೫. ಭತ್ತಗ್ಗವತ್ತಕಥಾ

೩೬೩. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ದುನ್ನಿವತ್ಥಾ ದುಪ್ಪಾರುತಾ ಅನಾಕಪ್ಪಸಮ್ಪನ್ನಾ ಭತ್ತಗ್ಗಂ ಗಚ್ಛನ್ತಿ, ವೋಕ್ಕಮ್ಮಪಿ ಥೇರಾನಂ ಭಿಕ್ಖೂನಂ ಪುರತೋ ಪುರತೋ ಗಚ್ಛನ್ತಿ, ಥೇರೇಪಿ ಭಿಕ್ಖೂ ಅನುಪಖಜ್ಜ ನಿಸೀದನ್ತಿ, ನವೇಪಿ ಭಿಕ್ಖೂ ಆಸನೇನ ಪಟಿಬಾಹನ್ತಿ, ಸಙ್ಘಾಟಿಮ್ಪಿ ಓತ್ಥರಿತ್ವಾ ಅನ್ತರಘರೇ ನಿಸೀದನ್ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ದುನ್ನಿವತ್ಥಾ ದುಪ್ಪಾರುತಾ ಅನಾಕಪ್ಪಸಮ್ಪನ್ನಾ ಭತ್ತಗ್ಗಂ ಗಚ್ಛಿಸ್ಸನ್ತಿ, ವೋಕ್ಕಮ್ಮಪಿ ಥೇರಾನಂ ಭಿಕ್ಖೂನಂ ಪುರತೋ ಪುರತೋ ಗಚ್ಛಿಸ್ಸನ್ತಿ, ಥೇರೇಪಿ ಭಿಕ್ಖೂ ಅನುಪಖಜ್ಜ ನಿಸೀದಿಸ್ಸನ್ತಿ, ನವೇಪಿ ಭಿಕ್ಖೂ ಆಸನೇನಪಿ ಪಟಿಬಾಹಿಸ್ಸನ್ತಿ, ಸಙ್ಘಾಟಿಮ್ಪಿ ಓತ್ಥರಿತ್ವಾ ಅನ್ತರಘರೇ ನಿಸೀದಿಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖೂ ದುನ್ನಿವತ್ಥಾ ದುಪ್ಪಾರುತಾ ಅನಾಕಪ್ಪಸಮ್ಪನ್ನಾ ಭತ್ತಗ್ಗಂ ಗಚ್ಛನ್ತಿ, ವೋಕ್ಕಮ್ಮಪಿ ಥೇರಾನಂ ಭಿಕ್ಖೂನಂ ಪುರತೋ ಪುರತೋ ಗಚ್ಛನ್ತಿ, ಥೇರೇಪಿ ಭಿಕ್ಖೂ ಅನುಪಖಜ್ಜ ನಿಸೀದನ್ತಿ, ನವೇಪಿ ಭಿಕ್ಖೂ ಆಸನೇನ ಪಟಿಬಾಹನ್ತಿ, ಸಙ್ಘಾಟಿಮ್ಪಿ ಓತ್ಥರಿತ್ವಾ ಅನ್ತರಘರೇ ನಿಸೀದನ್ತೀ’’ತಿ? ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೩೬೪. ‘‘ತೇನ ಹಿ, ಭಿಕ್ಖವೇ, ಭಿಕ್ಖೂನಂ ಭತ್ತಗ್ಗವತ್ತಂ ಪಞ್ಞಪೇಸ್ಸಾಮಿ ಯಥಾ ಭಿಕ್ಖೂಹಿ ಭತ್ತಗ್ಗೇ ಸಮ್ಮಾ ವತ್ತಿತಬ್ಬಂ. ಸಚೇ ಆರಾಮೇ ಕಾಲೋ ಆರೋಚಿತೋ ಹೋತಿ, ತಿಮಣ್ಡಲಂ ಪಟಿಚ್ಛಾದೇನ್ತೇನ ಪರಿಮಣ್ಡಲಂ ನಿವಾಸೇತ್ವಾ ಕಾಯಬನ್ಧನಂ ಬನ್ಧಿತ್ವಾ ಸಗುಣಂ ಕತ್ವಾ ಸಙ್ಘಾಟಿಯೋ ಪಾರುಪಿತ್ವಾ ಗಣ್ಠಿಕಂ ಪಟಿಮುಞ್ಚಿತ್ವಾ ಧೋವಿತ್ವಾ ಪತ್ತಂ ಗಹೇತ್ವಾ ಸಾಧುಕಂ ಅತರಮಾನೇನ ಗಾಮೋ ಪವಿಸಿತಬ್ಬೋ.

