ಭಿಕ್ಖುನೀವಿಭಙ್ಗೋ

೧೭೦. ಭಿಕ್ಖೂನಂ ಪಾಟವತ್ಥಾಯ, ವಿನಯಸ್ಸ ವಿನಿಚ್ಛಯೇ;

ಭಿಕ್ಖುನೀನಂ ವಿಭಙ್ಗೋಪಿ, ಕಿಞ್ಚಿಮತ್ತಂ ಭಣಾಮಹಂ.

೧೭೧. ಅವಸ್ಸುತಸ್ಸ ಪೋಸಸ್ಸ, ಭಿಕ್ಖುನೀಪಿ ಅವಸ್ಸುತಾ;

ನನ್ದನ್ತೀ ಕಾಯಸಂಸಗ್ಗಂ, ಕತಿ ಆಪತ್ತಿಯೋ ಫುಸೇ;

೧೭೨. ತಿಸ್ಸೋ ಆಪತ್ತಿಯೋ ಉಬ್ಭ-ಜಾಣುಸ್ಸಾಧಕ್ಖಕಸ್ಸ ಚ;

ಹೋತಿ ಪಾರಾಜಿಕಂ ತಸ್ಸಾ, ಗಹಣಂ ಸಾದಿಯನ್ತಿಯಾ.

೧೭೩. ಉಬ್ಭಕ್ಖಕಂ ಅಧೋಜಾಣು-ಗಹಣಂ ಸಾದಿಯನ್ತಿಯಾ;

ಥುಲ್ಲಚ್ಚಯಂ ಸಿಯಾ, ಕಾಯ-ಪಟಿಬದ್ಧೇ ತು ದುಕ್ಕಟಂ.

೧೭೪. ಛಾದೇನ್ತೀ ಭಿಕ್ಖುನೀ ವಜ್ಜಂ, ತಿಸ್ಸೋ ಆಪತ್ತಿಯೋ ಫುಸೇ;

ಜಾನಂ ಪಾರಾಜಿಕಂ ಧಮ್ಮಂ, ಛಾದೇನ್ತೀ ಸಾ ಪರಾಜಿಕಾ.

೧೭೫. ಥುಲ್ಲಚ್ಚಯಂ ವೇಮತಿಕಾ, ಪಟಿಚ್ಛಾದೇತಿ ಚೇ ಪನ;

ಅಥಾಚಾರವಿಪತ್ತಿಂ ಚೇ, ಪಟಿಚ್ಛಾದೇತಿ ದುಕ್ಕಟಂ.

೧೭೬. ನಿಸ್ಸಜ್ಜನ್ತೀ ನ ತಂ ಲದ್ಧಿಂ, ಉಕ್ಖಿತ್ತಸ್ಸಾನುವತ್ತಿಕಾ;

ಸಮನುಭಾಸನಾಯೇವ, ತಿಸ್ಸೋ ಆಪತ್ತಿಯೋ ಫುಸೇ.

೧೭೭. ಞತ್ತಿಯಾ ದುಕ್ಕಟಂ, ದ್ವೀಹಿ, ಕಮ್ಮವಾಚಾಹಿ ಥುಲ್ಲತಾ;

ಕಮ್ಮವಾಚಾಯ ಓಸಾನೇ, ಪಾರಾಜಿಕಮುದೀರಿತಂ.

೧೭೮. ಪೂರೇನ್ತೀ ಅಟ್ಠಮಂ ವತ್ಥುಂ, ತಿಸ್ಸೋ ಆಪತ್ತಿಯೋ ಫುಸೇ;

ಪುರಿಸೇನಿಧಾಗಚ್ಛಾತಿ, ವುತ್ತಾಗಚ್ಛತಿ ದುಕ್ಕಟಂ.

೧೭೯. ಥುಲ್ಲಚ್ಚಯಂ ತು ಪೋಸಸ್ಸ, ಹತ್ಥಪಾಸಪ್ಪವೇಸನೇ;

ಪೂರೇನ್ತೀ ಅಟ್ಠಮಂ ವತ್ಥುಂ, ಸಮಣೀ ಸಾ ಪರಾಜಿತಾ.

