ಭಿಕ್ಖುನೀವಿಭಙ್ಗೋ

೧೯೬೪. ಭಿಕ್ಖುನೀನಂ ಹಿತತ್ಥಾಯ, ವಿಭಙ್ಗಂ ಯಂ ಜಿನೋಬ್ರವಿ;

ತಸ್ಮಿಂ ಅಪಿ ಸಮಾಸೇನ, ಕಿಞ್ಚಿಮತ್ತಂ ಭಣಾಮಹಂ.

ಪಾರಾಜಿಕಕಥಾ

೧೯೬೫. ಛನ್ದಸೋ ಮೇಥುನಂ ಧಮ್ಮಂ, ಪಟಿಸೇವೇಯ್ಯ ಯಾ ಪನ;

ಹೋತಿ ಪಾರಾಜಿಕಾ ನಾಮ, ಸಮಣೀ ಸಾ ಪವುಚ್ಚತಿ.

೧೯೬೬. ಮನುಸ್ಸಪುರಿಸಾದೀನಂ, ನವನ್ನಂ ಯಸ್ಸ ಕಸ್ಸಚಿ;

ಸಜೀವಸ್ಸಾಪ್ಯಜೀವಸ್ಸ, ಸನ್ಥತಂ ವಾ ಅಸನ್ಥತಂ.

೧೯೬೭. ಅತ್ತನೋ ತಿವಿಧೇ ಮಗ್ಗೇ, ಯೇಭುಯ್ಯಕ್ಖಾಯಿತಾದಿಕಂ;

ಅಙ್ಗಜಾತಂ ಪವೇಸೇನ್ತೀ, ಅಲ್ಲೋಕಾಸೇ ಪರಾಜಿತಾ.

೧೯೬೮. ಇತೋ ಪರಮವತ್ವಾವ, ಸಾಧಾರಣವಿನಿಚ್ಛಯಂ;

ಅಸಾಧಾರಣಮೇವಾಹಂ, ಭಣಿಸ್ಸಾಮಿ ಸಮಾಸತೋ.

೧೯೬೯. ಅಧಕ್ಖಕಂ ಸರೀರಕಂ, ಯದುಬ್ಭಜಾಣುಮಣ್ಡಲಂ;

ಸರೀರಕೇನ ಚೇ ತೇನ, ಫುಸೇಯ್ಯ ಭಿಕ್ಖುನೀ ಪನ.

೧೯೭೦. ಅವಸ್ಸುತಸ್ಸಾವಸ್ಸುತಾ, ಮನುಸ್ಸಪುಗ್ಗಲಸ್ಸ ಯಾ;

ಸರೀರಮಸ್ಸ ತೇನ ವಾ, ಫುಟ್ಠಾ ಪಾರಾಜಿಕಾ ಸಿಯಾ.

೧೯೭೧. ಕಪ್ಪರಸ್ಸ ಪನುದ್ಧಮ್ಪಿ, ಗಹಿತಂ ಉಬ್ಭಜಾಣುನಾ;

ಯಥಾವುತ್ತಪ್ಪಕಾರೇನ, ಕಾಯೇನಾನೇನ ಅತ್ತನೋ.

೧೯೭೨. ಪುರಿಸಸ್ಸ ತಥಾ ಕಾಯ- ಪಟಿಬದ್ಧಂ ಫುಸನ್ತಿಯಾ;

ತಥಾ ಯಥಾಪರಿಚ್ಛಿನ್ನ- ಕಾಯಬದ್ಧೇನ ಅತ್ತನೋ.

೧೯೭೩. ಅವಸೇಸೇನ ವಾ ತಸ್ಸ, ಕಾಯಂ ಕಾಯೇನ ಅತ್ತನೋ;

ಹೋತಿ ಥುಲ್ಲಚ್ಚಯಂ ತಸ್ಸಾ, ಪಯೋಗೇ ಪುರಿಸಸ್ಸ ಚ.

