೧. ಅತೀತಾದಿಏಕಚ್ಚಕಥಾವಣ್ಣನಾ

೨೯೯. ಯೇ ಕತೂಪಚಿತಾ ಕುಸಲಾಕುಸಲಾ ಧಮ್ಮಾ ವಿಪಾಕದಾನಾಯ ಅಕತೋಕಾಸಾ, ಕತೋಕಾಸಾ ಚ ಯೇ ‘‘ಓಕಾಸಕತುಪ್ಪನ್ನಾ’’ತಿ ವುಚ್ಚನ್ತಿ. ಯೇ ಚ ವಿಪ್ಪಕತವಿಪಾಕಾ, ತೇ ಸಬ್ಬೇಪಿ ‘‘ಅವಿಪಕ್ಕವಿಪಾಕಾ’’ತಿ ವೇದಿತಬ್ಬಾ. ತೇಸಂ ವಿಪಾಕದಾನಸಾಮತ್ಥಿಯಂ ಅನಪಗತನ್ತಿ ಅಧಿಪ್ಪಾಯೇನ ಪರವಾದೀ ಅತ್ಥಿತಂ ಇಚ್ಛತಿ. ಯೇ ಪನ ಪರವಾದೀ ಸಬ್ಬೇನ ಸಬ್ಬಂ ವಿಪಕ್ಕವಿಪಾಕಾ ಕುಸಲಾಕುಸಲಾ ಧಮ್ಮಾ, ತೇಸಂ ಅಪಗತನ್ತಿ ನತ್ಥಿತಂ ಇಚ್ಛತಿ. ತೇನಾಹ ‘‘ಅತ್ಥೀತಿ ಏಕಚ್ಚಂ ಅತ್ಥಿ ಏಕಚ್ಚಂ ನತ್ಥೀ’’ತಿಆದಿ. ಏವಂ ಇಚ್ಛನ್ತಸ್ಸ ಪನ ಪರವಾದಿನೋ ಯಥಾ ಅವಿಪಾಕೇಸುಪಿ ಏಕಚ್ಚಂ ನತ್ಥೀತಿ ಆಪಜ್ಜತಿ, ಏವಂ ವಿಪಕ್ಕವಿಪಾಕೇಸು ಅವಿಪಕ್ಕವಿಪಾಕೇಸು ಚ ಆಪಜ್ಜತೇವಾತಿ ದಸ್ಸೇತುಂ ‘‘ಅವಿಪಕ್ಕವಿಪಾಕಾ ಧಮ್ಮಾ ಏಕಚ್ಚೇ’’ತಿಆದಿನಾ ಪಾಳಿ ಪವತ್ತಾ. ತೇನ ವುತ್ತಂ ‘‘ತಿಣ್ಣಂ ರಾಸೀನಂ ವಸೇನಾ’’ತಿಆದಿ. ವೋಹಾರವಸೇನಾತಿ ಫಲಸ್ಸ ಅನುಪರಮವೋಹಾರವಸೇನ, ಹೇತುಕಿಚ್ಚಂ ಪನ ಅನುಪರತಂ ಅನುಪಚ್ಛಿನ್ನಂ ಅತ್ಥೀತಿ ಲದ್ಧಿಯಂ ಠಿತತ್ತಾ ಚೋದೇತಬ್ಬೋವ. ಅವಿಚ್ಛೇದವಸೇನ ಪವತ್ತಮಾನಞ್ಹಿ ಫಲಸ್ಸ ಪಬನ್ಧವೋಹಾರಂ ಪರವಾದೀ ವೋಹಾರತೋ ಅತ್ಥೀತಿ ಇಚ್ಛತಿ, ಹೇತು ಪನಸ್ಸ ಕಮ್ಮಂ ಪರಮತ್ಥತೋ ಚ ಕಮ್ಮೂಪಚಯವಾದಿಭಾವತೋ ಪತ್ತಿಅಪ್ಪತ್ತಿಸಭಾವತಾದಯೋ ವಿಯ ಚಿತ್ತವಿಪ್ಪಯುತ್ತೋ ಕಮ್ಮೂಪಚಯೋ ನಾಮ ಏಕೋ ಸಙ್ಖಾರಧಮ್ಮೋ ಅವಿಪನ್ನೋ, ಸೋಪಿ ತಸ್ಸೇವ ವೇವಚನನ್ತಿ ಪರವಾದೀ. ಯಂ ಸನ್ಧಾಯಾಹ –

‘‘ನಪ್ಪಚಯನ್ತಿ ಕಮ್ಮಾನಿ, ಅಪಿ ಕಪ್ಪಸಹಸ್ಸತೋ;

ಪತ್ವಾ ಪಚ್ಚಯಸಾಮಗ್ಗಿಂ, ಕಾಲೇ ಪಚ್ಚನ್ತಿ ಪಾಣಿನ’’ನ್ತಿ.

ಯಞ್ಚ ಸನ್ಧಾಯ ಪರತೋ ಪರಿಭೋಗಮಯಪುಞ್ಞಕಥಾಯ ‘‘ಪರಿಭೋಗಮಯಂ ಪನ ಚಿತ್ತವಿಪ್ಪಯುತ್ತಂ ಉಪ್ಪಜ್ಜತೀತಿ ಲದ್ಧಿಯಾ ಪಟಿಜಾನಾತೀ’’ತಿ ವಕ್ಖತಿ.

ಏಕಚ್ಚಂಅತ್ಥೀತಿಕಥಾವಣ್ಣನಾ ನಿಟ್ಠಿತಾ.