ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ವಿನಯವಿನಿಚ್ಛಯೋ

ಗನ್ಥಾರಮ್ಭಕಥಾ

೧. ವನ್ದಿತ್ವಾ ಸಿರಸಾ ಸೇಟ್ಠಂ, ಬುದ್ಧಮಪ್ಪಟಿಪುಗ್ಗಲಂ;

ಭವಾಭಾವಕರಂ ಧಮ್ಮಂ, ಗಣಞ್ಚೇವ ನಿರಙ್ಗಣಂ.

೨. ಭಿಕ್ಖೂನಂ ಭಿಕ್ಖುನೀನಞ್ಚ, ಹಿತತ್ಥಾಯ ಸಮಾಹಿತೋ;

ಪವಕ್ಖಾಮಿ ಸಮಾಸೇನ, ವಿನಯಸ್ಸವಿನಿಚ್ಛಯಂ.

೩. ಅನಾಕುಲಮಸಂಕಿಣ್ಣಂ, ಮಧುರತ್ಥಪದಕ್ಕಮಂ;

ಪಟುಭಾವಕರಂ ಏತಂ, ಪರಮಂ ವಿನಯಕ್ಕಮೇ.

೪. ಅಪಾರಂ ಓತರನ್ತಾನಂ, ಸಾರಂ ವಿನಯಸಾಗರಂ;

ಭಿಕ್ಖೂನಂ ಭಿಕ್ಖುನೀನಞ್ಚ, ನಾವಾಭೂತಂ ಮನೋರಮಂ.

೫. ತಸ್ಮಾ ವಿನಯನೂಪಾಯಂ, ವಿನಯಸ್ಸವಿನಿಚ್ಛಯಂ;

ಅವಿಕ್ಖಿತ್ತೇನ ಚಿತ್ತೇನ, ವದತೋ ಮೇ ನಿಬೋಧಥ.

ಭಿಕ್ಖುವಿಭಙ್ಗೋ

ಪಾರಾಜಿಕಕಥಾ

ಪಠಮಪಾರಾಜಿಕಕಥಾ

೬. ತಿವಿಧೇ ತಿಲಮತ್ತಮ್ಪಿ, ಮಗ್ಗೇ ಸೇವನಚೇತನೋ;

ಅಙ್ಗಜಾತಂ ಪವೇಸೇನ್ತೋ, ಅಲ್ಲೋಕಾಸೇ ಪರಾಜಿತೋ.

೭. ಪವೇಸನಂ ಪವಿಟ್ಠಂ ವಾ, ಠಿತಮುದ್ಧರಣಮ್ಪಿ ವಾ;

ಸಸಿಕ್ಖೋ ಸಾದಿಯನ್ತೋ ಸೋ, ಠಪೇತ್ವಾ ಕಿರಿಯಂ ಚುತೋ.

೮. ಸನ್ಥತೇನಙ್ಗಜಾತೇನ, ಸನ್ಥತಂ ವಾ ಅಸನ್ಥತಂ;

ಮಗ್ಗಂ ಪನ ಪವೇಸೇನ್ತೋ, ತಥೇವಾಸನ್ಥತೇನ ಚ.

೯. ಉಪಾದಿನ್ನೇನುಪಾದಿನ್ನೇ, ಅನುಪಾದಿನ್ನಕೇನ ವಾ;

ಘಟ್ಟಿತೇ ಅನುಪಾದಿನ್ನೇ, ಸಚೇ ಸಾದಿಯತೇತ್ಥ ಸೋ.

೧೦. ಹೋತಿ ಪಾರಾಜಿಕಕ್ಖೇತ್ತೇ, ಪವಿಟ್ಠೇ ತು ಪರಾಜಿತೋ;

ಖೇತ್ತೇ ಥುಲ್ಲಚ್ಚಯಂ ತಸ್ಸ, ದುಕ್ಕಟಞ್ಚ ವಿನಿದ್ದಿಸೇ.

೧೧. ಮತೇ ಅಕ್ಖಾಯಿತೇ ಚಾಪಿ, ಯೇಭುಯ್ಯಕ್ಖಾಯಿತೇಪಿ ಚ;

ಮೇಥುನಂ ಪಟಿಸೇವನ್ತೋ, ಹೋತಿ ಪಾರಾಜಿಕೋ ನರೋ.

