೨. ಸಙ್ಘಾದಿಸೇಸಕಣ್ಡಂ (ಭಿಕ್ಖುನೀವಿಭಙ್ಗೋ)

೧. ಪಠಮಸಙ್ಘಾದಿಸೇಸಸಿಕ್ಖಾಪದಂ

ಇಮೇ ಖೋ ಪನಾಯ್ಯಾಯೋ ಸತ್ತರಸ ಸಙ್ಘಾದಿಸೇಸಾ

ಧಮ್ಮಾ ಉದ್ದೇಸಂ ಆಗಚ್ಛನ್ತಿ.

೬೭೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರೋ ಉಪಾಸಕೋ ಭಿಕ್ಖುನಿಸಙ್ಘಸ್ಸ ಉದೋಸಿತಂ [ಉದ್ದೋಸಿತಂ (ಸೀ. ಸ್ಯಾ.)] ದತ್ವಾ ಕಾಲಙ್ಕತೋ ಹೋತಿ. ತಸ್ಸ ದ್ವೇ ಪುತ್ತಾ ಹೋನ್ತಿ – ಏಕೋ ಅಸ್ಸದ್ಧೋ ಅಪ್ಪಸನ್ನೋ, ಏಕೋ ಸದ್ಧೋ ಪಸನ್ನೋ. ತೇ ಪೇತ್ತಿಕಂ ಸಾಪತೇಯ್ಯಂ ವಿಭಜಿಂಸು. ಅಥ ಖೋ ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏತದವೋಚ – ‘‘ಅಮ್ಹಾಕಂ ಉದೋಸಿತೋ, ತಂ ಭಾಜೇಮಾ’’ತಿ. ಏವಂ ವುತ್ತೇ ಸೋ ಸದ್ಧೋ ಪಸನ್ನೋ ತಂ ಅಸ್ಸದ್ಧಂ ಅಪ್ಪಸನ್ನಂ ಏತದವೋಚ – ‘‘ಮಾಯ್ಯೋ, ಏವಂ ಅವಚ. ಅಮ್ಹಾಕಂ ಪಿತುನಾ ಭಿಕ್ಖುನಿಸಙ್ಘಸ್ಸ ದಿನ್ನೋ’’ತಿ. ದುತಿಯಮ್ಪಿ ಖೋ ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏತದವೋಚ – ‘‘ಅಮ್ಹಾಕಂ ಉದೋಸಿತೋ, ತಂ ಭಾಜೇಮಾ’’ತಿ. ಅಥ ಖೋ ಸೋ ಸದ್ಧೋ ಪಸನ್ನೋ ತಂ ಅಸ್ಸದ್ಧಂ ಅಪ್ಪಸನ್ನಂ ಏತದವೋಚ – ‘‘ಮಾಯ್ಯೋ, ಏವಂ ಅವಚ. ಅಮ್ಹಾಕಂ ಪಿತುನಾ ಭಿಕ್ಖುನಿಸಙ್ಘಸ್ಸ ದಿನ್ನೋ’’ತಿ. ತತಿಯಮ್ಪಿ ಖೋ ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏತದವೋಚ – ‘‘ಅಮ್ಹಾಕಂ ಉದೋಸಿತೋ, ತಂ ಭಾಜೇಮಾ’’ತಿ. ಅಥ ಖೋ ಸೋ ಸದ್ಧೋ ಪಸನ್ನೋ – ‘‘ಸಚೇ ಮಯ್ಹಂ ಭವಿಸ್ಸತಿ, ಅಹಮ್ಪಿ ಭಿಕ್ಖುನಿಸಙ್ಘಸ್ಸ ದಸ್ಸಾಮೀ’’ತಿ – ತಂ ಅಸ್ಸದ್ಧಂ ಅಪ್ಪಸನ್ನಂ ಏತದವೋಚ – ‘‘ಭಾಜೇಮಾ’’ತಿ. ಅಥ ಖೋ ಸೋ ಉದೋಸಿತೋ ತೇಹಿ ಭಾಜೀಯಮಾನೋ ತಸ್ಸ ಅಸ್ಸದ್ಧಸ್ಸ ಅಪ್ಪಸನ್ನಸ್ಸ ಪಾಪುಣಾತಿ [ಪಾಪುಣಿ (ಸ್ಯಾ.)]. ಅಥ ಖೋ ಸೋ ಅಸ್ಸದ್ಧೋ ಅಪ್ಪಸನ್ನೋ ಭಿಕ್ಖುನಿಯೋ ಉಪಸಙ್ಕಮಿತ್ವಾ ಏತದವೋಚ – ‘‘ನಿಕ್ಖಮಥಾಯ್ಯೇ, ಅಮ್ಹಾಕಂ ಉದೋಸಿತೋ’’ತಿ.

ಏವಂ ವುತ್ತೇ ಥುಲ್ಲನನ್ದಾ ಭಿಕ್ಖುನೀ ತಂ ಪುರಿಸಂ ಏತದವೋಚ – ‘‘ಮಾಯ್ಯೋ, ಏವಂ ಅವಚ, ತುಮ್ಹಾಕಂ ಪಿತುನಾ ಭಿಕ್ಖುನಿಸಙ್ಘಸ್ಸ ದಿನ್ನೋ’’ತಿ. ‘‘ದಿನ್ನೋ ನ ದಿನ್ನೋ’’ತಿ ವೋಹಾರಿಕೇ ಮಹಾಮತ್ತೇ ಪುಚ್ಛಿಂಸು. ಮಹಾಮತ್ತಾ ಏವಮಾಹಂಸು – ‘‘ಕೋ, ಅಯ್ಯೇ, ಜಾನಾತಿ ಭಿಕ್ಖುನಿಸಙ್ಘಸ್ಸ ದಿನ್ನೋ’’ತಿ? ಏವಂ ವುತ್ತೇ ಥುಲ್ಲನನ್ದಾ ಭಿಕ್ಖುನೀ ತೇ ಮಹಾಮತ್ತೇ ಏತದವೋಚ – ‘‘ಅಪಿ ನಾಯ್ಯೋ [ಅಪಿ ನ್ವಯ್ಯಾ (ಸ್ಯಾ.), ಅಪಿ ನಾಯ್ಯೋ (ಕ.)] ತುಮ್ಹೇಹಿ ದಿಟ್ಠಂ ವಾ ಸುತಂ ವಾ ಸಕ್ಖಿಂ ಠಪಯಿತ್ವಾ ದಾನಂ ದಿಯ್ಯಮಾನ’’ನ್ತಿ? ಅಥ ಖೋ ತೇ ಮಹಾಮತ್ತಾ – ‘‘ಸಚ್ಚಂ ಖೋ ಅಯ್ಯಾ ಆಹಾ’’ತಿ ತಂ ಉದೋಸಿತಂ ಭಿಕ್ಖುನಿಸಙ್ಘಸ್ಸ ಅಕಂಸು. ಅಥ ಖೋ ಸೋ ಪುರಿಸೋ ಪರಾಜಿತೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಅಸ್ಸಮಣಿಯೋ ಇಮಾ ಮುಣ್ಡಾ ಬನ್ಧಕಿನಿಯೋ. ಕಥಞ್ಹಿ ನಾಮ ಅಮ್ಹಾಕಂ ಉದೋಸಿತಂ ಅಚ್ಛಿನ್ದಾಪೇಸ್ಸನ್ತೀ’’ತಿ! ಥುಲ್ಲನನ್ದಾ ಭಿಕ್ಖುನೀ ಮಹಾಮತ್ತಾನಂ ಏತಮತ್ಥಂ ಆರೋಚೇಸಿ. ಮಹಾಮತ್ತಾ ತಂ ಪುರಿಸಂ ದಣ್ಡಾಪೇಸುಂ. ಅಥ ಖೋ ಸೋ ಪುರಿಸೋ ದಣ್ಡಿತೋ ಭಿಕ್ಖುನೂಪಸ್ಸಯಸ್ಸ ಅವಿದೂರೇ ಆಜೀವಕಸೇಯ್ಯಂ ಕಾರಾಪೇತ್ವಾ ಆಜೀವಕೇ ಉಯ್ಯೋಜೇಸಿ – ‘‘ಏತಾ ಭಿಕ್ಖುನಿಯೋ ಅಚ್ಚಾವದಥಾ’’ತಿ.

ಥುಲ್ಲನನ್ದಾ ಭಿಕ್ಖುನೀ ಮಹಾಮತ್ತಾನಂ ಏತಮತ್ಥಂ ಆರೋಚೇಸಿ. ಮಹಾಮತ್ತಾ ತಂ ಪುರಿಸಂ ಬನ್ಧಾಪೇಸುಂ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಪಠಮಂ ಭಿಕ್ಖುನಿಯೋ ಉದೋಸಿತಂ ಅಚ್ಛಿನ್ದಾಪೇಸುಂ, ದುತಿಯಂ ದಣ್ಡಾಪೇಸುಂ, ತತಿಯಂ ಬನ್ಧಾಪೇಸುಂ. ಇದಾನಿ ಘಾತಾಪೇಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಉಸ್ಸಯವಾದಿಕಾ ವಿಹರಿಸ್ಸತೀ’’ತಿ! ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಉಸ್ಸಯವಾದಿಕಾ ವಿಹರತೀತಿ. ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಉಸ್ಸಯವಾದಿಕಾ ವಿಹರಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೭೯. ‘‘ಯಾ ಪನ ಭಿಕ್ಖುನೀ ಉಸ್ಸಯವಾದಿಕಾ ವಿಹರೇಯ್ಯ ಗಹಪತಿನಾ ವಾ ಗಹಪತಿಪುತ್ತೇನ ವಾ ದಾಸೇನ ವಾ ಕಮ್ಮಕಾರೇನ [ಕಮ್ಮಕರೇನ (ಸೀ. ಸ್ಯಾ.)] ವಾ ಅನ್ತಮಸೋ ಸಮಣಪರಿಬ್ಬಾಜಕೇನಾಪಿ, ಅಯಂ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೬೮೦. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಉಸ್ಸಯವಾದಿಕಾ ನಾಮ ಅಡ್ಡಕಾರಿಕಾ ವುಚ್ಚತಿ.

ಗಹಪತಿ ನಾಮ ಯೋ ಕೋಚಿ ಅಗಾರಂ ಅಜ್ಝಾವಸತಿ.

ಗಹಪತಿಪುತ್ತೋ ನಾಮ ಯೇ ಕೇಚಿ ಪುತ್ತಭಾತರೋ.

ದಾಸೋ ನಾಮ ಅನ್ತೋಜಾತೋ ಧನಕ್ಕೀತೋ ಕರಮರಾನೀತೋ.

ಕಮ್ಮಕಾರೋ ನಾಮ ಭಟಕೋ ಆಹತಕೋ.

ಸಮಣಪರಿಬ್ಬಾಜಕೋ ನಾಮ ಭಿಕ್ಖುಞ್ಚ ಭಿಕ್ಖುನಿಞ್ಚ ಸಿಕ್ಖಮಾನಞ್ಚ ಸಾಮಣೇರಞ್ಚ ಸಾಮಣೇರಿಞ್ಚ ಠಪೇತ್ವಾ ಯೋ ಕೋಚಿ ಪರಿಬ್ಬಾಜಕಸಮಾಪನ್ನೋ.

ಅಡ್ಡಂ ಕರಿಸ್ಸಾಮೀತಿ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಏಕಸ್ಸ ಆರೋಚೇತಿ, ಆಪತ್ತಿ ದುಕ್ಕಟಸ್ಸ. ದುತಿಯಸ್ಸ ಆರೋಚೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಅಡ್ಡಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಪಠಮಾಪತ್ತಿಕನ್ತಿ ಸಹ ವತ್ಥುಜ್ಝಾಚಾರಾ ಆಪಜ್ಜತಿ ಅಸಮನುಭಾಸನಾಯ.

ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ.

ಸಙ್ಘಾದಿಸೇಸನ್ತಿ ಸಙ್ಘೋವ ತಸ್ಸಾ ಆಪತ್ತಿಯಾ ಮಾನತ್ತಂ ದೇತಿ ಮೂಲಾಯ ಪಟಿಕಸ್ಸತಿ ಅಬ್ಭೇತಿ, ನ ಸಮ್ಬಹುಲಾ ನ ಏಕಾ ಭಿಕ್ಖುನೀ. ತೇನ ವುಚ್ಚತಿ ‘‘ಸಙ್ಘಾದಿಸೇಸೋ’’ತಿ. ತಸ್ಸೇವ ಆಪತ್ತಿನಿಕಾಯಸ್ಸ ನಾಮಕಮ್ಮಂ ಅಧಿವಚನಂ. ತೇನಪಿ ವುಚ್ಚತಿ ‘‘ಸಙ್ಘಾದಿಸೇಸೋ’’ತಿ.

೬೮೧. ಅನಾಪತ್ತಿ ಮನುಸ್ಸೇಹಿ ಆಕಡ್ಢೀಯಮಾನಾ ಗಚ್ಛತಿ, ಆರಕ್ಖಂ ಯಾಚತಿ, ಅನೋದಿಸ್ಸ ಆಚಿಕ್ಖತಿ, ಉಮ್ಮತ್ತಿಕಾಯ…ಪೇ… ಆದಿಕಮ್ಮಿಕಾಯಾತಿ.

ಪಠಮಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ.

೨. ದುತಿಯಸಙ್ಘಾದಿಸೇಸಸಿಕ್ಖಾಪದಂ

೬೮೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ವೇಸಾಲಿಯಂ ಅಞ್ಞತರಸ್ಸ ಲಿಚ್ಛವಿಸ್ಸ ಪಜಾಪತಿ ಅತಿಚಾರಿನೀ ಹೋತಿ. ಅಥ ಖೋ ಸೋ ಲಿಚ್ಛವಿ ತಂ ಇತ್ಥಿಂ ಏತದವೋಚ – ‘‘ಸಾಧು ವಿರಮಾಹಿ, ಅನತ್ಥಂ ಖೋ ತೇ ಕರಿಸ್ಸಾಮೀ’’ತಿ. ಏವಮ್ಪಿ ಸಾ ವುಚ್ಚಮಾನಾ ನಾದಿಯಿ. ತೇನ ಖೋ ಪನ ಸಮಯೇನ ವೇಸಾಲಿಯಂ ಲಿಚ್ಛವಿಗಣೋ ಸನ್ನಿಪತಿತೋ ಹೋತಿ ಕೇನಚಿದೇವ ಕರಣೀಯೇನ. ಅಥ ಖೋ ಸೋ ಲಿಚ್ಛವಿ ತೇ ಲಿಚ್ಛವಯೋ ಏತದವೋಚ – ‘‘ಏಕಂ ಮೇ, ಅಯ್ಯೋ, ಇತ್ಥಿಂ ಅನುಜಾನಾಥಾ’’ತಿ. ‘‘ಕಾ ನಾಮ ಸಾ’’ತಿ? ‘‘ಮಯ್ಹಂ ಪಜಾಪತಿ ಅತಿಚರತಿ, ತಂ ಘಾತೇಸ್ಸಾಮೀ’’ತಿ. ‘‘ಜಾನಾಹೀ’’ತಿ. ಅಸ್ಸೋಸಿ ಖೋ ಸಾ ಇತ್ಥೀ – ‘‘ಸಾಮಿಕೋ ಕಿರ ಮಂ ಘಾತೇತುಕಾಮೋ’’ತಿ. ವರಭಣ್ಡಂ ಆದಾಯ ಸಾವತ್ಥಿಂ ಗನ್ತ್ವಾ ತಿತ್ಥಿಯೇ ಉಪಸಙ್ಕಮಿತ್ವಾ ಪಬ್ಬಜ್ಜಂ ಯಾಚಿ. ತಿತ್ಥಿಯಾ ನ ಇಚ್ಛಿಂಸು ಪಬ್ಬಾಜೇತುಂ. ಭಿಕ್ಖುನಿಯೋ ಉಪಸಙ್ಕಮಿತ್ವಾ ಪಬ್ಬಜ್ಜಂ ಯಾಚಿ. ಭಿಕ್ಖುನಿಯೋಪಿ ನ ಇಚ್ಛಿಂಸು ಪಬ್ಬಾಜೇತುಂ. ಥುಲ್ಲನನ್ದಂ ಭಿಕ್ಖುನಿಂ ಉಪಸಙ್ಕಮಿತ್ವಾ ಭಣ್ಡಕಂ ದಸ್ಸೇತ್ವಾ ಪಬ್ಬಜ್ಜಂ ಯಾಚಿ. ಥುಲ್ಲನನ್ದಾ ಭಿಕ್ಖುನೀ ಭಣ್ಡಕಂ ಗಹೇತ್ವಾ ಪಬ್ಬಾಜೇಸಿ.

ಅಥ ಖೋ ಸೋ ಲಿಚ್ಛವಿ ತಂ ಇತ್ಥಿಂ ಗವೇಸನ್ತೋ ಸಾವತ್ಥಿಂ ಗನ್ತ್ವಾ ಭಿಕ್ಖುನೀಸು ಪಬ್ಬಜಿತಂ ದಿಸ್ವಾನ ಯೇನ ರಾಜಾ ಪಸೇನದಿ ಕೋಸಲೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ರಾಜಾನಂ ಪಸೇನದಿಂ ಕೋಸಲಂ ಏತದವೋಚ – ‘‘ಪಜಾಪತಿ ಮೇ, ದೇವ, ವರಭಣ್ಡಂ ಆದಾಯ ಸಾವತ್ಥಿಂ ಅನುಪ್ಪತ್ತಾ. ತಂ ದೇವೋ ಅನುಜಾನಾತೂ’’ತಿ. ‘‘ತೇನ ಹಿ, ಭಣೇ, ವಿಚಿನಿತ್ವಾ ಆಚಿಕ್ಖಾ’’ತಿ. ‘‘ದಿಟ್ಠಾ, ದೇವ, ಭಿಕ್ಖುನೀಸು ಪಬ್ಬಜಿತಾ’’ತಿ. ‘‘ಸಚೇ, ಭಣೇ, ಭಿಕ್ಖುನೀಸು ಪಬ್ಬಜಿತಾ, ನ ಸಾ ಲಬ್ಭಾ ಕಿಞ್ಚಿ ಕಾತುಂ. ಸ್ವಾಕ್ಖಾತೋ ಭಗವತಾ ಧಮ್ಮೋ, ಚರತು ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾ’’ತಿ. ಅಥ ಖೋ ಸೋ ಲಿಚ್ಛವಿ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಚೋರಿಂ ಪಬ್ಬಾಜೇಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತಸ್ಸ ಲಿಚ್ಛವಿಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಚೋರಿಂ ಪಬ್ಬಾಜೇಸ್ಸತೀ’’ತಿ! ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಚೋರಿಂ ಪಬ್ಬಾಜೇತೀತಿ [ಪಬ್ಬಾಜೇಸೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಚೋರಿಂ ಪಬ್ಬಾಜೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೮೩. ‘‘ಯಾ ಪನ ಭಿಕ್ಖುನೀ ಜಾನಂ ಚೋರಿಂ ವಜ್ಝಂ ವಿದಿತಂ ಅನಪಲೋಕೇತ್ವಾ ರಾಜಾನಂ ವಾ ಸಙ್ಘಂ ವಾ ಗಣಂ ವಾ ಪೂಗಂ ವಾ ಸೇಣಿಂ ವಾ ಅಞ್ಞತ್ರ ಕಪ್ಪಾ ವುಟ್ಠಾಪೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೬೮೪. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಜಾನಾತಿ ನಾಮ ಸಾಮಂ ವಾ ಜಾನಾತಿ ಅಞ್ಞೇ ವಾ ತಸ್ಸಾ ಆರೋಚೇನ್ತಿ, ಸಾ ವಾ ಆರೋಚೇತಿ.

