೧೦. ಖಣಿಕಕಥಾವಣ್ಣನಾ

೯೦೬-೯೦೭. ಪಥವಿಯಾದಿರೂಪೇಸೂತಿ ಅನೇಕಕಲಾಪಸಮುದಾಯಭೂತೇಸು ಸಸಮ್ಭಾರಪಥವೀಆದಿರೂಪೇಸು. ತತ್ಥ ಹಿ ಕೇಸುಚಿ ಪುರಿಮುಪ್ಪನ್ನೇಸು ಠಿತೇಸು ಕೇಸಞ್ಚಿ ತದಞ್ಞೇಸಂ ಉಪ್ಪಾದೋ, ತತೋ ಪುರಿಮನ್ತರುಪ್ಪನ್ನಾನಂ ಕೇಸಞ್ಚಿ ನಿರೋಧೋ ಹೋತಿ ಏಕೇಕಕಲಾಪರೂಪೇಸು ಸಮಾನುಪ್ಪಾದನಿರೋಧತ್ತಾ ತೇಸಂ. ಏವಂ ಪತಿಟ್ಠಾನನ್ತಿ ಏವಂ ವುತ್ತಪ್ಪಕಾರೇನ ಅಸಮಾನುಪ್ಪಾದನಿರೋಧೇನ ಪಬನ್ಧೇನ ಪತಿಟ್ಠಾನಪವತ್ತೀತಿ ಅತ್ಥೋ. ಸಾ ಪನಾಯಂ ಯಥಾವುತ್ತಾ ಪವತ್ತಿ ಕಸ್ಮಾ ರೂಪಸನ್ತತಿಯಾ ಏವಾತಿ ಆಹ ‘‘ನ ಹಿ ರೂಪಾನ’’ನ್ತಿಆದಿ. ತಸ್ಸತ್ಥೋ – ಯದಿ ಸಬ್ಬೇ ಸಙ್ಖತಧಮ್ಮಾ ಸಮಾನಕ್ಖಣಾ, ತಥಾ ಸತಿ ಅರೂಪಸನ್ತತಿಯಾ ವಿಯ ರೂಪಸನ್ತತಿಯಾಪಿ ಅನನ್ತರಾದಿಪಚ್ಚಯೇನ ವಿಧಿನಾ ಪವತ್ತಿ ಸಿಯಾ, ನ ಚೇತಂ ಅತ್ಥಿ. ಯದಿ ಸಿಯಾ, ಚಿತ್ತಕ್ಖಣೇ ಚಿತ್ತಕ್ಖಣೇ ಪಥವೀಆದೀನಂ ಉಪ್ಪಾದನಿರೋಧೇಹಿ ಭವಿತಬ್ಬನ್ತಿ.

ಖಣಿಕಕಥಾವಣ್ಣನಾ ನಿಟ್ಠಿತಾ.

ಬಾವೀಸತಿಮವಗ್ಗವಣ್ಣನಾ ನಿಟ್ಠಿತಾ.