೧. ಆಗನ್ತುಕವತ್ತಕಥಾ

೩೫೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಆಗನ್ತುಕಾ ಭಿಕ್ಖೂ ಸಉಪಾಹನಾಪಿ ಆರಾಮಂ ಪವಿಸನ್ತಿ, ಛತ್ತಪಗ್ಗಹಿತಾಪಿ ಆರಾಮಂ ಪವಿಸನ್ತಿ, ಓಗುಣ್ಠಿತಾಪಿ ಆರಾಮಂ ಪವಿಸನ್ತಿ, ಸೀಸೇಪಿ ಚೀವರಂ ಕರಿತ್ವಾ ಆರಾಮಂ ಪವಿಸನ್ತಿ, ಪಾನೀಯೇನಪಿ ಪಾದೇ ಧೋವನ್ತಿ, ವುಡ್ಢತರೇಪಿ ಆವಾಸಿಕೇ ಭಿಕ್ಖೂ ನ ಅಭಿವಾದೇನ್ತಿ, ನಪಿ ಸೇನಾಸನಂ ಪುಚ್ಛನ್ತಿ. ಅಞ್ಞತರೋಪಿ ಆಗನ್ತುಕೋ ಭಿಕ್ಖು ಅನಜ್ಝಾವುಟ್ಠಂ ವಿಹಾರಂ ಘಟಿಕಂ ಉಗ್ಘಾಟೇತ್ವಾ ಕವಾಟಂ ಪಣಾಮೇತ್ವಾ ಸಹಸಾ ಪಾವಿಸಿ. ತಸ್ಸ ಉಪರಿಪಿಟ್ಠಿತೋ [ಉಪರಿಪಿಟ್ಠತೋ (?)] ಅಹಿ ಖನ್ಧೇ ಪಪತಿ. ಸೋ ಭೀತೋ ವಿಸ್ಸರಮಕಾಸಿ. ಭಿಕ್ಖೂ ಉಪಧಾವಿತ್ವಾ ತಂ ಭಿಕ್ಖುಂ ಏತದವೋಚುಂ – ‘‘ಕಿಸ್ಸ ತ್ವಂ, ಆವುಸೋ, ವಿಸ್ಸರಮಕಾಸೀ’’ತಿ? ಅಥ ಖೋ ಸೋ ಭಿಕ್ಖು ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಗನ್ತುಕಾ ಭಿಕ್ಖೂ ಸಉಪಾಹನಾಪಿ ಆರಾಮಂ ಪವಿಸಿಸ್ಸನ್ತಿ, ಛತ್ತಪಗ್ಗಹಿತಾಪಿ ಆರಾಮಂ ಪವಿಸಿಸ್ಸನ್ತಿ, ಓಗುಣ್ಠಿತಾಪಿ ಆರಾಮಂ ಪವಿಸಿಸ್ಸನ್ತಿ, ಸೀಸೇಪಿ ಚೀವರಂ ಕರಿತ್ವಾ ಆರಾಮಂ ಪವಿಸಿಸ್ಸನ್ತಿ, ಪಾನೀಯೇನಪಿ ಪಾದೇ ಧೋವಿಸ್ಸನ್ತಿ, ವುಡ್ಢತರೇಪಿ ಆವಾಸಿಕೇ ಭಿಕ್ಖೂ ನ ಅಭಿವಾದೇಸ್ಸನ್ತಿ, ನಪಿ ಸೇನಾಸನಂ ಪುಚ್ಛಿಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ, ಭಿಕ್ಖವೇ, ‘‘ಆಗನ್ತುಕಾ ಭಿಕ್ಖೂ ಸಉಪಾಹನಾಪಿ ಆರಾಮಂ ಪವಿಸನ್ತಿ, ಛತ್ತಪಗ್ಗಹಿತಾಪಿ ಆರಾಮಂ ಪವಿಸನ್ತಿ, ಓಗುಣ್ಠಿತಾಪಿ ಆರಾಮಂ ಪವಿಸನ್ತಿ, ಸೀಸೇಪಿ ಚೀವರಂ ಕರಿತ್ವಾ ಆರಾಮಂ ಪವಿಸನ್ತಿ, ಪಾನೀಯೇನಿಪಿ ಪಾದೇ ಧೋವನ್ತಿ, ವುಡ್ಢತರೇಪಿ ಆವಾಸಿಕೇ ಭಿಕ್ಖೂ ನ ಅಭಿವಾದೇನ್ತಿ, ನಪಿ ಸೇನಾಸನಂ ಪುಚ್ಛನ್ತೀತಿ. ಸಚ್ಚಂ ಭಗವಾತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ಭಿಕ್ಖವೇ ಆಗನ್ತುಕಾ ಭಿಕ್ಖೂ ಸಉಪಾಹನಾಪಿ ಆರಾಮಂ ಪವಿಸಿಸ್ಸನ್ತಿ, ಛತ್ತಪಗ್ಗಹಿತಾಪಿ ಆರಾಮಂ ಪವಿಸಿಸ್ಸನ್ತಿ, ಓಗುಣ್ಠಿತಾಪಿ ಆರಾಮಂ ಪವಿಸಿಸ್ಸನ್ತಿ, ಸೀಸೇಪಿ ಚೀವರಂ ಕರಿತ್ವಾ ಆರಾಮಂ ಪವಿಸಿಸ್ಸನ್ತಿ, ಪಾನೀಯೇನಪಿ ಪಾದೇ ಧೋವಿಸ್ಸನ್ತಿ, ವುಡ್ಢತರೇಪಿ ಆವಾಸಿಕೇ ಭಿಕ್ಖೂ ನ ಅಭಿವಾದೇಸ್ಸನ್ತಿ, ನಪಿ ಸೇನಾಸನಂ ಪುಚ್ಛಿಸ್ಸನ್ತಿ, ನೇತಂ ಭಿಕ್ಖವೇ ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೩೫೭. ‘‘ತೇನ ಹಿ, ಭಿಕ್ಖವೇ, ಆಗನ್ತುಕಾನಂ ಭಿಕ್ಖೂನಂ ವತ್ತಂ ಪಞ್ಞಪೇಸ್ಸಾಮಿ ಯಥಾ ಆಗನ್ತುಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬಂ. ಆಗನ್ತುಕೇನ, ಭಿಕ್ಖವೇ, ಭಿಕ್ಖುನಾ ‘ಇದಾನಿ ಆರಾಮಂ ಪವಿಸಿಸ್ಸಾಮೀ’ತಿ ಉಪಾಹನಾ ಓಮುಞ್ಚಿತ್ವಾ ನೀಚಂ ಕತ್ವಾ ಪಪ್ಫೋಟೇತ್ವಾ ಗಹೇತ್ವಾ ಛತ್ತಂ ಅಪನಾಮೇತ್ವಾ ಸೀಸಂ ವಿವರಿತ್ವಾ ಸೀಸೇ ಚೀವರಂ [ವಿವರಿತ್ವಾ ಚೀವರಂ (ಕ.)] ಖನ್ಧೇ ಕತ್ವಾ ಸಾಧುಕಂ ಅತರಮಾನೇನ ಆರಾಮೋ ಪವಿಸಿತಬ್ಬೋ. ಆರಾಮಂ ಪವಿಸನ್ತೇನ ಸಲ್ಲಕ್ಖೇತಬ್ಬಂ – ‘ಕತ್ಥ ಆವಾಸಿಕಾ ಭಿಕ್ಖೂ ಪಟಿಕ್ಕಮನ್ತೀ’ತಿ? ಯತ್ಥ ಆವಾಸಿಕಾ ಭಿಕ್ಖೂ ಪಟಿಕ್ಕಮನ್ತಿ – ಉಪಟ್ಠಾನಸಾಲಾಯ ವಾ ಮಣ್ಡಪೇ ವಾ ರುಕ್ಖಮೂಲೇ ವಾ – ತತ್ಥ ಗನ್ತ್ವಾ ಏಕಮನ್ತಂ ಪತ್ತೋ ನಿಕ್ಖಿಪಿತಬ್ಬೋ; ಏಕಮನ್ತಂ ಚೀವರಂ ನಿಕ್ಖಿಪಿತಬ್ಬಂ; ಪತಿರೂಪಂ ಆಸನಂ ಗಹೇತ್ವಾ ನಿಸೀದಿತಬ್ಬಂ; ಪಾನೀಯಂ ಪುಚ್ಛಿತಬ್ಬಂ, ಪರಿಭೋಜನೀಯಂ ಪುಚ್ಛಿತಬ್ಬಂ – ‘ಕತಮಂ ಪಾನೀಯಂ, ಕತಮಂ ಪರಿಭೋಜನೀಯ’ನ್ತಿ? ಸಚೇ ಪಾನೀಯೇನ ಅತ್ಥೋ ಹೋತಿ, ಪಾನೀಯಂ ಗಹೇತ್ವಾ ಪಾತಬ್ಬಂ. ಸಚೇ ಪರಿಭೋಜನೀಯೇನ ಅತ್ಥೋ ಹೋತಿ, ಪರಿಭೋಜನೀಯಂ ಗಹೇತ್ವಾ ಪಾದಾ ಧೋವಿತಬ್ಬಾ. ಪಾದೇ ಧೋವನ್ತೇನ ಏಕೇನ ಹತ್ಥೇನ ಉದಕಂ ಆಸಿಞ್ಚಿತಬ್ಬಂ, ಏಕೇನ ಹತ್ಥೇನ ಪಾದಾ ಧೋವಿತಬ್ಬಾ. ತೇನೇವ ಉದಕಂ ಆಸಿಞ್ಚಿತಬ್ಬಂ [ಯೇನ ಹತ್ಥೇನ ಉದಕಂ ಆಸಿಞ್ಚಿತಬ್ಬಂ (ಸ್ಯಾ.)] ನ ತೇನೇವ ಹತ್ಥೇನ ಪಾದಾ ಧೋವಿತಬ್ಬಾ. ಉಪಾಹನಪುಞ್ಛನಚೋಳಕಂ ಪುಚ್ಛಿತ್ವಾ ಉಪಾಹನಾ ಪುಞ್ಛಿತಬ್ಬಾ. ಉಪಾಹನಾ ಪುಞ್ಛನ್ತೇನ ಪಠಮಂ ಸುಕ್ಖೇನ ಚೋಳಕೇನ ಪುಞ್ಛಿತಬ್ಬಾ, ಪಚ್ಛಾ ಅಲ್ಲೇನ. ಉಪಾಹನಾಪುಞ್ಛನಚೋಳಕಂ ಧೋವಿತ್ವಾ [ಪೀಳೇತ್ವಾ (ಸ್ಯಾ.)] ಏಕಮನ್ತಂ ವಿಸ್ಸಜ್ಜೇತಬ್ಬಂ.

‘‘ಸಚೇ ಆವಾಸಿಕೋ ಭಿಕ್ಖು ವುಡ್ಢೋ ಹೋತಿ, ಅಭಿವಾದೇತಬ್ಬೋ. ಸಚೇ ನವಕೋ ಹೋತಿ, ಅಭಿವಾದಾಪೇತಬ್ಬೋ. ಸೇನಾಸನಂ ಪುಚ್ಛಿತಬ್ಬಂ – ‘ಕತಮಂ ಮೇ ಸೇನಾಸನಂ ಪಾಪುಣಾತೀ’ತಿ? ಅಜ್ಝಾವುಟ್ಠಂ ವಾ ಅನಜ್ಝಾವುಟ್ಠಂ ವಾ ಪುಚ್ಛಿತಬ್ಬಂ, ಗೋಚರೋ ಪುಚ್ಛಿತಬ್ಬೋ, ಅಗೋಚರೋ ಪುಚ್ಛಿತಬ್ಬೋ, ಸೇಕ್ಖಸಮ್ಮತಾನಿ [ಸೇಖಸಮ್ಮತಾನಿ (ಕ.)] ಕುಲಾನಿ ಪುಚ್ಛಿತಬ್ಬಾನಿ, ವಚ್ಚಟ್ಠಾನಂ ಪುಚ್ಛಿತಬ್ಬಂ, ಪಸ್ಸಾವಟ್ಠಾನಂ ಪುಚ್ಛಿತಬ್ಬಂ, ಪಾನೀಯಂ ಪುಚ್ಛಿತಬ್ಬಂ, ಪರಿಭೋಜನೀಯಂ ಪುಚ್ಛಿತಬ್ಬಂ, ಕತ್ತರದಣ್ಡೋ ಪುಚ್ಛಿತಬ್ಬೋ, ಸಙ್ಘಸ್ಸ ಕತಿಕಸಣ್ಠಾನಂ ಪುಚ್ಛಿತಬ್ಬಂ – ‘ಕಂ ಕಾಲಂ ಪವಿಸಿತಬ್ಬಂ, ಕಂ ಕಾಲಂ ನಿಕ್ಖಮಿತಬ್ಬ’ನ್ತಿ? ಸಚೇ ವಿಹಾರೋ ಅನಜ್ಝಾವುಟ್ಠೋ ಹೋತಿ, ಕವಾಟಂ ಆಕೋಟೇತ್ವಾ ಮುಹುತ್ತಂ ಆಗಮೇತ್ವಾ ಘಟಿಕಂ ಉಗ್ಘಾಟೇತ್ವಾ ಕವಾಟಂ ಪಣಾಮೇತ್ವಾ ಬಹಿ ಠಿತೇನ ನಿಲ್ಲೋಕೇತಬ್ಬೋ.