೧೯೭೪. ಯಕ್ಖಪೇತತಿರಚ್ಛಾನ- ಪಣ್ಡಕಾನಂ ಅಧಕ್ಖಕಂ;

ಉಬ್ಭಜಾಣುಂ ತಥೇವಸ್ಸಾ, ಉಭತೋವಸ್ಸವೇ ಸತಿ.

೧೯೭೫. ಏಕತೋವಸ್ಸವೇ ಚಾಪಿ, ಥುಲ್ಲಚ್ಚಯಮುದೀರಿತಂ;

ಅವಸೇಸೇ ಚ ಸಬ್ಬತ್ಥ, ಹೋತಿ ಆಪತ್ತಿ ದುಕ್ಕಟಂ.

೧೯೭೬. ಉಬ್ಭಕ್ಖಕಮಧೋಜಾಣು-ಮಣ್ಡಲಂ ಪನ ಯಂ ಇಧ;

ಕಪ್ಪರಸ್ಸ ಚ ಹೇಟ್ಠಾಪಿ, ಗತಂ ಏತ್ಥೇವ ಸಙ್ಗಹಂ.

೧೯೭೭. ಕೇಲಾಯತಿ ಸಚೇ ಭಿಕ್ಖು, ಸದ್ಧಿಂ ಭಿಕ್ಖುನಿಯಾ ಪನ;

ಉಭಿನ್ನಂ ಕಾಯಸಂಸಗ್ಗ-ರಾಗೇ ಸತಿ ಹಿ ಭಿಕ್ಖುನೋ.

೧೯೭೮. ಹೋತಿ ಸಙ್ಘಾದಿಸೇಸೋವ, ನಾಸೋ ಭಿಕ್ಖುನಿಯಾ ಸಿಯಾ;

ಕಾಯಸಂಸಗ್ಗರಾಗೋ ಚ, ಸಚೇ ಭಿಕ್ಖುನಿಯಾ ಸಿಯಾ.

೧೯೭೯. ಭಿಕ್ಖುನೋ ಮೇಥುನೋ ರಾಗೋ, ಗೇಹಪೇಮಮ್ಪಿ ವಾ ಭವೇ;

ತಸ್ಸಾ ಥುಲ್ಲಚ್ಚಯಂ ವುತ್ತಂ, ಭಿಕ್ಖುನೋ ಹೋತಿ ದುಕ್ಕಟಂ.

೧೯೮೦. ಉಭಿನ್ನಂ ಮೇಥುನೇ ರಾಗೇ, ಗೇಹಪೇಮೇಪಿ ವಾ ಸತಿ;

ಅವಿಸೇಸೇನ ನಿದ್ದಿಟ್ಠಂ, ಉಭಿನ್ನಂ ದುಕ್ಕಟಂ ಪನ.

೧೯೮೧. ಯಸ್ಸ ಯತ್ಥ ಮನೋಸುದ್ಧಂ, ತಸ್ಸ ತತ್ಥ ನ ದೋಸತಾ;

ಉಭಿನ್ನಮ್ಪಿ ಅನಾಪತ್ತಿ, ಉಭಿನ್ನಂ ಚಿತ್ತಸುದ್ಧಿಯಾ.

೧೯೮೨. ಕಾಯಸಂಸಗ್ಗರಾಗೇನ, ಭಿನ್ದಿತ್ವಾ ಪಠಮಂ ಪನ;

ಪಚ್ಛಾ ದೂಸೇತಿ ಚೇ ನೇವ, ಹೋತಿ ಭಿಕ್ಖುನಿದೂಸಕೋ.

೧೯೮೩. ಅಥ ಭಿಕ್ಖುನಿಯಾ ಫುಟ್ಠೋ, ಸಾದಿಯನ್ತೋವ ಚೇತಸಾ;

ನಿಚ್ಚಲೋ ಹೋತಿ ಚೇ ಭಿಕ್ಖು, ನ ಹೋತಾಪತ್ತಿ ಭಿಕ್ಖುನೋ.