‘‘ನ ವೋಕ್ಕಮ್ಮ ಥೇರಾನಂ ಭಿಕ್ಖೂನಂ ಪುರತೋ ಪುರತೋ ಗನ್ತಬ್ಬಂ. ಸುಪ್ಪಟಿಚ್ಛನ್ನೇನ ಅನ್ತರಘರೇ ಗನ್ತಬ್ಬಂ. ಸುಸಂವುತೇನ ಅನ್ತರಘರೇ ಗನ್ತಬ್ಬಂ. ಓಕ್ಖಿತ್ತಚಕ್ಖುನಾ ಅನ್ತರಘರೇ ಗನ್ತಬ್ಬಂ. ನ ಉಕ್ಖಿತ್ತಕಾಯ ಅನ್ತರಘರೇ ಗನ್ತಬ್ಬಂ. ನ ಉಜ್ಜಗ್ಘಿಕಾಯ ಅನ್ತರಘರೇ ಗನ್ತಬ್ಬಂ. ಅಪ್ಪಸದ್ದೇನ ಅನ್ತರಘರೇ ಗನ್ತಬ್ಬಂ. ನ ಕಾಯಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ. ನ ಬಾಹುಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ. ನ ಸೀಸಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ. ನ ಖಮ್ಭಕತೇನ ಅನ್ತರಘರೇ ಗನ್ತಬ್ಬಂ. ನ ಓಗುಣ್ಠಿತೇನ ಅನ್ತರಘರೇ ಗನ್ತಬ್ಬಂ. ನ ಉಕ್ಕುಟಿಕಾಯ ಅನ್ತರಘರೇ ಗನ್ತಬ್ಬಂ.

‘‘ಸುಪ್ಪಟಿಚ್ಛನ್ನೇನ ಅನ್ತರಘರೇ ನಿಸೀದಿತಬ್ಬಂ. ಸುಸಂವುತೇನ ಅನ್ತರಘರೇ ನಿಸೀದಿತಬ್ಬಂ. ಓಕ್ಖಿತ್ತಚಕ್ಖುನಾ ಅನ್ತರಘರೇ ನಿಸೀದಿತಬ್ಬಂ. ನ ಉಕ್ಖಿತ್ತಕಾಯ ಅನ್ತರಘರೇ ನಿಸೀದಿತಬ್ಬಂ ನ ಉಜ್ಜಗ್ಘಿಕಾಯ ಅನ್ತರಘರೇ ನಿಸೀದಿತಬ್ಬಂ, ಅಪ್ಪಸದ್ದೇನ ಅನ್ತರಘರೇ ನಿಸೀದಿತಬ್ಬ. ನ ಕಾಯಪ್ಪಚಾಲಕಂ ಅನ್ತರಘರೇ ನಿಸೀದಿತಬ್ಬಂ. ನ ಬಾಹುಪ್ಪಚಾಲಕಂ ಅನ್ತರಘರೇ ನಿಸೀದಿತಬ್ಬಂ. ನ ಸೀಸಪ್ಪಚಾಲಕಂ ಅನ್ತರಘರೇ ನಿಸೀದಿತಬ್ಬಂ. ನ ಖಮ್ಭಕತೇನ ಅನ್ತರಘರೇ ನಿಸೀದಿತಬ್ಬಂ. ನ ಓಗುಣ್ಠಿತೇನ ಅನ್ತರಘರೇ ನಿಸೀದಿತಬ್ಬಂ. ನ ಪಲ್ಲತ್ಥಿಕಾಯ ಅನ್ತರಘರೇ ನಿಸೀದಿತಬ್ಬಂ. ನ ಥೇರೇ ಭಿಕ್ಖೂ ಅನುಪಖಜ್ಜ ನಿಸೀದಿತಬ್ಬಂ. ನ ನವಾ ಭಿಕ್ಖೂ ಆಸನೇನ ಪಟಿಬಾಹಿತಬ್ಬಾ. ನ ಸಙ್ಘಾಟಿಂ ಓತ್ಥರಿತ್ವಾ ಅನ್ತರಘರೇ ನಿಸೀದಿತಬ್ಬಂ.