ಚೋರೀ ನಾಮ ಯಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯತಿ, ಏಸಾ ಚೋರೀ ನಾಮ.

ವಜ್ಝಾ ನಾಮ ಯಂ ಕತ್ವಾ ವಜ್ಝಪ್ಪತ್ತಾ ಹೋತಿ.

ವಿದಿತಾ ನಾಮ ಅಞ್ಞೇಹಿ ಮನುಸ್ಸೇಹಿ ಞಾತಾ ಹೋತಿ ‘‘ವಜ್ಝಾ ಏಸಾ’’ತಿ.

ಅನಪಲೋಕೇತ್ವಾತಿ ಅನಾಪುಚ್ಛಾ.

ರಾಜಾ ನಾಮ ಯತ್ಥ ರಾಜಾ ಅನುಸಾಸತಿ, ರಾಜಾ ಅಪಲೋಕೇತಬ್ಬೋ.

ಸಙ್ಘೋ ನಾಮ ಭಿಕ್ಖುನಿಸಙ್ಘೋ ವುಚ್ಚತಿ, ಭಿಕ್ಖುನಿಸಙ್ಘೋ ಅಪಲೋಕೇತಬ್ಬೋ.

ಗಣೋ ನಾಮ ಯತ್ಥ ಗಣೋ ಅನುಸಾಸತಿ, ಗಣೋ ಅಪಲೋಕೇತಬ್ಬೋ.

ಪೂಗೋ ನಾಮ ಯತ್ಥ ಪೂಗೋ ಅನುಸಾಸತಿ, ಪೂಗೋ ಅಪಲೋಕೇತಬ್ಬೋ.

ಸೇಣಿ ನಾಮ ಯತ್ಥ ಸೇಣಿ ಅನುಸಾಸತಿ, ಸೇಣಿ ಅಪಲೋಕೇತಬ್ಬೋ.

ಅಞ್ಞತ್ರ ಕಪ್ಪಾತಿ ಠಪೇತ್ವಾ ಕಪ್ಪಂ. ಕಪ್ಪಂ ನಾಮ ದ್ವೇ ಕಪ್ಪಾನಿ – ತಿತ್ಥಿಯೇಸು ವಾ ಪಬ್ಬಜಿತಾ ಹೋತಿ ಅಞ್ಞಾಸು ವಾ ಭಿಕ್ಖುನೀಸು ಪಬ್ಬಜಿತಾ. ಅಞ್ಞತ್ರ ಕಪ್ಪಾ ‘‘ವುಟ್ಠಾಪೇಸ್ಸಾಮೀ’’ತಿ ಗಣಂ ವಾ ಆಚರಿನಿಂ ವಾ ಪತ್ತಂ ವಾ ಚೀವರಂ ವಾ ಪರಿಯೇಸತಿ, ಸೀಮಂ ವಾ ಸಮ್ಮನ್ನತಿ, ಆಪತ್ತಿ ದುಕ್ಕಟಸ್ಸ. ಞತ್ತಿಯಾ ದುಕ್ಕಟಂ. ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ. ಕಮ್ಮವಾಚಾಪರಿಯೋಸಾನೇ ಉಪಜ್ಝಾಯಾಯ ಆಪತ್ತಿ ಸಙ್ಘಾದಿಸೇಸಸ್ಸ. ಗಣಸ್ಸ ಚ ಆಚರಿನಿಯಾ ಚ ಆಪತ್ತಿ ದುಕ್ಕಟಸ್ಸ.

ಅಯಮ್ಪೀತಿ ಪುರಿಮಂ ಉಪಾದಾಯ ವುಚ್ಚತಿ.

ಪಠಮಾಪತ್ತಿಕನ್ತಿ ಸಹ ವತ್ಥುಜ್ಝಾಚಾರಾ ಆಪಜ್ಜತಿ ಅಸಮನುಭಾಸನಾಯ.

ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ.

ಸಙ್ಘಾದಿಸೇಸನ್ತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೬೮೫. ಚೋರಿಯಾ ಚೋರಿಸಞ್ಞಾ ಅಞ್ಞತ್ರ ಕಪ್ಪಾ ವುಟ್ಠಾಪೇತಿ, ಆಪತ್ತಿ ಸಙ್ಘಾದಿಸೇಸಸ್ಸ. ಚೋರಿಯಾ ವೇಮತಿಕಾ ಅಞ್ಞತ್ರ ಕಪ್ಪಾ ವುಟ್ಠಾಪೇತಿ, ಆಪತ್ತಿ ದುಕ್ಕಟಸ್ಸ. ಚೋರಿಯಾ ಅಚೋರಿಸಞ್ಞಾ ಅಞ್ಞತ್ರ ಕಪ್ಪಾ ವುಟ್ಠಾಪೇತಿ, ಅನಾಪತ್ತಿ. ಅಚೋರಿಯಾ ಚೋರಿಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅಚೋರಿಯಾ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅಚೋರಿಯಾ ಅಚೋರಿಸಞ್ಞಾ, ಅನಾಪತ್ತಿ.

೬೮೬. ಅನಾಪತ್ತಿ ಅಜಾನನ್ತೀ ವುಟ್ಠಾಪೇತಿ, ಅಪಲೋಕೇತ್ವಾ ವುಟ್ಠಾಪೇತಿ, ಕಪ್ಪಕತಂ ವುಟ್ಠಾಪೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದುತಿಯಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ.

೩. ತತಿಯಸಙ್ಘಾದಿಸೇಸಸಿಕ್ಖಾಪದಂ

೬೮೭. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭದ್ದಾಯ ಕಾಪಿಲಾನಿಯಾ ಅನ್ತೇವಾಸಿನೀ ಭಿಕ್ಖುನೀ ಭಿಕ್ಖುನೀಹಿ ಸದ್ಧಿಂ ಭಣ್ಡಿತ್ವಾ ಗಾಮಕಂ [ಗಾಮಕೇ (ಸ್ಯಾ.)] ಞಾತಿಕುಲಂ ಅಗಮಾಸಿ. ಭದ್ದಾ ಕಾಪಿಲಾನೀ ತಂ ಭಿಕ್ಖುನಿಂ ಅಪಸ್ಸನ್ತೀ ಭಿಕ್ಖುನಿಯೋ ಪುಚ್ಛಿ – ‘‘ಕಹಂ ಇತ್ಥನ್ನಾಮಾ, ನ ದಿಸ್ಸತೀ’’ತಿ! ‘‘ಭಿಕ್ಖುನೀಹಿ ಸದ್ಧಿಂ, ಅಯ್ಯೇ, ಭಣ್ಡಿತ್ವಾ ನ ದಿಸ್ಸತೀ’’ತಿ. ‘‘ಅಮ್ಮಾ, ಅಮುಕಸ್ಮಿಂ ಗಾಮಕೇ ಏತಿಸ್ಸಾ ಞಾತಿಕುಲಂ. ತತ್ಥ ಗನ್ತ್ವಾ ವಿಚಿನಥಾ’’ತಿ. ಭಿಕ್ಖುನಿಯೋ ತತ್ಥ ಗನ್ತ್ವಾ ತಂ ಭಿಕ್ಖುನಿಂ ಪಸ್ಸಿತ್ವಾ ಏತದವೋಚುಂ – ‘‘ಕಿಸ್ಸ ತ್ವಂ, ಅಯ್ಯೇ, ಏಕಿಕಾ ಆಗತಾ, ಕಚ್ಚಿಸಿ ಅಪ್ಪಧಂಸಿತಾ’’ತಿ? ‘‘ಅಪ್ಪಧಂಸಿತಾಮ್ಹಿ, ಅಯ್ಯೇ’’ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಏಕಾ ಗಾಮನ್ತರಂ ಗಚ್ಛಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಏಕಾ ಗಾಮನ್ತರಂ ಗಚ್ಛತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಏಕಾ ಗಾಮನ್ತರಂ ಗಚ್ಛಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

‘‘ಯಾ ಪನ ಭಿಕ್ಖುನೀ ಏಕಾ ಗಾಮನ್ತರಂ ಗಚ್ಛೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

ಏವಞ್ಚಿದಂ ಭಗವತಾ ಭಿಕ್ಖುನೀನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೬೮೮. ತೇನ ಖೋ ಪನ ಸಮಯೇನ ದ್ವೇ ಭಿಕ್ಖುನಿಯೋ ಸಾಕೇತಾ ಸಾವತ್ಥಿಂ ಅದ್ಧಾನಮಗ್ಗಪ್ಪಟಿಪನ್ನಾ ಹೋನ್ತಿ. ಅನ್ತರಾಮಗ್ಗೇ ನದೀ ತರಿತಬ್ಬಾ ಹೋತಿ. ಅಥ ಖೋ ತಾ ಭಿಕ್ಖುನಿಯೋ ನಾವಿಕೇ ಉಪಸಙ್ಕಮಿತ್ವಾ ಏತದವೋಚುಂ – ‘‘ಸಾಧು ನೋ, ಆವುಸೋ, ತಾರೇಥಾ’’ತಿ. ‘‘ನಾಯ್ಯೇ, ಸಕ್ಕಾ ಉಭೋ ಸಕಿಂ ತಾರೇತು’’ನ್ತಿ. ಏಕೋ ಏಕಂ ಉತ್ತಾರೇಸಿ. ಉತ್ತಿಣ್ಣೋ ಉತ್ತಿಣ್ಣಂ ದೂಸೇಸಿ. ಅನುತ್ತಿಣ್ಣೋ ಅನುತ್ತಿಣ್ಣಂ ದೂಸೇಸಿ. ತಾ ಪಚ್ಛಾ ಸಮಾಗನ್ತ್ವಾ ಪುಚ್ಛಿಂಸು – ‘‘ಕಚ್ಚಿಸಿ, ಅಯ್ಯೇ, ಅಪ್ಪಧಂಸಿತಾ’’ತಿ? ‘‘ಪಧಂಸಿತಾಮ್ಹಿ, ಅಯ್ಯೇ! ತ್ವಂ ಪನ, ಅಯ್ಯೇ, ಅಪ್ಪಧಂಸಿತಾ’’ತಿ? ‘‘ಪಧಂಸಿತಾಮ್ಹಿ, ಅಯ್ಯೇ’’ತಿ. ಅಥ ಖೋ ತಾ ಭಿಕ್ಖುನಿಯೋ ಸಾವತ್ಥಿಂ ಗನ್ತ್ವಾ ಭಿಕ್ಖುನೀನಂ ಏತಮತ್ಥಂ ಆರೋಚೇಸುಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಏಕಾ ನದೀಪಾರಂ ಗಚ್ಛಿಸ್ಸತೀ’’ತಿ! ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಏಕಾ ನದೀಪಾರಂ ಗಚ್ಛತೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಏಕಾ ನದೀಪಾರಂ ಗಚ್ಛಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