ಪಾರಾಜಿಕಕಥಾ.

೧೮೦. ಉಸ್ಸಯವಾದಿಕಾ ಅಟ್ಟಂ, ಕರೋನ್ತೀ ತಿವಿಧಂ ಫುಸೇ;

ಏಕಸ್ಸಾರೋಚನೇ ತಸ್ಸಾ, ಹೋತಿ ಆಪತ್ತಿ ದುಕ್ಕಟಂ.

೧೮೧. ದುತಿಯಾರೋಚನೇ ತಸ್ಸಾ, ಥುಲ್ಲಚ್ಚಯಮುದೀರಿತಂ;

ಅಟ್ಟಸ್ಸ ಪರಿಯೋಸಾನೇ, ಹೋತಿ ಸಙ್ಘಾದಿಸೇಸತಾ.

೧೮೨. ಚೋರಿವುಟ್ಠಾಪಿಕಾ ವಾಪಿ, ಞತ್ತಿಯಾ ದುಕ್ಕಟಂ ಫುಸೇ;

ದ್ವೀಹಿ ಥುಲ್ಲಚ್ಚಯಂ ಕಮ್ಮ-ವಾಚೋಸಾನೇ ಗರುಂ ಸಿಯಾ.

೧೮೩. ಏಕಾ ಗಾಮನ್ತರಂ ಗಚ್ಛೇ, ಗಮನೇ ದುಕ್ಕಟಂ ಸಿಯಾ;

ಪರಿಕ್ಖೇಪೇ ಅತಿಕ್ಕನ್ತೇ, ಪಾದೇನ ಪಠಮೇನ ತು.

೧೮೪. ಹೋತಿ ಥುಲ್ಲಚ್ಚಯಾಪತ್ತಿ, ತಸ್ಸಾ ಸಮಣಿಯಾ ಪನ;

ದುತಿಯೇನ ಅತಿಕ್ಕನ್ತೇ, ಗರುಕೇ ಪನ ತಿಟ್ಠತಿ.

೧೮೫. ಚತುತ್ಥೇ ದುತಿಯೇ ವುತ್ತ-ಸದಿಸೋವ ವಿನಿಚ್ಛಯೋ;

ಆಪತ್ತೀನಂ ಪಭೇದೇ ತು, ಕಾಚಿ ನತ್ಥಿ ವಿಸೇಸತಾ.

೧೮೬. ಅವಸ್ಸುತಾ ಸಯಂ ಹುತ್ವಾ, ತಾದಿಸಸ್ಸೇವ ಹತ್ಥತೋ;

ಗಹೇತ್ವಾ ಪನ ಭುಞ್ಜನ್ತೀ, ಭೋಜನಾದೀಸು ಕಿಞ್ಚಿಪಿ.

೧೮೭. ಫುಸೇ ಆಪತ್ತಿಯೋ ತಿಸ್ಸೋ, ಭೋಜನಾದೀಸು ಕಿಞ್ಚಿಪಿ;

ಪಟಿಗ್ಗಣ್ಹನ್ತಿಯಾ ತಸ್ಸಾ, ಹೋತಿ ಥುಲ್ಲಚ್ಚಯಂ ಪನ.

೧೮೮. ಅಜ್ಝೋಹಾರೇಸು ಸಬ್ಬೇಸು, ಹೋತಿ ಸಙ್ಘಾದಿಸೇಸತಾ;

ಉದಕಂ ದನ್ತಪೋನಂ ವಾ, ಪಟಿಗ್ಗಣ್ಹಾತಿ ದುಕ್ಕಟಂ.

೧೮೯. ‘‘ಸಹತ್ಥೇನ ಗಹೇತ್ವಾ ತ್ವಂ, ಖಾದ ವಾ ಭುಞ್ಜ ವಾ’’ತಿಪಿ;

ಉಯ್ಯೋಜೇನ್ತೀ ಪನೇವಂ ತು, ತಿಸ್ಸೋ ಆಪತ್ತಿಯೋ ಫುಸೇ.

