೧೪. ಅನ್ತೇವಾಸಿಕವತ್ತಕಥಾ

೩೮೧. ತೇನ ಖೋ ಪನ ಸಮಯೇನ ಆಚರಿಯಾ ಅನ್ತೇವಾಸಿಕೇಸು ನ ಸಮ್ಮಾ ವತ್ತನ್ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಚರಿಯಾ ಅನ್ತೇವಾಸಿಕೇಸು ನ ಸಮ್ಮಾ ವತ್ತಿಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಆಚರಿಯಾ ಅನ್ತೇವಾಸಿಕೇಸು ನ ಸಮ್ಮಾ ವತ್ತನ್ತೀ’’ತಿ? ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೩೮೨. ‘‘ತೇನ ಹಿ, ಭಿಕ್ಖವೇ, ಆಚರಿಯಾನಂ ಅನ್ತೇವಾಸಿಕೇಸು ವತ್ತಂ ಪಞ್ಞಪೇಸ್ಸಾಮಿ ಯಥಾ ಆಚರಿಯೇಹಿ ಅನ್ತೇವಾಸಿಕೇಸು ಸಮ್ಮಾ ವತ್ತಿತಬ್ಬಂ. [ಮಹಾವ. ೭೯] ಆಚರಿಯೇನ, ಭಿಕ್ಖವೇ, ಅನ್ತೇವಾಸಿಕಮ್ಹಿ ಸಮ್ಮಾ ವತ್ತಿತಬ್ಬಂ. ತತ್ರಾಯಂ ಸಮ್ಮಾವತ್ತನಾ –

‘‘ಆಚರಿಯೇನ, ಭಿಕ್ಖವೇ, ಅನ್ತೇವಾಸಿಕೋ ಸಙ್ಗಹೇತಬ್ಬೋ ಅನುಗ್ಗಹೇತಬ್ಬೋ ಉದ್ದೇಸೇನ ಪರಿಪುಚ್ಛಾಯ ಓವಾದೇನ ಅನುಸಾಸನಿಯಾ. ಸಚೇ ಆಚರಿಯಸ್ಸ ಪತ್ತೋ ಹೋತಿ, ಅನ್ತೇವಾಸಿಕಸ್ಸ ಪತ್ತೋ ನ ಹೋತಿ, ಆಚರಿಯೇನ ಅನ್ತೇವಾಸಿಕಸ್ಸ ಪತ್ತೋ ದಾತಬ್ಬೋ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಪತ್ತೋ ಉಪ್ಪಜ್ಜಿಯೇಥಾತಿ. ಸಚೇ ಆಚರಿಯಸ್ಸ ಚೀವರಂ ಹೋತಿ, ಅನ್ತೇವಾಸಿಕಸ್ಸ ಚೀವರಂ ನ ಹೋತಿ, ಆಚರಿಯೇನ ಅನ್ತೇವಾಸಿಕಸ್ಸ ಚೀವರಂ ದಾತಬ್ಬಂ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಚೀವರಂ ಉಪ್ಪಜ್ಜಿಯೇಥಾತಿ. ಸಚೇ ಆಚರಿಯಸ್ಸ ಪರಿಕ್ಖಾರೋ ಹೋತಿ, ಅನ್ತೇವಾಸಿಕಸ್ಸ ಪರಿಕ್ಖಾರೋ ನ ಹೋತಿ, ಆಚರಿಯೇನ ಅನ್ತೇವಾಸಿಕಸ್ಸ ಪರಿಕ್ಖಾರೋ ದಾತಬ್ಬೋ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಪರಿಕ್ಖಾರೋ ಉಪ್ಪಜ್ಜಿಯೇಥಾತಿ.

‘‘ಸಚೇ ಅನ್ತೇವಾಸಿಕೋ ಗಿಲಾನೋ ಹೋತಿ, ಕಾಲಸ್ಸೇವ ಉಟ್ಠಾಯ ದನ್ತಕಟ್ಠಂ ದಾತಬ್ಬಂ, ಮುಖೋದಕಂ ದಾತಬ್ಬಂ, ಆಸನಂ ಪಞ್ಞಪೇತಬ್ಬಂ. ಸಚೇ ಯಾಗು ಹೋತಿ, ಭಾಜನಂ ಧೋವಿತ್ವಾ ಯಾಗು ಉಪನಾಮೇತಬ್ಬಾ. ಯಾಗುಂ ಪೀತಸ್ಸ ಉದಕಂ ದತ್ವಾ ಭಾಜನಂ ಪಟಿಗ್ಗಹೇತ್ವಾ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ ಧೋವಿತ್ವಾ ಪಟಿಸಾಮೇತಬ್ಬಂ. ಅನ್ತೇವಾಸಿಕಮ್ಹಿ ವುಟ್ಠಿತೇ ಆಸನಂ ಉದ್ಧರಿತಬ್ಬಂ. ಸಚೇ ಸೋ ದೇಸೋ ಉಕ್ಲಾಪೋ ಹೋತಿ, ಸೋ ದೇಸೋ ಸಮ್ಮಜ್ಜಿತಬ್ಬೋ.

‘‘ಸಚೇ ಅನ್ತೇವಾಸಿಕೋ ಗಾಮಂ ಪವಿಸಿತುಕಾಮೋ ಹೋತಿ, ನಿವಾಸನಂ ದಾತಬ್ಬಂ, ಪಟಿನಿವಾಸನಂ ಪಟಿಗ್ಗಹೇತಬ್ಬಂ, ಕಾಯಬನ್ಧನಂ ದಾತಬ್ಬಂ, ಸಗುಣಂ ಕತ್ವಾ ಸಙ್ಘಾಟಿಯೋ ದಾತಬ್ಬಾ, ಧೋವಿತ್ವಾ ಪತ್ತೋ ಸೋದಕೋ ದಾತಬ್ಬೋ.