‘‘ಯಾ ಪನ ಭಿಕ್ಖುನೀ ಏಕಾ ವಾ ಗಾಮನ್ತರಂ ಗಚ್ಛೇಯ್ಯ, ಏಕಾ ವಾ ನದೀಪಾರಂ ಗಚ್ಛೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

ಏವಞ್ಚಿದಂ ಭಗವತಾ ಭಿಕ್ಖುನೀನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೬೮೯. ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖುನಿಯೋ ಕೋಸಲೇಸು ಜನಪದೇ ಸಾವತ್ಥಿಂ ಗಚ್ಛನ್ತಾ [ಗನ್ತ್ವಾ (ಕ.)] ಸಾಯಂ ಅಞ್ಞತರಂ ಗಾಮಂ ಉಪಗಚ್ಛಿಂಸು. ತತ್ಥ ಅಞ್ಞತರಾ ಭಿಕ್ಖುನೀ ಅಭಿರೂಪಾ ಹೋತಿ ದಸ್ಸನೀಯಾ ಪಾಸಾದಿಕಾ. ಅಞ್ಞತರೋ ಪುರಿಸೋ ತಸ್ಸಾ ಭಿಕ್ಖುನಿಯಾ ಸಹ ದಸ್ಸನೇನ ಪಟಿಬದ್ಧಚಿತ್ತೋ ಹೋತಿ. ಅಥ ಖೋ ಸೋ ಪುರಿಸೋ ತಾಸಂ ಭಿಕ್ಖುನೀನಂ ಸೇಯ್ಯಂ ಪಞ್ಞಪೇನ್ತೋ ತಸ್ಸಾ ಭಿಕ್ಖುನಿಯಾ ಸೇಯ್ಯಂ ಏಕಮನ್ತಂ ಪಞ್ಞಾಪೇಸಿ. ಅಥ ಖೋ ಸಾ ಭಿಕ್ಖುನೀ ಸಲ್ಲಕ್ಖೇತ್ವಾ – ‘‘ಪರಿಯುಟ್ಠಿತೋ ಅಯಂ ಪುರಿಸೋ; ಸಚೇ ರತ್ತಿಂ ಆಗಚ್ಛಿಸ್ಸತಿ, ವಿಸ್ಸರೋ ಮೇ ಭವಿಸ್ಸತೀ’’ತಿ, ಭಿಕ್ಖುನಿಯೋ ಅನಾಪುಚ್ಛಾ ಅಞ್ಞತರಂ ಕುಲಂ ಗನ್ತ್ವಾ ಸೇಯ್ಯಂ ಕಪ್ಪೇಸಿ. ಅಥ ಖೋ ಸೋ ಪುರಿಸೋ ರತ್ತಿಂ ಆಗನ್ತ್ವಾ ತಂ ಭಿಕ್ಖುನಿಂ ಗವೇಸನ್ತೋ ಭಿಕ್ಖುನಿಯೋ ಘಟ್ಟೇಸಿ. ಭಿಕ್ಖುನಿಯೋ ತಂ ಭಿಕ್ಖುನಿಂ ಅಪಸ್ಸನ್ತಿಯೋ ಏವಮಾಹಂಸು – ‘‘ನಿಸ್ಸಂಸಯಂ ಖೋ ಸಾ ಭಿಕ್ಖುನೀ ಪುರಿಸೇನ ಸದ್ಧಿಂ ನಿಕ್ಖನ್ತಾ’’ತಿ.

ಅಥ ಖೋ ಸಾ ಭಿಕ್ಖುನೀ ತಸ್ಸಾ ರತ್ತಿಯಾ ಅಚ್ಚಯೇನ ಯೇನ ತಾ ಭಿಕ್ಖುನಿಯೋ ತೇನುಪಸಙ್ಕಮಿ. ಭಿಕ್ಖುನಿಯೋ ತಂ ಭಿಕ್ಖುನಿಂ ಏತದವೋಚುಂ – ‘‘ಕಿಸ್ಸ ತ್ವಂ, ಅಯ್ಯೇ, ಪುರಿಸೇನ ಸದ್ಧಿಂ ನಿಕ್ಖನ್ತಾ’’ತಿ? ‘‘ನಾಹಂ, ಅಯ್ಯೇ, ಪುರಿಸೇನ ಸದ್ಧಿಂ ನಿಕ್ಖನ್ತಾ’’ತಿ. ಭಿಕ್ಖುನೀನಂ ಏತಮತ್ಥಂ ಆರೋಚೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಏಕಾ ರತ್ತಿಂ ವಿಪ್ಪವಸಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಏಕಾ ರತ್ತಿಂ ವಿಪ್ಪವಸೀತಿ [ವಿಪ್ಪವಸೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಏಕಾ ರತ್ತಿಂ ವಿಪ್ಪವಸಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

‘‘ಯಾ ಪನ ಭಿಕ್ಖುನೀ ಏಕಾ ವಾ ಗಾಮನ್ತರಂ ಗಚ್ಛೇಯ್ಯ, ಏಕಾ ವಾ ನದೀಪಾರಂ ಗಚ್ಛೇಯ್ಯ, ಏಕಾ ವಾ ರತ್ತಿಂ ವಿಪ್ಪವಸೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

ಏವಞ್ಚಿದಂ ಭಗವತಾ ಭಿಕ್ಖುನೀನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೬೯೦. ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖುನಿಯೋ ಕೋಸಲೇಸು ಜನಪದೇ ಸಾವತ್ಥಿಂ ಅದ್ಧಾನಮಗ್ಗಪ್ಪಟಿಪನ್ನಾ ಹೋನ್ತಿ. ತತ್ಥ ಅಞ್ಞತರಾ ಭಿಕ್ಖುನೀ ವಚ್ಚೇನ ಪೀಳಿತಾ ಏಕಿಕಾ ಓಹೀಯಿತ್ವಾ [ಓಹಿಯಿತ್ವಾ (ಕ.)] ಪಚ್ಛಾ ಅಗಮಾಸಿ. ಮನುಸ್ಸಾ ತಂ ಭಿಕ್ಖುನಿಂ ಪಸ್ಸಿತ್ವಾ ದೂಸೇಸುಂ. ಅಥ ಖೋ ಸಾ ಭಿಕ್ಖುನೀ ಯೇನ ತಾ ಭಿಕ್ಖುನಿಯೋ ತೇನುಪಸಙ್ಕಮಿ. ಭಿಕ್ಖುನಿಯೋ ತಂ ಭಿಕ್ಖುನಿಂ ಏತದವೋಚುಂ – ‘‘ಕಿಸ್ಸ ತ್ವಂ, ಅಯ್ಯೇ, ಏಕಿಕಾ ಓಹೀನಾ, ಕಚ್ಚಿಸಿ ಅಪ್ಪಧಂಸಿತಾ’’ತಿ? ‘‘ಪಧಂಸಿತಾಮ್ಹಿ, ಅಯ್ಯೇ’’ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಕಥಞ್ಹಿ ನಾಮ ಭಿಕ್ಖುನೀ ಏಕಾ ಗಣಮ್ಹಾ ಓಹೀಯಿಸ್ಸತೀತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಏಕಾ ಗಣಮ್ಹಾ ಓಹೀಯತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಏಕಾ ಗಣಮ್ಹಾ ಓಹೀಯಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೯೧. ‘‘ಯಾ ಪನ ಭಿಕ್ಖುನೀ ಏಕಾ ವಾ ಗಾಮನ್ತರಂ ಗಚ್ಛೇಯ್ಯ, ಏಕಾ ವಾ ನದೀಪಾರಂ ಗಚ್ಛೇಯ್ಯ, ಏಕಾ ವಾ ರತ್ತಿಂ ವಿಪ್ಪವಸೇಯ್ಯ, ಏಕಾ ವಾ ಗಣಮ್ಹಾ ಓಹೀಯೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೬೯೨. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಏಕಾ ವಾ ಗಾಮನ್ತರಂ ಗಚ್ಛೇಯ್ಯಾತಿ ಪರಿಕ್ಖಿತ್ತಸ್ಸ ಗಾಮಸ್ಸ ಪರಿಕ್ಖೇಪಂ ಪಠಮಂ ಪಾದಂ ಅತಿಕ್ಕಾಮೇನ್ತಿಯಾ ಆಪತ್ತಿ ಥುಲ್ಲಚ್ಚಯಸ್ಸ, ದುತಿಯಂ ಪಾದಂ ಅತಿಕ್ಕಾಮೇನ್ತಿಯಾ ಆಪತ್ತಿ ಸಙ್ಘಾದಿಸೇಸಸ್ಸ.