‘‘ಉದಕೇ ದಿಯ್ಯಮಾನೇ ಉಭೋಹಿ ಹತ್ಥೇಹಿ ಪತ್ತಂ ಪಟಿಗ್ಗಹೇತ್ವಾ ಉದಕಂ ಪಟಿಗ್ಗಹೇತಬ್ಬಂ. ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ ಪತ್ತೋ ಧೋವಿತಬ್ಬೋ. ಸಚೇ ಉದಕಪ್ಪಟಿಗ್ಗಾಹಕೋ ಹೋತಿ, ನೀಚಂ ಕತ್ವಾ ಉದಕಪ್ಪಟಿಗ್ಗಹೇ ಉದಕಂ ಆಸಿಞ್ಚಿತಬ್ಬಂ – ಮಾ ಉದಕಪ್ಪಟಿಗ್ಗಾಹಕೋ ಉದಕೇನ ಓಸಿಞ್ಚಿ [ಓಸಿಞ್ಚಿಯ್ಯೀ (ಕ.)], ಮಾ ಸಾಮನ್ತಾ ಭಿಕ್ಖೂ ಉದಕೇನ ಓಸಿಞ್ಚಿಂಸು [ಓಸಿಞ್ಚಿಯ್ಯಿಂಸು (ಕ.)], ಮಾ ಸಙ್ಘಾಟಿ ಉದಕೇನ ಓಸಿಞ್ಚೀತಿ. ಸಚೇ ಉದಕಪ್ಪಟಿಗ್ಗಾಹಕೋ ನ ಹೋತಿ, ನೀಚಂ ಕತ್ವಾ ಛಮಾಯ ಉದಕಂ ಆಸಿಞ್ಚಿತಬ್ಬಂ – ಮಾ ಸಾಮನ್ತಾ ಭಿಕ್ಖೂ ಉದಕೇನ ಓಸಿಞ್ಚಿಂಸು, ಮಾ ಸಙ್ಘಾಟಿ ಉದಕೇನ ಓಸಿಞ್ಚೀತಿ.

‘‘ಓದನೇ ದಿಯ್ಯಮಾನೇ ಉಭೋಹಿ ಹತ್ಥೇಹಿ ಪತ್ತಂ ಪಟಿಗ್ಗಹೇತ್ವಾ ಓದನೋ ಪಟಿಗ್ಗಹೇತಬ್ಬೋ, ಸೂಪಸ್ಸ ಓಕಾಸೋ ಕಾತಬ್ಬೋ. ಸಚೇ ಹೋತಿ ಸಪ್ಪಿ ವಾ ತೇಲಂ ವಾ ಉತ್ತರಿಭಙ್ಗಂ ವಾ, ಥೇರೇನ ವತ್ತಬ್ಬೋ – ‘ಸಬ್ಬೇಸಂ ಸಮಕಂ ಸಮ್ಪಾದೇಹೀ’ತಿ. ಸಕ್ಕಚ್ಚಂ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ. ಪತ್ತಸಞ್ಞಿನಾ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ. ಸಮಸೂಪಕೋ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ. ಸಮತಿತ್ತಿಕೋ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ.