೧೯೮೪. ಭಿಕ್ಖುನೀ ಭಿಕ್ಖುನಾ ಫುಟ್ಠಾ, ಸಚೇ ಹೋತಿಪಿ ನಿಚ್ಚಲಾ;

ಅಧಿವಾಸೇತಿ ಸಮ್ಫಸ್ಸಂ, ತಸ್ಸಾ ಪಾರಾಜಿಕಂ ಸಿಯಾ.

೧೯೮೫. ತಥಾ ಥುಲ್ಲಚ್ಚಯಂ ಖೇತ್ತೇ, ದುಕ್ಕಟಞ್ಚ ವಿನಿದ್ದಿಸೇ;

ವುತ್ತತ್ತಾ ‘‘ಕಾಯಸಂಸಗ್ಗಂ, ಸಾದಿಯೇಯ್ಯಾ’’ತಿ ಸತ್ಥುನಾ.

೧೯೮೬. ತಸ್ಸಾ ಕ್ರಿಯಸಮುಟ್ಠಾನಂ, ಏವಂ ಸತಿ ನ ದಿಸ್ಸತಿ;

ಇದಂ ತಬ್ಬಹುಲೇನೇವ, ನಯೇನ ಪರಿದೀಪಿತಂ.

೧೯೮೭. ಅನಾಪತ್ತಿ ಅಸಞ್ಚಿಚ್ಚ, ಅಜಾನಿತ್ವಾಮಸನ್ತಿಯಾ;

ಸತಿ ಆಮಸನೇ ತಸ್ಸಾ, ಫಸ್ಸಂ ವಾಸಾದಿಯನ್ತಿಯಾ.

೧೯೮೮. ವೇದನಟ್ಟಾಯ ವಾ ಖಿತ್ತ-ಚಿತ್ತಾಯುಮ್ಮತ್ತಿಕಾಯ ವಾ;

ಸಮುಟ್ಠಾನಾದಯೋ ತುಲ್ಯಾ, ಪಠಮನ್ತಿಮವತ್ಥುನಾ.

ಉಬ್ಭಜಾಣುಮಣ್ಡಲಕಥಾ.

೧೯೮೯. ಪಾರಾಜಿಕತ್ತಂ ಜಾನನ್ತಿ, ಸಲಿಙ್ಗೇ ತು ಠಿತಾಯ ಹಿ;

‘‘ನ ಕಸ್ಸಚಿ ಪರಸ್ಸಾಹಂ, ಆರೋಚೇಸ್ಸಾಮಿ ದಾನಿ’’ತಿ.

೧೯೯೦. ಧುರೇ ನಿಕ್ಖಿತ್ತಮತ್ತಸ್ಮಿಂ, ಸಾ ಚ ಪಾರಾಜಿಕಾ ಸಿಯಾ;

ಅಯಂ ವಜ್ಜಪಟಿಚ್ಛಾದಿ- ನಾಮಿಕಾ ಪನ ನಾಮತೋ.

೧೯೯೧. ಸೇಸಂ ಸಪ್ಪಾಣವಗ್ಗಸ್ಮಿಂ, ದುಟ್ಠುಲ್ಲೇನ ಸಮಂ ನಯೇ;

ವಿಸೇಸೋ ತತ್ರ ಪಾಚಿತ್ತಿ, ಇಧ ಪಾರಾಜಿಕಂ ಸಿಯಾ.

ವಜ್ಜಪಟಿಚ್ಛಾದಿಕಥಾ.

೧೯೯೨. ಸಙ್ಘೇನುಕ್ಖಿತ್ತಕೋ ಭಿಕ್ಖು, ಠಿತೋ ಉಕ್ಖೇಪನೇ ಪನ;

ಯಂದಿಟ್ಠಿಕೋ ಚ ಸೋ ತಸ್ಸಾ, ದಿಟ್ಠಿಯಾ ಗಹಣೇನ ತಂ.

೧೯೯೩. ಅನುವತ್ತೇಯ್ಯ ಯಾ ಭಿಕ್ಖುಂ, ಭಿಕ್ಖುನೀ ಸಾ ವಿಸುಮ್ಪಿ ಚ;

ಸಙ್ಘಮಜ್ಝೇಪಿ ಅಞ್ಞಾಹಿ, ವುಚ್ಚಮಾನಾ ತಥೇವ ಚ.

