿ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನೇ ಉಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನೇ ಅನುಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ.

೮೧೯. ಅನಾಪತ್ತಿ ದೇತಿ, ದಾಪೇತಿ, ಅನುಪಸಮ್ಪನ್ನಂ ಆಣಾಪೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಛಟ್ಠಸಿಕ್ಖಾಪದಂ ನಿಟ್ಠಿತಂ.

೭. ಸತ್ತಮಸಿಕ್ಖಾಪದಂ

೮೨೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಸಸ್ಸಕಾಲೇ ಆಮಕಧಞ್ಞಂ ವಿಞ್ಞಾಪೇತ್ವಾ ನಗರಂ ಅತಿಹರನ್ತಿ ದ್ವಾರಟ್ಠಾನೇ – ‘‘ದೇಥಾಯ್ಯೇ, ಭಾಗ’’ನ್ತಿ. ಪಲಿಬುನ್ಧೇತ್ವಾ ಮುಞ್ಚಿಂಸು. ಅಥ ಖೋ ತಾ ಭಿಕ್ಖುನಿಯೋ ಉಪಸ್ಸಯಂ ಗನ್ತ್ವಾ ಭಿಕ್ಖುನೀನಂ ಏತಮತ್ಥಂ ಆರೋಚೇಸುಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಆಮಕಧಞ್ಞಂ ವಿಞ್ಞಾಪೇಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಆಮಕಧಞ್ಞಂ ವಿಞ್ಞಾಪೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಆಮಕಧಞ್ಞಂ ವಿಞ್ಞಾಪೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೨೧. ‘‘ಯಾ ಪನ ಭಿಕ್ಖುನೀ ಆಮಕಧಞ್ಞಂ ವಿಞ್ಞತ್ವಾ ವಾ ವಿಞ್ಞಾಪೇತ್ವಾ ವಾ ಭಜ್ಜಿತ್ವಾ ವಾ ಭಜ್ಜಾಪೇತ್ವಾ ವಾ ಕೋಟ್ಟೇತ್ವಾ ವಾ ಕೋಟ್ಟಾಪೇತ್ವಾ ವಾ ಪಚಿತ್ವಾ ವಾ ಪಚಾಪೇತ್ವಾ ವಾ ಭುಞ್ಜೇಯ್ಯ, ಪಾಚಿತ್ತಿಯ’’ನ್ತಿ.

೮೨೨. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಆಮಕಧಞ್ಞಂ ನಾಮ ಸಾಲಿ ವೀಹಿ ಯವೋ ಗೋಧುಮೋ ಕಙ್ಗು ವರಕೋ ಕುದ್ರುಸಕೋ.

ವಿಞ್ಞತ್ವಾತಿ ಸಯಂ ವಿಞ್ಞತ್ವಾ. ವಿಞ್ಞಾಪೇತ್ವಾತಿ ಅಞ್ಞಂ ವಿಞ್ಞಾಪೇತ್ವಾ.

ಭಜ್ಜಿತ್ವಾತಿ ಸಯಂ ಭಜ್ಜಿತ್ವಾ. ಭಜ್ಜಾಪೇತ್ವಾತಿ ಅಞ್ಞಂ ಭಜ್ಜಾಪೇತ್ವಾ.

ಕೋಟ್ಟೇತ್ವಾತಿ ಸಯಂ ಕೋಟ್ಟೇತ್ವಾ. ಕೋಟ್ಟಾಪೇತ್ವಾತಿ ಅಞ್ಞಂ ಕೋಟ್ಟಾಪೇತ್ವಾ.

ಪಚಿತ್ವಾತಿ ಸಯಂ ಪಚಿತ್ವಾ. ಪಚಾಪೇತ್ವಾತಿ ಅಞ್ಞಂ ಪಚಾಪೇತ್ವಾ.

‘‘ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಚಿತ್ತಿಯಸ್ಸ.

೮೨೩. ಅನಾಪತ್ತಿ ಆಬಾಧಪಚ್ಚಯಾ, ಅಪರಣ್ಣಂ ವಿಞ್ಞಾಪೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಸತ್ತಮಸಿಕ್ಖಾಪದಂ ನಿಟ್ಠಿತಂ.

