ಸೇಖಿಯಕಥಾ

೧೮೭೦. ಯೋ ಅನಾದರಿಯೇನೇವ, ಪುರತೋ ಪಚ್ಛತೋಪಿ ವಾ;

ಓಲಮ್ಬೇತ್ವಾ ನಿವಾಸೇಯ್ಯ, ತಸ್ಸ ಚಾಪತ್ತಿ ದುಕ್ಕಟಂ.

೧೮೭೧. ಹತ್ಥಿಸೋಣ್ಡಾದಿತುಲ್ಯಂ ತು, ನಿವಾಸೇನ್ತಸ್ಸ ದುಕ್ಕಟಂ;

ಆಪತ್ತಿಭೀರುನಾ ನಿಚ್ಚಂ, ವತ್ಥಬ್ಬಂ ಪರಿಮಣ್ಡಲಂ.

೧೮೭೨. ಜಾಣುಮಣ್ಡಲತೋ ಹೇಟ್ಠಾ, ಅಟ್ಠಙ್ಗುಲಪ್ಪಮಾಣಕಂ;

ಓತಾರೇತ್ವಾ ನಿವತ್ಥಬ್ಬಂ, ತತೋ ಊನಂ ನ ವಟ್ಟತಿ.

೧೮೭೩. ಅಸಞ್ಚಿಚ್ಚಾಸತಿಸ್ಸಾಪಿ, ಅಜಾನನ್ತಸ್ಸ ಕೇವಲಂ;

ಅನಾಪತ್ತಿ ಗಿಲಾನಸ್ಸಾ-ಪದಾಸುಮ್ಮತ್ತಕಾದಿನೋ.

ಪರಿಮಣ್ಡಲಕಥಾ.

೧೮೭೪. ಉಭೋ ಕೋಣೇ ಸಮಂ ಕತ್ವಾ, ಸಾದರಂ ಪರಿಮಣ್ಡಲಂ;

ಕತ್ವಾ ಪಾರುಪಿತಬ್ಬೇವಂ, ಅಕರೋನ್ತಸ್ಸ ದುಕ್ಕಟಂ.

೧೮೭೫. ಅವಿಸೇಸೇನ ವುತ್ತಂ ತು, ಇದಂ ಸಿಕ್ಖಾಪದದ್ವಯಂ;

ತಸ್ಮಾ ಘರೇ ವಿಹಾರೇ ವಾ, ಕತ್ತಬ್ಬಂ ಪರಿಮಣ್ಡಲಂ.

ದುತಿಯಂ.

೧೮೭೬. ಗಣ್ಠಿಕಂ ಪಟಿಮುಞ್ಚಿತ್ವಾ, ಕತ್ವಾ ಕೋಣೇ ಉಭೋ ಸಮಂ;

ಛಾದೇತ್ವಾ ಮಣಿಬನ್ಧಞ್ಚ, ಗನ್ತಬ್ಬಂ ಗೀವಮೇವ ಚ.

೧೮೭೭. ತಥಾ ಅಕತ್ವಾ ಭಿಕ್ಖುಸ್ಸ, ಜತ್ತೂನಿಪಿ ಉರಮ್ಪಿ ಚ;

ವಿವರಿತ್ವಾ ಯಥಾಕಾಮಂ, ಗಚ್ಛತೋ ಹೋತಿ ದುಕ್ಕಟಂ.

ತತಿಯಂ.

೧೮೭೮. ಗಲವಾಟಕತೋ ಉದ್ಧಂ, ಸೀಸಞ್ಚ ಮಣಿಬನ್ಧತೋ;

ಹತ್ಥೇ ಪಿಣ್ಡಿಕಮಂಸಮ್ಹಾ, ಹೇಟ್ಠಾ ಪಾದೇ ಉಭೋಪಿ ಚ.

೧೮೭೯. ವಿವರಿತ್ವಾವಸೇಸಞ್ಚ, ಛಾದೇತ್ವಾ ಚೇ ನಿಸೀದತಿ;

ಹೋತಿ ಸೋ ಸುಪ್ಪಟಿಚ್ಛನ್ನೋ, ದೋಸೋ ವಾಸೂಪಗಸ್ಸ ನ.

ಚತುತ್ಥಂ.