‘‘ಏತ್ತಾವತಾ ನಿವತ್ತಿಸ್ಸತೀತಿ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇತಬ್ಬಂ, ಪಟಿನಿವಾಸನಂ ದಾತಬ್ಬಂ, ನಿವಾಸನಂ ಪಟಿಗ್ಗಹೇತಬ್ಬಂ. ಸಚೇ ಚೀವರಂ ಸಿನ್ನಂ ಹೋತಿ, ಮುಹುತ್ತಂ ಉಣ್ಹೇ ಓತಾಪೇತಬ್ಬಂ, ನ ಚ ಉಣ್ಹೇ ಚೀವರಂ ನಿದಹಿತಬ್ಬಂ. ಚೀವರಂ ಸಙ್ಘರಿತಬ್ಬಂ. ಚೀವರಂ ಸಙ್ಘರನ್ತೇನ ಚತುರಙ್ಗುಲಂ ಕಣ್ಣಂ ಉಸ್ಸಾರೇತ್ವಾ ಚೀವರಂ ಸಙ್ಘರಿತಬ್ಬಂ – ಮಾ ಮಜ್ಝೇ ಭಙ್ಗೋ ಅಹೋಸೀತಿ. ಓಭೋಗೇ ಕಾಯಬನ್ಧನಂ ಕಾತಬ್ಬಂ.

‘‘ಸಚೇ ಪಿಣ್ಡಪಾತೋ ಹೋತಿ, ಅನ್ತೇವಾಸಿಕೋ ಚ ಭುಞ್ಜಿತುಕಾಮೋ ಹೋತಿ, ಉದಕಂ ದತ್ವಾ ಪಿಣ್ಡಪಾತೋ ಉಪನಾಮೇತಬ್ಬೋ. ಅನ್ತೇವಾಸಿಕೋ ಪಾನೀಯೇನ ಪುಚ್ಛಿತಬ್ಬೋ. ಭುತ್ತಾವಿಸ್ಸ ಉದಕಂ ದತ್ವಾ ಪತ್ತಂ ಪಟಿಗ್ಗಹೇತ್ವಾ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ ಧೋವಿತ್ವಾ ವೋದಕಂ ಕತ್ವಾ ಮುಹುತ್ತಂ ಉಣ್ಹೇ ಓತಾಪೇತಬ್ಬೋ, ನ ಚ ಉಣ್ಹೇ ಪತ್ತೋ ನಿದಹಿತಬ್ಬೋ. ಪತ್ತಚೀವರಂ ನಿಕ್ಖಿಪಿತಬ್ಬಂ. ಪತ್ತಂ ನಿಕ್ಖಿಪನ್ತೇನ…ಪೇ… ಚೀವರಂ ನಿಕ್ಖಿಪನ್ತೇನ…ಪೇ… ಪಾರತೋ ಅನ್ತಂ ಓರತೋ ಭೋಗಂ ಕತ್ವಾ ಚೀವರಂ ನಿಕ್ಖಿಪಿತಬ್ಬಂ. ಅನ್ತೇವಾಸಿಕಮ್ಹಿ ಉಟ್ಠಿತೇ ಆಸನಂ ಉದ್ಧರಿತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಪಟಿಸಾಮೇತಬ್ಬಂ. ಸಚೇ ಸೋ ದೇಸೋ ಉಕ್ಲಾಪೋ ಹೋತಿ, ಸೋ ದೇಸೋ ಸಮ್ಮಜ್ಜಿತಬ್ಬೋ.

‘‘ಸಚೇ ಅನ್ತೇವಾಸಿಕೋ ನಹಾಯಿತುಕಾಮೋ ಹೋತಿ, ನಹಾನಂ ಪಟಿಯಾದೇತಬ್ಬಂ. ಸಚೇ ಸೀತೇನ ಅತ್ಥೋ ಹೋತಿ, ಸೀತಂ ಪಟಿಯಾದೇತಬ್ಬಂ. ಸಚೇ ಉಣ್ಹೇನ ಅತ್ಥೋ ಹೋತಿ, ಉಣ್ಹಂ ಪಟಿಯಾದೇತಬ್ಬಂ.

‘‘ಸಚೇ ಅನ್ತೇವಾಸಿಕೋ ಜನ್ತಾಘರಂ ಪವಿಸಿತುಕಾಮೋ ಹೋತಿ, ಚುಣ್ಣಂ ಸನ್ನೇತಬ್ಬಂ, ಮತ್ತಿಕಾ ತೇಮೇತಬ್ಬಾ, ಜನ್ತಾಘರಪೀಠಂ ಆದಾಯ [ಆದಾಯ ಅನ್ತೇವಾಸಿಕಸ್ಸ ಪಿಟ್ಠಿತೋ ಪಿಟ್ಠಿತೋ (ಕ.)] ಗನ್ತ್ವಾ ಜನ್ತಾಘರಪೀಠಂ ದತ್ವಾ ಚೀವರಂ ಪಟಿಗ್ಗಹೇತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ಚುಣ್ಣಂ ದಾತಬ್ಬಂ, ಮತ್ತಿಕಾ ದಾತಬ್ಬಾ. ಸಚೇ ಉಸ್ಸಹತಿ ಜನ್ತಾಘರಂ ಪವಿಸಿತಬ್ಬಂ. ಜನ್ತಾಘರಂ ಪವಿಸನ್ತೇನ ಮತ್ತಿಕಾಯ ಮುಖಂ ಮಕ್ಖೇತ್ವಾ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಂ ಪವಿಸಿತಬ್ಬಂ. ನ ಥೇರೇ ಭಿಕ್ಖೂ ಅನುಪಖಜ್ಜ ನಿಸೀದಿತಬ್ಬಂ. ನ ನವಾ ಭಿಕ್ಖೂ ಆಸನೇನ ಪಟಿಬಾಹಿತಬ್ಬಾ. ಜನ್ತಾಘರೇ ಅನ್ತೇವಾಸಿಕಸ್ಸ ಪರಿಕಮ್ಮಂ ಕಾತಬ್ಬಂ. ಜನ್ತಾಘರಾ ನಿಕ್ಖಮನ್ತೇನ ಜನ್ತಾಘರಪೀಠಂ ಆದಾಯ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಾ ನಿಕ್ಖಮಿತಬ್ಬಂ.

