೧೧. ಪಞ್ಞತ್ತಿಹಾರಸಮ್ಪಾತವಿಭಾವನಾ

೭೩. ಯೇನ ಯೇನ ವೇವಚನಹಾರಸಮ್ಪಾತೇನ ವೇವಚನಾನಿ ನಿದ್ಧಾರಿತಾನಿ, ಸೋ ವೇವಚನಹಾರಸಮ್ಪಾತೋ ಪರಿಪುಣ್ಣೋ, ‘‘ಕತಮೋ ಪಞ್ಞತ್ತಿಹಾರಸಮ್ಪಾತೋ’’ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಕತಮೋ ಪಞ್ಞತ್ತಿಹಾರಸಮ್ಪಾತೋ’’ತಿಆದಿ ವುತ್ತಂ.

‘‘ಕತಮಾ ಸುತ್ತಪ್ಪದೇಸಭೂತಾ ಪಞ್ಞತ್ತಿ ಕತಮೇಸಂ ಧಮ್ಮಾನಂ ಪಞ್ಞತ್ತೀ’’ತಿ ಪುಚ್ಛಿತಬ್ಬತ್ತಾ ‘‘ತಸ್ಮಾ’’ತಿಆದಿ ವುತ್ತಂ. ‘‘ತಸ್ಮಾ ರಕ್ಖಿತಚಿತ್ತಸ್ಸಾ’’ತಿ ಪಞ್ಞತ್ತಿ ಸತಿಯಾ ಪದಟ್ಠಾನಸ್ಸ ರಕ್ಖಿತಬ್ಬಸ್ಸ ಚಿತ್ತಸ್ಸ ಪಞ್ಞಾಪನತೋ ಸತಿಯಾ ಪದಟ್ಠಾನಪಞ್ಞತ್ತಿ ನಾಮ. ಸತಿಯಾ ಹಿ ರಕ್ಖಿತಬ್ಬಂ ಚಿತ್ತಂ ಸತಿಯಾ ಪದಟ್ಠಾನಂ ಅಧಿಟ್ಠಾನಂ ನಾಮ. ತೇನಾಹ ಅಟ್ಠಕಥಾಯಂ – ‘‘ಅಧಿಟ್ಠಹಿತ್ವಾ ರಕ್ಖನ್ತಿಯಾ ಸತಿಯಾ ರಕ್ಖಿಯಮಾನಂ ಚಿತ್ತಂ ತಸ್ಸಾ ಅಧಿಟ್ಠಾನಂ ವಿಯ ಹೋತೀ’’ತಿ. ‘‘ಸಮ್ಮಾಸಙ್ಕಪ್ಪಗೋಚರೋ’’ತಿ ಪಞ್ಞತ್ತಿ ಸಮಥಸ್ಸ ಭಾವನಾಯ ಪಞ್ಞಾಪನತೋ ಸಮಥಸ್ಸ ಭಾವನಾಪಞ್ಞತ್ತಿ ನಾಮ. ‘‘ಸಮ್ಮಾದಿಟ್ಠಿಪುರೇಕ್ಖಾರೋ, ಞತ್ವಾನ ಉದಯಬ್ಬಯ’’ನ್ತಿ ಪಞ್ಞತ್ತಿ ದಸ್ಸನಭೂಮಿಯಾ ನಿಕ್ಖೇಪಸ್ಸ ಪಞ್ಞಾಪನತೋ ನಿಕ್ಖೇಪಪಞ್ಞತ್ತಿ ನಾಮ. ‘‘ಥಿನಮಿದ್ಧಾಭಿಭೂ ಭಿಕ್ಖೂ’’ತಿ ಸಮುದಯಸ್ಸ ಅನವಸೇಸಪ್ಪಹಾನಸ್ಸ ಪಞ್ಞಾಪನತೋ ಅನವಸೇಸಪ್ಪಹಾನಪಞ್ಞತ್ತಿ ನಾಮ. ‘‘ಸಬ್ಬಾ ದುಗ್ಗತಿಯೋ ಜಹೇ’’ತಿ ಪಞ್ಞತ್ತಿ ಮಗ್ಗಸ್ಸ ಅರಿಯಮಗ್ಗಸ್ಸ ಭಾವನಾಯ ಪಞ್ಞಾಪನತೋ ಭಾವನಾಪಞ್ಞತ್ತಿ ನಾಮ.

‘‘ಏತ್ತಕೋವ ಪಞ್ಞತ್ತಿಹಾರಸಮ್ಪಾತೋ ಪರಿಪುಣ್ಣೋ’’ತಿ ವತ್ತಬ್ಬತ್ತಾ ‘‘ನಿಯುತ್ತೋ ಪಞ್ಞತ್ತಿಹಾರಸಮ್ಪಾತೋ’’ತಿ ವುತ್ತಂ. ಯೇನ ಯೇನ ಸಂವಣ್ಣನಾವಿಸೇಸಭೂತೇನ ಪಞ್ಞತ್ತಿಹಾರಸಮ್ಪಾತೇನ ಪಞ್ಞತ್ತಿಪ್ಪಭೇದಾ ನಿದ್ಧಾರಿತಾ, ಸೋ ಸೋ ಸಂವಣ್ಣನಾವಿಸೇಸಭೂತೋ ಪಞ್ಞತ್ತಿಹಾರಸಮ್ಪಾತೋ ನಿಯುತ್ತೋ ಯಥಾರಹಂ ನಿದ್ಧಾರೇತ್ವಾ ಯುಜ್ಜಿತಬ್ಬೋತಿ ಅತ್ಥೋ ಗಹೇತಬ್ಬೋತಿ.

ಇತಿ ಪಞ್ಞತ್ತಿಹಾರಸಮ್ಪಾತೇ ಸತ್ತಿಬಲಾನುರೂಪಾ ರಚಿತಾ

ವಿಭಾವನಾ ನಿಟ್ಠಿತಾ.

ಪಣ್ಡಿತೇಹಿ ಪನ…ಪೇ… ಗಹೇತಬ್ಬೋತಿ.