೯. ಆಸೇವನಪಚ್ಚಯಕಥಾವಣ್ಣನಾ

೯೦೩-೯೦೫. ಬೀಜಂ ಚತುಮಧುರಭಾವಂ ನ ಗಣ್ಹಾತೀತಿ ಇದಂ ಸಕಸಮಯವಸೇನ ವುತ್ತಂ, ಪರಸಮಯೇ ಪನ ರೂಪಧಮ್ಮಾಪಿ ಅರೂಪಧಮ್ಮೇಹಿ ಸಮಾನಕ್ಖಣಾ ಏವ ಇಚ್ಛಿತಾ. ತೇನೇವಾಹ ‘‘ಸಬ್ಬೇ ಧಮ್ಮಾ ಖಣಿಕಾ’’ತಿ. ಖಣಿಕತ್ತೇಪಿ ವಾ ಅಚೇತನೇಸುಪಿ ಅನಿನ್ದ್ರಿಯಬದ್ಧರೂಪೇಸು ಭಾವನಾವಿಸೇಸೋ ಲಬ್ಭತಿ, ಕಿಮಙ್ಗಂ ಪನ ಸಚೇತನೇಸೂತಿ ದಸ್ಸೇತುಂ ‘‘ಯಥಾ ಬೀಜಂ ಚತುಮಧುರಭಾವಂ ನ ಗಣ್ಹಾತೀ’’ತಿ ನಿದಸ್ಸನನ್ತಿ ದಟ್ಠಬ್ಬಂ. ಆಸೇವೇನ್ತೋ ನಾಮ ಕೋಚಿ ಧಮ್ಮೋ ನತ್ಥಿ ಇತ್ತರತಾಯ ಅನವಟ್ಠಾನತೋತಿ ಅಧಿಪ್ಪಾಯೋ. ಇತ್ತರಖಣತಾಯ ಏವ ಪನ ಆಸೇವನಂ ಲಬ್ಭತಿ. ಕುಸಲಾದಿಭಾವೇನ ಹಿ ಅತ್ತಸದಿಸಸ್ಸ ಪಯೋಗೇನ ಕರಣೀಯಸ್ಸ ಪುನಪ್ಪುನಂ ಕರಣಪ್ಪವತ್ತನಂ ಅತ್ತಸದಿಸತಾಪಾದನಂ ವಾಸನಂ ವಾ ಆಸೇವನಂ ಪುರೇ ಪರಿಚಿತಗನ್ಥೋ ವಿಯ ಪಚ್ಛಿಮಸ್ಸಾತಿ.

ಆಸೇವನಪಚ್ಚಯಕಥಾವಣ್ಣನಾ ನಿಟ್ಠಿತಾ.