‘‘ಉದಕೇಪಿ ಅನ್ತೇವಾಸಿಕಸ್ಸ ಪರಿಕಮ್ಮಂ ಕಾತಬ್ಬಂ. ನಹಾತೇನ ಪಠಮತರಂ ಉತ್ತರಿತ್ವಾ ಅತ್ತನೋ ಗತ್ತಂ ವೋದಕಂ ಕತ್ವಾ ನಿವಾಸೇತ್ವಾ ಅನ್ತೇವಾಸಿಕಸ್ಸ ಗತ್ತತೋ ಉದಕಂ ಪಮಜ್ಜಿತಬ್ಬಂ, ನಿವಾಸನಂ ದಾತಬ್ಬಂ, ಸಙ್ಘಾಟಿ ದಾತಬ್ಬಾ, ಜನ್ತಾಘರಪೀಠಂ ಆದಾಯ ಪಠಮತರಂ ಆಗನ್ತ್ವಾ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಅನ್ತೇವಾಸಿಕೋ ಪಾನೀಯೇನ ಪುಚ್ಛಿತಬ್ಬೋ.

‘‘ಯಸ್ಮಿಂ ವಿಹಾರೇ ಅನ್ತೇವಾಸಿಕೋ ವಿಹರತಿ, ಸಚೇ ಸೋ ವಿಹಾರೋ ಉಕ್ಲಾಪೋ ಹೋತಿ, ಸಚೇ ಉಸ್ಸಹತಿ, ಸೋಧೇತಬ್ಬೋ. ವಿಹಾರಂ ಸೋಧೇನ್ತೇನ ಪಠಮಂ ಪತ್ತಚೀವರಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ…ಪೇ… ಆಚಮನಕುಮ್ಭಿಯಾ ಉದಕಂ ನ ಹೋತಿ, ಆಚಮನಕುಮ್ಭಿಯಾ ಉದಕಂ ಆಸಿಞ್ಚಿತಬ್ಬಂ.

‘‘ಸಚೇ ಅನ್ತೇವಾಸಿಕಸ್ಸ ಅನಭಿರತಿ ಉಪ್ಪನ್ನಾ ಹೋತಿ, ಆಚರಿಯೇನ ವೂಪಕಾಸೇತಬ್ಬೋ, ವೂಪಕಾಸಾಪೇತಬ್ಬೋ, ಧಮ್ಮಕಥಾ ವಾಸ್ಸ ಕಾತಬ್ಬಾ. ಸಚೇ ಅನ್ತೇವಾಸಿಕಸ್ಸ ಕುಕ್ಕುಚ್ಚಂ ಉಪ್ಪನ್ನಂ ಹೋತಿ, ಆಚರಿಯೇನ ವಿನೋದೇತಬ್ಬಂ, ವಿನೋದಾಪೇತಬ್ಬಂ, ಧಮ್ಮಕಥಾ ವಾಸ್ಸ ಕಾತಬ್ಬಾ. ಸಚೇ ಅನ್ತೇವಾಸಿಕಸ್ಸ ದಿಟ್ಠಿಗತಂ ಉಪ್ಪನ್ನಂ ಹೋತಿ, ಆಚರಿಯೇನ ವಿವೇಚೇತಬ್ಬಂ, ವಿವೇಚಾಪೇತಬ್ಬಂ, ಧಮ್ಮಕಥಾ ವಾಸ್ಸ ಕಾತಬ್ಬಾ. ಸಚೇ ಅನ್ತೇವಾಸಿಕೋ ಗರುಧಮ್ಮಂ ಅಜ್ಝಾಪನ್ನೋ ಹೋತಿ, ಪರಿವಾಸಾರಹೋ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಸ್ಸ ಪರಿವಾಸಂ ದದೇಯ್ಯಾತಿ. ಸಚೇ ಅನ್ತೇವಾಸಿಕೋ ಮೂಲಾಯಪಟಿಕಸ್ಸನಾರಹೋ ಹೋತಿ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಂ ಮೂಲಾಯ ಪಟಿಕಸ್ಸೇಯ್ಯಾತಿ. ಸಚೇ ಅನ್ತೇವಾಸಿಕೋ ಮಾನತ್ತಾರಹೋ ಹೋತಿ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಸ್ಸ ಮಾನತ್ತಂ ದದೇಯ್ಯಾತಿ. ಸಚೇ ಅನ್ತೇವಾಸಿಕೋ ಅಬ್ಭಾನಾರಹೋ ಹೋತಿ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಂ ಅಬ್ಭೇಯ್ಯಾತಿ. ಸಚೇ ಸಙ್ಘೋ ಅನ್ತೇವಾಸಿಕಸ್ಸ ಕಮ್ಮಂ ಕತ್ತುಕಾಮೋ ಹೋತಿ, ತಜ್ಜನೀಯಂ ವಾ ನಿಯಸ್ಸಂ ವಾ ಪಬ್ಬಾಜನೀಯಂ ವಾ ಪಟಿಸಾರಣೀಯಂ ವಾ ಉಕ್ಖೇಪನೀಯಂ ವಾ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಸ್ಸ ಕಮ್ಮಂ ನ ಕರೇಯ್ಯ, ಲಹುಕಾಯ ವಾ ಪರಿಣಾಮೇಯ್ಯಾತಿ. ಕತಂ ವಾ ಪನಸ್ಸ ಹೋತಿ, ಸಙ್ಘೇನ ಕಮ್ಮಂ, ತಜ್ಜನೀಯಂ ವಾ ನಿಯಸ್ಸಂ ವಾ ಪಬ್ಬಾಜನೀಯಂ ವಾ ಪಟಿಸಾರಣೀಯಂ ವಾ ಉಕ್ಖೇಪನೀಯಂ ವಾ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕೋ ಸಮ್ಮಾ ವತ್ತೇಯ್ಯ, ಲೋಮಂ ಪಾತೇಯ್ಯ, ನೇತ್ಥಾರಂ ವತ್ತೇಯ್ಯ, ಸಙ್ಘೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇಯ್ಯಾತಿ.

