೯. ಜನ್ತಾಘರವತ್ತಕಥಾ

೩೭೧. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಜನ್ತಾಘರೇ ಥೇರೇಹಿ ಭಿಕ್ಖೂಹಿ ನಿವಾರಿಯಮಾನಾ ಅನಾದರಿಯಂ ಪಟಿಚ್ಚ ಪಹೂತಂ ಕಟ್ಠಂ ಆರೋಪೇತ್ವಾ ಅಗ್ಗಿಂ ದತ್ವಾ ದ್ವಾರಂ ಥಕೇತ್ವಾ ದ್ವಾರೇ ನಿಸೀದನ್ತಿ. ಭಿಕ್ಖೂ [ಥೇರಾ ಚ ಭಿಕ್ಖೂ (ಸ್ಯಾ. ಕಂ.)] ಉಣ್ಹಾಭಿತತ್ತಾ ದ್ವಾರಂ ಅಲಭಮಾನಾ ಮುಚ್ಛಿತಾ ಪಪತನ್ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಜನ್ತಾಘರೇ ಥೇರೇಹಿ ಭಿಕ್ಖೂಹಿ ನಿವಾರಿಯಮಾನಾ ಅನಾದರಿಯಂ ಪಟಿಚ್ಚ ಪಹೂತಂ ಕಟ್ಠಂ ಆರೋಪೇತ್ವಾ ಅಗ್ಗಿಂ ದತ್ವಾ ದ್ವಾರಂ ಥಕೇತ್ವಾ ದ್ವಾರೇ ನಿಸೀದಿಸ್ಸನ್ತಿ! ಭಿಕ್ಖೂ ಉಣ್ಹಾಭಿತತ್ತಾ ದ್ವಾರಂ ಅಲಭಮಾನಾ ಮುಚ್ಛಿತಾ ಪಪತನ್ತೀ’’ತಿ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖೂ ಜನ್ತಾಘರೇ ಥೇರೇಹಿ ಭಿಕ್ಖೂಹಿ ನಿವಾರಿಯಮಾನಾ ಅನಾದರಿಯಂ ಪಟಿಚ್ಚ ಪಹೂತಂ ಕಟ್ಠಂ ಆರೋಪೇತ್ವಾ ಅಗ್ಗಿಂ ದತ್ವಾ ದ್ವಾರಂ ಥಕೇತ್ವಾ ದ್ವಾರೇ ನಿಸೀದನ್ತಿ; ಭಿಕ್ಖೂ ಉಣ್ಹಾಭಿತತ್ತಾ ದ್ವಾರಂ ಅಲಭಮಾನಾ ಮುಚ್ಛಿತಾ ಪಪತನ್ತೀ’’ತಿ? ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಜನ್ತಾಘರೇ ಥೇರೇನ ಭಿಕ್ಖುನಾ ನಿವಾರಿಯಮಾನೇನ ಅನಾದರಿಯಂ ಪಟಿಚ್ಚ ಪಹೂತಂ ಕಟ್ಠಂ ಆರೋಪೇತ್ವಾ ಅಗ್ಗಿ ದಾತಬ್ಬೋ. ಯೋ ದದೇಯ್ಯ, ಆಪತ್ತಿ ದುಕ್ಕಟಸ್ಸ. ನ, ಭಿಕ್ಖವೇ, ದ್ವಾರಂ ಥಕೇತ್ವಾ ದ್ವಾರೇ ನಿಸೀದಿತಬ್ಬಂ. ಯೋ ನಿಸೀದೇಯ್ಯ, ಆಪತ್ತಿ ದುಕ್ಕಟಸ್ಸ.

