೭. ಆರಞ್ಞಿಕವತ್ತಕಥಾ

೩೬೭. ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖೂ ಅರಞ್ಞೇ ವಿಹರನ್ತಿ. ತೇ ನೇವ ಪಾನೀಯಂ ಉಪಟ್ಠಾಪೇನ್ತಿ, ನ ಪರಿಭೋಜನೀಯಂ ಉಪಟ್ಠಾಪೇನ್ತಿ, ನ ಅಗ್ಗಿಂ ಉಪಟ್ಠಾಪೇನ್ತಿ, ನ ಅರಣಿಸಹಿತಂ ಉಪಟ್ಠಾಪೇನ್ತಿ, ನ ನಕ್ಖತ್ತಪದಾನಿ ಜಾನನ್ತಿ, ನ ದಿಸಾಭಾಗಂ ಜಾನನ್ತಿ. ಚೋರಾ ತತ್ಥ ಗನ್ತ್ವಾ ತೇ ಭಿಕ್ಖೂ ಏತದವೋಚುಂ – ‘‘ಅತ್ಥಿ, ಭನ್ತೇ, ಪಾನೀಯ’’ನ್ತಿ? ‘‘ನತ್ಥಾವುಸೋ’’ತಿ. ‘‘ಅತ್ಥಿ, ಭನ್ತೇ, ಪರಿಭೋಜನೀಯ’’ನ್ತಿ? ‘‘ನತ್ಥಾವುಸೋ’’ತಿ. ‘‘ಅತ್ಥಿ, ಭನ್ತೇ, ಅಗ್ಗೀ’’ತಿ? ‘‘ನತ್ಥಾವುಸೋ’’ತಿ. ‘‘ಅತ್ಥಿ, ಭನ್ತೇ, ಅರಣಿಸಹಿತ’’ನ್ತಿ? ‘‘ನತ್ಥಾವುಸೋ’’ತಿ. ( ) [(ಅತ್ಥಿ ಭನ್ತೇ ನಕ್ಖತ್ತಪದಾನೀತಿ, ನ ಜಾನಾಮ ಆವುಸೋತಿ, ಅತ್ಥಿ ಭನ್ತೇ ದಿಸಾಭಾಗನ್ತಿ, ನ ಜಾನಾಮ ಆವುಸೋತಿ.) ಸೀ. ವಿಮತಿಟೀಕಾಯ ಪನ ಸಮೇತಿ] ‘‘ಕೇನಜ್ಜ, ಭನ್ತೇ, ಯುತ್ತ’’ನ್ತಿ? ‘‘ನ ಖೋ ಮಯಂ, ಆವುಸೋ, ಜಾನಾಮಾ’’ತಿ. ‘‘ಕತಮಾಯಂ, ಭನ್ತೇ, ದಿಸಾ’’ತಿ? ‘‘ನ ಖೋ ಮಯಂ, ಆವುಸೋ, ಜಾನಾಮಾ’’ತಿ. ಅಥ ಖೋ ತೇ ಚೋರಾ – ‘ನೇವಿಮೇಸಂ ಪಾನೀಯಂ ಅತ್ಥಿ, ನ ಪರಿಭೋಜನೀಯಂ ಅತ್ಥಿ, ನ ಅಗ್ಗಿ ಅತ್ಥಿ, ನ ಅರಣಿಸಹಿತಂ ಅತ್ಥಿ, ನ ನಕ್ಖತ್ತಪದಾನಿ ಜಾನನ್ತಿ, ನ ದಿಸಾಭಾಗಂ ಜಾನನ್ತಿ; ಚೋರಾ ಇಮೇ, ನಯಿಮೇ ಭಿಕ್ಖೂ’ತಿ – ಆಕೋಟೇತ್ವಾ ಪಕ್ಕಮಿಂಸು. ಅಥ ಖೋ ತೇ ಭಿಕ್ಖೂ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೩೬೮. ‘‘ತೇನ ಹಿ, ಭಿಕ್ಖವೇ, ಆರಞ್ಞಿಕಾನಂ ಭಿಕ್ಖೂನಂ ವತ್ತಂ ಪಞ್ಞಪೇಸ್ಸಾಮಿ ಯಥಾ ಆರಞ್ಞಿಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬಂ. ಆರಞ್ಞಿಕೇನ, ಭಿಕ್ಖವೇ, ಭಿಕ್ಖುನಾ ಕಾಲಸ್ಸೇವ ಉಟ್ಠಾಯ ಪತ್ತಂ ಥವಿಕಾಯ ಪಕ್ಖಿಪಿತ್ವಾ ಅಂಸೇ ಆಲಗ್ಗೇತ್ವಾ ಚೀವರಂ ಖನ್ಧೇ ಕರಿತ್ವಾ ಉಪಾಹನಾ ಆರೋಹಿತ್ವಾ ದಾರುಭಣ್ಡಂ ಮತ್ತಿಕಾಭಣ್ಡಂ ಪಟಿಸಾಮೇತ್ವಾ ದ್ವಾರವಾತಪಾನಂ ಥಕೇತ್ವಾ ಸೇನಾಸನಾ ಓತರಿತಬ್ಬಂ – ಇದಾನಿ ಗಾಮಂ ಪವಿಸಿಸ್ಸಾಮೀತಿ. ಉಪಾಹನಾ ಓಮುಞ್ಚಿತ್ವಾ ನೀಚಂ ಕತ್ವಾ ಪಪ್ಫೋಟೇತ್ವಾ ಥವಿಕಾಯ ಪಕ್ಖಿಪಿತ್ವಾ ಅಂಸೇ ಆಲಗ್ಗೇತ್ವಾ ತಿಮಣ್ಡಲಂ ಪಟಿಚ್ಛಾದೇನ್ತೇನ ಪರಿಮಣ್ಡಲಂ ನಿವಾಸೇತ್ವಾ ಕಾಯಬನ್ಧನಂ ಬನ್ಧಿತ್ವಾ ಸಗುಣಂ ಕತ್ವಾ ಸಙ್ಘಾಟಿಯೋ ಪಾರುಪಿತ್ವಾ ಗಣ್ಠಿಕಂ ಪಟಿಮುಞ್ಚಿತ್ವಾ ಧೋವಿತ್ವಾ ಪತ್ತಂ ಗಹೇತ್ವಾ ಸಾಧುಕಂ ಅತರಮಾನೇನ ಗಾಮೋ ಪವಿಸಿತಬ್ಬೋ. ಸುಪ್ಪಟಿಚ್ಛನ್ನೇನ ಅನ್ತರಘರೇ ಗನ್ತಬ್ಬಂ…ಪೇ… ನ ಖಮ್ಭಕತೇನ ಅನ್ತರಘರೇ ಗನ್ತಬ್ಬಂ. ನ ಓಗುಣ್ಠಿತೇನ ಅನ್ತರಘರೇ ಗನ್ತಬ್ಬಂ. ನ ಉಕ್ಕುಟಿಕಾಯ ಅನ್ತರಘರೇ ಗನ್ತಬ್ಬಂ.

‘‘ನಿವೇಸನಂ ಪವಿಸನ್ತೇನ ಸಲ್ಲಕ್ಖೇತಬ್ಬಂ – ‘ಇಮಿನಾ ಪವಿಸಿಸ್ಸಾಮಿ, ಇಮಿನಾ ನಿಕ್ಖಮಿಸ್ಸಾಮೀ’ತಿ. ನಾತಿಸಹಸಾ ಪವಿಸಿತಬ್ಬಂ. ನಾತಿಸಹಸಾ ನಿಕ್ಖಮಿತಬ್ಬಂ. ನಾತಿದೂರೇ ಠಾತಬ್ಬಂ. ನಾಚ್ಚಾಸನ್ನೇ ಠಾತಬ್ಬಂ. ನಾತಿಚಿರಂ ಠಾತಬ್ಬಂ. ನಾತಿಲಹುಂ ನಿವತ್ತಿತಬ್ಬಂ. ಠಿತಕೇನ ಸಲ್ಲಕ್ಖೇತಬ್ಬಂ – ‘ಭಿಕ್ಖಂ ದಾತುಕಾಮಾ ವಾ ಅದಾತುಕಾಮಾ ವಾ’ತಿ. ಸಚೇ ಕಮ್ಮಂ ವಾ ನಿಕ್ಖಿಪತಿ, ಆಸನಾ ವಾ ವುಟ್ಠಾತಿ, ಕಟಚ್ಛುಂ ವಾ ಪರಾಮಸತಿ, ಭಾಜನಂ ವಾ ಪರಾಮಸತಿ, ಠಪೇತಿ ವಾ – ದಾತುಕಾಮಸ್ಸಾತಿ ಠಾತಬ್ಬಂ. ಭಿಕ್ಖಾಯ ದಿಯ್ಯಮಾನಾಯ ವಾಮೇನ ಹತ್ಥೇನ ಸಙ್ಘಾಟಿಂ ಉಚ್ಚಾರೇತ್ವಾ ದಕ್ಖಿಣೇನ ಹತ್ಥೇನ ಪತ್ತಂ ಪಣಾಮೇತ್ವಾ ಉಭೋಹಿ ಹತ್ಥೇಹಿ ಪತ್ತಂ ಪಟಿಗ್ಗಹೇತ್ವಾ ಭಿಕ್ಖಾ ಪಟಿಗ್ಗಹೇತಬ್ಬಾ. ನ ಚ ಭಿಕ್ಖಾದಾಯಿಕಾಯ ಮುಖಂ ಉಲ್ಲೋಕೇತಬ್ಬಂ. ಸಲ್ಲಕ್ಖೇತಬ್ಬಂ – ‘ಸೂಪಂ ದಾತುಕಾಮಾ ವಾ ಅದಾತುಕಾಮಾ ವಾ’ತಿ. ಸಚೇ ಕಟಚ್ಛು ವಾ ಪರಾಮಸತಿ, ಭಾಜನಂ ವಾ ಪರಾಮಸತಿ, ಠಪೇತಿ ವಾ – ದಾತುಕಾಮಸ್ಸಾತಿ ಠಾತಬ್ಬಂ. ಭಿಕ್ಖಾಯ ದಿನ್ನಾಯ ಸಙ್ಘಾಟಿಯಾ ಪತ್ತಂ ಪಟಿಚ್ಛಾದೇತ್ವಾ ಸಾಧುಕಂ ಅತರಮಾನೇನ ನಿವತ್ತಿತಬ್ಬಂ.

‘‘ಸುಪ್ಪಟಿಚ್ಛನ್ನೇನ ಅನ್ತರಘರೇ ಗನ್ತಬ್ಬಂ…ಪೇ… ನ ಉಕ್ಕುಟಿಕಾಯ ಅನ್ತರಘರೇ ಗನ್ತಬ್ಬಂ. ಗಾಮತೋ ನಿಕ್ಖಮಿತ್ವಾ ಪತ್ತಂ ಥವಿಕಾಯ ಪಕ್ಖಿಪಿತ್ವಾ ಅಂಸೇ ಆಲಗ್ಗೇತ್ವಾ ಚೀವರಂ ಸಙ್ಘರಿತ್ವಾ ಸೀಸೇ ಕರಿತ್ವಾ ಉಪಾಹನಾ ಆರೋಹಿತ್ವಾ ಗನ್ತಬ್ಬಂ.

‘‘ಆರಞ್ಞಿಕೇನ, ಭಿಕ್ಖವೇ, ಭಿಕ್ಖುನಾ ಪಾನೀಯಂ ಉಪಟ್ಠಾಪೇತಬ್ಬಂ, ಪರಿಭೋಜನೀಯಂ ಉಪಟ್ಠಾಪೇತಬ್ಬಂ, ಅಗ್ಗಿ ಉಪಟ್ಠಾಪೇತಬ್ಬೋ, ಅರಣಿಸಹಿತಂ ಉಪಟ್ಠಾಪೇತಬ್ಬಂ, ಕತ್ತರದಣ್ಡೋ ಉಪಟ್ಠಾಪೇತಬ್ಬೋ, ನಕ್ಖತ್ತಪದಾನಿ ಉಗ್ಗಹೇತಬ್ಬಾನಿ – ಸಕಲಾನಿ ವಾ ಏಕದೇಸಾನಿ ವಾ, ದಿಸಾಕುಸಲೇನ ಭವಿತಬ್ಬಂ. ಇದಂ ಖೋ, ಭಿಕ್ಖವೇ, ಆರಞ್ಞಿಕಾನಂ ಭಿಕ್ಖೂನಂ ವತ್ತಂ ಯಥಾ ಆರಞ್ಞಿಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬ’’ನ್ತಿ.