೨. ಆವಾಸಿಕವತ್ತಕಥಾ

೩೫೮. ತೇನ ಖೋ ಪನ ಸಮಯೇನ ಆವಾಸಿಕಾ ಭಿಕ್ಖೂ ಆಗನ್ತುಕೇ ಭಿಕ್ಖೂ ದಿಸ್ವಾ ನೇವ ಆಸನಂ ಪಞ್ಞಪೇನ್ತಿ, ನ ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪನ್ತಿ, ನ ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಣ್ಹನ್ತಿ, ನ ಪಾನೀಯೇನ ಪುಚ್ಛನ್ತಿ [ನ ಪಾನೀಯೇನ ಪುಚ್ಛನ್ತಿ, ನ ಪರಿಭೋಜನೀಯೇನ ಪುಚ್ಛನ್ತಿ (ಸ್ಯಾ. ಕಂ.)], ನ ವುಡ್ಢತರೇಪಿ ಆಗನ್ತುಕೇ ಭಿಕ್ಖೂ ಅಭಿವಾದೇನ್ತಿ, ನ ಸೇನಾಸನಂ ಪಞ್ಞಪೇನ್ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆವಾಸಿಕಾ ಭಿಕ್ಖೂ ಆಗನ್ತುಕೇ ಭಿಕ್ಖೂ ದಿಸ್ವಾ ನೇವ ಆಸನಂ ಪಞ್ಞಪೇಸ್ಸನ್ತಿ, ನ ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿಸ್ಸನ್ತಿ, ನ ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹಿಸ್ಸನ್ತಿ, ನ ಪಾನೀಯೇನ ಪುಚ್ಛಿಸ್ಸನ್ತಿ, ವುಡ್ಢತರೇಪಿ ಆಗನ್ತುಕೇ ಭಿಕ್ಖೂ ನ ಅಭಿವಾದೇಸ್ಸನ್ತಿ, ನ ಸೇನಾಸನಂ ಪಞ್ಞಪೇಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರಂ, ಭಿಕ್ಖವೇ…ಪೇ… ಸಚ್ಚಂ ಭಗವಾತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೩೫೯. ‘‘ತೇನ ಹಿ, ಭಿಕ್ಖವೇ, ಆವಾಸಿಕಾನಂ ಭಿಕ್ಖೂನಂ ವತ್ತಂ ಪಞ್ಞಪೇಸ್ಸಾಮಿ ಯಥಾ ಆವಾಸಿಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬಂ. ಆವಾಸಿಕೇನ, ಭಿಕ್ಖವೇ, ಭಿಕ್ಖುನಾ ಆಗನ್ತುಕಂ ಭಿಕ್ಖುಂ ವುಡ್ಢತರಂ ದಿಸ್ವಾ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇತಬ್ಬಂ, ಪಾನೀಯೇನ ಪುಚ್ಛಿತಬ್ಬೋ [ಪಾನೀಯೇನ ಪುಚ್ಛಿತಬ್ಬೋ, ಪರಿಭೋಜನೀಯೇನ ಪುಚ್ಛಿತಬ್ಬೋ (ಸ್ಯಾ.)]. ಸಚೇ ಉಸ್ಸಹತಿ, ಉಪಾಹನಾ ಪುಞ್ಛಿತಬ್ಬಾ. ಉಪಾಹನಾ ಪುಞ್ಛನ್ತೇನ ಪಠಮಂ ಸುಕ್ಖೇನ ಚೋಳಕೇನ ಪುಞ್ಛಿತಬ್ಬಾ, ಪಚ್ಛಾ ಅಲ್ಲೇನ. ಉಪಾಹನಾಪುಞ್ಛನಚೋಳಕಂ ಧೋವಿತ್ವಾ [ಧೋವಿತ್ವಾ ಪೀಳೇತ್ವಾ (ಸ್ಯಾ.)] ಏಕಮನ್ತಂ ವಿಸ್ಸಜ್ಜೇತಬ್ಬಂ.