೮. ಅಟ್ಠಮಸಿಕ್ಖಾಪದಂ

೮೨೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರೋ ಬ್ರಾಹ್ಮಣೋ ನಿಬ್ಬಿಟ್ಠರಾಜಭಟೋ ‘‘ತಞ್ಞೇವ ಭಟಪಥಂ ಯಾಚಿಸ್ಸಾಮೀ’’ತಿ ಸೀಸಂ ನಹಾಯಿತ್ವಾ ಭಿಕ್ಖುನುಪಸ್ಸಯಂ ನಿಸ್ಸಾಯ ರಾಜಕುಲಂ ಗಚ್ಛತಿ. ಅಞ್ಞತರಾ ಭಿಕ್ಖುನೀ ಕಟಾಹೇ ವಚ್ಚಂ ಕತ್ವಾ ತಿರೋಕುಟ್ಟೇ ಛಡ್ಡೇನ್ತೀ ತಸ್ಸ ಬ್ರಾಹ್ಮಣಸ್ಸ ಮತ್ಥಕೇ ಆಸುಮ್ಭಿ. ಅಥ ಖೋ ಸೋ ಬ್ರಾಹ್ಮಣೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಅಸ್ಸಮಣಿಯೋ ಇಮಾ ಮುಣ್ಡಾ ಬನ್ಧಕಿನಿಯೋ. ಕಥಞ್ಹಿ ನಾಮ ಗೂಥಕಟಾಹಂ ಮತ್ಥಕೇ ಆಸುಮ್ಭಿಸ್ಸನ್ತಿ! ಇಮಾಸಂ ಉಪಸ್ಸಯಂ ಝಾಪೇಸ್ಸಾಮೀ’’ತಿ! ಉಮ್ಮುಕಂ ಗಹೇತ್ವಾ ಉಪಸ್ಸಯಂ ಪವಿಸತಿ. ಅಞ್ಞತರೋ ಉಪಾಸಕೋ ಉಪಸ್ಸಯಾ ನಿಕ್ಖಮನ್ತೋ ಅದ್ದಸ ತಂ ಬ್ರಾಹ್ಮಣಂ ಉಮ್ಮುಕಂ ಗಹೇತ್ವಾ ಉಪಸ್ಸಯಂ ಪವಿಸನ್ತಂ. ದಿಸ್ವಾನ ತಂ ಬ್ರಾಹ್ಮಣಂ ಏತದವೋಚ – ‘‘ಕಿಸ್ಸ ತ್ವಂ, ಭೋ, ಉಮ್ಮುಕಂ ಗಹೇತ್ವಾ ಉಪಸ್ಸಯಂ ಪವಿಸಸೀ’’ತಿ? ‘‘ಇಮಾ ಮಂ, ಭೋ, ಮುಣ್ಡಾ ಬನ್ಧಕಿನಿಯೋ ಗೂಥಕಟಾಹಂ ಮತ್ಥಕೇ ಆಸುಮ್ಭಿಂಸು. ಇಮಾಸಂ ಉಪಸ್ಸಯಂ ಝಾಪೇಸ್ಸಾಮೀ’’ತಿ. ‘‘ಗಚ್ಛ, ಭೋ ಬ್ರಾಹ್ಮಣ, ಮಙ್ಗಲಂ ಏತಂ. ಸಹಸ್ಸಂ ಲಚ್ಛಸಿ ತಞ್ಚ ಭಟಪಥ’’ನ್ತಿ. ಅಥ ಖೋ ಸೋ ಬ್ರಾಹ್ಮಣೋ ಸೀಸಂ ನಹಾಯಿತ್ವಾ ರಾಜಕುಲಂ ಗನ್ತ್ವಾ ಸಹಸ್ಸಂ ಅಲತ್ಥ ತಞ್ಚ ಭಟಪಥಂ. ಅಥ ಖೋ ಸೋ ಉಪಾಸಕೋ ಉಪಸ್ಸಯಂ ಪವಿಸಿತ್ವಾ ಭಿಕ್ಖುನೀನಂ ಏತಮತ್ಥಂ ಆರೋಚೇತ್ವಾ ಪರಿಭಾಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಉಚ್ಚಾರಂ ತಿರೋಕುಟ್ಟೇ ಛಡ್ಡೇಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಉಚ್ಚಾರಂ ತಿರೋಕುಟ್ಟೇ ಛಡ್ಡೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಉಚ್ಚಾರಂ ತಿರೋಕುಟ್ಟೇ ಛಡ್ಡೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೨೫. ‘‘ಯಾ ಪನ ಭಿಕ್ಖುನೀ ಉಚ್ಚಾರಂ ವಾ ಪಸ್ಸಾವಂ ವಾ ಸಙ್ಕಾರಂ ವಾ ವಿಘಾಸಂ ವಾ ತಿರೋಕುಟ್ಟೇ ವಾ ತಿರೋಪಾಕಾರೇ ವಾ ಛಡ್ಡೇಯ್ಯ ವಾ ಛಡ್ಡಾಪೇಯ್ಯ ವಾ, ಪಾಚಿತ್ತಿಯ’’ನ್ತಿ.