೧೯೦. ದುಕ್ಕಟಂ ವಚನೇ ತಸ್ಸಾ, ‘‘ಭುಞ್ಜಿಸ್ಸಾಮೀ’’ತಿ ಗಣ್ಹತಿ;

ಅಜ್ಝೋಹಾರೇಸು ಸಬ್ಬೇಸು, ತಸ್ಸಾ ಥುಲ್ಲಚ್ಚಯಂ ಸಿಯಾ.

೧೯೧. ಭೋಜನಸ್ಸ ಪನೋಸಾನೇ, ಹೋತಿ ಸಙ್ಘಾದಿಸೇಸತಾ;

ಉಯ್ಯೋಜೇತಿ ಚ ಯಾ ತಸ್ಸಾ, ಇಮಾ ತಿಸ್ಸೋತಿ ದೀಪಯೇ.

೧೯೨. ಸತ್ತಮೇ ಅಟ್ಠಮೇ ಚಾಪಿ, ನವಮೇ ದಸಮೇಪಿ ಚ;

ಚೋರಿವುಟ್ಠಾಪನೇನೇವ, ಸಮಾನೋವ ವಿನಿಚ್ಛಯೋ.

ಸಙ್ಘಾದಿಸೇಸಕಥಾ.

೧೯೩. ಪತ್ತಸನ್ನಿಚಯಂ ಯಿಹ, ಕರೋನ್ತೀ ಭಿಕ್ಖುನೀ ಪನ;

ಏಕಂ ನಿಸ್ಸಗ್ಗಿಯಂಯೇವ, ಫುಸೇ ಪಾಚಿತ್ತಿಯಂ ತು ಸಾ.

೧೯೪. ಅಕಾಲಚೀವರಂ ಕಾಲ-ಚೀವರಂ ಭಾಜಾಪೇನ್ತಿಯಾ;

ಪಯೋಗೇ ದುಕ್ಕಟಂ ವುತ್ತಂ, ಲಾಭೇ ನಿಸ್ಸಗ್ಗಿಯಂ ಸಿಯಾ.

೧೯೫. ಚೀವರಂ ಪರಿವತ್ತೇತ್ವಾ, ಅಚ್ಛಿನ್ದತಿ ಸಚೇ ಪನ;

ಪಯೋಗೇ ದುಕ್ಕಟಂ, ಛಿನ್ನೇ, ತಸ್ಸಾ ನಿಸ್ಸಗ್ಗಿಯಂ ಸಿಯಾ.

೧೯೬. ವಿಞ್ಞಾಪೇತ್ವಾವ ಅಞ್ಞಂ ಚೇ, ವಿಞ್ಞಾಪೇತಿ ತತೋ ಪರಂ;

ಪಯೋಗೇ ದುಕ್ಕಟಂ, ವಿಞ್ಞಾ-ಪಿತೇ ನಿಸ್ಸಗ್ಗಿಯಂ ಸಿಯಾ.

೧೯೭. ಚೇತಾಪೇತ್ವಾ ಹಿ ಅಞ್ಞಂ ಚೇ, ಚೇತಾಪೇತಿ ತತೋ ಪರಂ;

ಪಯೋಗೇ ದುಕ್ಕಟಂ, ಚೇತಾ-ಪಿತೇ ನಿಸ್ಸಗ್ಗಿಯಂ ಸಿಯಾ.

೧೯೮. ಏವಮೇವ ಚ ಸೇಸೇಸು, ಛಟ್ಠಾದೀಸು ಚ ಸತ್ತಸು;

ಅನನ್ತರಸಮಾನೋವ, ಆಪತ್ತೀನಂ ವಿನಿಚ್ಛಯೋ.

ನಿಸ್ಸಗ್ಗಿಯಕಥಾ.

೧೯೯. ಲಸುಣಂ ಖಾದತಿ ದ್ವೇ ಚೇ, ದುಕ್ಕಟಂ ಗಹಣೇ ಸಿಯಾ;

ಅಜ್ಝೋಹಾರಪಯೋಗೇಸು, ಪಾಚಿತ್ತಿ ಪರಿಯಾಪುತಾ.

೨೦೦. ಸಂಹರಾಪೇನ್ತಿಯಾ ಲೋಮಂ, ಸಮ್ಬಾಧೇ ದ್ವೇವ ಹೋನ್ತಿ ಹಿ;

ಪಯೋಗೇ ದುಕ್ಕಟಂ ವುತ್ತಂ, ಹೋತಿ ಪಾಚಿತ್ತಿ ಸಂಹಟೇ.

೨೦೧. ಕರೋನ್ತೀ ತಲಘಾತಂ ತು, ದ್ವೇ ಪನಾಪತ್ತಿಯೋ ಫುಸೇ;

ಪಯೋಗೇ ದುಕ್ಕಟಂ ಹೋತಿ, ಕತೇ ಪಾಚಿತ್ತಿಯಂ ಸಿಯಾ.

೨೦೨. ಜತುನಾ ಮಟ್ಠಕಂ ಕಿಞ್ಚಿ, ಸಾದಿಯನ್ತೀ ದುವೇ ಫುಸೇ;

ಪಯೋಗೇ ದುಕ್ಕಟಾದಿನ್ನೇ, ತಸ್ಸಾ ಪಾಚಿತ್ತಿಯಂ ಸಿಯಾ.

೨೦೩. ಪಞ್ಚಮಂ ತು ಚತುತ್ಥೇನ, ಸಮಾನಮಿತಿ ದೀಪಯೇ;

ಆಪತ್ತೀನಂ ವಿಭಾಗಸ್ಮಿಂ, ವಿಸೇಸೋ ನತ್ಥಿ ಕೋಚಿಪಿ.

೨೦೪. ಭಿಕ್ಖುಸ್ಸ ಭುಞ್ಜಮಾನಸ್ಸ, ಪಾನೀಯೇನುಪತಿಟ್ಠತಿ;

ಹತ್ಥಪಾಸೇ ತು ಪಾಚಿತ್ತಿ, ಹಿತ್ವಾ ತಿಟ್ಠತಿ ದುಕ್ಕಟಂ.

೨೦೫. ವಿಞ್ಞಾಪೇತ್ವಾಮಕಂ ಧಞ್ಞಂ, ‘‘ಭುಞ್ಜಿಸ್ಸಾಮೀ’’ತಿ ಗಣ್ಹತಿ;

ದುಕ್ಕಟಂ ಹೋತಿ ಪಾಚಿತ್ತಿ, ಅಜ್ಝೋಹಾರೇಸು ದೀಪಯೇ.

೨೦೬. ಉಚ್ಚಾರಾದಿಂ ತಿರೋಕುಟ್ಟೇ, ಛಡ್ಡೇನ್ತೀ ದ್ವೇ ಫುಸೇ ಹವೇ;

ಪಯೋಗೇ ದುಕ್ಕಟಂ ವುತ್ತಂ, ಪಾಚಿತ್ತಿ ಛಡ್ಡಿತೇ ಸಿಯಾ.

೨೦೭. ಉಚ್ಚಾರಾದಿಚತುಕ್ಕಂ ತು, ಛಡ್ಡೇತಿ ಹರಿತೇ ಸಚೇ;

ಪಯೋಗೇ ದುಕ್ಕಟಂ ತಸ್ಸಾ, ಪಾಚಿತ್ತಿ ಛಡ್ಡಿತೇ ಸಿಯಾ.

೨೦೮. ನಚ್ಚಾದಿಂ ದಸ್ಸನತ್ಥಾಯ, ಸಚೇ ಗಚ್ಛತಿ ದುಕ್ಕಟಂ;

ಪಸ್ಸನ್ತಿಯಾಪಿ ಪಾಚಿತ್ತಿ, ತಥೇವ ಚ ಸುಣನ್ತಿಯಾ.

ಲಸುಣವಗ್ಗೋ ಪಠಮೋ.

೨೦೯. ಪಠಮೇ ದುತಿಯೇ ಚೇವ, ತತಿಯೇ ಚ ಚತುತ್ಥಕೇ;

ತುಲ್ಯೋ ಲಸುಣವಗ್ಗಸ್ಸ, ಛಟ್ಠೇನಿಧ ವಿನಿಚ್ಛಯೋ.