‘‘ಆಗನ್ತುಕೋ ಭಿಕ್ಖು ವುಡ್ಢತರೋ ಅಭಿವಾದೇತಬ್ಬೋ. ಸೇನಾಸನಂ ಪಞ್ಞಪೇತಬ್ಬಂ – ‘ಏತಂ ತೇ ಸೇನಾಸನಂ ಪಾಪುಣಾತೀ’ತಿ. ಅಜ್ಝಾವುಟ್ಠಂ ವಾ ಅನಜ್ಝಾವುಟ್ಠಂ ವಾ ಆಚಿಕ್ಖಿತಬ್ಬಂ. ಗೋಚರೋ ಆಚಿಕ್ಖಿತಬ್ಬೋ. ಅಗೋಚರೋ ಆಚಿಕ್ಖಿತಬ್ಬೋ. ಸೇಕ್ಖಸಮ್ಮತಾನಿ ಕುಲಾನಿ ಆಚಿಕ್ಖಿತಬ್ಬಾನಿ. ವಚ್ಚಟ್ಠಾನಂ ಆಚಿಕ್ಖಿತಬ್ಬಂ. ಪಸ್ಸಾವಟ್ಠಾನಂ ಆಚಿಕ್ಖಿತಬ್ಬಂ. ಪಾನೀಯಂ ಆಚಿಕ್ಖಿತಬ್ಬಂ. ಪರಿಭೋಜನೀಯಂ ಆಚಿಕ್ಖಿತಬ್ಬಂ. ಕತ್ತರದಣ್ಡೋ ಆಚಿಕ್ಖಿತಬ್ಬೋ. ಸಙ್ಘಸ್ಸ ಕತಿಕಸಣ್ಠಾನಂ ಆಚಿಕ್ಖಿತಬ್ಬಂ – ‘ಇಮಂ ಕಾಲಂ ಪವಿಸಿತಬ್ಬಂ, ಇಮಂ ಕಾಲಂ ನಿಕ್ಖಮಿತಬ್ಬ’ನ್ತಿ.

‘‘ಸಚೇ ನವಕೋ ಹೋತಿ, ನಿಸಿನ್ನಕೇನೇವ ಆಚಿಕ್ಖಿತಬ್ಬಂ – ‘ಅತ್ರ ಪತ್ತಂ ನಿಕ್ಖಿಪಾಹಿ, ಅತ್ರ ಚೀವರಂ ನಿಕ್ಖಿಪಾಹಿ, ಇದಂ ಆಸನಂ ನಿಸೀದಾಹೀ’ತಿ. ಪಾನೀಯಂ ಆಚಿಕ್ಖಿತಬ್ಬಂ. ಪರಿಭೋಜನೀಯಂ ಆಚಿಕ್ಖಿತಬ್ಬಂ. ಉಪಾಹನಾಪುಞ್ಛನಚೋಳಕಂ ಆಚಿಕ್ಖಿತಬ್ಬಂ. ಆಗನ್ತುಕೋ ಭಿಕ್ಖು ನವಕೋ ಅಭಿವಾದಾಪೇತಬ್ಬೋ. ಸೇನಾಸನಂ ಆಚಿಕ್ಖಿತಬ್ಬಂ – ‘ಏತಂ ತೇ ಸೇನಾಸನಂ ಪಾಪುಣಾತೀ’ತಿ. ಅಜ್ಝಾವುಟ್ಠಂ ವಾ ಅನಜ್ಝಾವುಟ್ಠಂ ವಾ ಆಚಿಕ್ಖಿತಬ್ಬಂ. ಗೋಚರೋ ಆಚಿಕ್ಖಿತಬ್ಬೋ. ಅಗೋಚರೋ ಆಚಿಕ್ಖಿತಬ್ಬೋ. ಸೇಕ್ಖಸಮ್ಮತಾನಿ ಕುಲಾನಿ ಆಚಿಕ್ಖಿತಬ್ಬಾನಿ. ವಚ್ಚಟ್ಠಾನಂ ಆಚಿಕ್ಖಿತಬ್ಬಂ. ಪಸ್ಸಾವಟ್ಠಾನಂ ಆಚಿಕ್ಖಿತಬ್ಬಂ. ಪಾನೀಯಂ ಆಚಿಕ್ಖಿತಬ್ಬಂ. ಪರಿಭೋಜನೀಯಂ ಆಚಿಕ್ಖಿತಬ್ಬಂ. ಕತ್ತರದಣ್ಡೋ ಆಚಿಕ್ಖಿತಬ್ಬೋ. ಸಙ್ಘಸ್ಸ ಕತಿಕಸಣ್ಠಾನಂ ಆಚಿಕ್ಖಿತಬ್ಬಂ – ‘ಇಮಂ ಕಾಲಂ ಪವಿಸಿತಬ್ಬಂ, ಇಮಂ ಕಾಲಂ ನಿಕ್ಖಮಿತಬ್ಬ’ನ್ತಿ. ಇದಂ ಖೋ, ಭಿಕ್ಖವೇ, ಆವಾಸಿಕಾನಂ ಭಿಕ್ಖೂನಂ ವತ್ತಂ ಯಥಾ ಆವಾಸಿಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬ’’ನ್ತಿ.