‘‘ಸಚೇ ಅನ್ತೇವಾಸಿಕಸ್ಸ ಚೀವರಂ ಧೋವಿತಬ್ಬಂ ಹೋತಿ, ಆಚರಿಯೇನ ಆಚಿಕ್ಖಿತಬ್ಬಂ – ಏವಂ ಧೋವೇಯ್ಯಾಸೀತಿ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಚೀವರಂ ಧೋವಿಯೇಥಾತಿ. ಸಚೇ ಅನ್ತೇವಾಸಿಕಸ್ಸ ಚೀವರಂ ಕಾತಬ್ಬಂ ಹೋತಿ, ಆಚರಿಯೇನ ಆಚಿಕ್ಖಿತಬ್ಬಂ – ಏವಂ ಕರೇಯ್ಯಾಸೀತಿ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಚೀವರಂ ಕರಿಯೇಥಾತಿ. ಸಚೇ ಅನ್ತೇವಾಸಿಕಸ್ಸ ರಜನಂ ಪಚಿತಬ್ಬಂ ಹೋತಿ, ಆಚರಿಯೇನ ಆಚಿಕ್ಖಿತಬ್ಬಂ – ಏವಂ ಪಚೇಯ್ಯಾಸೀತಿ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ರಜನಂ ಪಚಿಯೇಥಾತಿ. ಸಚೇ ಅನ್ತೇವಾಸಿಕಸ್ಸ ಚೀವರಂ ರಜಿತಬ್ಬಂ ಹೋತಿ, ಆಚರಿಯೇನ ಆಚಿಕ್ಖಿತಬ್ಬಂ – ಏವಂ ರಜೇಯ್ಯಾಸೀತಿ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಚೀವರಂ ರಜಿಯೇಥಾತಿ. ಚೀವರಂ ರಜನ್ತೇನ ಸಾಧುಕಂ ಸಮ್ಪರಿವತ್ತಕಂ ಸಮ್ಪರಿವತ್ತಕಂ ರಜಿತಬ್ಬಂ. ನ ಚ ಅಚ್ಛಿನ್ನೇ ಥೇವೇ ಪಕ್ಕಮಿತಬ್ಬಂ. ಸಚೇ ಅನ್ತೇವಾಸಿಕೋ ಗಿಲಾನೋ ಹೋತಿ, ಯಾವಜೀವಂ ಉಪಟ್ಠಾತಬ್ಬೋ, ವುಟ್ಠಾನಮಸ್ಸ ಆಗಮೇತಬ್ಬಂ. ಇದಂ ಖೋ, ಭಿಕ್ಖವೇ, ಆಚರಿಯಾನಂ ಅನ್ತೇವಾಸಿಕೇಸು ವತ್ತಂ ಯಥಾ ಆಚರಿಯೇಹಿ ಅನ್ತೇವಾಸಿಕೇಸು ಸಮ್ಮಾ ವತ್ತಿತಬ್ಬ’’ನ್ತಿ.

ವತ್ತಕ್ಖನ್ಧಕೋ ಅಟ್ಠಮೋ.

ಇಮಮ್ಹಿ ಖನ್ಧಕೇ ವತ್ಥೂ ಏಕೂನವೀಸತಿ, ವತ್ತಾ ಚುದ್ದಸ.

ತಸ್ಸುದ್ದಾನಂ –

ಸಉಪಾಹನಾ ಛತ್ತಾ ಚ, ಓಗುಣ್ಠಿ ಸೀಸಂ ಪಾನೀಯಂ;

ನಾಭಿವಾದೇ ನ ಪುಚ್ಛನ್ತಿ, ಅಹಿ ಉಜ್ಝನ್ತಿ ಪೇಸಲಾ.

ಓಮುಞ್ಚಿ ಛತ್ತಂ ಖನ್ಧೇ ಚ, ಅತರಞ್ಚ ಪಟಿಕ್ಕಮಂ;

ಪತ್ತಚೀವರಂ ನಿಕ್ಖಿಪಾ, ಪತಿರೂಪಞ್ಚ ಪುಚ್ಛಿತಾ.

ಆಸಿಞ್ಚೇಯ್ಯ ಧೋವಿತೇನ, ಸುಕ್ಖೇನಲ್ಲೇನುಪಾಹನಾ;

ವುಡ್ಢೋ ನವಕೋ ಪುಚ್ಛೇಯ್ಯ, ಅಜ್ಝಾವುಟ್ಠಞ್ಚ ಗೋಚರಾ.

ಸೇಕ್ಖಾ ವಚ್ಚಾ ಪಾನೀ ಪರಿ, ಕತ್ತರಂ ಕತಿಕಂ ತತೋ;

ಕಾಲಂ ಮುಹುತ್ತಂ ಉಕ್ಲಾಪೋ, ಭೂಮತ್ಥರಣಂ ನೀಹರೇ.