ಅಪರಿಕ್ಖಿತ್ತಸ್ಸ ಗಾಮಸ್ಸ ಉಪಚಾರಂ ಪಠಮಂ ಪಾದಂ ಅತಿಕ್ಕಾಮೇನ್ತಿಯಾ ಆಪತ್ತಿ ಥುಲ್ಲಚ್ಚಯಸ್ಸ. ದುತಿಯಂ ಪಾದಂ ಅತಿಕ್ಕಾಮೇನ್ತಿಯಾ ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಾ ವಾ ನದೀಪಾರಂ ಗಚ್ಛೇಯ್ಯಾತಿ ನದೀ ನಾಮ ತಿಮಣ್ಡಲಂ ಪಟಿಚ್ಛಾದೇತ್ವಾ ಯತ್ಥ ಕತ್ಥಚಿ ಉತ್ತರನ್ತಿಯಾ ಭಿಕ್ಖುನಿಯಾ ಅನ್ತರವಾಸಕೋ ತೇಮಿಯತಿ. ಪಠಮಂ ಪಾದಂ ಉತ್ತರನ್ತಿಯಾ ಆಪತ್ತಿ ಥುಲ್ಲಚ್ಚಯಸ್ಸ. ದುತಿಯಂ ಪಾದಂ ಉತ್ತರನ್ತಿಯಾ ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಾ ವಾ ರತ್ತಿಂ ವಿಪ್ಪವಸೇಯ್ಯಾತಿ ಸಹ ಅರುಣುಗ್ಗಮನಾ ದುತಿಯಿಕಾಯ ಭಿಕ್ಖುನಿಯಾ ಹತ್ಥಪಾಸಂ ವಿಜಹನ್ತಿಯಾ ಆಪತ್ತಿ ಥುಲ್ಲಚ್ಚಯಸ್ಸ. ವಿಜಹಿತೇ ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಾ ವಾ ಗಣಮ್ಹಾ ಓಹೀಯೇಯ್ಯಾತಿ ಅಗಾಮಕೇ ಅರಞ್ಞೇ ದುತಿಯಿಕಾಯ ಭಿಕ್ಖುನಿಯಾ ದಸ್ಸನೂಪಚಾರಂ ವಾ ಸವನೂಪಚಾರಂ ವಾ ವಿಜಹನ್ತಿಯಾ ಆಪತ್ತಿ ಥುಲ್ಲಚ್ಚಯಸ್ಸ. ವಿಜಹಿತೇ ಆಪತ್ತಿ ಸಙ್ಘಾದಿಸೇಸಸ್ಸ.

ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ.

ಪಠಮಾಪತ್ತಿಕನ್ತಿ ಸಹ ವತ್ಥುಜ್ಝಾಚಾರಾ ಆಪಜ್ಜತಿ ಅಸಮನುಭಾಸನಾಯ.

ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೬೯೩. ಅನಾಪತ್ತಿ ದುತಿಯಿಕಾ ಭಿಕ್ಖುನೀ ಪಕ್ಕನ್ತಾ ವಾ ಹೋತಿ ವಿಬ್ಭನ್ತಾ ವಾ ಕಾಲಙ್ಕತಾ ವಾ ಪಕ್ಖಸಙ್ಕನ್ತಾ ವಾ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ತತಿಯಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ.

೪. ಚತುತ್ಥಸಙ್ಘಾದಿಸೇಸಸಿಕ್ಖಾಪದಂ

೬೯೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಚಣ್ಡಕಾಳೀ ಭಿಕ್ಖುನೀ ಭಣ್ಡನಕಾರಿಕಾ ಹೋತಿ ಕಲಹಕಾರಿಕಾ ವಿವಾದಕಾರಿಕಾ ಭಸ್ಸಕಾರಿಕಾ ಸಙ್ಘೇ ಅಧಿಕರಣಕಾರಿಕಾ. ಥುಲ್ಲನನ್ದಾ ಭಿಕ್ಖುನೀ ತಸ್ಸಾ ಕಮ್ಮೇ ಕರೀಯಮಾನೇ ಪಟಿಕ್ಕೋಸತಿ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ಗಾಮಕಂ ಅಗಮಾಸಿ ಕೇನಚಿದೇವ ಕರಣೀಯೇನ. ಅಥ ಖೋ ಭಿಕ್ಖುನಿಸಙ್ಘೋ – ‘‘ಥುಲ್ಲನನ್ದಾ ಭಿಕ್ಖುನೀ ಪಕ್ಕನ್ತಾ’’ತಿ, ಚಣ್ಡಕಾಳಿಂ ಭಿಕ್ಖುನಿಂ ಆಪತ್ತಿಯಾ ಅದಸ್ಸನೇ [ಅದಸ್ಸನೇನ (ಕ.)] ಉಕ್ಖಿಪಿ. ಥುಲ್ಲನನ್ದಾ ಭಿಕ್ಖುನೀ ಗಾಮಕೇ ತಂ ಕರಣೀಯಂ ತೀರೇತ್ವಾ ಪುನದೇವ ಸಾವತ್ಥಿಂ ಪಚ್ಚಾಗಚ್ಛಿ. ಚಣ್ಡಕಾಳೀ ಭಿಕ್ಖುನೀ ಥುಲ್ಲನನ್ದಾಯ ಭಿಕ್ಖುನಿಯಾ ಆಗಚ್ಛನ್ತಿಯಾ ನೇವ ಆಸನಂ ಪಞ್ಞಪೇಸಿ ನ ಪಾದೋದಕಂ ಪಾದಪೀಠಂ ಪಾದಕಠಲಿಕಂ ಉಪನಿಕ್ಖಿಪಿ ನ ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇಸಿ ನ ಪಾನೀಯೇನ ಆಪುಚ್ಛಿ. ಥುಲ್ಲನನ್ದಾ ಭಿಕ್ಖುನೀ ಚಣ್ಡಕಾಳಿಂ ಭಿಕ್ಖುನಿಂ ಏತದವೋಚ – ‘‘ಕಿಸ್ಸ ತ್ವಂ, ಅಯ್ಯೇ, ಮಯಿ ಆಗಚ್ಛನ್ತಿಯಾ ನೇವ ಆಸನಂ ಪಞ್ಞಪೇಸಿ ನ ಪಾದೋದಕಂ ಪಾದಪೀಠಂ ಪಾದಕಠಲಿಕಂ ಉಪನಿಕ್ಖಿಪಿ ನ ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇಸಿ ನ ಪಾನೀಯೇನ ಆಪುಚ್ಛೀ’’ತಿ? ‘‘ಏವಞ್ಹೇತಂ, ಅಯ್ಯೇ, ಹೋತಿ ಯಥಾ ತಂ ಅನಾಥಾಯಾ’’ತಿ. ‘‘ಕಿಸ್ಸ ಪನ ತ್ವಂ, ಅಯ್ಯೇ, ಅನಾಥಾ’’ತಿ? ‘‘ಇಮಾ ಮಂ, ಅಯ್ಯೇ, ಭಿಕ್ಖುನಿಯೋ – ‘‘ಅಯಂ ಅನಾಥಾ ಅಪ್ಪಞ್ಞಾತಾ, ನತ್ಥಿ ಇಮಿಸ್ಸಾ ಕಾಚಿ ಪಟಿವತ್ತಾ’’ತಿ, ಆಪತ್ತಿಯಾ ಅದಸ್ಸನೇ [ಅದಸ್ಸನೇನ (ಕ.)] ಉಕ್ಖಿಪಿಂಸೂ’’ತಿ.

ಥುಲ್ಲನನ್ದಾ ಭಿಕ್ಖುನೀ – ‘‘ಬಾಲಾ ಏತಾ ಅಬ್ಯತ್ತಾ ಏತಾ, ನೇವ ಜಾನನ್ತಿ ಕಮ್ಮಂ ವಾ ಕಮ್ಮದೋಸಂ ವಾ ಕಮ್ಮವಿಪತ್ತಿಂ ವಾ ಕಮ್ಮಸಮ್ಪತ್ತಿಂ ವಾ. ಮಯಂ ಖೋ ಜಾನಾಮ ಕಮ್ಮಮ್ಪಿ ಕಮ್ಮದೋಸಮ್ಪಿ ಕಮ್ಮವಿಪತ್ತಿಮ್ಪಿ ಕಮ್ಮಸಮ್ಪತ್ತಿಮ್ಪಿ. ಮಯಂ ಖೋ ಅಕತಂ ವಾ ಕಮ್ಮಂ ಕಾರೇಯ್ಯಾಮ ಕತಂ ವಾ ಕಮ್ಮಂ ಕೋಪೇಯ್ಯಾಮಾ’’ತಿ, ಲಹುಂ ಲಹುಂ ಭಿಕ್ಖುನಿಸಙ್ಘಂ ಸನ್ನಿಪಾತೇತ್ವಾ ಚಣ್ಡಕಾಳಿಂ ಭಿಕ್ಖುನಿಂ ಓಸಾರೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುನಿಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಪಲೋಕೇತ್ವಾ ಕಾರಕಸಙ್ಘಂ ಅನಞ್ಞಾಯ ಗಣಸ್ಸ ಛನ್ದಂ ಓಸಾರೇಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುನಿಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಪಲೋಕೇತ್ವಾ ಕಾರಕಸಙ್ಘಂ ಅನಞ್ಞಾಯ ಗಣಸ್ಸ ಛನ್ದಂ ಓಸಾರೇತೀತಿ [ಓಸಾರೇಸೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುನಿಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಪಲೋಕೇತ್ವಾ ಕಾರಕಸಙ್ಘಂ ಅನಞ್ಞಾಯ ಗಣಸ್ಸ ಛನ್ದಂ ಓಸಾರೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೯೫. ‘‘ಯಾ ಪನ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುನಿಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಪಲೋಕೇತ್ವಾ ಕಾರಕಸಙ್ಘಂ ಅನಞ್ಞಾಯ ಗಣಸ್ಸ ಛನ್ದಂ ಓಸಾರೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೬೯೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಸಮಗ್ಗೋ ನಾಮ ಸಙ್ಘೋ ಸಮಾನಸಂವಾಸಕೋ ಸಮಾನಸೀಮಾಯಂ ಠಿತೋ.