೧೮೮೦. ಹತ್ಥಂ ವಾ ಪನ ಪಾದಂ ವಾ, ಅಚಾಲೇನ್ತೇನ ಭಿಕ್ಖುನಾ;

ಸುವಿನೀತೇನ ಗನ್ತಬ್ಬಂ, ಛಟ್ಠೇ ನತ್ಥಿ ವಿಸೇಸತಾ.

ಪಞ್ಚಮಛಟ್ಠಾನಿ.

೧೮೮೧. ಸತೀಮತಾವಿಕಾರೇನ, ಯುಗಮತ್ತಞ್ಚ ಪೇಕ್ಖಿನಾ;

ಸುಸಂವುತೇನ ಗನ್ತಬ್ಬಂ, ಭಿಕ್ಖುನೋಕ್ಖಿತ್ತಚಕ್ಖುನಾ.

೧೮೮೨. ಯತ್ಥ ಕತ್ಥಚಿ ಹಿ ಟ್ಠಾನೇ, ಏಕಸ್ಮಿಂ ಅನ್ತರೇ ಘರೇ;

ಠತ್ವಾ ಪರಿಸ್ಸಯಾಭಾವಂ, ಓಲೋಕೇತುಮ್ಪಿ ವಟ್ಟತಿ.

೧೮೮೩. ಯೋ ಅನಾದರಿಯಂ ಕತ್ವಾ, ಓಲೋಕೇನ್ತೋ ತಹಿಂ ತಹಿಂ;

ಸಚೇನ್ತರಘರೇ ಯಾತಿ, ದುಕ್ಕಟಂ ಅಟ್ಠಮಂ ತಥಾ.

ಸತ್ತಮಟ್ಠಮಾನಿ.

೧೮೮೪. ಏಕತೋ ಉಭತೋ ವಾಪಿ, ಹುತ್ವಾ ಉಕ್ಖಿತ್ತಚೀವರೋ;

ಇನ್ದಖೀಲಕತೋ ಅನ್ತೋ, ಗಚ್ಛತೋ ಹೋತಿ ದುಕ್ಕಟಂ.

ನವಮಂ.

೧೮೮೫. ತಥಾ ನಿಸಿನ್ನಕಾಲೇಪಿ, ನೀಹರನ್ತೇನ ಕುಣ್ಡಿಕಂ;

ಅನುಕ್ಖಿಪಿತ್ವಾ ದಾತಬ್ಬಾ, ದೋಸೋ ವಾಸೂಪಗಸ್ಸ ನ.

ದಸಮಂ.

ಪಠಮೋ ವಗ್ಗೋ.

೧೮೮೬. ನ ವಟ್ಟತಿ ಹಸನ್ತೇನ, ಗನ್ತುಞ್ಚೇವ ನಿಸೀದಿತುಂ;

ವತ್ಥುಸ್ಮಿಂ ಹಸನೀಯಸ್ಮಿಂ, ಸಿತಮತ್ತಂ ತು ವಟ್ಟತಿ.

ಪಠಮದುತಿಯಾನಿ.

೧೮೮೭. ಅಪ್ಪಸದ್ದೇನ ಗನ್ತಬ್ಬಂ, ಚತುತ್ಥೇಪಿ ಅಯಂ ನಯೋ;

ಮಹಾಸದ್ದಂ ಕರೋನ್ತಸ್ಸ, ಉಭಯತ್ಥಾಪಿ ದುಕ್ಕಟಂ.

ತತಿಯಚತುತ್ಥಾನಿ.

೧೮೮೮. ಕಾಯಪ್ಪಚಾಲಕಂ ಕತ್ವಾ, ಬಾಹುಸೀಸಪ್ಪಚಾಲಕಂ;

ಗಚ್ಛತೋ ದುಕ್ಕಟಂ ಹೋತಿ, ತಥೇವ ಚ ನಿಸೀದತೋ.

೧೮೮೯. ಕಾಯಂ ಬಾಹುಞ್ಚ ಸೀಸಞ್ಚ, ಪಗ್ಗಹೇತ್ವಾ ಉಜುಂ ಪನ;

ಗನ್ತಬ್ಬಮಾಸಿತಬ್ಬಞ್ಚ, ಸಮೇನಿರಿಯಾಪಥೇನ ತು.

