೧೨. ಓತರಣಹಾರಸಮ್ಪಾತವಿಭಾವನಾ

೭೪. ಯೇನ ಯೇನ ಪಞ್ಞತ್ತಿಹಾರಸಮ್ಪಾತೇನ ಪಞ್ಞತ್ತಿಪ್ಪಭೇದಾ ನಿದ್ಧಾರಿತಾ, ಸೋ ಪಞ್ಞತ್ತಿಹಾರಸಮ್ಪಾತೋ ಪರಿಪುಣ್ಣೋ, ‘‘ಕತಮೋ ಓತರಣೋ ಹಾರಸಮ್ಪಾತೋ’’ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಕತಮೋ ಓತರಣೋ ಹಾರಸಮ್ಪಾತೋ’’ತಿಆದಿಮಾಹ.

‘‘ತತ್ಥ ತಿಸ್ಸಂ ಗಾಥಾಯಂ ಕತಮಾನಿ ಇನ್ದ್ರಿಯಾನಿ ನಿದ್ಧಾರೇತ್ವಾ ಕತಮೇಹಿ ನಿದ್ಧಾರಿತೇಹಿ ಧಮ್ಮೇಹಿ ಓತರತೀ’’ತಿ ಪುಚ್ಛಿತಬ್ಬತ್ತಾ ‘‘ತಸ್ಮಾ’’ತಿಆದಿ ವುತ್ತಂ. ಯಾ ‘‘ತಸ್ಮಾ ರಕ್ಖಿತಚಿತ್ತಸ್ಸಾ’’ತಿಆದಿಗಾಥಾ ವುತ್ತಾ, ತಿಸ್ಸಂ ಗಾಥಾಯಂ ‘‘ತಸ್ಮಾ…ಪೇ… ಪುರೇಕ್ಖಾರೋ’’ತಿ ಸುತ್ತಪ್ಪದೇಸೇನ ಸಮ್ಮಾದಿಟ್ಠಿ ಗಹಿತಾ, ಸಮ್ಮಾದಿಟ್ಠಿಯಾ ಗಹಿತಾಯ ಪಞ್ಚಿನ್ದ್ರಿಯಾನಿ ಸದ್ಧಾದಿಪಞ್ಚಿನ್ದ್ರಿಯಾನಿ ಗಹಿತಾನಿ ಭವನ್ತಿ.

ತಾನಿಯೇವ ಸದ್ಧಾದಿಪಞ್ಚಿನ್ದ್ರಿಯಾನಿ ವಿಜ್ಜಾಯ ಉಪಕಾರತ್ತಾ ವಾ ಪದಟ್ಠಾನತ್ತಾ ವಾ ವಿಜ್ಜಾ ಭವನ್ತಿ, ವಿಜ್ಜುಪ್ಪಾದಾ ತಾದಿಸಾಯ ವಿಜ್ಜಾಯ ಉಪ್ಪಾದಾ ಉಪ್ಪಾದಹೇತುತೋ ಅವಿಜ್ಜಾನಿರೋಧೋ ಸಮ್ಭವತಿ, ಅವಿಜ್ಜಾನಿರೋಧಾ ಸಙ್ಖಾರನಿರೋಧೋ ಸಮ್ಭವತಿ…ಪೇ… ಜಾತಿನಿರೋಧಾ ಜರಾಮರಣನಿರೋಧೋ ಸಮ್ಭವತೀತಿ. ಅಯಂ ಓತರಣಾ ಪಟಿಚ್ಚಸಮುಪ್ಪಾದೇನ ಪಞ್ಚಿನ್ದ್ರಿಯಾನಂ ಓತರಣಾ ನಾಮ.

ತಾನಿಯೇವ ಪಞ್ಚಿನ್ದ್ರಿಯಾನಿ ಸೀಲಕ್ಖನ್ಧೇನ ಸಮಾಧಿಕ್ಖನ್ಧೇನ ಪಞ್ಞಾಕ್ಖನ್ಧೇನ ತೀಹಿ ಖನ್ಧೇಹಿ ಸಙ್ಗಹಿತಾನಿ ಭವನ್ತಿ ಸದ್ಧಾವೀರಿಯೇಹಿ ಸೀಲಸಮ್ಭವತೋ, ಸತಿಯಾ ಚ ಪಞ್ಞಾನುವತ್ತಕತ್ತಾ. ಅಯಂ ಓತರಣಾ ಖನ್ಧೇಹಿ ಪಞ್ಚಿನ್ದ್ರಿಯಾನಂ ಓತರಣಾ ನಾಮ.