ಉಕ್ಖಿತ್ತಾ ನಾಮ ಆಪತ್ತಿಯಾ ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಅಪ್ಪಟಿನಿಸ್ಸಗ್ಗೇ ವಾ [ಅದಸ್ಸನೇನ ವಾ ಅಪ್ಪಟಿಕಮ್ಮೇನ ವಾ ಅಪ್ಪಟಿನಿಸ್ಸಗ್ಗೇನ ವಾ (ಕ.), ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ವಾ (?)] ಉಕ್ಖಿತ್ತಾ.

ಧಮ್ಮೇನ ವಿನಯೇನಾತಿ ಯೇನ ಧಮ್ಮೇನ ಯೇನ ವಿನಯೇನ.

ಸತ್ಥುಸಾಸನೇನಾತಿ ಜಿನಸಾಸನೇನ ಬುದ್ಧಸಾಸನೇನ.

ಅನಪಲೋಕೇತ್ವಾ ಕಾರಕಸಙ್ಘನ್ತಿ ಕಮ್ಮಕಾರಕಸಙ್ಘಂ ಅನಾಪುಚ್ಛಾ.

ಅನಞ್ಞಾಯ ಗಣಸ್ಸ ಛನ್ದನ್ತಿ ಗಣಸ್ಸ ಛನ್ದಂ ಅಜಾನಿತ್ವಾ.

‘‘ಓಸಾರೇಸ್ಸಾಮೀ’’ತಿ ಗಣಂ ವಾ ಪರಿಯೇಸತಿ, ಸೀಮಂ ವಾ ಸಮ್ಮನ್ನತಿ, ಆಪತ್ತಿ ದುಕ್ಕಟಸ್ಸ. ಞತ್ತಿಯಾ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ, ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ.

ಪಠಮಾಪತ್ತಿಕನ್ತಿ ಸಹ ವತ್ಥುಜ್ಝಾಚಾರಾ ಆಪಜ್ಜತಿ ಅಸಮನುಭಾಸನಾಯ.

ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೬೯೭. ಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ಸಙ್ಘಾದಿಸೇಸಸ್ಸ. ಧಮ್ಮಕಮ್ಮೇ ವೇಮತಿಕಾ ಓಸಾರೇತಿ ಆಪತ್ತಿ ಸಙ್ಘಾದಿಸೇಸಸ್ಸ. ಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಅಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಕಮ್ಮೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ.

೬೯೮. ಅನಾಪತ್ತಿ ಕಮ್ಮಕಾರಕಸಙ್ಘಂ ಅಪಲೋಕೇತ್ವಾ ಓಸಾರೇತಿ, ಗಣಸ್ಸ ಛನ್ದಂ ಜಾನಿತ್ವಾ ಓಸಾರೇತಿ, ವತ್ತೇ ವತ್ತನ್ತಿಂ ಓಸಾರೇತಿ, ಅಸನ್ತೇ ಕಮ್ಮಕಾರಕಸಙ್ಘೇ ಓಸಾರೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಚತುತ್ಥಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ.

೫. ಪಞ್ಚಮಸಙ್ಘಾದಿಸೇಸಸಿಕ್ಖಾಪದಂ

೬೯೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಸುನ್ದರೀನನ್ದಾ ಭಿಕ್ಖುನೀ ಅಭಿರೂಪಾ ಹೋತಿ ದಸ್ಸನೀಯಾ ಪಾಸಾದಿಕಾ. ಮನುಸ್ಸಾ ಭತ್ತಗ್ಗೇ ಸುನ್ದರೀನನ್ದಂ ಭಿಕ್ಖುನಿಂ ಪಸ್ಸಿತ್ವಾ ಅವಸ್ಸುತಾ ಅವಸ್ಸುತಾಯ ಸುನ್ದರೀನನ್ದಾಯ ಭಿಕ್ಖುನಿಯಾ ಅಗ್ಗಮಗ್ಗಾನಿ ಭೋಜನಾನಿ ದೇನ್ತಿ. ಸುನ್ದರೀನನ್ದಾ ಭಿಕ್ಖುನೀ ಯಾವದತ್ಥಂ ಭುಞ್ಜತಿ; ಅಞ್ಞಾ ಭಿಕ್ಖುನಿಯೋ ನ ಚಿತ್ತರೂಪಂ ಲಭನ್ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಸುನ್ದರೀನನ್ದಾ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದಿಸ್ಸತಿ ಭುಞ್ಜಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಸುನ್ದರೀನನ್ದಾ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದತಿ ಭುಞ್ಜತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಸುನ್ದರೀನನ್ದಾ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದಿಸ್ಸತಿ ಭುಞ್ಜಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೭೦೦. ‘‘ಯಾ ಪನ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೭೦೧. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅವಸ್ಸುತಾ ನಾಮ ಸಾರತ್ತಾ ಅಪೇಕ್ಖವತೀ ಪಟಿಬದ್ಧಚಿತ್ತಾ.

ಅವಸ್ಸುತೋ ನಾಮ ಸಾರತ್ತೋ ಅಪೇಕ್ಖವಾ ಪಟಿಬದ್ಧಚಿತ್ತೋ.

ಪುರಿಸಪುಗ್ಗಲೋ ನಾಮ ಮನುಸ್ಸಪುರಿಸೋ, ನ ಯಕ್ಖೋ ನ ಪೇತೋ ನ ತಿರಚ್ಛಾನಗತೋ, ವಿಞ್ಞೂ ಪಟಿಬಲೋ ಸಾರಜ್ಜಿತುಂ.

ಖಾದನೀಯಂ ನಾಮ ಪಞ್ಚ ಭೋಜನಾನಿ – ಉದಕದನ್ತಪೋನಂ ಠಪೇತ್ವಾ ಅವಸೇಸಂ ಖಾದನೀಯಂ ನಾಮ.

ಭೋಜನೀಯಂ ನಾಮ ಪಞ್ಚ ಭೋಜನಾನಿ – ಓದನೋ, ಕುಮ್ಮಾಸೋ, ಸತ್ತು, ಮಚ್ಛೋ, ಮಂಸಂ.

‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ಥುಲ್ಲಚ್ಚಯಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಸಙ್ಘಾದಿಸೇಸಸ್ಸ.

ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ.

ಪಠಮಾಪತ್ತಿಕನ್ತಿ ಸಹ ವತ್ಥುಜ್ಝಾಚಾರಾ ಆಪಜ್ಜತಿ ಅಸಮನುಭಾಸನಾಯ.

ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

ಉದಕದನ್ತಪೋನಂ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಏಕತೋಅವಸ್ಸುತೇ ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ.

೭೦೨. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಥುಲ್ಲಚ್ಚಯಸ್ಸ. ಉದಕದನ್ತಪೋನಂ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಉಭತೋಅವಸ್ಸುತೇ ಯಕ್ಖಸ್ಸ ವಾ ಪೇತಸ್ಸ ವಾ ಪಣ್ಡಕಸ್ಸ ವಾ ತಿರಚ್ಛಾನಗತಮನುಸ್ಸವಿಗ್ಗಹಸ್ಸ ವಾ ಹತ್ಥತೋ ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಥುಲ್ಲಚ್ಚಯಸ್ಸ. ಉದಕದನ್ತಪೋನಂ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಏಕತೋಅವಸ್ಸುತೇ ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ದುಕ್ಕಟಸ್ಸ. ಉದಕದನ್ತಪೋನಂ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ.

೭೦೩. ಅನಾಪತ್ತಿ ಉಭತೋಅನವಸ್ಸುತಾ ಹೋನ್ತಿ, ‘‘ಅನವಸ್ಸುತೋ’’ತಿ ಜಾನನ್ತೀ ಪಟಿಗ್ಗಣ್ಹಾತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಞ್ಚಮಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ.

೬. ಛಟ್ಠಸಙ್ಘಾದಿಸೇಸಸಿಕ್ಖಾಪದಂ

೭೦೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಸುನ್ದರೀನನ್ದಾ ಭಿಕ್ಖುನೀ ಅಭಿರೂಪಾ ಹೋತಿ ದಸ್ಸನೀಯಾ ಪಾಸಾದಿಕಾ. ಮನುಸ್ಸಾ ಭತ್ತಗ್ಗೇ ಸುನ್ದರೀನನ್ದಂ ಭಿಕ್ಖುನಿಂ ಪಸ್ಸಿತ್ವಾ ಅವಸ್ಸುತಾ ಸುನ್ದರೀನನ್ದಾಯ ಭಿಕ್ಖುನಿಯಾ ಅಗ್ಗಮಗ್ಗಾನಿ ಭೋಜನಾನಿ ದೇನ್ತಿ. ಸುನ್ದರೀನನ್ದಾ ಭಿಕ್ಖುನೀ ಕುಕ್ಕುಚ್ಚಾಯನ್ತೀ ನ ಪಟಿಗ್ಗಣ್ಹಾತಿ. ಅನನ್ತರಿಕಾ ಭಿಕ್ಖುನೀ ಸುನ್ದರೀನನ್ದಂ ಭಿಕ್ಖುನಿಂ ಏತದವೋಚ – ‘‘ಕಿಸ್ಸ ತ್ವಂ, ಅಯ್ಯೇ, ನ ಪಟಿಗ್ಗಣ್ಹಾಸೀ’’ತಿ? ‘‘ಅವಸ್ಸುತಾ, ಅಯ್ಯೇ’’ತಿ. ‘‘ತ್ವಂ ಪನ, ಅಯ್ಯೇ, ಅವಸ್ಸುತಾ’’ತಿ? ‘‘ನಾಹಂ, ಅಯ್ಯೇ, ಅವಸ್ಸುತಾ’’ತಿ. ‘‘ಕಿಂ ತೇ, ಅಯ್ಯೇ, ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ, ಯತೋ ತ್ವಂ ಅನವಸ್ಸುತಾ. ಇಙ್ಘಂ, ಅಯ್ಯೇ, ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ, ಭುಞ್ಜ ವಾ’’ತಿ.

ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಏವಂ ವಕ್ಖತಿ – ‘ಕಿಂ ತೇ, ಅಯ್ಯೇ, ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ, ಯತೋ ತ್ವಂ ಅನವಸ್ಸುತಾ. ಇಙ್ಘ, ಅಯ್ಯೇ, ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ ಭುಞ್ಜ ವಾ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಏವಂ ವದೇತಿ – ‘‘ಕಿಂ ತೇ, ಅಯ್ಯೇ, ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ ಯತೋ ತ್ವಂ ಅನವಸ್ಸುತಾ! ಇಙ್ಘ, ಅಯ್ಯೇ, ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ ಭುಞ್ಜ ವಾ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಏವಂ ವಕ್ಖತಿ – ‘‘ಕಿಂ ತೇ, ಅಯ್ಯೇ, ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ ಯತೋ ತ್ವಂ ಅನವಸ್ಸುತಾ; ಇಙ್ಘ, ಅಯ್ಯೇ, ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ ಭುಞ್ಜ ವಾ’’. ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೭೦೫. ‘‘ಯಾ ಪನ ಭಿಕ್ಖುನೀ ಏವಂ ವದೇಯ್ಯ – ‘ಕಿಂ ತೇ, ಅಯ್ಯೇ, ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ, ಯತೋ ತ್ವಂ ಅನವಸ್ಸುತಾ. ಇಙ್ಘ, ಅಯ್ಯೇ, ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ ಭುಞ್ಜ ವಾ’ತಿ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೭೦೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಏವಂ ವದೇಯ್ಯಾತಿ – ‘‘ಕಿಂ ತೇ, ಅಯ್ಯೇ, ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ, ಯತೋ ತ್ವಂ ಅನವಸ್ಸುತಾ. ಇಙ್ಘ, ಅಯ್ಯೇ, ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ ಭುಞ್ಜ ವಾ’’ತಿ ಉಯ್ಯೋಜೇತಿ, ಆಪತ್ತಿ ದುಕ್ಕಟಸ್ಸ. ತಸ್ಸಾ ವಚನೇನ ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಥುಲ್ಲಚ್ಚಯಸ್ಸ. ಭೋಜನಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ.

ಪಠಮಾಪತ್ತಿಕನ್ತಿ ಸಹ ವತ್ಥುಜ್ಝಾಚಾರಾ ಆಪಜ್ಜತಿ ಅಸಮನುಭಾಸನಾಯ.

ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

ಉದಕದನ್ತಪೋನಂ ‘‘ಪಟಿಗ್ಗಣ್ಹಾ’’ತಿ ಉಯ್ಯೋಜೇತಿ, ಆಪತ್ತಿ ದುಕ್ಕಟಸ್ಸ. ತಸ್ಸಾ ವಚನೇನ ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ.

೭೦೭. ಏಕತೋಅವಸ್ಸುತೇ ಯಕ್ಖಸ್ಸ ವಾ ಪೇತಸ್ಸ ವಾ ಪಣ್ಡಕಸ್ಸ ವಾ ತಿರಚ್ಛಾನಗತಮನುಸ್ಸವಿಗ್ಗಹಸ್ಸ ವಾ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ‘‘ಖಾದ ವಾ ಭುಞ್ಜ ವಾ’’ತಿ ಉಯ್ಯೋಜೇತಿ, ಆಪತ್ತಿ ದುಕ್ಕಟಸ್ಸ. ತಸ್ಸಾ ವಚನೇನ ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ದುಕ್ಕಟಸ್ಸ. ಭೋಜನಪರಿಯೋಸಾನೇ ಆಪತ್ತಿ ಥುಲ್ಲಚ್ಚಯಸ್ಸ. ಉದಕದನ್ತಪೋನಂ ಪಟಿಗ್ಗಣ್ಹಾತಿ ಉಯ್ಯೋಜೇತಿ, ಆಪತ್ತಿ ದುಕ್ಕಟಸ್ಸ. ತಸ್ಸಾ ವಚನೇನ ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ.

೭೦೮. ಅನಾಪತ್ತಿ ‘‘ಅನವಸ್ಸುತೋ’’ತಿ ಜಾನನ್ತೀ ಉಯ್ಯೋಜೇತಿ, ‘‘ಕುಪಿತಾ ನ ಪಟಿಗ್ಗಣ್ಹಾತೀ’’ತಿ ಉಯ್ಯೋಜೇತಿ, ‘‘ಕುಲಾನುದ್ದಯತಾಯ ನ ಪಟಿಗ್ಗಣ್ಹಾತೀ’’ತಿ ಉಯ್ಯೋಜೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಛಟ್ಠಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ.

೭. ಸತ್ತಮಸಙ್ಘಾದಿಸೇಸಸಿಕ್ಖಾಪದಂ

೭೦೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಚಣ್ಡಕಾಳೀ ಭಿಕ್ಖುನೀ ಭಿಕ್ಖುನೀಹಿ ಸದ್ಧಿಂ ಭಣ್ಡಿತ್ವಾ ಕುಪಿತಾ ಅನತ್ತಮನಾ ಏವಂ ವದೇತಿ – ‘‘ಬುದ್ಧಂ ಪಚ್ಚಾಚಿಕ್ಖಾಮಿ, ಧಮ್ಮಂ ಪಚ್ಚಾಚಿಕ್ಖಾಮಿ, ಸಙ್ಘಂ ಪಚ್ಚಾಚಿಕ್ಖಾಮಿ, ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ, ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’’ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಚಣ್ಡಕಾಳೀ [ಚಣ್ಡಕಾಳೀ ಭಿಕ್ಖುನೀ (ಕ.)] ಕುಪಿತಾ ಅನತ್ತಮನಾ ಏವಂ ವಕ್ಖತಿ – ಬುದ್ಧಂ ಪಚ್ಚಾಚಿಕ್ಖಾಮಿ…ಪೇ… ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ, ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಚಣ್ಡಕಾಳೀ ಭಿಕ್ಖುನೀ ಕುಪಿತಾ ಅನತ್ತಮನಾ ಏವಂ ವದೇತಿ – ‘‘ಬುದ್ಧಂ ಪಚ್ಚಾಚಿಕ್ಖಾಮಿ…ಪೇ… ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ, ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಚಣ್ಡಕಾಳೀ ಭಿಕ್ಖುನೀ ಕುಪಿತಾ ಅನತ್ತಮನಾ ಏವಂ ವಕ್ಖತಿ – ‘‘ಬುದ್ಧಂ ಪಚ್ಚಾಚಿಕ್ಖಾಮಿ…ಪೇ… ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ, ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’’ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೭೧೦. ‘‘ಯಾ ಪನ ಭಿಕ್ಖುನೀ ಕುಪಿತಾ ಅನತ್ತಮನಾ ಏವಂ ವದೇಯ್ಯ – ‘ಬುದ್ಧಂ ಪಚ್ಚಾಚಿಕ್ಖಾಮಿ, ಧಮ್ಮಂ ಪಚ್ಚಾಚಿಕ್ಖಾಮಿ, ಸಙ್ಘಂ ಪಚ್ಚಾಚಿಕ್ಖಾಮಿ, ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ! ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’ತಿ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ – ‘ಮಾಯ್ಯೇ, ಕುಪಿತಾ ಅನತ್ತಮನಾ ಏವಂ ಅವಚ – ಬುದ್ಧಂ ಪಚ್ಚಾಚಿಕ್ಖಾಮಿ, ಧಮ್ಮಂ ಪಚ್ಚಾಚಿಕ್ಖಾಮಿ, ಸಙ್ಘಂ ಪಚ್ಚಾಚಿಕ್ಖಾಮಿ, ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ! ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀತಿ, ಅಭಿರಮಾಯ್ಯೇ, ಸ್ವಾಕ್ಖಾತೋ ಧಮ್ಮೋ; ಚರ ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾ’ತಿ. ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ. ಯಾವತತಿಯಞ್ಚೇ ಸಮನುಭಾಸೀಯಮಾನಾ ತಂ ಪಟಿನಿಸ್ಸಜ್ಜೇಯ್ಯ ಇಚ್ಚೇತಂ ಕುಸಲಂ; ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಭಿಕ್ಖುನೀ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೭೧೧. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಕುಪಿತಾ ಅನತ್ತಮನಾತಿ ಅನಭಿರದ್ಧಾ ಆಹತಚಿತ್ತಾ ಖಿಲಜಾತಾ.

ಏವಂ ವದೇಯ್ಯಾತಿ – ‘‘ಬುದ್ಧಂ ಪಚ್ಚಾಚಿಕ್ಖಾಮಿ…ಪೇ… ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ! ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’’ತಿ.

ಸಾ ಭಿಕ್ಖುನೀತಿ ಯಾ ಸಾ ಏವಂವಾದಿನೀ ಭಿಕ್ಖುನೀ. ಭಿಕ್ಖುನೀಹೀತಿ ಅಞ್ಞಾಹಿ ಭಿಕ್ಖುನೀಹಿ.