‘‘ನ ತಾವ ಥೇರೇನ ಭುಞ್ಜಿತಬ್ಬಂ ಯಾವ ನ ಸಬ್ಬೇಸಂ ಓದನೋ ಸಮ್ಪತ್ತೋ ಹೋತಿ. ಸಕ್ಕಚ್ಚಂ ಪಿಣ್ಡಪಾತೋ ಭುಞ್ಜಿತಬ್ಬೋ. ಪತ್ತಸಞ್ಞಿನಾ ಪಿಣ್ಡಪಾತೋ ಭುಞ್ಜಿತಬ್ಬೋ. ಸಪದಾನಂ ಪಿಣ್ಡಪಾತೋ ಭುಞ್ಜಿತಬ್ಬೋ. ಸಮಸೂಪಕೋ ಪಿಣ್ಡಪಾತೋ ಭುಞ್ಜಿತಬ್ಬೋ. ನ ಥೂಪಕತೋ ಓಮದ್ದಿತ್ವಾ ಪಿಣ್ಡಿಪಾತೋ ಭುಞ್ಜಿತಬ್ಬೋ. ನ ಸೂಪಂ ವಾ ಬ್ಯಞ್ಜನಂ ವಾ ಓದನೇನ ಪಟಿಚ್ಛಾದೇತಬ್ಬಂ ಭಿಯ್ಯೋಕಮ್ಯತಂ ಉಪಾದಾಯ. ನ ಸೂಪಂ ವಾ ಓದನಂ ವಾ ಅಗಿಲಾನೇನ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜಿತಬ್ಬಂ. ನ ಉಜ್ಝಾನಸಞ್ಞಿನಾ ಪರೇಸಂ ಪತ್ತೋ ಓಲೋಕೇತಬ್ಬೋ. ನಾತಿಮಹನ್ತೋ ಕಬಳೋ ಕಾತಬ್ಬೋ. ಪರಿಮಣ್ಡಲೋ ಆಲೋಪೋ ಕಾತಬ್ಬೋ. ನ ಅನಾಹಟೇ ಕಬಳೇ ಮುಖದ್ವಾರಂ ವಿವರಿತಬ್ಬಂ. ನ ಭುಞ್ಜಮಾನೇನ ಸಬ್ಬೋ ಹತ್ಥೋ ಮುಖೇ ಪಕ್ಖಿಪಿತಬ್ಬೋ. ನ ಸಕಬಳೇನ ಮುಖೇನ ಬ್ಯಾಹರಿತಬ್ಬಂ. ನ ಪಿಣ್ಡುಕ್ಖೇಪಕಂ ಭುಞ್ಜಿತಬ್ಬಂ. ನ ಕಬಳಾವಚ್ಛೇದಕಂ ಭುಞ್ಜಿತಬ್ಬಂ. ನ ಅವಗಣ್ಡಕಾರಕಂ ಭುಞ್ಜಿತಬ್ಬಂ. ನ ಹತ್ಥನಿದ್ಧುನಕಂ ಭುಞ್ಜಿತಬ್ಬಂ. ನ ಸಿತ್ಥಾವಕಾರಕಂ ಭುಞ್ಜಿತಬ್ಬಂ. ನ ಜಿವ್ಹಾನಿಚ್ಛಾರಕಂ ಭುಞ್ಜಿತಬ್ಬಂ. ನ ಚಪುಚಪುಕಾರಕಂ ಭುಞ್ಜಿತಬ್ಬಂ. ನ ಸುರುಸುರುಕಾರಕಂ ಭುಞ್ಜಿತಬ್ಬಂ. ನ ಹತ್ಥನಿಲ್ಲೇಹಕಂ ಭುಞ್ಜಿತಬ್ಬಂ. ನ ಪತ್ತನಿಲ್ಲೇಹಕಂ ಭುಞ್ಜಿತಬ್ಬಂ. ನ ಓಟ್ಠನಿಲ್ಲೇಹಕಂ ಭುಞ್ಜಿತಬ್ಬಂ.