೧೯೯೪. ಅಚಜನ್ತೀವ ತಂ ವತ್ಥುಂ, ಗಹೇತ್ವಾ ಯದಿ ತಿಟ್ಠತಿ;

ತಸ್ಸ ಕಮ್ಮಸ್ಸ ಓಸಾನೇ, ಉಕ್ಖಿತ್ತಸ್ಸಾನುವತ್ತಿಕಾ.

೧೯೯೫. ಹೋತಿ ಪಾರಾಜಿಕಾಪನ್ನಾ, ಹೋತಾಸಾಕಿಯಧೀತರಾ;

ಪುನ ಅಪ್ಪಟಿಸನ್ಧೇಯಾ, ದ್ವಿಧಾ ಭಿನ್ನಾ ಸಿಲಾ ವಿಯ.

೧೯೯೬. ಅಧಮ್ಮೇ ಪನ ಕಮ್ಮಸ್ಮಿಂ, ನಿದ್ದಿಟ್ಠಂ ತಿಕದುಕ್ಕಟಂ;

ಸಮುಟ್ಠಾನಾದಯೋ ಸಬ್ಬೇ, ವುತ್ತಾ ಸಮನುಭಾಸನೇ.

ಉಕ್ಖಿತ್ತಾನುವತ್ತಿಕಕಥಾ.

೧೯೯೭. ಅಪಾರಾಜಿಕಖೇತ್ತಸ್ಸ, ಗಹಣಂ ಯಸ್ಸ ಕಸ್ಸಚಿ;

ಅಙ್ಗಸ್ಸ ಪನ ತಂ ಹತ್ಥ-ಗ್ಗಹಣನ್ತಿ ಪವುಚ್ಚತಿ.

೧೯೯೮. ಪಾರುತಸ್ಸ ನಿವತ್ಥಸ್ಸ, ಗಹಣಂ ಯಸ್ಸ ಕಸ್ಸಚಿ;

ಏತಂ ಸಙ್ಘಾಟಿಯಾ ಕಣ್ಣ-ಗ್ಗಹಣನ್ತಿ ಪವುಚ್ಚತಿ.

೧೯೯೯. ಕಾಯಸಂಸಗ್ಗಸಙ್ಖಾತ-ಅಸದ್ಧಮ್ಮಸ್ಸ ಕಾರಣಾ;

ಭಿಕ್ಖುನೀ ಹತ್ಥಪಾಸಸ್ಮಿಂ, ತಿಟ್ಠೇಯ್ಯ ಪುರಿಸಸ್ಸ ವಾ.

೨೦೦೦. ಸಲ್ಲಪೇಯ್ಯ ತಥಾ ತತ್ಥ, ಠತ್ವಾ ತು ಪುರಿಸೇನ ವಾ;

ಸಙ್ಕೇತಂ ವಾಪಿ ಗಚ್ಛೇಯ್ಯ, ಇಚ್ಛೇಯ್ಯಾ ಗಮನಸ್ಸ ವಾ.

೨೦೦೧. ತದತ್ಥಾಯ ಪಟಿಚ್ಛನ್ನ-ಟ್ಠಾನಞ್ಚ ಪವಿಸೇಯ್ಯ ವಾ;

ಉಪಸಂಹರೇಯ್ಯ ಕಾಯಂ ವಾ, ಹತ್ಥಪಾಸೇ ಠಿತಾ ಪನ.

೨೦೦೨. ಅಯಮಸ್ಸಮಣೀ ಹೋತಿ, ವಿನಟ್ಠಾ ಅಟ್ಠವತ್ಥುಕಾ;

ಅಭಬ್ಬಾ ಪುನರುಳ್ಹಾಯ, ಛಿನ್ನೋ ತಾಲೋವ ಮತ್ಥಕೇ.

