ಮಹಾವಿಭಙ್ಗಸಙ್ಗಹಕಥಾ

೪. ಮೇಥುನಂ ಪಟಿಸೇವನ್ತೋ, ಕತಿ ಆಪತ್ತಿಯೋ ಫುಸೇ;

ಮೇಥುನಂ ಪಟಿಸೇವನ್ತೋ, ತಿಸ್ಸೋ ಆಪತ್ತಿಯೋ ಫುಸೇ.

೫. ಭವೇ ಪಾರಾಜಿಕಂ ಖೇತ್ತೇ, ಯೇಭುಯ್ಯಕ್ಖಾಯಿತೇ ಪನ;

ಥುಲ್ಲಚ್ಚಯಂ ಮುಖೇ ವಟ್ಟ-ಕತೇ ವುತ್ತಂ ತು ದುಕ್ಕಟಂ.

೬. ಅದಿನ್ನಂ ಆದಿಯನ್ತೋ ಯೋ;

ಕತಿ ಆಪತ್ತಿಯೋ ಫುಸೇ;

ಅದಿನ್ನಂ ಆದಿಯನ್ತೋ ಸೋ;

ತಿಸ್ಸೋ ಆಪತ್ತಿಯೋ ಫುಸೇ.

೭. ಪಞ್ಚಮಾಸಗ್ಘನೇ ವಾಪಿ, ಅಧಿಕೇ ವಾ ಪರಾಜಯೋ;

ಮಾಸೇ ವಾ ದುಕ್ಕಟಂ ಊನೇ, ಮಜ್ಝೇ ಥುಲ್ಲಚ್ಚಯಂ ತತೋ.

೮. ಮನುಸ್ಸಜಾತಿಂ ಮಾರೇನ್ತೋ;

ಕತಿ ಆಪತ್ತಿಯೋ ಫುಸೇ;

ಮನುಸ್ಸಜಾತಿಂ ಮಾರೇನ್ತೋ;

ತಿಸ್ಸೋ ಆಪತ್ತಿಯೋ ಫುಸೇ.

೯. ಮನುಸ್ಸಮುದ್ದಿಸ್ಸೋಪಾತಂ, ಖಣನೇ ದುಕ್ಕಟಂ ಸಿಯಾ;

ದುಕ್ಖೇ ಥುಲ್ಲಚ್ಚಯಂ ಜಾತೇ, ಮತೇ ಪಾರಾಜಿಕಂ ಸಿಯಾ.

೧೦. ಅಸನ್ತಂ ಉತ್ತರಿಂ ಧಮ್ಮಂ, ವದಮತ್ತೂಪನಾಯಿಕಂ;

ಕತಿ ಆಪಜ್ಜತಾಪತ್ತೀ? ತಿಸ್ಸೋ ಆಪತ್ತಿಯೋ ಫುಸೇ.

೧೧. ಅಸನ್ತಂ ಉತ್ತರಿಂ ಧಮ್ಮಂ, ಭಣನ್ತಸ್ಸ ಪರಾಜಯೋ;

ಥುಲ್ಲಚ್ಚಯಂ ಪರಿಯಾಯೇ, ಞಾತೇ, ನೋ ಚೇ ತು ದುಕ್ಕಟಂ.

ಪಾರಾಜಿಕಕಥಾ.

೧೨. ಭಣ ಸುಕ್ಕಂ ವಿಮೋಚೇನ್ತೋ;

ಕತಿ ಆಪತ್ತಿಯೋ ಫುಸೇ;

ಸುಣ ಸುಕ್ಕಂ ವಿಮೋಚೇನ್ತೋ;

ತಿಸ್ಸೋ ಆಪತ್ತಿಯೋ ಫುಸೇ.

೧೩. ಗರುಕಂ ಯದಿ ಚೇತೇತಿ, ಉಪಕ್ಕಮತಿ ಮುಚ್ಚತಿ;

ದ್ವಙ್ಗೇ ಥುಲ್ಲಚ್ಚಯಂ ವುತ್ತಂ, ಪಯೋಗೇ ದುಕ್ಕಟಂ ಸಿಯಾ.

೧೪. ಇತೋ ಪಟ್ಠಾಯ ಮುಞ್ಚಿತ್ವಾ, ಪಞ್ಹಾಪುಚ್ಛನಮತ್ತಕಂ;

ವಿಸ್ಸಜ್ಜನವಸೇನೇವ, ಹೋತಿ ಅತ್ಥವಿನಿಚ್ಛಯೋ.

