೬. ಪಿಣ್ಡಚಾರಿಕವತ್ತಕಥಾ

೩೬೫. ತೇನ ಖೋ ಪನ ಸಮಯೇನ ಪಿಣ್ಡಚಾರಿಕಾ ಭಿಕ್ಖೂ ದುನ್ನಿವತ್ಥಾ ದುಪ್ಪಾರುತಾ ಅನಾಕಪ್ಪಸಮ್ಪನ್ನಾ ಪಿಣ್ಡಾಯ ಚರನ್ತಿ, ಅಸಲ್ಲಕ್ಖೇತ್ವಾಪಿ ನಿವೇಸನಂ ಪವಿಸನ್ತಿ, ಅಸಲ್ಲಕ್ಖೇತ್ವಾಪಿ ನಿಕ್ಖಮನ್ತಿ, ಅತಿಸಹಸಾಪಿ ಪವಿಸನ್ತಿ, ಅತಿಸಹಸಾಪಿ ನಿಕ್ಖಮನ್ತಿ, ಅತಿದೂರೇಪಿ ತಿಟ್ಠನ್ತಿ, ಅಚ್ಚಾಸನ್ನೇಪಿ ತಿಟ್ಠನ್ತಿ, ಅತಿಚಿರಮ್ಪಿ ತಿಟ್ಠನ್ತಿ, ಅತಿಲಹುಮ್ಪಿ ನಿವತ್ತನ್ತಿ. ಅಞ್ಞತರೋಪಿ ಪಿಣ್ಡಚಾರಿಕೋ ಭಿಕ್ಖು ಅಸಲ್ಲಕ್ಖೇತ್ವಾ ನಿವೇಸನಂ ಪಾವಿಸಿ. ಸೋ ಚ ದ್ವಾರಂ ಮಞ್ಞಮಾನೋ ಅಞ್ಞತರಂ ಓವರಕಂ ಪಾವಿಸಿ. ತಸ್ಮಿಮ್ಪಿ ಓವರಕೇ ಇತ್ಥೀ ನಗ್ಗಾ ಉತ್ತಾನಾ ನಿಪನ್ನಾ ಹೋತಿ. ಅದ್ದಸಾ ಖೋ ಸೋ ಭಿಕ್ಖು ತಂ ಇತ್ಥಿಂ ನಗ್ಗಂ ಉತ್ತಾನಂ ನಿಪನ್ನಂ. ದಿಸ್ವಾನ – ‘‘ನಯಿದಂ ದ್ವಾರಂ, ಓವರಕಂ ಇದ’’ನ್ತಿ ತಮ್ಹಾ ಓವರಕಾ ನಿಕ್ಖಮಿ. ಅದ್ದಸಾ ಖೋ ತಸ್ಸಾ ಇತ್ಥಿಯಾ ಸಾಮಿಕೋ ತಂ ಇತ್ಥಿಂ ನಗ್ಗಂ ಉತ್ತಾನಂ ನಿಪನ್ನಂ. ದಿಸ್ವಾನ – ‘‘ಇಮಿನಾ ಮೇ ಭಿಕ್ಖುನಾ ಪಜಾಪತೀ ದೂಸಿತಾ’’ತಿ ತಂ ಭಿಕ್ಖುಂ ಗಹೇತ್ವಾ ಆಕೋಟೇಸಿ. ಅಥ ಖೋ ಸಾ ಇತ್ಥೀ ತೇನ ಸದ್ದೇನ ಪಟಿಬುಜ್ಝಿತ್ವಾ ತಂ ಪುರಿಸಂ ಏತದವೋಚ – ‘‘ಕಿಸ್ಸ ತ್ವಂ, ಅಯ್ಯ, ಇಮಂ ಭಿಕ್ಖುಂ ಆಕೋಟೇಸೀ’’ತಿ? ‘‘ಇಮಿನಾಸಿ ತ್ವಂ ಭಿಕ್ಖುನಾ ದೂಸಿತಾ’’ತಿ? ‘‘ನಾಹಂ, ಅಯ್ಯ, ಇಮಿನಾ ಭಿಕ್ಖುನಾ ದೂಸಿತಾ; ಅಕಾರಕೋ ಸೋ ಭಿಕ್ಖೂ’’ತಿ ತಂ ಭಿಕ್ಖುಂ ಮುಞ್ಚಾಪೇಸಿ. ಅಥ ಖೋ ಸೋ ಭಿಕ್ಖು ಆರಾಮಂ ಗನ್ತ್ವಾ ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಪಿಣ್ಡಚಾರಿಕಾ ಭಿಕ್ಖೂ ದುನ್ನಿವತ್ಥಾ ದುಪ್ಪಾರುತಾ ಅನಾಕಪ್ಪಸಮ್ಪನ್ನಾ ಪಿಣ್ಡಾಯ ಚರಿಸ್ಸನ್ತಿ, ಅಸಲ್ಲಕ್ಖೇತ್ವಾಪಿ ನಿವೇಸನಂ ಪವಿಸಿಸ್ಸನ್ತಿ, ಅಸಲ್ಲಕ್ಖೇತ್ವಾಪಿ ನಿಕ್ಖಮಿಸ್ಸನ್ತಿ, ಅತಿಸಹಸಾಪಿ ಪವಿಸಿಸ್ಸನ್ತಿ, ಅತಿಸಹಸಾಪಿ ನಿಕ್ಖಮಿಸ್ಸನ್ತಿ, ಅತಿದೂರೇಪಿ ತಿಟ್ಠಿಸ್ಸನ್ತಿ, ಅಚ್ಚಾಸನ್ನೇಪಿ ತಿಟ್ಠಿಸ್ಸನ್ತಿ, ಅತಿಚಿರಮ್ಪಿ ತಿಟ್ಠಿಸ್ಸನ್ತಿ, ಅತಿಲಹುಮ್ಪಿ ನಿವತ್ತಿಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ…ಪೇ… ಸಚ್ಚಂ ಭಗವಾತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೩೬೬. ‘‘ತೇನ ಹಿ, ಭಿಕ್ಖವೇ, ಪಿಣ್ಡಚಾರಿಕಾನಂ ಭಿಕ್ಖೂನಂ ವತ್ತಂ ಪಞ್ಞಾಪೇಸ್ಸಾಮಿ ಯಥಾ ಪಿಣ್ಡಚಾರಿಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬಂ. ಪಿಣ್ಡಚಾರಿಕೇನ, ಭಿಕ್ಖವೇ, ಭಿಕ್ಖುನಾ – ‘ಇದಾನಿ ಗಾಮಂ ಪವಿಸಿಸ್ಸಾಮೀ’ತಿ ತಿಮಣ್ಡಲಂ ಪಟಿಚ್ಛಾದೇನ್ತೇನ ಪರಿಮಣ್ಡಲಂ ನಿವಾಸೇತ್ವಾ ಕಾಯಬನ್ಧನಂ ಬನ್ಧಿತ್ವಾ ಸಗುಣಂ ಕತ್ವಾ ಸಙ್ಘಾಟಿಯೋ ಪಾರುಪಿತ್ವಾ ಗಣ್ಠಿಕಂ ಪಟಿಮುಞ್ಚಿತ್ವಾ ಧೋವಿತ್ವಾ ಪತ್ತಂ ಗಹೇತ್ವಾ ಸಾಧುಕಂ ಅತರಮಾನೇನ ಗಾಮೋ ಪವಿಸಿತಬ್ಬೋ.