ಪಟಿಪಾದೋ ಭಿಸಿಬಿಬ್ಬೋ, ಮಞ್ಚಪೀಠಞ್ಚ ಮಲ್ಲಕಂ;

ಅಪಸ್ಸೇನುಲ್ಲೋಕಕಣ್ಣಾ, ಗೇರುಕಾ ಕಾಳ ಅಕತಾ.

ಸಙ್ಕಾರಞ್ಚ ಭೂಮತ್ಥರಣಂ, ಪಟಿಪಾದಕಂ ಮಞ್ಚಪೀಠಂ;

ಭಿಸಿ ನಿಸೀದನಮ್ಪಿ, ಮಲ್ಲಕಂ ಅಪಸ್ಸೇನ ಚ.

ಪತ್ತಚೀವರಂ ಭೂಮಿ ಚ, ಪಾರನ್ತಂ ಓರತೋ ಭೋಗಂ;

ಪುರತ್ಥಿಮಾ ಪಚ್ಛಿಮಾ ಚ, ಉತ್ತರಾ ಅಥ ದಕ್ಖಿಣಾ.

ಸೀತುಣ್ಹೇ ಚ ದಿವಾರತ್ತಿಂ, ಪರಿವೇಣಞ್ಚ ಕೋಟ್ಠಕೋ;

ಉಪಟ್ಠಾನಗ್ಗಿ ಸಾಲಾ ಚ, ವತ್ತಂ ವಚ್ಚಕುಟೀಸು ಚ.

ಪಾನೀ ಪರಿಭೋಜನಿಯಾ, ಕುಮ್ಭಿ ಆಚಮನೇಸು ಚ;

ಅನೋಪಮೇನ ಪಞ್ಞತ್ತಂ, ವತ್ತಂ ಆಗನ್ತುಕೇಹಿಮೇ [ವೇ (ಕ. ಏವಮುಪರಿಪಿ)].

ನೇವಾಸನಂ ನ ಉದಕಂ, ನ ಪಚ್ಚು ನ ಚ ಪಾನಿಯಂ;

ನಾಭಿವಾದೇ ನಪಞ್ಞಪೇ, ಉಜ್ಝಾಯನ್ತಿ ಚ ಪೇಸಲಾ.

ವುಡ್ಢಾಸನಞ್ಚ ಉದಕಂ, ಪಚ್ಚುಗ್ಗನ್ತ್ವಾ ಚ ಪಾನಿಯಂ;

ಉಪಾಹನೇ ಏಕಮನ್ತಂ, ಅಭಿವಾದೇ ಚ ಪಞ್ಞಪೇ.

ವುತ್ಥಂ ಗೋಚರಸೇಕ್ಖೋ ಚ, ಠಾನಂ ಪಾನಿಯಭೋಜನಂ;

ಕತ್ತರಂ ಕತಿಕಂ ಕಾಲಂ, ನವಕಸ್ಸ ನಿಸಿನ್ನಕೇ.

ಅಭಿವಾದಯೇ ಆಚಿಕ್ಖೇ, ಯಥಾ ಹೇಟ್ಠಾ ತಥಾ ನಯೇ;

ನಿದ್ದಿಟ್ಠಂ ಸತ್ಥವಾಹೇನ ವತ್ತಂ ಆವಾಸಿಕೇಹಿಮೇ.

ಗಮಿಕಾ ದಾರುಮತ್ತಿ ಚ, ವಿವರಿತ್ವಾ ನ ಪುಚ್ಛಿಯ;

ನಸ್ಸನ್ತಿ ಚ ಅಗುತ್ತಞ್ಚ, ಉಜ್ಝಾಯನ್ತಿ ಚ ಪೇಸಲಾ.

ಪಟಿಸಾಮೇತ್ವಾ ಥಕೇತ್ವಾ, ಆಪುಚ್ಛಿತ್ವಾವ ಪಕ್ಕಮೇ;

ಭಿಕ್ಖು ವಾ ಸಾಮಣೇರೋ ವಾ, ಆರಾಮಿಕೋ ಉಪಾಸಕೋ.

ಪಾಸಾಣಕೇಸು ಚ ಪುಞ್ಜಂ, ಪಟಿಸಾಮೇ ಥಕೇಯ್ಯ ಚ;

ಸಚೇ ಉಸ್ಸಹತಿ ಉಸ್ಸುಕ್ಕಂ, ಅನೋವಸ್ಸೇ ತಥೇವ ಚ.

ಸಬ್ಬೋ ಓವಸ್ಸತಿ ಗಾಮಂ, ಅಜ್ಝೋಕಾಸೇ ತಥೇವ ಚ;

ಅಪ್ಪೇವಙ್ಗಾನಿ ಸೇಸೇಯ್ಯುಂ, ವತ್ತಂ ಗಮಿಕಭಿಕ್ಖುನಾ.

ನಾನುಮೋದನ್ತಿ ಥೇರೇನ, ಓಹಾಯ ಚತುಪಞ್ಚಹಿ;

ವಚ್ಚಿತೋ ಮುಚ್ಛಿತೋ ಆಸಿ, ವತ್ತಾನುಮೋದನೇಸುಮೇ.

ಛಬ್ಬಗ್ಗಿಯಾ ದುನ್ನಿವತ್ಥಾ, ಅಥೋಪಿ ಚ ದುಪ್ಪಾರುತಾ;

ಅನಾಕಪ್ಪಾ ಚ ವೋಕ್ಕಮ್ಮ, ಥೇರೇ ಅನುಪಖಜ್ಜನೇ.

ನವೇ ಭಿಕ್ಖೂ ಚ ಸಙ್ಘಾಟಿ, ಉಜ್ಝಾಯನ್ತಿ ಚ ಪೇಸಲಾ;

ತಿಮಣ್ಡಲಂ ನಿವಾಸೇತ್ವಾ, ಕಾಯಸಗುಣಗಣ್ಠಿಕಾ.