೧೮೯೦. ನಿಸೀದನೇನ ಯುತ್ತೇಸು, ತೀಸು ವಾಸೂಪಗಸ್ಸ ಹಿ;

ಅನಾಪತ್ತೀತಿ ಞಾತಬ್ಬಂ, ವಿಞ್ಞುನಾ ವಿನಯಞ್ಞುನಾ.

ದುತಿಯೋ ವಗ್ಗೋ.

೧೮೯೧. ಖಮ್ಭಂ ಕತ್ವಾ ಸಸೀಸಂ ವಾ, ಪಾರುಪಿತ್ವಾನ ಗಚ್ಛತೋ;

ದುಕ್ಕಟಂ ಮುನಿನಾ ವುತ್ತಂ, ತಥಾ ಉಕ್ಕುಟಿಕಾಯ ವಾ.

೧೮೯೨. ಹತ್ಥಪಲ್ಲತ್ಥಿಕಾಯಾಪಿ, ದುಸ್ಸಪಲ್ಲತ್ಥಿಕಾಯ ವಾ;

ತಸ್ಸನ್ತರಘರೇ ಹೋತಿ, ನಿಸೀದನ್ತಸ್ಸ ದುಕ್ಕಟಂ.

೧೮೯೩. ದುತಿಯೇ ಚ ಚತುತ್ಥೇ ಚ, ಛಟ್ಠೇ ವಾಸೂಪಗಸ್ಸ ತು;

ಅನಾಪತ್ತೀತಿ ಸಾರುಪ್ಪಾ, ಛಬ್ಬೀಸತಿ ಪಕಾಸಿತಾ.

ಛಟ್ಠಂ.

೧೮೯೪. ಸಕ್ಕಚ್ಚಂ ಸತಿಯುತ್ತೇನ, ಭಿಕ್ಖುನಾ ಪತ್ತಸಞ್ಞಿನಾ;

ಪಿಣ್ಡಪಾತೋ ಗಹೇತಬ್ಬೋ, ಸಮಸೂಪೋವ ವಿಞ್ಞುನಾ.

೧೮೯೫. ಸೂಪೋ ಭತ್ತಚತುಬ್ಭಾಗೋ, ‘‘ಸಮಸೂಪೋ’’ತಿ ವುಚ್ಚತಿ;

ಮುಗ್ಗಮಾಸಕುಲತ್ಥಾನಂ, ಸೂಪೋ ‘‘ಸೂಪೋ’’ತಿ ವುಚ್ಚತಿ.

೧೮೯೬. ಅನಾಪತ್ತಿ ಅಸಞ್ಚಿಚ್ಚ, ಗಿಲಾನಸ್ಸ ರಸೇರಸೇ;

ತಥೇವ ಞಾತಕಾದೀನಂ, ಅಞ್ಞತ್ಥಾಯ ಧನೇನ ವಾ.

ಸತ್ತಮಟ್ಠಮನವಮಾನಿ.

೧೮೯೭. ಅನ್ತೋಲೇಖಾಪಮಾಣೇನ, ಪತ್ತಸ್ಸ ಮುಖವಟ್ಟಿಯಾ;

ಪೂರಿತೋವ ಗಹೇತಬ್ಬೋ, ಅಧಿಟ್ಠಾನೂಪಗಸ್ಸ ತು.

೧೮೯೮. ತತ್ಥ ಥೂಪೀಕತಂ ಕತ್ವಾ, ಗಣ್ಹತೋ ಯಾವಕಾಲಿಕಂ;

ಯಂ ಕಿಞ್ಚಿ ಪನ ಭಿಕ್ಖುಸ್ಸ, ಹೋತಿ ಆಪತ್ತಿ ದುಕ್ಕಟಂ.

೧೮೯೯. ಅಧಿಟ್ಠಾನೂಪಗೇ ಪತ್ತೇ, ಕಾಲಿಕತ್ತಯಮೇವ ಚ;

ಸೇಸೇ ಥೂಪೀಕತಂ ಸಬ್ಬಂ, ವಟ್ಟತೇವ ನ ಸಂಸಯೋ.