‘‘ಸಚೇ ವಿಹಾರೋ ಉಕ್ಲಾಪೋ ಹೋತಿ, ಮಞ್ಚೇ ವಾ ಮಞ್ಚೋ ಆರೋಪಿತೋ ಹೋತಿ, ಪೀಠೇ ವಾ ಪೀಠಂ ಆರೋಪಿತಂ ಹೋತಿ, ಸೇನಾಸನಂ ಉಪರಿ ಪುಞ್ಜೀಕತಂ [ಪುಞ್ಜಕಿತಂ (ಕ.)] ಹೋತಿ, ಸಚೇ ಉಸ್ಸಹತಿ, ಸೋಧೇತಬ್ಬೋ. [ಮಹಾವ. ೬೬-೬೭ (ಥೋಕಂ ವಿಸದಿಸಂ)] ವಿಹಾರಂ ಸೋಧೇನ್ತೇನ ಪಠಮಂ ಭೂಮತ್ಥರಣಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ; ಮಞ್ಚಪಟಿಪಾದಕಾ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಾ; ಭಿಸಿಬಿಬ್ಬೋಹನಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ; ನಿಸೀದನಪಚ್ಚತ್ಥರಣಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ; ಮಞ್ಚೋ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ, ಅಸಙ್ಘಟ್ಟೇನ್ತೇನ ಕವಾಟಪಿಟ್ಠಂ, ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬೋ; ಪೀಠಂ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ, ಅಸಙ್ಘಟ್ಟೇನ್ತೇನ ಕವಾಟಪಿಟ್ಠಂ, ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ; ಖೇಳಮಲ್ಲಕೋ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬೋ; ಅಪಸ್ಸೇನಫಲಕಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ. ಸಚೇ ವಿಹಾರೇ ಸನ್ತಾನಕಂ ಹೋತಿ, ಉಲ್ಲೋಕಾ ಪಠಮಂ ಓಹಾರೇತಬ್ಬಂ, ಆಲೋಕಸನ್ಧಿಕಣ್ಣಭಾಗಾ ಪಮಜ್ಜಿತಬ್ಬಾ. ಸಚೇ ಗೇರುಕಪರಿಕಮ್ಮಕತಾ ಭಿತ್ತಿ ಕಣ್ಣಕಿತಾ ಹೋತಿ, ಚೋಳಕಂ ತೇಮೇತ್ವಾ ಪೀಳೇತ್ವಾ ಪಮಜ್ಜಿತಬ್ಬಾ. ಸಚೇ ಕಾಳವಣ್ಣಕತಾ ಭೂಮಿ ಕಣ್ಣಕಿತಾ ಹೋತಿ, ಚೋಳಕಂ ತೇಮೇತ್ವಾ ಪೀಳೇತ್ವಾ ಪಮಜ್ಜಿತಬ್ಬಾ. ಸಚೇ ಅಕತಾ ಹೋತಿ ಭೂಮಿ, ಉದಕೇನ ಪರಿಪ್ಫೋಸಿತ್ವಾ ಸಮ್ಮಜ್ಜಿತಬ್ಬಾ – ಮಾ ವಿಹಾರೋ ರಜೇನ ಉಹಞ್ಞೀತಿ [ಊಹಞ್ಞೀತಿ (ಸೀ. ಸ್ಯಾ.)]. ಸಙ್ಕಾರಂ ವಿಚಿನಿತ್ವಾ ಏಕಮನ್ತಂ ಛಡ್ಡೇತಬ್ಬಂ.