ಯಾ ಪಸ್ಸನ್ತಿ ಯಾ ಸುಣನ್ತಿ ತಾಹಿ ವತ್ತಬ್ಬಾ – ‘‘ಮಾಯ್ಯೇ, ಕುಪಿತಾ ಅನತ್ತಮನಾ ಏವಂ ಅವಚ – ‘ಬುದ್ಧಂ ಪಚ್ಚಾಚಿಕ್ಖಾಮಿ…ಪೇ… ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ! ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’ತಿ. ಅಭಿರಮಾಯ್ಯೇ, ಸ್ವಾಕ್ಖಾತೋ ಧಮ್ಮೋ; ಚರ ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾ’’ತಿ. ದುತಿಯಮ್ಪಿ ವತ್ತಬ್ಬಾ. ತತಿಯಮ್ಪಿ ವತ್ತಬ್ಬಾ. ಸಚೇ ಪಟಿನಿಸ್ಸಜ್ಜತಿ ಇಚ್ಚೇತಂ ಕುಸಲಂ, ನೋ ಚೇ ಪಟಿನಿಸ್ಸಜ್ಜತಿ ಆಪತ್ತಿ ದುಕ್ಕಟಸ್ಸ. ಸುತ್ವಾ ನ ವದನ್ತಿ, ಆಪತ್ತಿ ದುಕ್ಕಟಸ್ಸ. ಸಾ ಭಿಕ್ಖುನೀ ಸಙ್ಘಮಜ್ಝಮ್ಪಿ ಆಕಡ್ಢಿತ್ವಾ ವತ್ತಬ್ಬಾ – ‘‘ಮಾಯ್ಯೇ, ಕುಪಿತಾ ಅನತ್ತಮನಾ ಏವಂ ಅವಚ – ‘ಬುದ್ಧಂ ಪಚ್ಚಾಚಿಕ್ಖಾಮಿ…ಪೇ… ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ! ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’ತಿ. ಅಭಿರಮಾಯ್ಯೇ, ಸ್ವಾಕ್ಖಾತೋ ಧಮ್ಮೋ; ಚರ ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾ’’ತಿ. ದುತಿಯಮ್ಪಿ ವತ್ತಬ್ಬಾ. ತತಿಯಮ್ಪಿ ವತ್ತಬ್ಬಾ. ಸಚೇ ಪಟಿನಿಸ್ಸಜ್ಜತಿ ಇಚ್ಚೇತಂ ಕುಸಲಂ, ನೋ ಚೇ ಪಟಿನಿಸ್ಸಜ್ಜತಿ ಆಪತ್ತಿ ದುಕ್ಕಟಸ್ಸ. ಸಾ ಭಿಕ್ಖುನೀ ಸಮನುಭಾಸಿತಬ್ಬಾ. ಏವಞ್ಚ ಪನ, ಭಿಕ್ಖವೇ, ಸಮನುಭಾಸಿತಬ್ಬಾ. ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –

೭೧೨. ‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಅಯಂ ಇತ್ಥನ್ನಾಮಾ ಭಿಕ್ಖುನೀ ಕುಪಿತಾ ಅನತ್ತಮನಾ ಏವಂ ವದೇತಿ – ‘ಬುದ್ಧಂ ಪಚ್ಚಾಚಿಕ್ಖಾಮಿ, ಧಮ್ಮಂ ಪಚ್ಚಾಚಿಕ್ಖಾಮಿ, ಸಙ್ಘಂ ಪಚ್ಚಾಚಿಕ್ಖಾಮಿ, ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ! ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’ತಿ. ಸಾ ತಂ ವತ್ಥುಂ ನ ಪಟಿನಿಸ್ಸಜ್ಜತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮನುಭಾಸೇಯ್ಯ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ. ಏಸಾ ಞತ್ತಿ.

‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಅಯಂ ಇತ್ಥನ್ನಾಮಾ ಭಿಕ್ಖುನೀ ಕುಪಿತಾ ಅನತ್ತಮನಾ ಏವಂ ವದೇತಿ – ‘ಬುದ್ಧಂ ಪಚ್ಚಾಚಿಕ್ಖಾಮಿ…ಪೇ… ಸಿಕ್ಖಂ ಪಚ್ಚಾಚಿಕ್ಖಾಮಿ. ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ! ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’ತಿ. ಸಾ ತಂ ವತ್ಥುಂ ನ ಪಟಿನಿಸ್ಸಜ್ಜತಿ. ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮನುಭಾಸತಿ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ. ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಭಿಕ್ಖುನಿಯಾ ಸಮನುಭಾಸನಾ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ ಸಾ, ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ…ಪೇ….

‘‘ಸಮನುಭಟ್ಠಾ ಸಙ್ಘೇನ ಇತ್ಥನ್ನಾಮಾ ಭಿಕ್ಖುನೀ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಞತ್ತಿಯಾ ದುಕ್ಕಟಂ. ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ. ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ. ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತಿಯಾ ಞತ್ತಿಯಾ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ ಪಟಿಪ್ಪಸ್ಸಮ್ಭನ್ತಿ.

ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ.

ಯಾವತತಿಯಕನ್ತಿ ಯಾವತತಿಯಂ ಸಮನುಭಾಸನಾಯ ಆಪಜ್ಜತಿ, ನ ಸಹ ವತ್ಥುಜ್ಝಾಚಾರಾ.

ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೭೧೩. ಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ ನ ಪಟಿನಿಸ್ಸಜ್ಜತಿ, ಆಪತ್ತಿ ಸಙ್ಘಾದಿಸೇಸಸ್ಸ. ಧಮ್ಮಕಮ್ಮೇ ವೇಮತಿಕಾ ನ ಪಟಿನಿಸ್ಸಜ್ಜತಿ, ಆಪತ್ತಿ ಸಙ್ಘಾದಿಸೇಸಸ್ಸ. ಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ ನ ಪಟಿನಿಸ್ಸಜ್ಜತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಅಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಕಮ್ಮೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ.

೭೧೪. ಅನಾಪತ್ತಿ ಅಸಮನುಭಾಸನ್ತಿಯಾ, ಪಟಿನಿಸ್ಸಜ್ಜನ್ತಿಯಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಸತ್ತಮಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ.

೮. ಅಟ್ಠಮಸಙ್ಘಾದಿಸೇಸಸಿಕ್ಖಾಪದಂ

೭೧೫. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಚಣ್ಡಕಾಳೀ ಭಿಕ್ಖುನೀ ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ ಕುಪಿತಾ ಅನತ್ತಮನಾ ಏವಂ ವದೇತಿ – ‘‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ, ದೋಸಗಾಮಿನಿಯೋ ಚ ಭಿಕ್ಖುನಿಯೋ, ಮೋಹಗಾಮಿನಿಯೋ ಚ ಭಿಕ್ಖುನಿಯೋ, ಭಯಗಾಮಿನಿಯೋ ಚ ಭಿಕ್ಖುನಿಯೋ’’ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಚಣ್ಡಕಾಳೀ ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ ಕುಪಿತಾ ಅನತ್ತಮನಾ ಏವಂ ವಕ್ಖತಿ – ಛನ್ದಗಾಮಿನಿಯೋ ಚ ಭಿಕ್ಖುನಿಯೋ…ಪೇ… ಭಯಗಾಮಿನಿಯೋ ಚ ಭಿಕ್ಖುನಿಯೋ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಚಣ್ಡಕಾಳೀ ಭಿಕ್ಖುನೀ ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ ಕುಪಿತಾ ಅನತ್ತಮನಾ ಏವಂ ವದೇತಿ – ‘‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ…ಪೇ… ಭಯಗಾಮಿನಿಯೋ ಚ ಭಿಕ್ಖುನಿಯೋ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಚಣ್ಡಕಾಳೀ ಭಿಕ್ಖುನೀ ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ ಕುಪಿತಾ ಅನತ್ತಮನಾ ಏವಂ ವಕ್ಖತಿ – ‘‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ…ಪೇ… ಭಯಗಾಮಿನಿಯೋ ಚ ಭಿಕ್ಖುನಿಯೋ’’ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೭೧೬. ‘‘ಯಾ ಪನ ಭಿಕ್ಖುನೀ ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ ಕುಪಿತಾ ಅನತ್ತಮನಾ ಏವಂ ವದೇಯ್ಯ – ‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ, ದೋಸಗಾಮಿನಿಯೋ ಚ ಭಿಕ್ಖುನಿಯೋ, ಮೋಹಗಾಮಿನಿಯೋ ಚ ಭಿಕ್ಖುನಿಯೋ, ಭಯಗಾಮಿನಿಯೋ ಚ ಭಿಕ್ಖುನಿಯೋ’ತಿ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ – ‘ಮಾಯ್ಯೇ, ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ ಕುಪಿತಾ ಅನತ್ತಮನಾ ಏವಂ ಅವಚ – ಛನ್ದಗಾಮಿನಿಯೋ ಚ ಭಿಕ್ಖುನಿಯೋ ದೋಸಗಾಮಿನಿಯೋ ಚ ಭಿಕ್ಖುನಿಯೋ ಮೋಹಗಾಮಿನಿಯೋ ಚ ಭಿಕ್ಖುನಿಯೋ ಭಯಗಾಮಿನಿಯೋ ಚ ಭಿಕ್ಖುನಿಯೋತಿ. ಅಯ್ಯಾ ಖೋ ಛನ್ದಾಪಿ ಗಚ್ಛೇಯ್ಯ, ದೋಸಾಪಿ ಗಚ್ಛೇಯ್ಯ, ಮೋಹಾಪಿ ಗಚ್ಛೇಯ್ಯ, ಭಯಾಪಿ ಗಚ್ಛೇಯ್ಯಾ’ತಿ. ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ. ಯಾವತತಿಯಞ್ಚೇ ಸಮನುಭಾಸೀಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ; ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಭಿಕ್ಖುನೀ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೭೧೭. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಕಿಸ್ಮಿಞ್ಚಿದೇವ ಅಧಿಕರಣೇತಿ ಅಧಿಕರಣಂ ನಾಮ ಚತ್ತಾರಿ ಅಧಿಕರಣಾನಿ – ವಿವಾದಾಧಿಕರಣಂ, ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ.

ಪಚ್ಚಾಕತಾ ನಾಮ ಪರಾಜಿತಾ ವುಚ್ಚತಿ.

ಕುಪಿತಾ ಅನತ್ತಮನಾತಿ ಅನಭಿರದ್ಧಾ ಆಹತಚಿತ್ತಾ ಖಿಲಜಾತಾ.

ಏವಂ ವದೇಯ್ಯಾತಿ – ‘‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ…ಪೇ… ಭಯಗಾಮಿನಿಯೋ ಚ ಭಿಕ್ಖುನಿಯೋ’’ತಿ.