೧೫. ಇತ್ಥಿಯಾ ಕಾಯಸಂಸಗ್ಗೇ, ತಿಸ್ಸೋ ಆಪತ್ತಿಯೋ ಫುಸೇ;

ಆಮಸನ್ತಸ್ಸ ಕಾಯೇನ, ಕಾಯಂ ತು ಗರುಕಂ ಸಿಯಾ.

೧೬. ಕಾಯೇನ ಕಾಯಬದ್ಧಂ ತು, ಫುಸಂ ಥುಲ್ಲಚ್ಚಯಂ ಫುಸೇ;

ಪಟಿಬದ್ಧೇನ ಕಾಯೇನ, ಪಟಿಬದ್ಧೇ ತು ದುಕ್ಕಟಂ.

೧೭. ಇತ್ಥಿಂ ದುಟ್ಠುಲ್ಲವಾಚಾಹಿ, ತಿಸ್ಸೋ ಓಭಾಸತೋ ಸಿಯುಂ;

ವಣ್ಣಾವಣ್ಣಂ ವದಂ ದ್ವಿನ್ನಂ, ಮಗ್ಗಾನಂ ಗರುಕಂ ಫುಸೇ.

೧೮. ವಣ್ಣಾದಿಭಞ್ಞೇ ಆದಿಸ್ಸ, ಉಬ್ಭಜಾಣುಮಧಕ್ಖಕಂ;

ಹೋತಿ ಥುಲ್ಲಚ್ಚಯಂ, ಕಾಯ-ಪಟಿಬದ್ಧೇ ತು ದುಕ್ಕಟಂ.

೧೯. ಅತ್ತಕಾಮಚರಿಯಾಯ, ವದತೋ ವಣ್ಣಮಿತ್ಥಿಯಾ;

ಸನ್ತಿಕೇ ಗರುಕಂ ಹೋತಿ, ಸಚೇ ಜಾನಾತಿ ಸಾ ಪನ.

೨೦. ಸನ್ತಿಕೇ ಪಣ್ಡಕಸ್ಸಾಪಿ, ತಸ್ಸ ಥುಲ್ಲಚ್ಚಯಂ ಸಿಯಾ;

ತಿರಚ್ಛಾನಗತಸ್ಸಾಪಿ, ಸನ್ತಿಕೇ ದುಕ್ಕಟಂ ಮತಂ.

೨೧. ಪಟಿಗ್ಗಣ್ಹನವೀಮಂಸಾ, ಪಚ್ಚಾಹರಣಕತ್ತಿಕೇ;

ಸಞ್ಚರಿತ್ತಂ ಸಮಾಪನ್ನೇ, ಗರುಕಂ ನಿದ್ದಿಸೇ ಬುಧೋ.

೨೨. ತಸ್ಸ ದ್ವಙ್ಗಸಮಾಯೋಗೇ, ಹೋತಿ ಥುಲ್ಲಚ್ಚಯಂ ತಥಾ;

ಅಙ್ಗೇ ಸತಿ ಪನೇಕಸ್ಮಿಂ, ಹೋತಿ ಆಪತ್ತಿ ದುಕ್ಕಟಂ.

೨೩. ಸಂಯಾಚಿಕಾಯ ಚ ಕುಟಿಂ;

ವಿಹಾರಞ್ಚ ಮಹಲ್ಲಕಂ;

ಕಾರಾಪೇತಿ ಸಚೇ ಭಿಕ್ಖು;

ತಿಸ್ಸೋ ಆಪತ್ತಿಯೋ ಫುಸೇ.

೨೪. ಪಯೋಗೇ ದುಕ್ಕಟಂ ವುತ್ತಂ, ಏಕಪಿಣ್ಡೇ ಅನಾಗತೇ;

ಹೋತಿ ಥುಲ್ಲಚ್ಚಯಂ, ತಸ್ಮಿಂ, ಪಿಣ್ಡೇ ಗರುಕಮಾಗತೇ.

೨೫. ಪಾರಾಜಿಕೇನ ಧಮ್ಮೇನ, ಭಿಕ್ಖುಂ ಅಮೂಲಕೇನಿಧ;

ಅನುದ್ಧಂಸೇತಿ ಯೋ ತಸ್ಸ, ತಿಸ್ಸೋ ಆಪತ್ತಿಯೋ ಸಿಯುಂ.