೨೧೦. ಕುಲಾನಿ ಉಪಸಙ್ಕಮ್ಮ, ನಿಸೀದಿತ್ವಾ ಪನಾಸನೇ;

ಸಾಮಿಕೇ ತು ಅನಾಪುಚ್ಛಾ, ಪಕ್ಕಮನ್ತೀ ದುವೇ ಫುಸೇ.

೨೧೧. ಪಠಮೇನ ಚ ಪಾದೇನ, ಅನೋವಸ್ಸಮತಿಕ್ಕಮೇ;

ದುಕ್ಕಟಂ ಹೋತಿ, ಪಾಚಿತ್ತಿ, ದುತಿಯಾತಿಕ್ಕಮೇ ಸಿಯಾ.

೨೧೨. ಸಾಮಿಕೇ ತು ಅನಾಪುಚ್ಛಾ, ಆಸನೇ ಚೇ ನಿಸೀದತಿ;

ಪಯೋಗೇ ದುಕ್ಕಟಂ ಹೋತಿ, ಪಾಚಿತ್ತಿ ಚ ನಿಸೀದಿತೇ.

೨೧೩. ಛಟ್ಠೇನ ಸತ್ತಮಂ ಸಬ್ಬಂ, ಸಮಾನಂ ಅಟ್ಠಮೇ ಪನ;

ಪಯೋಗೇ ದುಕ್ಕಟಂ, ಉಜ್ಝಾ-ಪಿತೇ ಪಾಚಿತ್ತಿಯಂ ಸಿಯಾ.

೨೧೪. ಅತ್ತಾನಂ ಚಾಭಿಸಪ್ಪೇನ್ತೀ, ದ್ವೇ ಫುಸೇ ನಿರಯಾದಿನಾ;

ಪಯೋಗೇ ದುಕ್ಕಟಂ ವುತ್ತಂ, ಪಾಚಿತ್ತಿ ಅಭಿಸಪ್ಪಿತೇ.

೨೧೫. ವಧಿತ್ವಾ ಪನ ಅತ್ತಾನಂ, ರೋದನ್ತೀ ತು ದುವೇ ಫುಸೇ;

ವಧತಿ ರೋದತಿ ಪಾಚಿತ್ತಿ, ಕರೋತೇಕಂ ತು ದುಕ್ಕಟಂ.

ರತ್ತನ್ಧಕಾರವಗ್ಗೋ ದುತಿಯೋ.

೨೧೬. ನಗ್ಗಾ ನ್ಹಾಯತಿ ದ್ವೇ ಚೇವ, ಪಯೋಗೇ ದುಕ್ಕಟಂ ಸಿಯಾ;

ನ್ಹಾನಸ್ಸ ಪರಿಯೋಸಾನೇ, ತಸ್ಸಾ ಪಾಚಿತ್ತಿಯಂ ಸಿಯಾ.

೨೧೭. ಕಾರಾಪೇತಿ ಪಮಾಣಾತಿ-ಕ್ಕನ್ತಂ ಉದಕಸಾಟಿಕಂ;

ಪಯೋಗೇ ದುಕ್ಕಟಂ, ಕಾರಾ-ಪಿತೇ ಪಾಚಿತ್ತಿಯಂ ಸಿಯಾ.

೨೧೮. ಚೀವರಂ ತು ವಿಸಿಬ್ಬೇತ್ವಾ, ವಿಸಿಬ್ಬಾಪೇತ್ವ ವಾ ಪನ;

ನೇವ ಸಿಬ್ಬನ್ತಿಯಾ ವುತ್ತ-ಮೇಕಂ ಪಾಚಿತ್ತಿಯಂ ಪನ.

೨೧೯. ಪಞ್ಚಾಹಿಕಂ ತು ಸಙ್ಘಾಟಿ-ಚಾರಂ ಪನ ಅತಿಕ್ಕಮೇ;

ಏಕಾವಸ್ಸಾ ಪನಾಪತ್ತಿ, ಪಾಚಿತ್ತಿ ಪರಿದೀಪಿತಾ.