೮೨೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಉಚ್ಚಾರೋ ನಾಮ ಗೂಥೋ ವುಚ್ಚತಿ. ಪಸ್ಸಾವೋ ನಾಮ ಮುತ್ತಂ ವುಚ್ಚತಿ.

ಸಙ್ಕಾರಂ ನಾಮ ಕಚವರಂ ವುಚ್ಚತಿ.

ವಿಘಾಸಂ ನಾಮ ಚಲಕಾನಿ ವಾ ಅಟ್ಠಿಕಾನಿ ವಾ ಉಚ್ಛಿಟ್ಠೋದಕಂ ವಾ.

ಕುಟ್ಟೋ ನಾಮ ತಯೋ ಕುಟ್ಟಾ – ಇಟ್ಠಕಾಕುಟ್ಟೋ, ಸಿಲಾಕುಟ್ಟೋ, ದಾರುಕುಟ್ಟೋ.

ಪಾಕಾರೋ ನಾಮ ತಯೋ ಪಾಕಾರಾ – ಇಟ್ಠಕಾಪಾಕಾರೋ, ಸಿಲಾಪಾಕಾರೋ, ದಾರುಪಾಕಾರೋ.

ತಿರೋಕುಟ್ಟೇತಿ ಕುಟ್ಟಸ್ಸ ಪರತೋ. ತಿರೋಪಾಕಾರೇತಿ ಪಾಕಾರಸ್ಸ ಪರತೋ.

ಛಡ್ಡೇಯ್ಯಾತಿ ಸಯಂ ಛಡ್ಡೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಛಡ್ಡಾಪೇಯ್ಯಾತಿ ಅಞ್ಞಂ ಆಣಾಪೇತಿ, ಆಪತ್ತಿ ದುಕ್ಕಟಸ್ಸ. ಸಕಿಂ ಆಣತ್ತಾ ಬಹುಕಮ್ಪಿ ಛಡ್ಡೇತಿ, ಆಪತ್ತಿ ಪಾಚಿತ್ತಿಯಸ್ಸ.

೮೨೭. ಅನಾಪತ್ತಿ ಓಲೋಕೇತ್ವಾ ಛಡ್ಡೇತಿ, ಅವಳಞ್ಜೇ ಛಡ್ಡೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಅಟ್ಠಮಸಿಕ್ಖಾಪದಂ ನಿಟ್ಠಿತಂ.

೯. ನವಮಸಿಕ್ಖಾಪದಂ

೮೨೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಸ್ಸ ಬ್ರಾಹ್ಮಣಸ್ಸ ಭಿಕ್ಖುನೂಪಸ್ಸಯಂ ನಿಸ್ಸಾಯ ಯವಖೇತ್ತಂ ಹೋತಿ. ಭಿಕ್ಖುನಿಯೋ ಉಚ್ಚಾರಮ್ಪಿ ಪಸ್ಸಾವಮ್ಪಿ ಸಙ್ಕಾರಮ್ಪಿ ವಿಘಾಸಮ್ಪಿ ಖೇತ್ತೇ ಛಡ್ಡೇನ್ತಿ. ಅಥ ಖೋ ಸೋ ಬ್ರಾಹ್ಮಣೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಅಮ್ಹಾಕಂ ಯವಖೇತ್ತಂ ದೂಸೇಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತಸ್ಸ ಬ್ರಾಹ್ಮಣಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಉಚ್ಚಾರಮ್ಪಿ ಪಸ್ಸಾವಮ್ಪಿ ಸಙ್ಕಾರಮ್ಪಿ ವಿಘಾಸಮ್ಪಿ ಹರಿತೇ ಛಡ್ಡೇಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಉಚ್ಚಾರಮ್ಪಿ ಪಸ್ಸಾವಮ್ಪಿ ಸಙ್ಕಾರಮ್ಪಿ ವಿಘಾಸಮ್ಪಿ ಹರಿತೇ ಛಡ್ಡೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಉಚ್ಚಾರಮ್ಪಿ ಪಸ್ಸಾವಮ್ಪಿ ಸಙ್ಕಾರಮ್ಪಿ ವಿಘಾಸಮ್ಪಿ ಹರಿತೇ ಛಡ್ಡೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೨೯. ‘‘ಯಾ ಪನ ಭಿಕ್ಖುನೀ ಉಚ್ಚಾರಂ ವಾ ಪಸ್ಸಾವಂ ವಾ ಸಙ್ಕಾರಂ ವಾ ವಿಘಾಸಂ ವಾ ಹರಿತೇ ಛಡ್ಡೇಯ್ಯ ವಾ ಛಡ್ಡಾಪೇಯ್ಯ ವಾ, ಪಾಚಿತ್ತಿಯ’’ನ್ತಿ.