೩೭೨. ‘‘ತೇನ ಹಿ, ಭಿಕ್ಖವೇ, ಭಿಕ್ಖೂನಂ ಜನ್ತಾಘರವತ್ತಂ ಪಞ್ಞಪೇಸ್ಸಾಮಿ ಯಥಾ ಭಿಕ್ಖೂಹಿ ಜನ್ತಾಘರೇ ಸಮ್ಮಾ ವತ್ತಿತಬ್ಬಂ. ಯೋ ಪಠಮಂ ಜನ್ತಾಘರಂ ಗಚ್ಛತಿ, ಸಚೇ ಛಾರಿಕಾ ಉಸ್ಸನ್ನಾ ಹೋತಿ, ಛಾರಿಕಾ ಛಡ್ಡೇತಬ್ಬಾ. ಸಚೇ ಜನ್ತಾಘರಂ ಉಕ್ಲಾಪಂ ಹೋತಿ, ಜನ್ತಾಘರಂ ಸಮ್ಮಜ್ಜಿತಬ್ಬಂ. ಸಚೇ ಪರಿಭಣ್ಡಂ ಉಕ್ಲಾಪಂ ಹೋತಿ, ಪರಿಭಣ್ಡಂ ಸಮ್ಮಜ್ಜಿತಬ್ಬಂ. ಸಚೇ ಪರಿವೇಣಂ ಉಕ್ಲಾಪಂ ಹೋತಿ, ಪರಿವೇಣಂ ಸಮ್ಮಜ್ಜಿತಬ್ಬಂ. ಸಚೇ ಕೋಟ್ಠಕೋ ಉಕ್ಲಾಪೋ ಹೋತಿ, ಕೋಟ್ಠಕೋ ಸಮ್ಮಜ್ಜಿತಬ್ಬೋ. ಸಚೇ ಜನ್ತಾಘರಸಾಲಾ ಉಕ್ಲಾಪಾ ಹೋತಿ, ಜನ್ತಾಘರಸಾಲಾ ಸಮ್ಮಜ್ಜಿತಬ್ಬಾ.

‘‘ಚುಣ್ಣಂ ಸನ್ನೇತಬ್ಬಂ, ಮತ್ತಿಕಾ ತೇಮೇತಬ್ಬಾ, ಉದಕದೋಣಿಕಾಯ ಉದಕಂ ಆಸಿಞ್ಚಿತಬ್ಬಂ. ಜನ್ತಾಘರಂ ಪವಿಸನ್ತೇನ ಮತ್ತಿಕಾಯ ಮುಖಂ ಮಕ್ಖೇತ್ವಾ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಂ ಪವಿಸಿತಬ್ಬಂ. ನ ಥೇರೇ ಭಿಕ್ಖೂ ಅನುಪಖಜ್ಜ ನಿಸೀದಿತಬ್ಬಂ. ನ ನವಾ ಭಿಕ್ಖೂ ಆಸನೇನ ಪಟಿಬಾಹಿತಬ್ಬಾ. ಸಚೇ ಉಸ್ಸಹತಿ, ಜನ್ತಾಘರೇ ಥೇರಾನಂ ಭಿಕ್ಖೂನಂ ಪರಿಕಮ್ಮಂ ಕಾತಬ್ಬಂ. ಜನ್ತಾಘರಾ ನಿಕ್ಖಮನ್ತೇನ ಜನ್ತಾಘರಪೀಠಂ ಆದಾಯ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಾ ನಿಕ್ಖಮಿತಬ್ಬಂ. ಸಚೇ ಉಸ್ಸಹತಿ, ಉದಕೇಪಿ ಥೇರಾನಂ ಭಿಕ್ಖೂನಂ ಪರಿಕಮ್ಮಂ ಕಾತಬ್ಬಂ. ನ ಥೇರಾನಂ ಭಿಕ್ಖೂನಂ ಪುರತೋಪಿ ನಹಾಯಿತಬ್ಬಂ, ನ ಉಪರಿತೋಪಿ ನಹಾಯಿತಬ್ಬಂ. ನಹಾತೇನ ಉತ್ತರನ್ತೇನ ಓತರನ್ತಾನಂ ಮಗ್ಗೋ ದಾತಬ್ಬೋ. ಯೋ ಪಚ್ಛಾ ಜನ್ತಾಘರಾ ನಿಕ್ಖಮತಿ, ಸಚೇ ಜನ್ತಾಘರಂ ಚಿಕ್ಖಲ್ಲಂ ಹೋತಿ, ಧೋವಿತಬ್ಬಂ. ಮತ್ತಿಕಾದೋಣಿಕಂ ಧೋವಿತ್ವಾ ಜನ್ತಾಘರಪೀಠಂ ಪಟಿಸಾಮೇತ್ವಾ ಅಗ್ಗಿಂ ವಿಜ್ಝಾಪೇತ್ವಾ ದ್ವಾರಂ ಥಕೇತ್ವಾ ಪಕ್ಕಮಿತಬ್ಬಂ. ಇದಂ ಖೋ, ಭಿಕ್ಖವೇ, ಭಿಕ್ಖೂನಂ ಜನ್ತಾಘರವತ್ತಂ ಯಥಾ ಭಿಕ್ಖೂಹಿ ಜನ್ತಾಘರೇ ಸಮ್ಮಾ ವತ್ತಿತಬ್ಬ’’ನ್ತಿ.