‘‘ನಿವೇಸನಂ ಪವಿಸನ್ತೇನ ಸಲ್ಲಕ್ಖೇತಬ್ಬಂ – ‘ಇಮಿನಾ ಪವಿಸಿಸ್ಸಾಮಿ, ಇಮಿನಾ ನಿಕ್ಖಮಿಸ್ಸಾಮೀ’ತಿ. ನಾತಿಸಹಸಾ ಪವಿಸಿತಬ್ಬಂ. ನಾತಿಸಹಸಾ ನಿಕ್ಖಮಿತಬ್ಬಂ. ನಾತಿದೂರೇ ಠಾತಬ್ಬಂ. ನಾಚ್ಚಾಸನ್ನೇ ಠಾತಬ್ಬಂ. ನಾತಿಚಿರಂ ಠಾತಬ್ಬಂ. ನಾತಿಲಹುಂ ನಿವತ್ತಿತಬ್ಬಂ. ಠಿತಕೇನ ಸಲ್ಲಕ್ಖೇತಬ್ಬಂ – ‘ಭಿಕ್ಖಂ ದಾತುಕಾಮಾ ವಾ ಅದಾತುಕಾಮಾ ವಾ’ತಿ. ಸಚೇ ಕಮ್ಮಂ ವಾ ನಿಕ್ಖಿಪತಿ, ಆಸನಾ ವಾ ವುಟ್ಠಾತಿ, ಕಟಚ್ಛುಂ ವಾ ಪರಾಮಸತಿ, ಭಾಜನಂ ವಾ ಪರಾಮಸತಿ, ಠಪೇತಿ [ಠಾಪೇತಿ (ಕ.)] ವಾ – ದಾತುಕಾಮಸ್ಸಾತಿ [ದಾತುಕಾಮಿಯಾತಿ (ಸ್ಯಾ.), ದಾತುಕಾಮಾ ವಿಯಾತಿ (ಸೀ.)] ಠಾತಬ್ಬಂ. ಭಿಕ್ಖಾಯ ದಿಯ್ಯಮಾನಾಯ ವಾಮೇನ ಹತ್ಥೇನ ಸಙ್ಘಾಟಿಂ ಉಚ್ಚಾರೇತ್ವಾ ದಕ್ಖಿಣೇನ ಹತ್ಥೇನ ಪತ್ತಂ ಪಣಾಮೇತ್ವಾ ಉಭೋಹಿ ಹತ್ಥೇಹಿ ಪತ್ತಂ ಪಟಿಗ್ಗಹೇತ್ವಾ ಭಿಕ್ಖಾ ಪಟಿಗ್ಗಹೇತಬ್ಬಾ. ನ ಚ ಭಿಕ್ಖಾದಾಯಿಕಾಯ ಮುಖಂ ಉಲ್ಲೋಕೇತಬ್ಬಂ [ಓಲೋಕೇತಬ್ಬಂ (ಸ್ಯಾ.)]. ಸಲ್ಲಕ್ಖೇತಬ್ಬಂ – ‘ಸೂಪಂ ದಾತುಕಾಮಾ ವಾ ಅದಾತುಕಾಮಾ ವಾ’ತಿ. ಸಚೇ ಕಟಚ್ಛುಂ ವಾ ಪರಾಮಸತಿ, ಭಾಜನಂ ವಾ ಪರಾಮಸತಿ, ಠಪೇತಿ ವಾ – ದಾತುಕಾಮಸ್ಸಾತಿ ಠಾತಬ್ಬಂ. ಭಿಕ್ಖಾಯ ದಿನ್ನಾಯ ಸಙ್ಘಾಟಿಯಾ ಪತ್ತಂ ಪಟಿಚ್ಛಾದೇತ್ವಾ ಸಾಧುಕಂ ಅತರಮಾನೇನ ನಿವತ್ತಿತಬ್ಬಂ.