‘‘ಭೂಮತ್ಥರಣಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ಅತಿಹರಿತ್ವಾ ಯಥಾಠಾನೇ [ಯಥಾಪಞ್ಞತ್ತಂ (ಸೀ. ಸ್ಯಾ.), ಯಥಾಭಾಗಂ (ಕ.)] ಪಞ್ಞಪೇತಬ್ಬಂ. ಮಞ್ಚಪಟಿಪಾದಕಾ ಓತಾಪೇತ್ವಾ ಪಮಜ್ಜಿತ್ವಾ ಅತಿಹರಿತ್ವಾ ಯಥಾಠಾನೇ [ಯಥಾಭಾಗಂ (ಸ್ಯಾ. ಕ.)] ಠಪೇತಬ್ಬಾ. ಮಞ್ಚೋ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ, ಅಸಙ್ಘಟ್ಟೇನ್ತೇನ ಕವಾಟಪಿಟ್ಠಂ, ಅತಿಹರಿತ್ವಾ ಯಥಾಠಾನೇ [ಯಥಾಭಾಗಂ (ಸ್ಯಾ. ಕ.)] ಪಞ್ಞಪೇತಬ್ಬೋ. ಪೀಠಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ, ಅಸಙ್ಘಟ್ಟೇನ್ತೇನ ಕವಾಟಪಿಟ್ಠಂ, ಅತಿಹರಿತ್ವಾ ಯಥಾಠಾನೇ [ಯಥಾಭಾಗಂ (ಸ್ಯಾ. ಕ.)] ಪಞ್ಞಪೇತಬ್ಬಂ. ಭಿಸಿಬಿಬ್ಬೋಹನಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ಅತಿಹರಿತ್ವಾ ಯಥಾಭಾಗಂ ಪಞ್ಞಪೇತಬ್ಬಂ. ನಿಸೀದನಪಚ್ಚತ್ಥರಣಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ಅತಿಹರಿತ್ವಾ ಯಥಾಭಾಗಂ ಪಞ್ಞಪೇತಬ್ಬಂ. ಖೇಳಮಲ್ಲಕೋ ಓತಾಪೇತ್ವಾ ಪಮಜ್ಜಿತ್ವಾ ಅತಿಹರಿತ್ವಾ ಯಥಾಭಾಗಂ ಠಪೇತಬ್ಬೋ. ಅಪಸ್ಸೇನಫಲಕಂ ಓತಾಪೇತ್ವಾ ಪಮಜ್ಜಿತ್ವಾ ಅತಿಹರಿತ್ವಾ ಯಥಾಭಾಗಂ ಠಪೇತಬ್ಬಂ. ಪತ್ತಚೀವರಂ ನಿಕ್ಖಿಪಿತಬ್ಬಂ. ಪತ್ತಂ ನಿಕ್ಖಿಪನ್ತೇನ ಏಕೇನ ಹತ್ಥೇನ ಪತ್ತಂ ಗಹೇತ್ವಾ ಏಕೇನ ಹತ್ಥೇನ ಹೇಟ್ಠಾಮಞ್ಚಂ ವಾ ಹೇಟ್ಠಾಪೀಠಂ ವಾ ಪರಾಮಸಿತ್ವಾ ಪತ್ತೋ ನಿಕ್ಖಿಪಿತಬ್ಬೋ. ನ ಚ ಅನನ್ತರಹಿತಾಯ ಭೂಮಿಯಾ ಪತ್ತೋ ನಿಕ್ಖಿಪಿತಬ್ಬೋ. ಚೀವರಂ ನಿಕ್ಖಿಪನ್ತೇನ ಏಕೇನ ಹತ್ಥೇನ ಚೀವರಂ ಗಹೇತ್ವಾ ಏಕೇನ ಹತ್ಥೇನ ಚೀವರವಂಸಂ ವಾ ಚೀವರರಜ್ಜುಂ ವಾ ಪಮಜ್ಜಿತ್ವಾ ಪಾರತೋ ಅನ್ತಂ ಓರತೋ ಭೋಗಂ ಕತ್ವಾ ಚೀವರಂ ನಿಕ್ಖಿಪಿತಬ್ಬಂ.