೧೨. ಯೇಭುಯ್ಯಕ್ಖಾಯಿತೇ ಚಾಪಿ, ಉಪಡ್ಢಕ್ಖಾಯಿತೇಪಿ ಚ;

ಹೋತಿ ಥುಲ್ಲಚ್ಚಯಾಪತ್ತಿ, ಸೇಸೇ ಆಪತ್ತಿ ದುಕ್ಕಟಂ.

೧೩. ನಿಮಿತ್ತಮತ್ತಂ ಸೇಸೇತ್ವಾ, ಖಾಯಿತೇಪಿ ಸರೀರಕೇ;

ನಿಮಿತ್ತೇ ಮೇಥುನಂ ತಸ್ಮಿಂ, ಸೇವತೋಪಿ ಪರಾಜಯೋ.

೧೪. ಉದ್ಧುಮಾತಾದಿಸಮ್ಪತ್ತೇ, ಸಬ್ಬತ್ಥಾಪಿ ಚ ದುಕ್ಕಟಂ;

ಖಾಯಿತಾಕ್ಖಾಯಿತಂ ನಾಮ, ಸಬ್ಬಂ ಮತಸರೀರಕೇ.

೧೫. ಛಿನ್ದಿತ್ವಾ ಪನ ತಚ್ಛೇತ್ವಾ, ನಿಮಿತ್ತುಪ್ಪಾಟಿತೇ ಪನ;

ವಣಸಙ್ಖೇಪತೋ ತಸ್ಮಿಂ, ಸೇವಂ ಥುಲ್ಲಚ್ಚಯಂ ಫುಸೇ.

೧೬. ತತೋ ಮೇಥುನರಾಗೇನ, ಪತಿತಾಯ ನಿಮಿತ್ತತೋ;

ತಾಯಂ ಉಪಕ್ಕಮನ್ತಸ್ಸ, ದುಕ್ಕಟಂ ಮಂಸಪೇಸಿಯಂ.

೧೭. ನಖಪಿಟ್ಠಿಪ್ಪಮಾಣೇಪಿ, ಮಂಸೇ ನ್ಹಾರುಮ್ಹಿ ವಾ ಸತಿ;

ಮೇಥುನಂ ಪಟಿಸೇವನ್ತೋ, ಜೀವಮಾನೇ ಪರಾಜಿತೋ.

೧೮. ಕಣ್ಣಚ್ಛಿದ್ದಕ್ಖಿನಾಸಾಸು, ವತ್ಥಿಕೋಸೇ ವಣೇಸು ವಾ;

ಅಙ್ಗಜಾತಂ ಪವೇಸೇನ್ತೋ, ರಾಗಾ ಥುಲ್ಲಚ್ಚಯಂ ಫುಸೇ.

೧೯. ಅವಸೇಸಸರೀರಸ್ಮಿಂ, ಉಪಕಚ್ಛೂರುಕಾದಿಸು;

ವಸಾ ಮೇಥುನರಾಗಸ್ಸ, ಸೇವಮಾನಸ್ಸ ದುಕ್ಕಟಂ.

೨೦. ಅಸ್ಸಗೋಮಹಿಸಾದೀನಂ, ಓಟ್ಠಗದ್ರಭದನ್ತಿನಂ;

ನಾಸಾಸು ವತ್ಥಿಕೋಸೇಸು, ಸೇವಂ ಥುಲ್ಲಚ್ಚಯಂ ಫುಸೇ.

೨೧. ತಥಾ ಸಬ್ಬತಿರಚ್ಛಾನಂ, ಅಕ್ಖಿಕಣ್ಣವಣೇಸುಪಿ;

ಅವಸೇಸಸರೀರೇಸು, ಸೇವಮಾನಸ್ಸ ದುಕ್ಕಟಂ.

೨೨. ತೇಸಂ ಅಲ್ಲಸರೀರೇಸು, ಮತಾನಂ ಸೇವತೋ ಪನ;

ತಿವಿಧಾಪಿ ಸಿಯಾಪತ್ತಿ, ಖೇತ್ತಸ್ಮಿಂ ತಿವಿಧೇ ಸತಿ.

೨೩. ಬಹಿ ಮೇಥುನರಾಗೇನ, ನಿಮಿತ್ತಂ ಇತ್ಥಿಯಾ ಪನ;

ನಿಮಿತ್ತೇನ ಛುಪನ್ತಸ್ಸ, ತಸ್ಸ ಥುಲ್ಲಚ್ಚಯಂ ಸಿಯಾ.