ನ ವೋಕ್ಕಮ್ಮ ಪಟಿಚ್ಛನ್ನಂ, ಸುಸಂವುತೋಕ್ಖಿತ್ತಚಕ್ಖು;

ಉಕ್ಖಿತ್ತೋಜ್ಜಗ್ಘಿಕಾಸದ್ದೋ, ತಯೋ ಚೇವ ಪಚಾಲನಾ.

ಖಮ್ಭೋಗುಣ್ಠಿಉಕ್ಕುಟಿಕಾ, ಪಟಿಚ್ಛನ್ನಂ ಸುಸಂವುತೋ;

ಓಕ್ಖಿತ್ತುಕ್ಖಿತ್ತಉಜ್ಜಗ್ಘಿ, ಅಪ್ಪಸದ್ದೋ ತಯೋ ಚಲಾ.

ಖಮ್ಭೋಗುಣ್ಠಿಪಲ್ಲತ್ಥಿ ಚ, ಅನುಪಖಜ್ಜ ನಾಸನೇ;

ಓತ್ಥರಿತ್ವಾನ ಉದಕೇ, ನೀಚಂ ಕತ್ವಾನ ಸಿಞ್ಚಿಯಾ.

ಪಟಿ ಸಾಮನ್ತಾ ಸಙ್ಘಾಟಿ, ಓದನೇ ಚ ಪಟಿಗ್ಗಹೇ;

ಸೂಪಂ ಉತ್ತರಿಭಙ್ಗೇನ, ಸಬ್ಬೇಸಂ ಸಮತಿತ್ಥಿ ಚ.

ಸಕ್ಕಚ್ಚಂ ಪತ್ತಸಞ್ಞೀ ಚ, ಸಪದಾನಞ್ಚ ಸೂಪಕಂ;

ನ ಥೂಪತೋ ಪಟಿಚ್ಛಾದೇ, ವಿಞ್ಞತ್ತುಜ್ಝಾನಸಞ್ಞಿನಾ.

ಮಹನ್ತಮಣ್ಡಲದ್ವಾರಂ, ಸಬ್ಬಹತ್ಥೋ ನ ಬ್ಯಾಹರೇ;

ಉಕ್ಖೇಪೋ ಛೇದನಾಗಣ್ಡ, ಧುನಂ ಸಿತ್ಥಾವಕಾರಕಂ.

ಜಿವ್ಹಾನಿಚ್ಛಾರಕಞ್ಚೇವ, ಚಪುಚಪು ಸುರುಸುರು;

ಹತ್ಥಪತ್ತೋಟ್ಠನಿಲ್ಲೇಹಂ, ಸಾಮಿಸೇನ ಪಟಿಗ್ಗಹೇ.

ಯಾವ ನ ಸಬ್ಬೇ ಉದಕೇ, ನೀಚಂ ಕತ್ವಾನ ಸಿಞ್ಚಿಯಂ;

ಪಟಿ ಸಾಮನ್ತಾ ಸಙ್ಘಾಟಿ, ನೀಚಂ ಕತ್ವಾ ಛಮಾಯ ಚ.

ಸಸಿತ್ಥಕಂ ನಿವತ್ತನ್ತೇ, ಸುಪ್ಪಟಿಚ್ಛನ್ನಮುಕ್ಕುಟಿ;

ಧಮ್ಮರಾಜೇನ ಪಞ್ಞತ್ತಂ, ಇದಂ ಭತ್ತಗ್ಗವತ್ತನಂ.

ದುನ್ನಿವತ್ಥಾ ಅನಾಕಪ್ಪಾ, ಅಸಲ್ಲೇಕ್ಖೇತ್ವಾ ಚ ಸಹಸಾ;

ದೂರೇ ಅಚ್ಚ ಚಿರಂ ಲಹುಂ, ತಥೇವ ಪಿಣ್ಡಚಾರಿಕೋ.

ಪಟಿಚ್ಛನ್ನೋವ ಗಚ್ಛೇಯ್ಯ, ಸುಂಸವುತೋಕ್ಖಿತ್ತಚಕ್ಖು;

ಉಕ್ಖಿತ್ತೋಜ್ಜಗ್ಘಿಕಾಸದ್ದೋ, ತಯೋ ಚೇವ ಪಚಾಲನಾ.

ಖಮ್ಭೋಗುಣ್ಠಿಉಕ್ಕುಟಿಕಾ, ಸಲ್ಲಕ್ಖೇತ್ವಾ ಚ ಸಹಸಾ;

ದೂರೇ ಅಚ್ಚ ಚಿರಂ ಲಹುಂ, ಆಸನಕಂ ಕಟಚ್ಛುಕಾ.

ಭಾಜನಂ ವಾ ಠಪೇತಿ ಚ, ಉಚ್ಚಾರೇತ್ವಾ ಪಣಾಮೇತ್ವಾ;

ಪಟಿಗ್ಗಹೇ ನ ಉಲ್ಲೋಕೇ, ಸೂಪೇಸುಪಿ ತಥೇವ ತಂ.

ಭಿಕ್ಖು ಸಙ್ಘಾಟಿಯಾ ಛಾದೇ, ಪಟಿಚ್ಛನ್ನೇವ ಗಚ್ಛಿಯಂ;

ಸಂವುತೋಕ್ಖಿತ್ತಚಕ್ಖು ಚ, ಉಕ್ಖಿತ್ತೋಜ್ಜಗ್ಘಿಕಾಯ ಚ;

ಅಪ್ಪಸದ್ದೋ ತಯೋ ಚಾಲಾ, ಖಮ್ಭೋಗುಣ್ಠಿಕಉಕ್ಕುಟಿ.

