೧೬. ಸಮಾರೋಪನಹಾರಸಮ್ಪಾತವಿಭಾವನಾ

೭೮. ‘‘ತಸ್ಮಾ ರಕ್ಖಿತಚಿತ್ತಸ್ಸಾ’’ತಿ ಪದೇನ ಯಂ ರಕ್ಖಿತಚಿತ್ತಂ ವುತ್ತಂ, ತಂ ರಕ್ಖಿತಚಿತ್ತಂ ತಿಣ್ಣಂ ಸುಚರಿತಾನಂ ಕಮ್ಮಾನಂ ಪದಟ್ಠಾನಂ. ಸಮ್ಮಾದಿಟ್ಠಿಯಾ ಭಾವಿತಾಯ ಅರಿಯೋ ಅಟ್ಠಙ್ಗಿಕೋ ಮಗ್ಗೋ ಭಾವಿತೋ ಭವತಿ ಏಕತೋ ಭಾವಿತಬ್ಬತ್ತಾ, ಪದಟ್ಠಾನಕಾರಣತ್ತಾ ಚ. ತೇನ ವುತ್ತಂ – ‘‘ಸಮ್ಮಾದಿಟ್ಠಿತೋ ಹೀ’’ತಿಆದಿ. ಯಸ್ಸ ಅರಹತೋ ಸಮಾಧಿವಿಮುತ್ತಿ ಭವತಿ, ಅಯಂ ಅರಹಾ ಅನುಪಾದಿಸೇಸೋ ಪುಗ್ಗಲೋ, ಅಯಂ ಸಮಾಧಿವಿಮುತ್ತಿ ಅನುಪಾದಿಸೇಸಾ ನಿಬ್ಬಾನಧಾತು.

‘‘ದೇಸನಾಹಾರಸಮ್ಪಾತಾದಿಕೋ ಹಾರಸಮ್ಪಾತೋ ಯೇನ ಸೋಳಸಪ್ಪಭೇದಭಾವೇನ ಸುತ್ತಪ್ಪದೇಸತ್ಥೇ ನಿದ್ಧಾರೇತ್ವಾ ಯುಜ್ಜಿತೋ, ಸೋಳಸಪ್ಪಭೇದಭಾವೋ ಕೇನ ಅಮ್ಹೇಹಿ ಸದ್ದಹಿತಬ್ಬೋ’’ತಿ ವತ್ತಬ್ಬತ್ತಾ ‘‘ತೇನಾಹಾ’’ತಿಆದಿ ವುತ್ತಂ. ತೇನ ಸೋಳಸಪ್ಪಭೇದಭಾವೇನ ಆಯಸ್ಮಾ ಮಹಾಕಚ್ಚಾನೋ ‘‘ಸೋಳಸ…ಪೇ… ಸುತ್ತ’’ನ್ತಿ ಯಂ ವಚನಂ ಆಹ, ತೇನ ವಚನೇನ ಸೋಳಸಪ್ಪಭೇದಭಾವೋ ತುಮ್ಹೇಹಿ ಸದ್ದಹಿತಬ್ಬೋ.

‘‘ಏತ್ತಕೋವ ಹಾರಸಮ್ಪಾತೋ ಪರಿಪುಣ್ಣೋ’’ತಿ ವತ್ತಬ್ಬತ್ತಾ ‘‘ನಿಯುತ್ತೋ ಹಾರಸಮ್ಪಾತೋ’’ತಿ ವುತ್ತಂ. ಯೇನ ಯೇನ ಸಂವಣ್ಣನಾವಿಸೇಸಭೂತೇನ ದೇಸನಾಹಾರಸಮ್ಪಾತೇನ ಸುತ್ತಪ್ಪದೇಸತ್ಥಾ ನಿದ್ಧಾರಿತಾ, ಸೋ ಸೋ ಸಂವಣ್ಣನಾವಿಸೇಸಭೂತೋ ದೇಸನಾಹಾರಸಮ್ಪಾತಾದಿಹಾರಸಮ್ಪಾತೋ ನಿಯುತ್ತೋ ಯಥಾರಹಂ ನಿದ್ಧಾರೇತ್ವಾ ಯುಜ್ಜಿತಬ್ಬೋತಿ ಅತ್ಥೋ ಗಹೇತಬ್ಬೋ, ಅಟ್ಠಕಥಾಯಞ್ಚ (ನೇತ್ತಿ. ಅಟ್ಠ. ೭೩, ೭೬) ತಥಾ ನಿದ್ಧಾರೇತ್ವಾ ಯುಜ್ಜಿತೋತಿ.

ಇತಿ ದೇಸನಾಹಾರಸಮ್ಪಾತಾದಿಹಾರಸಮ್ಪಾತೇ ಸತ್ತಿಬಲಾನುರೂಪಾ

ರಚಿತಾ ವಿಭಾವನಾ ನಿಟ್ಠಿತಾ.

ಪಣ್ಡಿತೇಹಿ ಪನ ಅಟ್ಠಕಥಾಟೀಕಾನುಸಾರೇನ ಗಮ್ಭೀರತ್ಥೋ ವಿತ್ಥಾರತೋ ವಿಭಜಿತ್ವಾ ಗಹೇತಬ್ಬೋತಿ.