೨೪. ಕಾಯಸಂಸಗ್ಗರಾಗೇನ, ನಿಮಿತ್ತೇನ ಮುಖೇನ ವಾ;

ನಿಮಿತ್ತಂ ಇತ್ಥಿಯಾ ತಸ್ಸ, ಛುಪತೋ ಗರುಕಂ ಸಿಯಾ.

೨೫. ತಥೇವೋಭಯರಾಗೇನ, ನಿಮಿತ್ತಂ ಪುರಿಸಸ್ಸಪಿ;

ನಿಮಿತ್ತೇನ ಛುಪನ್ತಸ್ಸ, ಹೋತಿ ಆಪತ್ತಿ ದುಕ್ಕಟಂ.

೨೬. ನಿಮಿತ್ತೇನ ನಿಮಿತ್ತಂ ತು, ತಿರಚ್ಛಾನಗತಿತ್ಥಿಯಾ;

ಥುಲ್ಲಚ್ಚಯಂ ಛುಪನ್ತಸ್ಸ, ಹೋತಿ ಮೇಥುನರಾಗತೋ.

೨೭. ಕಾಯಸಂಸಗ್ಗರಾಗೇನ, ತಿರಚ್ಛಾನಗತಿತ್ಥಿಯಾ;

ನಿಮಿತ್ತೇನ ನಿಮಿತ್ತಸ್ಸ, ಛುಪನೇ ದುಕ್ಕಟಂ ಮತಂ.

೨೮. ಅಙ್ಗಜಾತಂ ಪವೇಸೇತ್ವಾ, ತಮಾವಟ್ಟಕತೇ ಮುಖೇ;

ತತ್ಥಾಕಾಸಗತಂ ಕತ್ವಾ, ನೀಹರನ್ತಸ್ಸ ದುಕ್ಕಟಂ.

೨೯. ತಥಾ ಚತೂಹಿ ಪಸ್ಸೇಹಿ, ಇತ್ಥಿಯಾ ಹೇಟ್ಠಿಮತ್ತಲಂ;

ಅಛುಪನ್ತಂ ಪವೇಸೇತ್ವಾ, ನೀಹರನ್ತಸ್ಸ ದುಕ್ಕಟಂ.

೩೦. ಉಪ್ಪಾಟಿತೋಟ್ಠಮಂಸೇಸು, ಬಹಿ ನಿಕ್ಖನ್ತಕೇಸು ವಾ;

ದನ್ತೇಸು ವಾಯಮನ್ತಸ್ಸ, ತಸ್ಸ ಥುಲ್ಲಚ್ಚಯಂ ಸಿಯಾ.

೩೧. ಅಟ್ಠಿಸಙ್ಘಟ್ಟನಂ ಕತ್ವಾ, ಮಗ್ಗೇ ದುವಿಧರಾಗತೋ;

ಸುಕ್ಕೇ ಮುತ್ತೇಪಿ ವಾಮುತ್ತೇ, ವಾಯಮನ್ತಸ್ಸ ದುಕ್ಕಟಂ.

೩೨. ಇತ್ಥಿಂ ಮೇಥುನರಾಗೇನ, ಆಲಿಙ್ಗನ್ತಸ್ಸ ದುಕ್ಕಟಂ;

ಹತ್ಥಗ್ಗಾಹಪರಾಮಾಸ-ಚುಮ್ಬನಾದೀಸ್ವಯಂ ನಯೋ.

೩೩. ಅಪದೇ ಅಹಯೋ ಮಚ್ಛಾ, ಕಪೋತಾ ದ್ವಿಪದೇಪಿ ಚ;

ಗೋಧಾ ಚತುಪ್ಪದೇ ಹೇಟ್ಠಾ, ವತ್ಥು ಪಾರಾಜಿಕಸ್ಸಿಮೇ.

೩೪. ಸೇವೇತುಕಾಮತಾಚಿತ್ತಂ, ಮಗ್ಗೇ ಮಗ್ಗಪ್ಪವೇಸನಂ;

ಇದಮಙ್ಗದ್ವಯಂ ವುತ್ತಂ, ಪಠಮನ್ತಿಮವತ್ಥುನೋ.

೩೫. ದುಕ್ಕಟಂ ಪಠಮಸ್ಸೇವ, ಸಾಮನ್ತಮಿತಿ ವಣ್ಣಿತಂ;

ಸೇಸಾನಂ ಪನ ತಿಣ್ಣಮ್ಪಿ, ಥುಲ್ಲಚ್ಚಯಮುದೀರಿತಂ.