೮೩೦. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಉಚ್ಚಾರೋ ನಾಮ ಗೂಥೋ ವುಚ್ಚತಿ. ಪಸ್ಸಾವೋ ನಾಮ ಮುತ್ತಂ ವುಚ್ಚತಿ.

ಸಙ್ಕಾರಂ ನಾಮ ಕಚವರಂ ವುಚ್ಚತಿ.

ವಿಘಾಸಂ ನಾಮ ಚಲಕಾನಿ ವಾ ಅಟ್ಠಿಕಾನಿ ವಾ ಉಚ್ಛಿಟ್ಠೋದಕಂ ವಾ.

ಹರಿತಂ ನಾಮ ಪುಬ್ಬಣ್ಣಂ ಅಪರಣ್ಣಂ ಯಂ ಮನುಸ್ಸಾನಂ ಉಪಭೋಗಪರಿಭೋಗಂ ರೋಪಿಮಂ.

ಛಡ್ಡೇಯ್ಯಾತಿ ಸಯಂ ಛಡ್ಡೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಛಡ್ಡಾಪೇಯ್ಯಾತಿ ಅಞ್ಞಂ ಆಣಾಪೇತಿ, ಆಪತ್ತಿ ದುಕ್ಕಟಸ್ಸ. ಸಕಿಂ ಆಣತ್ತಾ ಬಹುಕಮ್ಪಿ ಛಡ್ಡೇತಿ, ಆಪತ್ತಿ ಪಾಚಿತ್ತಿಯಸ್ಸ.

೮೩೧. ಹರಿತೇ ಹರಿತಸಞ್ಞಾ ಛಡ್ಡೇತಿ ವಾ ಛಡ್ಡಾಪೇತಿ ವಾ, ಆಪತ್ತಿ ಪಾಚಿತ್ತಿಯಸ್ಸ. ಹರಿತೇ ವೇಮತಿಕಾ ಛಡ್ಡೇತಿ ವಾ ಛಡ್ಡಾಪೇತಿ ವಾ, ಆಪತ್ತಿ ಪಾಚಿತ್ತಿಯಸ್ಸ. ಹರಿತೇ ಅಹರಿತಸಞ್ಞಾ ಛಡ್ಡೇತಿ ವಾ ಛಡ್ಡಾಪೇತಿ ವಾ, ಆಪತ್ತಿ ಪಾಚಿತ್ತಿಯಸ್ಸ.

ಅಹರಿತೇ ಹರಿತಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅಹರಿತೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅಹರಿತೇ ಅಹರಿತಸಞ್ಞಾ, ಅನಾಪತ್ತಿ.

೮೩೨. ಅನಾಪತ್ತಿ ಓಲೋಕೇತ್ವಾ ಛಡ್ಡೇತಿ, ಖೇತ್ತಮರಿಯಾದೇ [ಛಡ್ಡಿತಖೇತ್ತೇ (?) ಅಟ್ಠಕಥಾ ಓಲೋಕೇತಬ್ಬಾ] ಛಡ್ಡೇತಿ ಸಾಮಿಕೇ ಆಪುಚ್ಛಿತ್ವಾ ಅಪಲೋಕೇತ್ವಾ ಛಡ್ಡೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ನವಮಸಿಕ್ಖಾಪದಂ ನಿಟ್ಠಿತಂ.