೧೯೦೦. ದ್ವೀಸು ಪತ್ತೇಸು ಭತ್ತಂ ತು, ಗಹೇತ್ವಾ ಪತ್ತಮೇಕಕಂ;

ಪೂರೇತ್ವಾ ಯದಿ ಪೇಸೇತಿ, ಭಿಕ್ಖೂನಂ ಪನ ವಟ್ಟತಿ.

೧೯೦೧. ಪತ್ತೇ ಪಕ್ಖಿಪ್ಪಮಾನಂ ಯಂ, ಉಚ್ಛುಖಣ್ಡಫಲಾದಿಕಂ;

ಓರೋಹತಿ ಸಚೇ ಹೇಟ್ಠಾ, ನ ತಂ ಥೂಪೀಕತಂ ಸಿಯಾ.

೧೯೦೨. ಪುಪ್ಫತಕ್ಕೋಲಕಾದೀನಂ, ಠಪೇತ್ವಾ ಚೇ ವಟಂಸಕಂ;

ದಿನ್ನಂ ಅಯಾವಕಾಲಿತ್ತಾ, ನ ತಂ ಥೂಪೀಕತಂ ಸಿಯಾ.

೧೯೦೩. ವಟಂಸಕಂ ತು ಪೂವಸ್ಸ, ಠಪೇತ್ವಾ ಓದನೋಪರಿ;

ಪಿಣ್ಡಪಾತಂ ಸಚೇ ದೇನ್ತಿ, ಇದಂ ಥೂಪೀಕತಂ ಸಿಯಾ.

೧೯೦೪. ಭತ್ತಸ್ಸೂಪರಿ ಪಣ್ಣಂ ವಾ, ಥಾಲಕಂ ವಾಪಿ ಕಿಞ್ಚಿಪಿ;

ಠಪೇತ್ವಾ ಪರಿಪೂರೇತ್ವಾ, ಸಚೇ ಗಣ್ಹಾತಿ ವಟ್ಟತಿ.

೧೯೦೫. ಪಟಿಗ್ಗಹೇತುಮೇವಸ್ಸ, ತಂ ತು ಸಬ್ಬಂ ನ ವಟ್ಟತಿ;

ಗಹಿತಂ ಸುಗಹಿತಂ, ಪಚ್ಛಾ, ಭುಞ್ಜಿತಬ್ಬಂ ಯಥಾಸುಖಂ.

ತತಿಯೋ ವಗ್ಗೋ.

೧೯೦೬. ಪಠಮಂ ದುತಿಯಂ ವುತ್ತ-ನಯಂ ತು ತತಿಯೇ ಪನ;

ಉಪರೋಧಿಮದಸ್ಸೇತ್ವಾ, ಭೋತ್ತಬ್ಬಂ ಪಟಿಪಾಟಿಯಾ.

೧೯೦೭. ಅಞ್ಞೇಸಂ ಅತ್ತನೋ ಭತ್ತಂ, ಆಕಿರಂ ಪನ ಭಾಜನೇ;

ನತ್ಥೋಮಸತಿ ಚೇ ದೋಸೋ, ತಥಾ ಉತ್ತರಿಭಙ್ಗಕಂ.

ತತಿಯಂ.

೧೯೦೮. ಚತುತ್ಥೇ ಯಂ ತು ವತ್ತಬ್ಬಂ, ವುತ್ತಂ ಪುಬ್ಬೇ ಅಸೇಸತೋ;

ಪಞ್ಚಮೇ ಮತ್ಥಕಂ ದೋಸೋ, ಮದ್ದಿತ್ವಾ ಪರಿಭುಞ್ಜತೋ.

೧೯೦೯. ಅನಾಪತ್ತಿ ಗಿಲಾನಸ್ಸ, ಪರಿತ್ತೇಪಿ ಚ ಸೇಸಕೇ;

ಏಕತೋ ಪನ ಮದ್ದಿತ್ವಾ, ಸಂಕಡ್ಢಿತ್ವಾನ ಭುಞ್ಜತೋ.

ಚತುತ್ಥಪಞ್ಚಮಾನಿ.