೨೬. ಓಕಾಸಂ ನ ಚ ಕಾರೇತ್ವಾ, ಹುತ್ವಾ ಚಾವನಚೇತನೋ;

ಸಚೇ ಚೋದೇತಿ ಸಙ್ಘಾದಿ-ಸೇಸೇನ ಸಹ ದುಕ್ಕಟಂ.

೨೭. ಓಕಾಸಂ ಪನ ಕಾರೇತ್ವಾ, ಹುತ್ವಾ ಅಕ್ಕೋಸಚೇತನೋ;

ಚೋದೇತಿ ಓಮಸವಾದೇ, ಪಾಚಿತ್ತಿಂ ಪರಿದೀಪಯೇ.

೨೮. ಅನನ್ತರಸಮಾನೋವ, ನವಮೇ ಅಞ್ಞಭಾಗಿಯೇ;

ಸಬ್ಬೋ ಆಪತ್ತಿಭೇದೋ ಹಿ, ನತ್ಥಿ ಕಾಚಿ ವಿಸೇಸತಾ.

೨೯. ಸಙ್ಘಸ್ಸ ಭೇದಕೋ ಭಿಕ್ಖು, ಯಾವತತಿಯಕಂ ಪನ;

ಸಮನುಭಾಸನಾಯೇವ, ಗಾಹಂ ನ ಪಟಿನಿಸ್ಸಜಂ.

೩೦. ಞತ್ತಿಯಾ ದುಕ್ಕಟಂ, ದ್ವೀಹಿ, ಕಮ್ಮವಾಚಾಹಿ ಥುಲ್ಲತಂ;

ಕಮ್ಮವಾಚಾಯ ಓಸಾನೇ, ಆಪತ್ತಿ ಗರುಕಂ ಸಿಯಾ.

೩೧. ಭೇದಾನುವತ್ತಕೇ ಚೇವ, ದುಬ್ಬಚೇ ಕುಲದೂಸಕೇ;

ಸಙ್ಘಭೇದಕತುಲ್ಯೋವ, ಹೋತಿ ಆಪತ್ತಿನಿಚ್ಛಯೋ.

ಸಙ್ಘಾದಿಸೇಸಕಥಾ.

೩೨. ಅತಿಕ್ಕಮನ್ತೋ ಅತಿರೇಕಚೀವರಂ;

ದಸಾಹಮಾಪಜ್ಜತಿ ಏಕಮೇವ;

ನಿಸ್ಸಗ್ಗಿಪಾಚಿತ್ತಿಯಮೇಕರತ್ತಿಂ;

ತಿಚೀವರೇನಾಪಿ ವಿನಾ ವಸನ್ತೋ.

೩೩. ಮಾಸಂ ಅತಿಕ್ಕಮನ್ತೋ ಹಿ, ಗಹೇತ್ವಾ ಕಾಲಚೀವರಂ;

ಏಕಂ ಆಪಜ್ಜತಾಪತ್ತಿಂ, ನಿಸ್ಸಗ್ಗಿಯಮುದೀರಿತಂ.

೩೪. ಅಞ್ಞಾತಿಕಾಯ ಯಂ ಕಿಞ್ಚಿ;

ಪುರಾಣಚೀವರಂ ಪನ;

ಧೋವಾಪೇತಿ ಸಚೇ ತಸ್ಸ;

ಹೋನ್ತಿ ಆಪತ್ತಿಯೋ ದುವೇ.

೩೫. ಧೋವಾಪೇತಿ ಪಯೋಗಸ್ಮಿಂ, ದುಕ್ಕಟಂ ಸಮುದಾಹಟಂ;

ನಿಸ್ಸಗ್ಗಿಯಾವ ಪಾಚಿತ್ತಿ, ಹೋತಿ ಧೋವಾಪಿತೇ ಪನ.

೩೬. ಅಞ್ಞಾತಿಕಾಯ ಹತ್ಥಮ್ಹಾ, ಚೀವರಂ ಪಟಿಗಣ್ಹತೋ;

ಗಹಣೇ ದುಕ್ಕಟಂ ವುತ್ತಂ, ಪಾಚಿತ್ತಿ ಗಹಿತೇ ಸಿಯಾ.