‘‘ಸುಪ್ಪಟಿಚ್ಛನ್ನೇನ ಅನ್ತರಘರೇ ಗನ್ತಬ್ಬಂ. ಸುಸಂವುತೇನ ಅನ್ತರಘರೇ ಗನ್ತಬ್ಬಂ. ಓಕ್ಖಿತ್ತಚಕ್ಖುನಾ ಅನ್ತರಘರೇ ಗನ್ತಬ್ಬಂ. ನ ಉಕ್ಖಿತ್ತಕಾಯ ಅನ್ತರಘರೇ ಗನ್ತಬ್ಬಂ. ನ ಉಜ್ಜಗ್ಘಿಕಾಯ ಅನ್ತರಘರೇ ಗನ್ತಬ್ಬಂ. ಅಪ್ಪಸದ್ದೇನ ಅನ್ತರಘರೇ ಗನ್ತಬ್ಬಂ. ನ ಕಾಯಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ. ನ ಬಾಹುಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ. ನ ಸೀಸಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ. ನ ಖಮ್ಭಕತೇನ ಅನ್ತರಘರೇ ಗನ್ತಬ್ಬಂ. ನ ಓಗುಣ್ಠಿತೇನ ಅನ್ತರಘರೇ ಗನ್ತಬ್ಬಂ. ನ ಉಕ್ಕುಟಿಕಾಯ ಅನ್ತರಘರೇ ಗನ್ತಬ್ಬಂ. ಯೋ ಪಠಮಂ ಗಾಮತೋ ಪಿಣ್ಡಾಯ ಪಟಿಕ್ಕಮತಿ, ತೇನ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಅವಕ್ಕಾರಪಾತಿ ಧೋವಿತ್ವಾ ಉಪಟ್ಠಾಪೇತಬ್ಬಾ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಬ್ಬಂ. ಯೋ ಪಚ್ಛಾ ಗಾಮತೋ ಪಿಣ್ಡಾಯ ಪಟಿಕ್ಕಮತಿ, ಸಚೇ ಹೋತಿ ಭುತ್ತಾವಸೇಸೋ, ಸಚೇ ಆಕಙ್ಖತಿ, ಭುಞ್ಜಿತಬ್ಬಂ. ನೋ ಚೇ ಆಕಙ್ಖತಿ, ಅಪ್ಪಹರಿತೇ ವಾ ಛಡ್ಡೇತಬ್ಬಂ, ಅಪ್ಪಾಣಕೇ ವಾ ಉದಕೇ ಓಪಿಲಾಪೇತಬ್ಬಂ. ತೇನ ಆಸನಂ ಉದ್ಧರಿತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಪಟಿಸಾಮೇತಬ್ಬಂ, ಅವಕ್ಕಾರಪಾತಿ ಧೋವಿತ್ವಾ ಪಟಿಸಾಮೇತಬ್ಬಾ, ಪಾನೀಯಂ ಪರಿಭೋಜನೀಯಂ ಪಟಿಸಾಮೇತಬ್ಬಂ, ಭತ್ತಗ್ಗಂ ಸಮ್ಮಜ್ಜಿತಬ್ಬಂ. ಯೋ ಪಸ್ಸತಿ ಪಾನೀಯಘಟಂ ವಾ ಪರಿಭೋಜನೀಯಘಟಂ ವಾ ವಚ್ಚಘಟಂ ವಾ ರಿತ್ತಂ ತುಚ್ಛಂ ತೇನ ಉಪಟ್ಠಾಪೇತಬ್ಬಂ. ಸಚಸ್ಸ ಹೋತಿ ಅವಿಸಯ್ಹಂ, ಹತ್ಥವಿಕಾರೇನ ದುತಿಯಂ ಆಮನ್ತೇತ್ವಾ ಹತ್ಥವಿಲಙ್ಘಕೇನ ಉಪಟ್ಠಾಪೇತಬ್ಬಂ, ನ ಚ ತಪ್ಪಚ್ಚಯಾ ವಾಚಾ ಭಿನ್ದಿತಬ್ಬಾ. ಇದಂ ಖೋ, ಭಿಕ್ಖವೇ, ಪಿಣ್ಡಚಾರಿಕಾನಂ ಭಿಕ್ಖೂನಂ ವತ್ತಂ ಯಥಾ ಪಿಣ್ಡಚಾರಿಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬ’’ನ್ತಿ.