‘‘ಸಚೇ ಪುರತ್ಥಿಮಾ ಸರಜಾ ವಾತಾ ವಾಯನ್ತಿ, ಪುರತ್ಥಿಮಾ ವಾತಪಾನಾ ಥಕೇತಬ್ಬಾ. ಸಚೇ ಪಚ್ಛಿಮಾ ಸರಜಾ ವಾತಾ ವಾಯನ್ತಿ, ಪಚ್ಛಿಮಾ ವಾತಪಾನಾ ಥಕೇತಬ್ಬಾ. ಸಚೇ ಉತ್ತರಾ ಸರಜಾ ವಾತಾ ವಾಯನ್ತಿ, ಉತ್ತರಾ ವಾತಪಾನಾ ಥಕೇತಬ್ಬಾ. ಸಚೇ ದಕ್ಖಿಣಾ ಸರಜಾ ವಾತಾ ವಾಯನ್ತಿ, ದಕ್ಖಿಣಾ ವಾತಪಾನಾ ಥಕೇತಬ್ಬಾ. ಸಚೇ ಸೀತಕಾಲೋ ಹೋತಿ, ದಿವಾ ವಾತಪಾನಾ ವಿವರಿತಬ್ಬಾ, ರತ್ತಿಂ ಥಕೇತಬ್ಬಾ. ಸಚೇ ಉಣ್ಹಕಾಲೋ ಹೋತಿ, ದಿವಾ ವಾತಪಾನಾ ಥಕೇತಬ್ಬಾ, ರತ್ತಿಂ ವಿವರಿತಬ್ಬಾ.

‘‘ಸಚೇ ಪರಿವೇಣಂ ಉಕ್ಲಾಪಂ ಹೋತಿ, ಪರಿವೇಣಂ ಸಮ್ಮಜ್ಜಿತಬ್ಬಂ. ಸಚೇ ಕೋಟ್ಠಕೋ ಉಕ್ಲಾಪೋ ಹೋತಿ, ಕೋಟ್ಠಕೋ ಸಮ್ಮಜ್ಜಿತಬ್ಬೋ. ಸಚೇ ಉಪಟ್ಠಾನಸಾಲಾ ಉಕ್ಲಾಪಾ ಹೋತಿ, ಉಪಟ್ಠಾನಸಾಲಾ ಸಮ್ಮಜ್ಜಿತಬ್ಬಾ. ಸಚೇ ಅಗ್ಗಿಸಾಲಾ ಉಕ್ಲಾಪಾ ಹೋತಿ, ಅಗ್ಗಿಸಾಲಾ ಸಮ್ಮಜ್ಜಿತಬ್ಬಾ. ಸಚೇ ವಚ್ಚಕುಟಿ ಉಕ್ಲಾಪಾ ಹೋತಿ, ವಚ್ಚಕುಟಿ ಸಮ್ಮಜ್ಜಿತಬ್ಬಾ. ಸಚೇ ಪಾನೀಯಂ ನ ಹೋತಿ, ಪಾನೀಯಂ ಉಪಟ್ಠಾಪೇತಬ್ಬಂ. ಸಚೇ ಪರಿಭೋಜನೀಯಂ ನ ಹೋತಿ, ಪರಿಭೋಜನೀಯಂ ಉಪಟ್ಠಾಪೇತಬ್ಬಂ. ಸಚೇ ಆಚಮನಕುಮ್ಭಿಯಾ ಉದಕಂ ನ ಹೋತಿ, ಆಚಮನಕುಮ್ಭಿಯಾ ಉದಕಂ ಆಸಿಞ್ಚಿತಬ್ಬಂ. ಇದಂ ಖೋ, ಭಿಕ್ಖವೇ, ಆಗನ್ತುಕಾನಂ ಭಿಕ್ಖೂನಂ ವತ್ತಂ ಯಥಾ ಆಗನ್ತುಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬ’’ನ್ತಿ.