೩೭. ಅಞ್ಞಾತಕಂ ಗಹಪತಿಂ, ಗಹಪತಾನಿಮೇವ ವಾ;

ಚೀವರಂ ವಿಞ್ಞಾಪೇನ್ತೋ ದ್ವೇ, ಭಿಕ್ಖು ಆಪತ್ತಿಯೋ ಫುಸೇ.

೩೮. ವಿಞ್ಞಾಪೇತಿ ಪಯೋಗಸ್ಮಿಂ, ದುಕ್ಕಟಂ ಪರಿಕಿತ್ತಿತಂ;

ವಿಞ್ಞಾಪಿತೇ ಚ ನಿಸ್ಸಗ್ಗಿ, ಪಾಚಿತ್ತಿ ಪರಿಯಾಪುತಾ.

೩೯. ಭಿಕ್ಖು ಚೀವರಮಞ್ಞಾತಿಂ, ವಿಞ್ಞಾಪೇನ್ತೋ ತದುತ್ತರಿಂ;

ಪಯೋಗೇ ದುಕ್ಕಟಂ, ವಿಞ್ಞಾ-ಪಿತೇ ನಿಸ್ಸಗ್ಗಿಯಂ ಫುಸೇ.

೪೦. ಅಞ್ಞಾತಕಂ ಕಞ್ಚಿ ಉಪಾಸಕಂ ವಾ;

ಉಪಾಸಿಕಂ ವಾ ಉಪಸಙ್ಕಮಿತ್ವಾ;

ಪುಬ್ಬೇವ ಹುತ್ವಾ ಪನ ಅಪ್ಪವಾರಿತೋ;

ವತ್ಥೇ ವಿಕಪ್ಪಂ ಪಟಿಪಜ್ಜಮಾನೋ.

೪೧. ದುವೇ ಆಪಜ್ಜತಾಪತ್ತೀ, ಪಯೋಗೇ ದುಕ್ಕಟಂ ಸಿಯಾ;

ವಿಕಪ್ಪಂ ಪನ ಆಪನ್ನೇ, ನಿಸ್ಸಗ್ಗಿಯಮುದೀರಿತಂ.

೪೨. ಅಞ್ಞಾತಿಂ ಉಪಸಙ್ಕಮ್ಮ, ಪುಬ್ಬೇಯೇವಪ್ಪವಾರಿತೋ;

ವಿಕಪ್ಪಂ ಚೀವರೇ ಭಿಕ್ಖು, ಆಪಜ್ಜನ್ತೋ ದುವೇ ಫುಸೇ.

೪೩. ತಥಾತಿರೇಕತಿಕ್ಖತ್ತುಂ, ಚೋದನಾಯ ಚ ಭಿಕ್ಖು ಚೇ;

ಗನ್ತ್ವಾತಿರೇಕಛಕ್ಖತ್ತುಂ, ಠಾನೇನಪಿ ಚ ಚೀವರಂ.

೪೪. ನಿಪ್ಫಾದೇತಿ ಸಚೇ ತಸ್ಸ, ಹೋನ್ತಿ ಆಪತ್ತಿಯೋ ದುವೇ;

ಪಯೋಗೇ ದುಕ್ಕಟಂ, ತಸ್ಸ, ಲಾಭೇ ನಿಸ್ಸಗ್ಗಿಯಂ ಸಿಯಾ.

ಕಥಿನವಗ್ಗೋ ಪಠಮೋ.

೪೫. ದೋಸಾ ಕೋಸಿಯವಗ್ಗಸ್ಸ, ದ್ವೇದ್ವೇಆದೀಸು ಪಞ್ಚಸು;

ಪಯೋಗೇ ದುಕ್ಕಟಂ ವುತ್ತಂ, ಲಾಭೇ ನಿಸ್ಸಗ್ಗಿಯಂ ಸಿಯಾ.

೪೬. ಗಹೇತ್ವೇಳಕಲೋಮಾನಿ, ತಿಯೋಜನಮತಿಕ್ಕಮಂ;

ದುಕ್ಕಟಂ ಪಠಮೇ ಪಾದೇ, ನಿಸ್ಸಗ್ಗಿಂ ದುತಿಯೇ ಫುಸೇ.