೧೯೧೦. ಯೋ ಭಿಯ್ಯೋಕಮ್ಯತಾಹೇತು, ಸೂಪಂ ವಾ ಬ್ಯಞ್ಜನಮ್ಪಿ ವಾ;

ಪಟಿಚ್ಛಾದೇಯ್ಯ ಭತ್ತೇನ, ತಸ್ಸ ಚಾಪತ್ತಿ ದುಕ್ಕಟಂ.

ಛಟ್ಠಂ.

೧೯೧೧. ವಿಞ್ಞತ್ತಿಯಂ ತು ವತ್ತಬ್ಬಂ, ಅಪುಬ್ಬಂ ನತ್ಥಿ ಕಿಞ್ಚಿಪಿ;

ಅಟ್ಠಮೇ ಪನ ಉಜ್ಝಾನೇ, ಗಿಲಾನೋಪಿ ನ ಮುಚ್ಚತಿ.

೧೯೧೨. ‘‘ದಸ್ಸಾಮಿ ದಾಪೇಸ್ಸಾಮೀ’’ತಿ, ಓಲೋಕೇನ್ತಸ್ಸ ಭಿಕ್ಖುನೋ;

ಅನಾಪತ್ತೀತಿ ಞಾತಬ್ಬಂ, ನ ಚ ಉಜ್ಝಾನಸಞ್ಞಿನೋ.

ಅಟ್ಠಮಂ.

೧೯೧೩. ಮಹನ್ತಂ ಪನ ಮೋರಣ್ಡಂ, ಕುಕ್ಕುಟಣ್ಡಞ್ಚ ಖುದ್ದಕಂ;

ತೇಸಂ ಮಜ್ಝಪ್ಪಮಾಣೇನ, ಕತ್ತಬ್ಬೋ ಕಬಳೋ ಪನ.

೧೯೧೪. ಖಜ್ಜಕೇ ಪನ ಸಬ್ಬತ್ಥ, ಮೂಲಖಾದನಿಯಾದಿಕೇ;

ಫಲಾಫಲೇ ಅನಾಪತ್ತಿ, ಗಿಲಾನುಮ್ಮತ್ತಕಾದಿನೋ.

ನವಮಂ.

೧೯೧೫. ಅದೀಘೋ ಪನ ಕಾತಬ್ಬೋ, ಆಲೋಪೋ ಪರಿಮಣ್ಡಲೋ;

ಖಜ್ಜತುತ್ತರಿಭಙ್ಗಸ್ಮಿಂ, ಅನಾಪತ್ತಿ ಫಲಾಫಲೇ.

ದಸಮಂ.

ಚತುತ್ಥೋ ವಗ್ಗೋ.

೧೯೧೬. ಅನಾಹಟೇ ಮುಖದ್ವಾರಂ, ಅಪ್ಪತ್ತೇ ಕಬಳೇ ಪನ;

ಅತ್ತನೋ ಚ ಮುಖದ್ವಾರಂ, ವಿವರನ್ತಸ್ಸ ದುಕ್ಕಟಂ.

ಪಠಮಂ.

೧೯೧೭. ಮುಖೇ ಚ ಸಕಲಂ ಹತ್ಥಂ, ಪಕ್ಖಿಪನ್ತಸ್ಸ ದುಕ್ಕಟಂ;

ಮುಖೇ ಚ ಕಬಳಂ ಕತ್ವಾ, ಕಥೇತುಂ ನ ಚ ವಟ್ಟತಿ.

೧೯೧೮. ವಚನಂ ಯತ್ತಕೇನಸ್ಸ, ಪರಿಪುಣ್ಣಂ ನ ಹೋತಿ ಹಿ;

ಮುಖಸ್ಮಿಂತತ್ತಕೇ ಸನ್ತೇ, ಬ್ಯಾಹರನ್ತಸ್ಸ ದುಕ್ಕಟಂ.

೧೯೧೯. ಮುಖೇ ಹರೀತಕಾದೀನಿ, ಪಕ್ಖಿಪಿತ್ವಾ ಕಥೇತಿ ಯೋ;

ವಚನಂ ಪರಿಪುಣ್ಣಂ ಚೇ, ಕಥೇತುಂ ಪನ ವಟ್ಟತಿ.

ದುತಿಯತತಿಯಾನಿ.