೨೦೦೩. ಅನುಲೋಮೇನ ವಾ ವತ್ಥುಂ, ಪಟಿಲೋಮೇನ ವಾ ಚುತಾ;

ಅಟ್ಠಮಂ ಪರಿಪೂರೇನ್ತೀ, ತಥೇಕನ್ತರಿಕಾಯ ವಾ.

೨೦೦೪. ಅಥಾದಿತೋ ಪನೇಕಂ ವಾ, ದ್ವೇ ವಾ ತೀಣಿಪಿ ಸತ್ತ ವಾ;

ಸತಕ್ಖತ್ತುಮ್ಪಿ ಪೂರೇನ್ತೀ, ನೇವ ಪಾರಾಜಿಕಾ ಸಿಯಾ.

೨೦೦೫. ಆಪತ್ತಿಯೋ ಪನಾಪನ್ನಾ, ದೇಸೇತ್ವಾ ತಾಹಿ ಮುಚ್ಚತಿ;

ಧುರನಿಕ್ಖೇಪನಂ ಕತ್ವಾ, ದೇಸಿತಾ ಗಣನೂಪಿಕಾ.

೨೦೦೬. ನ ಹೋತಾಪತ್ತಿಯಾ ಅಙ್ಗಂ, ಸಉಸ್ಸಾಹಾಯ ದೇಸಿತಾ;

ದೇಸನಾಗಣನಂ ನೇತಿ, ದೇಸಿತಾಪಿ ಅದೇಸಿತಾ.

೨೦೦೭. ಅನಾಪತ್ತಿ ಅಸಞ್ಚಿಚ್ಚ, ಅಜಾನಿತ್ವಾ ಕರೋನ್ತಿಯಾ;

ಸಮುಟ್ಠಾನಾದಯೋ ಸಬ್ಬೇ, ಅನನ್ತರಸಮಾ ಮತಾ.

೨೦೦೮. ‘‘ಅಸದ್ಧಮ್ಮೋ’’ತಿ ನಾಮೇತ್ಥ, ಕಾಯಸಂಸಗ್ಗನಾಮಕೋ;

ಅಯಮುದ್ದಿಸಿತೋ ಅತ್ಥೋ, ಸಬ್ಬಅಟ್ಠಕಥಾಸುಪಿ.

೨೦೦೯. ವಿಞ್ಞೂ ಪಟಿಬಲೋ ಕಾಯ-ಸಂಸಗ್ಗಂ ಪಟಿಪಜ್ಜಿತುಂ;

ಕಾಯಸಂಸಗ್ಗಭಾವೇ ತು, ಸಾಧಕಂ ವಚನಂ ಇದಂ.

ಅಟ್ಠವತ್ಥುಕಕಥಾ.

೨೦೧೦. ಅವಸ್ಸುತಾ ಪಟಿಚ್ಛಾದೀ, ಉಕ್ಖಿತ್ತಾ ಅಟ್ಠವತ್ಥುಕಾ;

ಅಸಾಧಾರಣಪಞ್ಞತ್ತಾ, ಚತಸ್ಸೋವ ಮಹೇಸಿನಾ.

ಪಾರಾಜಿಕಕಥಾ ನಿಟ್ಠಿತಾ.

ಸಙ್ಘಾದಿಸೇಸಕಥಾ

೨೦೧೧. ಯಾ ಪನ ಭಿಕ್ಖುನೀ ಉಸ್ಸಯವಾದಾ;

ಅಟ್ಟಕರೀ ಮುಖರೀ ವಿಹರೇಯ್ಯ;

ಯೇನ ಕೇನಚಿ ನರೇನಿಧ ಸದ್ಧಿಂ;

ಸಾ ಗರುಕಂ ಕಿರ ದೋಸಮುಪೇತಿ.

೨೦೧೨. ಸಕ್ಖಿಂ ವಾಪಿ ಸಹಾಯಂ ವಾ, ಪರಿಯೇಸತಿ ದುಕ್ಕಟಂ;

ಪದೇ ಪದೇ ತಥಾ ಅಟ್ಟಂ, ಕಾತುಂ ಗಚ್ಛನ್ತಿಯಾಪಿ ಚ.