‘‘ನ ಸಾಮಿಸೇನ ಹತ್ಥೇನ ಪಾನೀಯಥಾಲಕೋ ಪಟಿಗ್ಗಹೇತಬ್ಬೋ. ನ ತಾವ ಥೇರೇನ ಉದಕಂ ಪಟಿಗ್ಗಹೇತಬ್ಬಂ ಯಾವ ನ ಸಬ್ಬೇವ ಭುತ್ತಾವಿನೋ ಹೋನ್ತಿ. ಉದಕೇ ದಿಯ್ಯಮಾನೇ ಉಭೋಹಿ ಹತ್ಥೇಹಿ ಪತ್ತಂ ಪಟಿಗ್ಗಹೇತ್ವಾ ಉದಕಂ ಪಟಿಗ್ಗಹೇತಬ್ಬಂ. ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ ಪತ್ತೋ ಧೋವಿತಬ್ಬೋ. ಸಚೇ ಉದಕಪ್ಪಟಿಗ್ಗಾಹಕೋ ಹೋತಿ, ನೀಚಂ ಕತ್ವಾ ಉದಕಪ್ಪಟಿಗ್ಗಹೇ ಉದಕಂ ಆಸಿಞ್ಚಿತಬ್ಬಂ – ಮಾ ಉದಕಪ್ಪಟಿಗ್ಗಾಹಕೋ ಉದಕೇನ ಓಸಿಞ್ಚಿ, ಮಾ ಸಾಮನ್ತಾ ಭಿಕ್ಖೂ ಉದಕೇನ ಓಸಿಞ್ಚಿಂಸು, ಮಾ ಸಙ್ಘಾಟಿ ಉದಕೇನ ಓಸಿಞ್ಚೀತಿ. ಸಚೇ ಉದಕಪ್ಪಟಿಗ್ಗಾಹಕೋ ನ ಹೋತಿ, ನೀಚಂ ಕತ್ವಾ ಛಮಾಯ ಉದಕಂ ಆಸಿಞ್ಚಿತಬ್ಬಂ – ಮಾ ಸಾಮನ್ತಾ ಭಿಕ್ಖೂ ಉದಕೇನ ಓಸಿಞ್ಚಿಂಸು, ಮಾ ಸಙ್ಘಾಟಿ ಉದಕೇನ ಓಸಿಞ್ಚೀತಿ. ನ ಸಸಿತ್ಥಕಂ ಪತ್ತಧೋವನಂ ಅನ್ತರಘರೇ ಛಡ್ಡೇತಬ್ಬಂ.

‘‘ನಿವತ್ತನ್ತೇನ ನವಕೇಹಿ ಭಿಕ್ಖೂಹಿ ಪಠಮತರಂ ನಿವತ್ತಿತಬ್ಬಂ. ಪಚ್ಛಾ ಥೇರೇಹಿ ಸುಪ್ಪಟಿಚ್ಛನ್ನೇನ ಅನ್ತರಘರೇ ಗನ್ತಬ್ಬಂ. ಸುಸಂವುತೇನ ಅನ್ತರಘರೇ ಗನ್ತಬ್ಬಂ. ಓಕ್ಖಿತ್ತಚಕ್ಖುನಾ ಅನ್ತರಘರೇ ಗನ್ತಬ್ಬಂ. ನ ಉಕ್ಖಿತ್ತಕಾಯ ಅನ್ತರಘರೇ ಗನ್ತಬ್ಬಂ. ನ ಉಜ್ಜಗ್ಘಿಕಾಯ ಅನ್ತರಘರೇ ಗನ್ತಬ್ಬಂ. ಅಪ್ಪಸದ್ದೇನ ಅನ್ತರಘರೇ ಗನ್ತಬ್ಬಂ. ನ ಕಾಯಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ. ನ ಬಾಹುಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ. ನ ಸೀಸಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ. ನ ಖಮ್ಭಕತೇನ ಅನ್ತರಘರೇ ಗನ್ತಬ್ಬಂ. ನ ಓಗುಣ್ಠಿತೇನ ಅನ್ತರಘರೇ ಗನ್ತಬ್ಬಂ. ನ ಉಕ್ಕುಟಿಕಾಯ ಅನ್ತರಘರೇ ಗನ್ತಬ್ಬಂ. ಇದಂ ಖೋ, ಭಿಕ್ಖವೇ, ಭಿಕ್ಖೂನಂ ಭತ್ತಗ್ಗವತ್ತಂ ಯಥಾ ಭಿಕ್ಖೂಹಿ ಭತ್ತಗ್ಗೇ ಸಮ್ಮಾ ವತ್ತಿತಬ್ಬ’’ನ್ತಿ.

ಪಠಮಭಾಣವಾರೋ ನಿಟ್ಠಿತೋ.