೩೬. ‘‘ಅನಾಪತ್ತೀ’’ತಿ ಞಾತಬ್ಬಂ, ಅಜಾನನ್ತಸ್ಸ ಭಿಕ್ಖುನೋ;

ತಥೇವಾಸಾದಿಯನ್ತಸ್ಸ, ಜಾನನ್ತಸ್ಸಾದಿಕಮ್ಮಿನೋ.

೩೭. ವಿನಯೇ ಅನಯೂಪರಮೇ ಪರಮೇ;

ಸುಜನಸ್ಸ ಸುಖಾನಯನೇ ನಯನೇ;

ಪಟು ಹೋತಿ ಪಧಾನರತೋ ನ ರತೋ;

ಇಧ ಯೋ ಪನ ಸಾರಮತೇ ರಮತೇ.

೩೮. ಇಮಂ ಹಿತವಿಭಾವನಂ ಭಾವನಂ;

ಅವೇದಿ ಸುರಸಮ್ಭವಂ ಸಮ್ಭವಂ;

ಸ ಮಾರಬಳಿಸಾಸನೇ ಸಾಸನೇ;

ಸಮೋ ಭವತುಪಾಲಿನಾ ಪಾಲಿನಾ.

ಇತಿ ವಿನಯವಿನಿಚ್ಛಯೇ ಪಠಮಪಾರಾಜಿಕಕಥಾ ನಿಟ್ಠಿತಾ.

ದುತಿಯಪಾರಾಜಿಕಕಥಾ

೩೯. ಆದಿಯನ್ತೋ ಹರನ್ತೋವ-ಹರನ್ತೋ ಇರಿಯಾಪಥಂ;

ವಿಕೋಪೇನ್ತೋ ತಥಾ ಠಾನಾ, ಚಾವೇನ್ತೋಪಿ ಪರಾಜಿತೋ.

೪೦. ತತ್ಥ ನಾನೇಕಭಣ್ಡಾನಂ, ಪಞ್ಚಕಾನಂ ವಸಾ ಪನ;

ಅವಹಾರಾ ದಸೇವೇತೇ, ವಿಞ್ಞಾತಬ್ಬಾ ವಿಭಾವಿನಾ.

೪೧. ಸಾಹತ್ಥಾಣತ್ತಿಕೋ ಚೇವ, ನಿಸ್ಸಗ್ಗೋ ಅತ್ಥಸಾಧಕೋ;

ಧುರನಿಕ್ಖೇಪನಞ್ಚಾತಿ, ಇದಂ ಸಾಹತ್ಥಪಞ್ಚಕಂ.

೪೨. ಪುಬ್ಬಸಹಪಯೋಗೋ ಚ, ಸಂವಿದಾಹರಣಮ್ಪಿ ಚ;

ಸಙ್ಕೇತಕಮ್ಮಂ ನೇಮಿತ್ತಂ, ಪುಬ್ಬಯೋಗಾದಿಪಞ್ಚಕಂ.

೪೩. ಥೇಯ್ಯಪಸಯ್ಹಪರಿಕಪ್ಪ-ಪಟಿಚ್ಛನ್ನಕುಸಾದಿಕಾ;

ಅವಹಾರಾ ಇಮೇ ಪಞ್ಚ, ವೇದಿತಬ್ಬಾವ ವಿಞ್ಞುನಾ.

೪೪. ವತ್ಥುಕಾಲಗ್ಘದೇಸೇ ಚ, ಪರಿಭೋಗಞ್ಚ ಪಞ್ಚಪಿ;

ಞತ್ವಾ ಏತಾನಿ ಕಾತಬ್ಬೋ, ಪಣ್ಡಿತೇನ ವಿನಿಚ್ಛಯೋ.

೪೫. ದುತಿಯಂ ವಾಪಿ ಕುದ್ದಾಲಂ, ಪಿಟಕಂ ಪರಿಯೇಸತೋ;

ಗಚ್ಛತೋ ಥೇಯ್ಯಚಿತ್ತೇನ, ದುಕ್ಕಟಂ ಪುಬ್ಬಯೋಗತೋ.

೪೬. ತತ್ಥಜಾತಕಕಟ್ಠಂ ವಾ, ಲತಂ ವಾ ಛಿನ್ದತೋ ಪನ;

ದುಕ್ಕಟಂ ಉಭಯತ್ಥಾಪಿ, ವುತ್ತಂ ಸಹಪಯೋಗತೋ.