೧೦. ದಸಮಸಿಕ್ಖಾಪದಂ

೮೩೩. ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ರಾಜಗಹೇ ಗಿರಗ್ಗಸಮಜ್ಜೋ ಹೋತಿ. ಛಬ್ಬಗ್ಗಿಯಾ ಭಿಕ್ಖುನಿಯೋ ಗಿರಗ್ಗಸಮಜ್ಜಂ ದಸ್ಸನಾಯ ಅಗಮಂಸು. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ನಚ್ಚಮ್ಪಿ ಗೀತಮ್ಪಿ ವಾದಿತಮ್ಪಿ ದಸ್ಸನಾಯ ಗಚ್ಛಿಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ನಚ್ಚಮ್ಪಿ ಗೀತಮ್ಪಿ ವಾದಿತಮ್ಪಿ ದಸ್ಸನಾಯ ಗಚ್ಛಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ನಚ್ಚಮ್ಪಿ ಗೀತಮ್ಪಿ ವಾದಿತಮ್ಪಿ ದಸ್ಸನಾಯ ಗಚ್ಛನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ನಚ್ಚಮ್ಪಿ ಗೀತಮ್ಪಿ ವಾದಿತಮ್ಪಿ ದಸ್ಸನಾಯ ಗಚ್ಛಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೩೪. ‘‘ಯಾ ಪನ ಭಿಕ್ಖುನೀ ನಚ್ಚಂ ವಾ ಗೀತಂ ವಾ ವಾದಿತಂ ವಾ ದಸ್ಸನಾಯ ಗಚ್ಛೇಯ್ಯ, ಪಾಚಿತ್ತಿಯ’’ನ್ತಿ.

೮೩೫. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ನಚ್ಚಂ ನಾಮ ಯಂ ಕಿಞ್ಚಿ ನಚ್ಚಂ. ಗೀತಂ ನಾಮ ಯಂ ಕಿಞ್ಚಿ ಗೀತಂ. ವಾದಿತಂ ನಾಮ ಯಂ ಕಿಞ್ಚಿ ವಾದಿತಂ.

೮೩೬. ದಸ್ಸನಾಯ ಗಚ್ಛತಿ, ಆಪತ್ತಿ ದುಕ್ಕಟಸ್ಸ. ಯತ್ಥ ಠಿತಾ ಪಸ್ಸತಿ ವಾ ಸುಣಾತಿ ವಾ, ಆಪತ್ತಿ ಪಾಚಿತ್ತಿಯಸ್ಸ. ದಸ್ಸನೂಪಚಾರಂ ವಿಜಹಿತ್ವಾ ಪುನಪ್ಪುನಂ ಪಸ್ಸತಿ ವಾ ಸುಣಾತಿ ವಾ, ಆಪತ್ತಿ ಪಾಚಿತ್ತಿಯಸ್ಸ. ಏಕಮೇಕಂ ದಸ್ಸನಾಯ ಗಚ್ಛತಿ, ಆಪತ್ತಿ ದುಕ್ಕಟಸ್ಸ. ಯತ್ಥ ಠಿತಾ ಪಸ್ಸತಿ ವಾ ಸುಣಾತಿ ವಾ, ಆಪತ್ತಿ ಪಾಚಿತ್ತಿಯಸ್ಸ. ದಸ್ಸನೂಪಚಾರಂ ವಿಜಹಿತ್ವಾ ಪುನಪ್ಪುನಂ ಪಸ್ಸತಿ ವಾ ಸುಣಾತಿ ವಾ, ಆಪತ್ತಿ ಪಾಚಿತ್ತಿಯಸ್ಸ.

೮೩೭. ಅನಾಪತ್ತಿ ಆರಾಮೇ ಠಿತಾ ಪಸ್ಸತಿ ವಾ ಸುಣಾತಿ ವಾ, ಭಿಕ್ಖುನಿಯಾ ಠಿತೋಕಾಸಂ ವಾ ನಿಸಿನ್ನೋಕಾಸಂ ವಾ ನಿಪನ್ನೋಕಾಸಂ ವಾ ಆಗನ್ತ್ವಾ ನಚ್ಚನ್ತಿ ವಾ ಗಾಯನ್ತಿ ವಾ ವಾದೇನ್ತಿ ವಾ, ಪಟಿಪಥಂ ಗಚ್ಛನ್ತೀ ಪಸ್ಸತಿ ವಾ ಸುಣಾತಿ ವಾ, ಸತಿ ಕರಣೀಯೇ ಗನ್ತ್ವಾ ಪಸ್ಸತಿ ವಾ ಸುಣಾತಿ ವಾ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದಸಮಸಿಕ್ಖಾಪದಂ ನಿಟ್ಠಿತಂ.

ಲಸುಣವಗ್ಗೋ ಪಠಮೋ.