ಪಠಮಾಸನವಕ್ಕಾರ, ಪಾನಿಯಂ ಪರಿಭೋಜನೀ;

ಪಚ್ಛಾಕಙ್ಖತಿ ಭುಞ್ಜೇಯ್ಯ, ಓಪಿಲಾಪೇಯ್ಯ ಉದ್ಧರೇ.

ಪಟಿಸಾಮೇಯ್ಯ ಸಮ್ಮಜ್ಜೇ, ರಿತ್ತಂ ತುಚ್ಛಂ ಉಪಟ್ಠಪೇ;

ಹತ್ಥವಿಕಾರೇ ಭಿನ್ದೇಯ್ಯ, ವತ್ತಿದಂ ಪಿಣ್ಡಚಾರಿಕೇ.

ಪಾನೀ ಪರಿ ಅಗ್ಗಿರಣಿ, ನಕ್ಖತ್ತದಿಸಚೋರಾ ಚ;

ಸಬ್ಬಂ ನತ್ಥೀತಿ ಕೋಟ್ಟೇತ್ವಾ, ಪತ್ತಂಸೇ ಚೀವರಂ ತತೋ.

ಇದಾನಿ ಅಂಸೇ ಲಗ್ಗೇತ್ವಾ, ತಿಮಣ್ಡಲಂ ಪರಿಮಣ್ಡಲಂ;

ಯಥಾ ಪಿಣ್ಡಚಾರಿವತ್ತಂ, ನಯೇ ಆರಞ್ಞಕೇಸುಪಿ.

ಪತ್ತಂಸೇ ಚೀವರಂ ಸೀಸೇ, ಆರೋಹಿತ್ವಾ ಚ ಪಾನಿಯಂ;

ಪರಿಭೋಜನಿಯಂ ಅಗ್ಗಿ, ಅರಣೀ ಚಾಪಿ ಕತ್ತರಂ.

ನಕ್ಖತ್ತಂ ಸಪ್ಪದೇಸಂ ವಾ, ದಿಸಾಪಿ ಕುಸಲೋ ಭವೇ;

ಸತ್ತುತ್ತಮೇನ ಪಞ್ಞತ್ತಂ, ವತ್ತಂ ಆರಞ್ಞಕೇಸುಮೇ.

ಅಜ್ಝೋಕಾಸೇ ಓಕಿರಿಂಸು, ಉಜ್ಝಾಯನ್ತಿ ಚ ಪೇಸಲಾ;

ಸಚೇ ವಿಹಾರೋ ಉಕ್ಲಾಪೋ, ಪಠಮಂ ಪತ್ತಚೀವರಂ.

ಭಿಸಿಬಿಬ್ಬೋಹನಂ ಮಞ್ಚಂ, ಪೀಠಞ್ಚ ಖೇಳಮಲ್ಲಕಂ;

ಅಪಸ್ಸೇನುಲ್ಲೋಕಕಣ್ಣಾ, ಗೇರುಕಾ ಕಾಳ ಅಕತಾ.

ಸಙ್ಕಾರಂ ಭಿಕ್ಖುಸಾಮನ್ತಾ, ಸೇನಾವಿಹಾರಪಾನಿಯಂ;

ಪರಿಭೋಜನಸಾಮನ್ತಾ, ಪಟಿವಾತೇ ಚ ಅಙ್ಗಣೇ.

ಅಧೋವಾತೇ ಅತ್ಥರಣಂ, ಪಟಿಪಾದಕಮಞ್ಚೋ ಚ;

ಪೀಠಂ ಭಿಸಿ ನಿಸೀದನಂ, ಮಲ್ಲಕಂ ಅಪಸ್ಸೇನ ಚ.

ಪತ್ತಚೀವರಂ ಭೂಮಿ ಚ, ಪಾರನ್ತಂ ಓರತೋ ಭೋಗಂ;

ಪುರತ್ಥಿಮಾ ಚ ಪಚ್ಛಿಮಾ, ಉತ್ತರಾ ಅಥ ದಕ್ಖಿಣಾ.

ಸೀತುಣ್ಹೇ ಚ ದಿವಾ ರತ್ತಿಂ, ಪರಿವೇಣಞ್ಚ ಕೋಟ್ಠಕೋ;

ಉಪಟ್ಠಾನಗ್ಗಿಸಾಲಾ ಚ, ವಚ್ಚಕುಟೀ ಚ ಪಾನಿಯಂ.

ಆಚಮನಕುಮ್ಭಿ ವುಡ್ಢೇ ಚ, ಉದ್ದೇಸಪುಚ್ಛನಾ ಸಜ್ಝಾ;

ಧಮ್ಮೋ ಪದೀಪಂ ವಿಜ್ಝಾಪೇ, ನ ವಿವರೇ ನಪಿ ಥಕೇ.

ಯೇನ ವುಡ್ಢೋ ಪರಿವತ್ತಿ, ಕಣ್ಣೇನಪಿ ನ ಘಟ್ಟಯೇ;

ಪಞ್ಞಪೇಸಿ ಮಹಾವೀರೋ, ವತ್ತಂ ಸೇನಾಸನೇಸು ತಂ.

ನಿವಾರಿಯಮಾನಾ ದ್ವಾರಂ, ಮುಚ್ಛಿತುಜ್ಝನ್ತಿ ಪೇಸಲಾ;

ಛಾರಿಕಂ ಛಡ್ಡಯೇ ಜನ್ತಾ, ಪರಿಭಣ್ಡಂ ತಥೇವ ಚ.

ಪರಿವೇಣಂ ಕೋಟ್ಠಕೋ ಸಾಲಾ, ಚುಣ್ಣಮತ್ತಿಕದೋಣಿಕಾ;

ಮುಖಂ ಪುರತೋ ನ ಥೇರೇ, ನ ನವೇ ಉಸ್ಸಹತಿ ಸಚೇ.