೧೯೨೦. ಯೋ ಪಿಣ್ಡುಕ್ಖೇಪಕಂ ಭಿಕ್ಖು, ಕಬಳಚ್ಛೇದಕಮ್ಪಿ ವಾ;

ಮಕ್ಕಟೋ ವಿಯ ಗಣ್ಡೇ ವಾ, ಕತ್ವಾ ಭುಞ್ಜೇಯ್ಯ ದುಕ್ಕಟಂ.

ಚತುತ್ಥಪಞ್ಚಮಛಟ್ಠಾನಿ.

೧೯೨೧. ನಿದ್ಧುನಿತ್ವಾನ ಹತ್ಥಂ ವಾ, ಭತ್ತಂ ಸಿತ್ಥಾವಕಾರಕಂ;

ಜಿವ್ಹಾನಿಚ್ಛಾರಕಂ ವಾಪಿ, ತಥಾ ‘‘ಚಪು ಚಪೂ’’ತಿ ವಾ.

೧೯೨೨. ಅನಾದರವಸೇನೇವ, ಭುಞ್ಜತೋ ಹೋತಿ ದುಕ್ಕಟಂ;

ಸತ್ತಮೇ ಅಟ್ಠಮೇ ನತ್ಥಿ, ದೋಸೋ ಕಚವರುಜ್ಝನೇ.

ಸತ್ತಮದಸಮಾನಿ.

ಪಞ್ಚಮೋ ವಗ್ಗೋ.

೧೯೨೩. ಕತ್ವಾ ಏವಂ ನ ಭೋತ್ತಬ್ಬಂ, ಸದ್ದಂ ‘‘ಸುರು ಸುರೂ’’ತಿ ಚ;

ಹತ್ಥನಿಲ್ಲೇಹಕಂ ವಾಪಿ, ನ ಚ ವಟ್ಟತಿ ಭುಞ್ಜಿತುಂ.

೧೯೨೪. ಫಾಣಿತಂ ಘನಯಾಗುಂ ವಾ, ಗಹೇತ್ವಾ ಅಙ್ಗುಲೀಹಿ ತಂ;

ಮುಖೇ ಅಙ್ಗುಲಿಯೋ ಭೋತ್ತುಂ, ಪವೇಸೇತ್ವಾಪಿ ವಟ್ಟತಿ.

೧೯೨೫. ನ ಪತ್ತೋ ಲೇಹಿತಬ್ಬೋವ, ಏಕಾಯಙ್ಗುಲಿಕಾಯ ವಾ;

ಏಕಓಟ್ಠೋಪಿ ಜಿವ್ಹಾಯ, ನ ಚ ನಿಲ್ಲೇಹಿತಬ್ಬಕೋ.

ಚತುತ್ಥಂ.

೧೯೨೬. ಸಾಮಿಸೇನ ತು ಹತ್ಥೇನ, ನ ಚ ಪಾನೀಯಥಾಲಕಂ;

ಗಹೇತಬ್ಬಂ, ಪಟಿಕ್ಖಿತ್ತಂ, ಪಟಿಕ್ಕೂಲವಸೇನ ಹಿ.

೧೯೨೭. ಪುಗ್ಗಲಸ್ಸ ಚ ಸಙ್ಘಸ್ಸ, ಗಹಟ್ಠಸ್ಸತ್ತನೋಪಿ ಚ;

ಸನ್ತಕೋ ಪನ ಸಙ್ಖೋ ವಾ, ಸರಾವಂ ವಾಪಿ ಥಾಲಕಂ.

೧೯೨೮. ತಸ್ಮಾ ನ ಚ ಗಹೇತಬ್ಬಂ, ಗಣ್ಹತೋ ಹೋತಿ ದುಕ್ಕಟಂ;

ಅನಾಮಿಸೇನ ಹತ್ಥೇನ, ಗಹಣಂ ಪನ ವಟ್ಟತಿ.

ಪಞ್ಚಮಂ.

೧೯೨೯. ಉದ್ಧರಿತ್ವಾಪಿ ಭಿನ್ದಿತ್ವಾ, ಗಹೇತ್ವಾ ವಾ ಪಟಿಗ್ಗಹೇ;

ನೀಹರಿತ್ವಾ ಅನಾಪತ್ತಿ, ಛಡ್ಡೇನ್ತಸ್ಸ ಘರಾ ಬಹಿ.