೪೭. ಪಥವಿಂ ಖಣತೋ ವಾಪಿ, ಬ್ಯೂಹತೋ ಪಂಸುಮೇವ ವಾ;

ಆಮಸನ್ತಸ್ಸ ವಾ ಕುಮ್ಭಿಂ, ಹೋತಿ ಆಪತ್ತಿ ದುಕ್ಕಟಂ.

೪೮. ಮುಖೇ ಪಾಸಂ ಪವೇಸೇತ್ವಾ, ಖಾಣುಕೇ ಬದ್ಧಕುಮ್ಭಿಯಾ;

ಬನ್ಧನಾನಂ ವಸಾ ಞೇಯ್ಯೋ, ಠಾನಭೇದೋ ವಿಜಾನತಾ.

೪೯. ದ್ವೇ ಠಾನಾನಿ ಪನೇಕಸ್ಮಿಂ, ಖಾಣುಕೇ ಬದ್ಧಕುಮ್ಭಿಯಾ;

ವಲಯಂ ರುಕ್ಖಮೂಲಸ್ಮಿಂ, ಪವೇಸೇತ್ವಾ ಕತಾಯ ವಾ.

೫೦. ಉದ್ಧರನ್ತಸ್ಸ ಖಾಣುಂ ವಾ, ಛಿನ್ದತೋ ಸಙ್ಖಲಿಮ್ಪಿ ವಾ;

ಥುಲ್ಲಚ್ಚಯಂ ತತೋ ಕುಮ್ಭಿಂ, ಠಾನಾ ಚಾವೇತಿ ಚೇ ಚುತೋ.

೫೧. ಪಠಮಂ ಪನ ಕುಮ್ಭಿಂ ವಾ, ಉದ್ಧರಿತ್ವಾ ತಥಾ ಪುನ;

ಠಾನಾ ಚಾವೇತಿ ಖಾಣುಂ ವಾ, ಸಙ್ಖಲಿಂ ವಾಪಿ ಸೋ ನಯೋ.

೫೨. ಇತೋ ಚಿತೋ ಚ ಘಂಸನ್ತೋ, ಮೂಲೇ ಸಾರೇತಿ ರಕ್ಖತಿ;

ವಲಯಂ ಖೇಗತಂ ತತ್ಥ, ಕರೋನ್ತೋವ ಪರಾಜಿತೋ.

೫೩. ಜಾತಂ ಛಿನ್ದತಿ ಚೇ ರುಕ್ಖಂ, ದುಕ್ಕಟಂ ಕುಮ್ಭಿಮತ್ಥಕೇ;

ಸಮೀಪೇ ಛಿನ್ದತೋ ತಸ್ಸ, ಪಾಚಿತ್ತಿಯಮತತ್ಥಜಂ.

೫೪. ಅನ್ತೋಕುಮ್ಭಿಗತಂ ಭಣ್ಡಂ, ಫನ್ದಾಪೇತಿ ಸಚೇ ಪನ;

ಅಪಬ್ಯೂಹೇತಿ ತತ್ಥೇವ, ತಸ್ಸ ಥುಲ್ಲಚ್ಚಯಂ ಸಿಯಾ.

೫೫. ಹರನ್ತೋ ಕುಮ್ಭಿಯಾ ಭಣ್ಡಂ, ಮುಟ್ಠಿಂ ಛಿನ್ದತಿ ಅತ್ತನೋ;

ಭಾಜನೇ ವಾ ಗತಂ ಕತ್ವಾ, ಹೋತಿ ಭಿಕ್ಖು ಪರಾಜಿತೋ.

೫೬. ಹಾರಂ ವಾ ಪನ ಪಾಮಙ್ಗಂ, ಸುತ್ತಾರುಳ್ಹಂ ತು ಕುಮ್ಭಿಯಾ;

ಫನ್ದಾಪೇತಿ ಯಥಾವತ್ಥುಂ, ಠಾನಾ ಚಾವೇತಿ ಚೇ ಚುತೋ.

೫೭. ಸಪ್ಪಿಆದೀಸು ಯಂ ಕಿಞ್ಚಿ, ಪಿವತೋ ಪಾದಪೂರಣಂ;

ಏಕೇನೇವ ಪಯೋಗೇನ, ಪೀತಮತ್ತೇ ಪರಾಜಯೋ.