೪೭. ಭಿಕ್ಖು ಭಿಕ್ಖುನಿಯಞ್ಞಾಯ, ಧೋವಾಪೇತೇಳಲೋಮಕಂ;

ಪಯೋಗೇ ದುಕ್ಕಟಂ, ತಸ್ಸ, ಧೋತೇ ನಿಸ್ಸಗ್ಗಿಯಂ ಸಿಯಾ.

೪೮. ರೂಪಿಯಂ ಪಟಿಗಣ್ಹನ್ತೋ, ದ್ವೇ ಪನಾಪತ್ತಿಯೋ ಫುಸೇ;

ಪಯೋಗೇ ದುಕ್ಕಟಂ ವುತ್ತಂ, ನಿಸ್ಸಗ್ಗಿ ಗಹಿತೇ ಸಿಯಾ.

೪೯. ನಾನಾಕಾರಂ ಸಮಾಪಜ್ಜಂ, ಸಂವೋಹಾರಞ್ಚ ರೂಪಿಯೇ;

ಸಮಾಪನ್ನೇ ಚ ನಿಸ್ಸಗ್ಗಿಂ, ಪಯೋಗೇ ದುಕ್ಕಟಂ ಫುಸೇ.

೫೦. ನಾನಪ್ಪಕಾರಕಂ ಭಿಕ್ಖು, ಆಪಜ್ಜೇ ಕಯವಿಕ್ಕಯಂ;

ಪಯೋಗೇ ದುಕ್ಕಟಂ, ತಸ್ಮಿಂ, ಕತೇ ನಿಸ್ಸಗ್ಗಿಯಂ ಫುಸೇ.

ಕೋಸಿಯವಗ್ಗೋ ದುತಿಯೋ.

೫೧. ಪತ್ತಂ ಅತಿಕ್ಕಮೇನ್ತಸ್ಸ, ದಸಾಹಮತಿರೇಕಕಂ;

ತಸ್ಸ ನಿಸ್ಸಗ್ಗಿಯಾಪತ್ತಿ, ಹೋತಿ ಏಕಾವ ಭಿಕ್ಖುನೋ.

೫೨. ಅಪಞ್ಚಬನ್ಧನೇ ಪತ್ತೇ, ವಿಜ್ಜಮಾನೇಪಿ ಭಿಕ್ಖುನೋ;

ಅಞ್ಞಂ ಪನ ನವಂ ಪತ್ತಂ, ಚೇತಾಪೇತಿ ಸಚೇ ಪನ.

೫೩. ದ್ವೇ ಪನಾಪತ್ತಿಯೋ ಭಿಕ್ಖು, ಆಪಜ್ಜತಿ, ನ ಸಂಸಯೋ;

ಪಯೋಗೇ ದುಕ್ಕಟಂ, ತಸ್ಸ, ಲಾಭೇ ನಿಸ್ಸಗ್ಗಿಯಂ ಫುಸೇ.

೫೪. ಪಟಿಗ್ಗಹೇತ್ವಾ ಭೇಸಜ್ಜಂ, ಸತ್ತಾಹಂ ಯೋ ಅತಿಕ್ಕಮೇ;

ಏಕಂ ನಿಸ್ಸಗ್ಗಿಯಾಪತ್ತಿಂ, ಆಪಜ್ಜತಿ ಹಿ ಸೋ ಪನ.

೫೫. ಅಕಾಲೇ ಪರಿಯೇಸನ್ತೋ, ವಸ್ಸಸಾಟಿಕಚೀವರಂ;

ಪಯೋಗೇ ದುಕ್ಕಟಂ, ತಸ್ಸ, ಲಾಭೇ ನಿಸ್ಸಗ್ಗಿಯಂ ಫುಸೇ.

೫೬. ಭಿಕ್ಖುನೋ ಚೀವರಂ ದತ್ವಾ, ಅಚ್ಛಿನ್ದನ್ತೋ ದುವೇ ಫುಸೇ;

ಪಯೋಗೇ ದುಕ್ಕಟಂ ವುತ್ತಂ, ಹಟೇ ನಿಸ್ಸಗ್ಗಿಯಂ ಸಿಯಾ.

೫೭. ವಿಞ್ಞಾಪೇತ್ವಾ ಸಯಂ ಸುತ್ತಂ, ತನ್ತವಾಯೇಹಿ ಚೀವರಂ;

ವಾಯಾಪೇತಿ ಸಚೇ ಭಿಕ್ಖು, ದ್ವೇ ಪನಾಪತ್ತಿಯೋ ಫುಸೇ.