ತಾನಿಯೇವ ಪಞ್ಚಿನ್ದ್ರಿಯಾನಿ ಸಙ್ಖಾರಪರಿಯಾಪನ್ನಾನಿ ಭವನ್ತಿ. ಯೇ ಸಙ್ಖಾರಾ ಅನಾಸವಾ ಭವನ್ತಿ, ಭವಙ್ಗಾ ಭವಹೇತೂ ನೋ ಭವನ್ತಿ, ತೇ ಅನಾಸವಾ ಸಙ್ಖಾರಾ ಧಮ್ಮಧಾತುಸಙ್ಗಹಿತಾ ಭವನ್ತಿ ಧಮ್ಮಧಾತುಯಾ ಅನ್ತೋಗಧತ್ತಾ. ಅಯಂ ಓತರಣಾ ಧಾತೂಹಿ ಪಞ್ಚಿನ್ದ್ರಿಯಾನಂ ಓತರಣಾ ನಾಮ.

ಸಾ ಅನಾಸವಾ ಧಮ್ಮಧಾತು ಧಮ್ಮಾಯತನಪರಿಯಾಪನ್ನಾ ಭವತಿ, ಯಂ ಆಯತನಂ ಅನಾಸವಂ ಭವತಿ, ಭವಙ್ಗಂ ಭವಹೇತು ನೋ ಭವತಿ. ಅಯಂ ಓತರಣಾ ಆಯತನೇಹಿ ಧಮ್ಮಧಾತುಯಾ ಓತರಣಾ ನಾಮ.

‘‘ಏತ್ತಕೋವ ಓತರಣೋ ಹಾರಸಮ್ಪಾತೋ ಪರಿಪುಣ್ಣೋ’’ತಿ ವತ್ತಬ್ಬತ್ತಾ ‘‘ನಿಯುತ್ತೋ ಓತರಣೋ ಹಾರಸಮ್ಪಾತೋ’’ತಿ ವುತ್ತಂ. ಯೇನ ಯೇನ ಸಂವಣ್ಣನಾವಿಸೇಸಭೂತೇನ ಓತರಣಹಾರಸಮ್ಪಾತೇನ ಸುತ್ತಪ್ಪದೇಸತ್ಥಾ ಓತರಿತಬ್ಬಾ, ಸೋ ಸೋ ಸಂವಣ್ಣನಾವಿಸೇಸಭೂತೋ ಓತರಣೋ ಹಾರಸಮ್ಪಾತೋ ನಿಯುತ್ತೋ ಯಥಾರಹಂ ನಿದ್ಧಾರೇತ್ವಾ ಯುಜ್ಜಿತಬ್ಬೋತಿ ಅತ್ಥೋ ಗಹೇತಬ್ಬೋತಿ.

ಇತಿ ಓತರಣಹಾರಸಮ್ಪಾತೇ ಸತ್ತಿಬಲಾನುರೂಪಾ ರಚಿತಾ

ವಿಭಾವನಾ ನಿಟ್ಠಿತಾ.

ಪಣ್ಡಿತೇಹಿ ಪನ…ಪೇ… ಗಹೇತಬ್ಬೋತಿ.

ಇತೋ ಪಟ್ಠಾಯ ‘‘ತತ್ಥ ಕತಮೋ’’ತಿಆದಿಅನುಸನ್ಧ್ಯತ್ಥೋ ಚ ಪರಿಯೋಸಾನೇ ‘‘ನಿಯುತ್ತೋ’’ತಿಆದಿಅನುಸನ್ಧ್ಯತ್ಥೋ ಚ ವುತ್ತನಯಾನುಸಾರೇನೇವ ವಿಞ್ಞಾತಬ್ಬೋ. ಕತ್ಥಚಿ ಕತ್ಥಚಿ ಪಾಠೇ ಅಪಾಕಟಂಯೇವ ಯಥಾಬಲಂ ಕಥಯಿಸ್ಸಾಮ.