೨೦೧೩. ಆರೋಚೇತಿ ಸಚೇ ಪುಬ್ಬಂ, ಭಿಕ್ಖುನೀ ಅತ್ತನೋ ಕಥಂ;

ದಿಸ್ವಾ ವೋಹಾರಿಕಂ ತಸ್ಸಾ, ಹೋತಿ ಆಪತ್ತಿ ದುಕ್ಕಟಂ.

೨೦೧೪. ಆರೋಚೇತಿ ಸಚೇ ಪಚ್ಛಾ, ಇತರೋ ಅತ್ತನೋ ಕಥಂ;

ಹೋತಿ ಭಿಕ್ಖುನಿಯಾ ತಸ್ಸಾ, ಥುಲ್ಲಚ್ಚಯಮನನ್ತರಂ.

೨೦೧೫. ಆರೋಚೇತಿತರೋ ಪುಬ್ಬಂ, ಸಚೇ ಸೋ ಅತ್ತನೋ ಕಥಂ;

ಪಚ್ಛಾ ಭಿಕ್ಖುನೀ ಚೇ ಪುಬ್ಬ-ಸದಿಸೋವ ವಿನಿಚ್ಛಯೋ.

೨೦೧೬. ‘‘ಆರೋಚೇಹೀ’’ತಿ ವುತ್ತಾ ಚೇ, ‘‘ಕಥಂ ತವ ಮಮಾಪಿ ಚ’’;

ಆರೋಚೇತು ಯಥಾಕಾಮಂ, ಪಠಮೇ ದುಕ್ಕಟಂ ಸಿಯಾ.

೨೦೧೭. ದುತಿಯಾರೋಚನೇ ತಸ್ಸಾ, ಥುಲ್ಲಚ್ಚಯಮುದೀರಿತಂ;

ಉಪಾಸಕೇನ ವುತ್ತೇಪಿ, ಅಯಮೇವ ವಿನಿಚ್ಛಯೋ.

೨೦೧೮. ಆರೋಚಿತಕಥಂ ಸುತ್ವಾ, ಉಭಿನ್ನಮ್ಪಿ ಯಥಾ ತಥಾ;

ವಿನಿಚ್ಛಯೇ ಕತೇ ತೇಹಿ, ಅಟ್ಟೇ ಪನ ಚ ನಿಟ್ಠಿತೇ.

೨೦೧೯. ಅಟ್ಟಸ್ಸ ಪರಿಯೋಸಾನೇ, ಜಯೇ ಭಿಕ್ಖುನಿಯಾ ಪನ;

ಪರಾಜಯೇಪಿ ವಾ ತಸ್ಸಾ, ಹೋತಿ ಸಙ್ಘಾದಿಸೇಸತಾ.

೨೦೨೦. ದೂತಂ ವಾಪಿ ಪಹಿಣಿತ್ವಾ, ಆಗನ್ತ್ವಾನ ಸಯಮ್ಪಿ ವಾ;

ಪಚ್ಚತ್ಥಿಕಮನುಸ್ಸೇಹಿ, ಆಕಡ್ಢೀಯತಿ ಯಾ ಪನ.

೨೦೨೧. ಆರಾಮೇ ಪನ ಅಞ್ಞೇಹಿ, ಅನಾಚಾರಂ ಕತಂ ಸಚೇ;

ಅನೋದಿಸ್ಸ ಪರಂ ಕಿಞ್ಚಿ, ರಕ್ಖಂ ಯಾಚತಿ ತತ್ಥ ಯಾ.

೨೦೨೨. ಯಾಯ ಕಿಞ್ಚಿ ಅವುತ್ತಾವ, ಧಮ್ಮಟ್ಠಾ ಸಯಮೇವ ತು;

ಸುತ್ವಾ ತಂ ಅಞ್ಞತೋ ಅಟ್ಟಂ, ನಿಟ್ಠಾಪೇನ್ತಿ ಸಚೇ ಪನ.