ಪುರತೋ ಉಪರಿಮಗ್ಗೋ, ಚಿಕ್ಖಲ್ಲಂ ಮತ್ತಿ ಪೀಠಕಂ;

ವಿಜ್ಝಾಪೇತ್ವಾ ಥಕೇತ್ವಾ ಚ, ವತ್ತಂ ಜನ್ತಾಘರೇಸುಮೇ.

ನಾಚಮೇತಿ ಯಥಾವುಡ್ಢಂ, ಪಟಿಪಾಟಿ ಚ ಸಹಸಾ;

ಉಬ್ಭಜಿ ನಿತ್ಥುನೋ ಕಟ್ಠಂ, ವಚ್ಚಂ ಪಸ್ಸಾವ ಖೇಳಕಂ.

ಫರುಸಾ ಕೂಪ ಸಹಸಾ, ಉಬ್ಭಜಿ ಚಪು ಸೇಸೇನ;

ಬಹಿ ಅನ್ತೋ ಚ ಉಕ್ಕಾಸೇ, ರಜ್ಜು ಅತರಮಾನಞ್ಚ.

ಸಹಸಾ ಉಬ್ಭಜಿ ಠಿತೇ, ನಿತ್ಥುನೇ ಕಟ್ಠ ವಚ್ಚಞ್ಚ;

ಪಸ್ಸಾವ ಖೇಳ ಫರುಸಾ, ಕೂಪಞ್ಚ ವಚ್ಚಪಾದುಕೇ.

ನಾತಿಸಹಸಾ ಉಬ್ಭಜಿ, ಪಾದುಕಾಯ ಚಪುಚಪು;

ನ ಸೇಸಯೇ ಪಟಿಚ್ಛಾದೇ, ಉಹತಪಿಧರೇನ ಚ.

ವಚ್ಚಕುಟೀ ಪರಿಭಣ್ಡಂ, ಪರಿವೇಣಞ್ಚ ಕೋಟ್ಠಕೋ;

ಆಚಮನೇ ಚ ಉದಕಂ, ವತ್ತಂ ವಚ್ಚಕುಟೀಸುಮೇ.

ಉಪಾಹನಾ ದನ್ತಕಟ್ಠಂ, ಮುಖೋದಕಞ್ಚ ಆಸನಂ;

ಯಾಗು ಉದಕಂ ಧೋವಿತ್ವಾ, ಉದ್ಧಾರುಕ್ಲಾಪ ಗಾಮ ಚ.

ನಿವಾಸನಾ ಕಾಯಬನ್ಧಾ, ಸಗುಣಂ ಪತ್ತಸೋದಕಂ;

ಪಚ್ಛಾ ತಿಮಣ್ಡಲೋ ಚೇವ, ಪರಿಮಣ್ಡಲ ಬನ್ಧನಂ.

ಸಗುಣಂ ಧೋವಿತ್ವಾ ಪಚ್ಛಾ, ನಾತಿದೂರೇ ಪಟಿಗ್ಗಹೇ;

ಭಣಮಾನಸ್ಸ ಆಪತ್ತಿ, ಪಠಮಾಗನ್ತ್ವಾನ ಆಸನಂ.

ಉದಕಂ ಪೀಠಕಥಲಿ, ಪಚ್ಚುಗ್ಗನ್ತ್ವಾ ನಿವಾಸನಂ;

ಓತಾಪೇ ನಿದಹಿ ಭಙ್ಗೋ, ಓಭೋಗೇ ಭುಞ್ಜಿತು ನಮೇ.

ಪಾನೀಯಂ ಉದಕಂ ನೀಚಂ, ಮುಹುತ್ತಂ ನ ಚ ನಿದಹೇ;

ಪತ್ತಚೀವರಂ ಭೂಮಿ ಚ, ಪಾರನ್ತಂ ಓರತೋ ಭೋಗಂ.

ಉದ್ಧರೇ ಪಟಿಸಾಮೇ ಚ, ಉಕ್ಲಾಪೋ ಚ ನಹಾಯಿತುಂ;

ಸೀತಂ ಉಣ್ಹಂ ಜನ್ತಾಘರಂ, ಚುಣ್ಣಂ ಮತ್ತಿಕ ಪಿಟ್ಠಿತೋ.

ಪೀಠಞ್ಚ ಚೀವರಂ ಚುಣ್ಣಂ, ಮತ್ತಿಕುಸ್ಸಹತಿ ಮುಖಂ;

ಪುರತೋ ಥೇರೇ ನವೇ ಚ, ಪರಿಕಮ್ಮಞ್ಚ ನಿಕ್ಖಮೇ.

ಪುರತೋ ಉದಕೇ ನ್ಹಾತೇ, ನಿವಾಸೇತ್ವಾ ಉಪಜ್ಝಾಯಂ;

ನಿವಾಸನಞ್ಚ ಸಙ್ಘಾಟಿ, ಪೀಠಕಂ ಆಸನೇನ ಚ.

ಪಾದೋ ಪೀಠಂ ಕಥಲಿಞ್ಚ, ಪಾನೀಯುದ್ದೇಸಪುಚ್ಛನಾ;

ಉಕ್ಲಾಪಂ ಸುಸೋಧೇಯ್ಯ, ಪಠಮಂ ಪತ್ತಚೀವರಂ.

ನಿಸೀದನಪಚ್ಚತ್ಥರಣಂ, ಭಿಸಿ ಬಿಬ್ಬೋಹನಾನಿ ಚ;

ಮಞ್ಚೋ ಪೀಠಂ ಪಟಿಪಾದಂ, ಮಲ್ಲಕಂ ಅಪಸ್ಸೇನ ಚ.