೨೨೦. ಸಚೇ ಸಙ್ಕಮನೀಯಂ ತು, ಧಾರೇತಿ ಪನ ಚೀವರಂ;

ಪಯೋಗೇ ದುಕ್ಕಟಂ ವುತ್ತಂ, ಪಾಚಿತ್ತಿ ಪನ ಧಾರಿತೇ.

೨೨೧. ಗಣಚೀವರಲಾಭಸ್ಸ, ಅನ್ತರಾಯಂ ಕರೋತಿ ಚೇ;

ಪಯೋಗೇ ದುಕ್ಕಟಂ ಹೋತಿ, ಕತೇ ಪಾಚಿತ್ತಿಯಂ ಸಿಯಾ.

೨೨೨. ವಿಭಙ್ಗಂ ಪಟಿಬಾಹನ್ತೀ, ಚೀವರಾನಂ ತು ಧಮ್ಮಿಕಂ;

ಪಯೋಗೇ ದುಕ್ಕಟಂ ವುತ್ತಂ, ಪಾಚಿತ್ತಿ ಪಟಿಬಾಹಿತೇ.

೨೨೩. ಅಗಾರಿಕಾದಿನೋ ದೇತಿ, ಸಚೇ ಸಮಣಚೀವರಂ;

ಪಯೋಗೇ ದುಕ್ಕಟಂ, ದಿನ್ನೇ, ಪಾಚಿತ್ತಿ ಪರಿಯಾಪುತಾ.

೨೨೪. ಚೀವರೇ ದುಬ್ಬಲಾಸಾಯ, ಕಾಲಂ ಚೇ ಸಮತಿಕ್ಕಮೇ;

ಪಯೋಗೇ ದುಕ್ಕಟಂ ವುತ್ತಂ, ಪಾಚಿತ್ತಿ ಸಮತಿಕ್ಕಮೇ.

೨೨೫. ಧಮ್ಮಿಕಂ ಕಥಿನುದ್ಧಾರಂ, ಪಟಿಬಾಹನ್ತಿಯಾ ದುವೇ;

ಪಯೋಗೇ ದುಕ್ಕಟಂ ಹೋತಿ, ಪಾಚಿತ್ತಿ ಪಟಿಬಾಹಿತೇ.

ನ್ಹಾನವಗ್ಗೋ ತತಿಯೋ.

೨೨೬. ದುವೇ ಭಿಕ್ಖುನಿಯೋ ಏಕ-ಮಞ್ಚಸ್ಮಿಂ ಚೇ ತುವಟ್ಟೇಯ್ಯುಂ;

ಪಯೋಗೇ ದುಕ್ಕಟಂ ತಾಸಂ, ನಿಪನ್ನೇ ಇತರಂ ಸಿಯಾ.

೨೨೭. ದುತಿಯಂ ಪಠಮೇನೇವ, ಸದಿಸಂ ತತಿಯೇ ಪನ;

ಪಯೋಗೇ ದುಕ್ಕಟಂ ಹೋತಿ, ಕತೇ ಪಾಚಿತ್ತಿಯಂ ಸಿಯಾ.

೨೨೮. ನುಪಟ್ಠಾಪೇನ್ತಿಯಾ ವಾಪಿ, ದುಕ್ಖಿತಂ ಸಹಜೀವಿನಿಂ;

ಏಕಾಯೇವ ಪನಾಪತ್ತಿ, ಪಾಚಿತ್ತಿ ಪರಿದೀಪಿತಾ.

೨೨೯. ಸಚೇ ಉಪಸ್ಸಯಂ ದತ್ವಾ, ನಿಕ್ಕಡ್ಢತಿ ಚ ಭಿಕ್ಖುನಿಂ;

ಪಯೋಗೇ ದುಕ್ಕಟಂ ತಸ್ಸಾ, ಹೋತಿ ಪಾಚಿತ್ತಿ ಕಡ್ಢಿತೇ.

೨೩೦. ಛಟ್ಠೇ ಪನ ಚ ಸಂಸಟ್ಠಾ, ಞತ್ತಿಯಾ ದುಕ್ಕಟಂ ಫುಸೇ;

ಕಮ್ಮವಾಚಾಯ ಓಸಾನೇ, ಪಾಚಿತ್ತಿ ಪರಿದೀಪಿತಾ.