೨೦೨೩. ತಸ್ಸಾ, ಉಮ್ಮತ್ತಿಕಾದೀನ-ಮನಾಪತ್ತಿ ಪಕಾಸಿತಾ;

ಕಥಿನೇನ ಸಮುಟ್ಠಾನಂ, ತುಲ್ಯಂ ಸಕಿರಿಯಂ ಇದಂ.

ಅಟ್ಟಕಾರಿಕಥಾ.

೨೦೨೪. ಜಾನನ್ತೀ ಭಿಕ್ಖುನೀ ಚೋರಿಂ, ವಜ್ಝಂ ವಿದಿತಮೇವ ಯಾ;

ಸಙ್ಘಂ ಅನಪಲೋಕೇತ್ವಾ, ರಾಜಾನಂ ಗಣಮೇವ ವಾ.

೨೦೨೫. ವುಟ್ಠಾಪೇಯ್ಯ ವಿನಾ ಕಪ್ಪಂ, ಚೋರಿವುಟ್ಠಾಪನಂ ಪನ;

ಸಙ್ಘಾದಿಸೇಸಮಾಪತ್ತಿ-ಮಾಪನ್ನಾ ನಾಮ ಹೋತಿ ಸಾ.

೨೦೨೬. ಪಞ್ಚಮಾಸಗ್ಘನಂ ಯಾಯ, ಹರಿತಂ ಪರಸನ್ತಕಂ;

ಅತಿರೇಕಗ್ಘನಂ ವಾಪಿ, ಅಯಂ ‘‘ಚೋರೀ’’ತಿ ವುಚ್ಚತಿ.

೨೦೨೭. ಭಿಕ್ಖುನೀಸು ಪನಞ್ಞಾಸು, ತಿತ್ಥಿಯೇಸುಪಿ ವಾ ತಥಾ;

ಯಾ ಪಬ್ಬಜಿತಪುಬ್ಬಾ ಸಾ, ಅಯಂ ‘‘ಕಪ್ಪಾ’’ತಿ ವುಚ್ಚತಿ.

೨೦೨೮. ವುಟ್ಠಾಪೇತಿ ಚ ಯಾ ಚೋರಿಂ, ಠಪೇತ್ವಾ ಕಪ್ಪಮೇವಿದಂ;

ಸಚೇ ಆಚರಿನಿಂ ಪತ್ತಂ, ಚೀವರಂ ಪರಿಯೇಸತಿ.

೨೦೨೯. ಸಮ್ಮನ್ನತಿ ಚ ಸೀಮಂ ವಾ, ತಸ್ಸಾ ಆಪತ್ತಿ ದುಕ್ಕಟಂ;

ಞತ್ತಿಯಾ ದುಕ್ಕಟಂ ದ್ವೀಹಿ, ಕಮ್ಮವಾಚಾಹಿ ಚ ದ್ವಯಂ.

೨೦೩೦. ಥುಲ್ಲಚ್ಚಯಸ್ಸ, ಕಮ್ಮನ್ತೇ, ಗರುಕಂ ನಿದ್ದಿಸೇ ಬುಧೋ;

ಗಣೋ ಆಚರಿನೀ ಚೇವ, ನ ಚ ಮುಚ್ಚತಿ ದುಕ್ಕಟಂ.

೨೦೩೧. ಅನಾಪತ್ತಿ ಅಜಾನನ್ತೀ, ವುಟ್ಠಾಪೇತಿ, ತಥೇವ ಚ;

ಕಪ್ಪಂ ವಾ ಅಪಲೋಕೇತ್ವಾ, ತಸ್ಸಾ ಉಮ್ಮತ್ತಿಕಾಯ ವಾ.

೨೦೩೨. ಚೋರಿವುಟ್ಠಾಪನಂ ನಾಮ, ಜಾಯತೇ ವಾಚಚಿತ್ತತೋ;

ಕಾಯವಾಚಾದಿತೋ ಚೇವ, ಸಚಿತ್ತಞ್ಚ ಕ್ರಿಯಾಕ್ರಿಯಂ.

ಚೋರಿವುಟ್ಠಾಪನಕಥಾ.