೫೮. ಯೋ ಪನಞ್ಞಾತಕಸ್ಸೇವ, ತನ್ತವಾಯೇ ಸಮೇಚ್ಚ ಚೇ;

ವಿಕಪ್ಪಂ ಚೀವರೇ ಭಿಕ್ಖು, ಆಪಜ್ಜಂ ಅಪ್ಪವಾರಿತೋ.

೫೯. ದ್ವೇ ಪನಾಪತ್ತಿಯೋ ಸೋ ಹಿ, ಆಪಜ್ಜತಿ, ನ ಸಂಸಯೋ;

ಪಯೋಗೇ ದುಕ್ಕಟಂ, ತಸ್ಸ, ಲಾಭೇ ನಿಸ್ಸಗ್ಗಿಯಂ ಸಿಯಾ.

೬೦. ಪಟಿಗ್ಗಹೇತ್ವಾ ಅಚ್ಚೇಕ-ಸಞ್ಞಿತಂ ಪನ ಚೀವರಂ;

ಕಾಲಂ ಅತಿಕ್ಕಮೇನ್ತೋ ತಂ, ಏಕಂ ನಿಸ್ಸಗ್ಗಿಯಂ ಫುಸೇ.

೬೧. ತಿಣ್ಣಮಞ್ಞತರಂ ವತ್ಥಂ, ನಿದಹಿತ್ವಾ ಘರೇಧಿಕಂ;

ಛಾರತ್ತತೋ ವಿನಾ ತೇನ, ವಸಂ ನಿಸ್ಸಗ್ಗಿಯಂ ಫುಸೇ.

೬೨. ಜಾನಂ ಪರಿಣತಂ ಲಾಭಂ, ಸಙ್ಘಿಕಂ ಅತ್ತನೋ ಪನ;

ಪರಿಣಾಮೇತಿ ಚೇ ಭಿಕ್ಖು, ದ್ವೇ ಪನಾಪತ್ತಿಯೋ ಫುಸೇ.

೬೩. ಪಯೋಗೇ ದುಕ್ಕಟಂ ಹೋತಿ, ನಿಸ್ಸಗ್ಗಿ ಪರಿಣಾಮಿತೇ;

ಸಬ್ಬತ್ಥ ಅಪ್ಪನಾವಾರ-ಪರಿಹಾನಿ ಕತಾ ಮಯಾ.

ಪತ್ತವಗ್ಗೋ ತತಿಯೋ.

ತಿಂಸನಿಸ್ಸಗ್ಗಿಯಕಥಾ.

೬೪. ವದನ್ತಸ್ಸ ಮುಸಾವಾದಂ, ಪಞ್ಚ ಆಪತ್ತಿಯೋ ಸಿಯುಂ;

ಮನುಸ್ಸುತ್ತರಿಧಮ್ಮೇ ತು, ಅಭೂತಸ್ಮಿಂ ಪರಾಜಯೋ.

೬೫. ಚೋದನಾಯ ಗರುಂ ಭಿಕ್ಖುಂ, ಅಮೂಲನ್ತಿಮವತ್ಥುನಾ;

ಪರಿಯಾಯವಚನೇ ಞಾತೇ, ಥುಲ್ಲಚ್ಚಯಮುದೀರಿತಂ.

೬೬. ನೋ ಚೇ ಪಟಿವಿಜಾನಾತಿ, ದುಕ್ಕಟಂ ಸಮುದಾಹಟಂ;

ಸಮ್ಪಜಾನಮುಸಾವಾದೇ, ಪಾಚಿತ್ತಿ ಪರಿದೀಪಿತಾ.

೬೭. ಆಪತ್ತಿಯೋ ದುವೇ ವುತ್ತಾ, ಭಿಕ್ಖುಸ್ಸೋಮಸತೋ ಪನ;

ಪಾಚಿತ್ತಿ ಉಪಸಮ್ಪನ್ನಂ, ದುಕ್ಕಟಂ ಇತರಂ ಸಿಯಾ.

೬೮. ಪೇಸುಞ್ಞಹರಣೇ ದ್ವೇಪಿ, ಹೋನ್ತಿ, ಪಾಚಿತ್ತಿಯಂ ಪನ;