೨೩೧. ಅನ್ತೋರಟ್ಠೇ ತು ಸಾಸಙ್ಕೇ, ಚಾರಿಕಂ ತು ಚರನ್ತಿಯಾ;

ಪಯೋಗೇ ದುಕ್ಕಟಂ ವುತ್ತಂ, ಪಟಿಪನ್ನಾಯ ಸೇಸಕಂ.

೨೩೨. ಅಟ್ಠಮಂ ನವಮಞ್ಚೇವ, ಸತ್ತಮೇನ ಸಮಂ ಮತಂ;

ದಸಮೇ ಪನ ಏಕಾವ, ಪಾಚಿತ್ತಿ ಪರಿದೀಪಿತಾ.

ತುವಟ್ಟವಗ್ಗೋ ಚತುತ್ಥೋ.

೨೩೩. ರಾಜಾಗಾರಾದಿಕಂ ಸಬ್ಬಂ, ದಸ್ಸನತ್ಥಾಯ ಗಚ್ಛತಿ;

ಪಯೋಗೇ ದುಕ್ಕಟಂ ತಸ್ಸಾ, ಪಾಚಿತ್ತಿ ಯದಿ ಪಸ್ಸತಿ.

೨೩೪. ಆಸನ್ದಿಂ ವಾಪಿ ಪಲ್ಲಙ್ಕಂ, ಪರಿಭುಞ್ಜನ್ತಿಯಾ ದುವೇ;

ಪಯೋಗೇ ದುಕ್ಕಟಂ ವುತ್ತಂ, ಭುತ್ತೇ ಪಾಚಿತ್ತಿಯಂ ಸಿಯಾ.

೨೩೫. ಸುತ್ತಂ ಕನ್ತನ್ತಿಯಾ ದ್ವೇವ, ಪಯೋಗೇ ದುಕ್ಕಟಂ ಮತಂ;

ಉಜ್ಜವುಜ್ಜವನೇ ತಸ್ಸಾ, ಪಾಚಿತ್ತಿ ಸಮುದಾಹರೇ.

೨೩೬. ವೇಯ್ಯಾವಚ್ಚಂ ಗಿಹೀನಂ ತು, ದ್ವೇವ ಹೋನ್ತಿ ಕರೋನ್ತಿಯಾ;

ಪಯೋಗೇ ದುಕ್ಕಟಂ ವುತ್ತಂ, ಕತೇ ಪಾಚಿತ್ತಿಯಂ ಸಿಯಾ.

೨೩೭. ಪಞ್ಚಮೇ ಪನ ಏಕಾವ, ಪಾಚಿತ್ತಿ ಪರಿದೀಪಿತಾ;

ಪಯೋಗೇ ದುಕ್ಕಟಂ ಛಟ್ಠೇ, ದಿನ್ನೇ ಪಾಚಿತ್ತಿಯಂ ಸಿಯಾ.

೨೩೮. ಸತ್ತಮಂ ದುತಿಯೇನೇವ, ಸಮಾಪತ್ತಿಪಭೇದತೋ;

ಅಟ್ಠಮಂ ದುತಿಯೇ ವಗ್ಗೇ, ಪಞ್ಚಮೇನ ಸಮಂ ಮತಂ.

೨೩೯. ತಿರಚ್ಛಾನಗತಂ ವಿಜ್ಜಂ, ದ್ವೇವ ಹೋನ್ತಿ ಪಠನ್ತಿಯಾ;

ಪಯೋಗೇ ದುಕ್ಕಟಂ ಹೋತಿ, ಪಾಚಿತ್ತಿ ಹಿ ಪದೇ ಪದೇ.

೨೪೦. ದಸಮಂ ನವಮೇನೇವ, ಸಮಾನಂ ಸಬ್ಬಥಾ ಪನ;

‘‘ಪರಿಯಾಪುಣಾತಿ, ವಾಚೇತಿ’’, ಪದಮತ್ತಂ ವಿಸೇಸಕಂ.