೫೮. ಕತ್ವಾವ ಧುರನಿಕ್ಖೇಪಂ, ಪಿವನ್ತಸ್ಸ ಪುನಪ್ಪುನಂ;

ಸಕಲಮ್ಪಿ ಚ ತಂ ಕುಮ್ಭಿಂ, ಪಿವತೋ ನ ಪರಾಜಯೋ.

೫೯. ಸಚೇ ಖಿಪತಿ ಯಂ ಕಿಞ್ಚಿ, ಭಣ್ಡಕಂ ತೇಲಕುಮ್ಭಿಯಂ;

ತಂ ಪಾದಗ್ಘನಕಂ ತೇಲಂ, ಧುವಂ ಪಿವತಿ ತಾವದೇ.

೬೦. ಹತ್ಥತೋ ಮುತ್ತಮತ್ತೇವ, ಥೇಯ್ಯಚಿತ್ತೋ ವಿನಸ್ಸತಿ;

ಆವಿಞ್ಜೇತ್ವಾಪಿ ವಾ ಕುಮ್ಭಿಂ, ತೇಲಂ ಗಾಳೇತಿ ಚೇ ತಥಾ.

೬೧. ತೇಲಸ್ಸಾಕಿರಣಂ ಞತ್ವಾ, ಖಿತ್ತಂ ರಿತ್ತಾಯ ಕುಮ್ಭಿಯಾ;

ಪೀತಂ ತೇಲಞ್ಚ ತಂ ಭಣ್ಡಂ, ಉದ್ಧರನ್ತೋವ ಧಂಸಿತೋ.

೬೨. ತತ್ಥೇವ ಭಿನ್ದತೋ ತೇಲಂ, ಛಡ್ಡೇನ್ತಸ್ಸ ತಥೇವ ಚ;

ಝಾಪೇನ್ತಸ್ಸ ಅಭೋಗಂ ವಾ, ಕರೋನ್ತಸ್ಸ ಚ ದುಕ್ಕಟಂ.

ಭೂಮಟ್ಠಕಥಾ.

೬೩. ಠಪಿತಂ ಪತ್ಥರಿತ್ವಾ ಚ, ಸಾಟಕತ್ಥರಣಾದಿಕಂ;

ವೇಠೇತ್ವಾ ಉದ್ಧರನ್ತಸ್ಸ, ಮುತ್ತೇ ಠಾನಾ ಪರಾಭವೋ.

೬೪. ಓರಿಮನ್ತೇನ ವಾ ಫುಟ್ಠ-ಮೋಕಾಸಂ ಪಾರಿಮನ್ತತೋ;

ಪಾರಾಜಿಕಮತಿಕ್ಕನ್ತೇ, ಕಡ್ಢತೋ ಉಜುಕಮ್ಪಿ ವಾ.

ಥಲಟ್ಠಕಥಾ.

೬೫. ಪುರತೋ ಮುಖತುಣ್ಡಞ್ಚ, ಕಲಾಪಗ್ಗಞ್ಚ ಪಚ್ಛತೋ;

ದ್ವೀಸು ಪಸ್ಸೇಸು ಪಕ್ಖನ್ತೋ, ಹೇಟ್ಠಾ ಪಾದನಖಾ ತಥಾ.

೬೬. ಉದ್ಧಞ್ಚಾಪಿ ಸಿಖಗ್ಗನ್ತಿ, ಗಗನೇ ಗಚ್ಛತೋ ಪನ;

ಮೋರಸ್ಸ ಛ ಪರಿಚ್ಛೇದಾ, ವೇದಿತಬ್ಬಾ ವಿಭಾವಿನಾ.

೬೭. ಭಿಕ್ಖು ‘‘ಸಸ್ಸಾಮಿಕಂ ಮೋರಂ, ಗಹೇಸ್ಸಾಮೀ’’ತಿ ಖೇಗತಂ;

ಹತ್ಥಂ ವಾಪಿ ಪಸಾರೇತಿ, ಪುರತೋ ವಾಸ್ಸ ತಿಟ್ಠತಿ.

೬೮. ಮೋರೋಪಿ ಗಗನೇ ಪಕ್ಖೇ, ಚಾರೇತಿ ನ ಚ ಗಚ್ಛತಿ;

ದುಕ್ಕಟಂ ಗಮನಚ್ಛೇದೇ, ಆಮಸನ್ತಸ್ಸ ಚೇವ ತಂ.