ಪಾಟಿದೇಸನೀಯಕಥಾ

೧೮೩೦. ಯೋ ಚನ್ತರಘರಂ ಭಿಕ್ಖು, ಪವಿಟ್ಠಾಯ ತು ಹತ್ಥತೋ;

ಅಞ್ಞಾತಿಕಾಯ ಯಂ ಕಿಞ್ಚಿ, ತಸ್ಸ ಭಿಕ್ಖುನಿಯಾ ಪನ.

೧೮೩೧. ಸಹತ್ಥಾ ಪಟಿಗ್ಗಣ್ಹೇಯ್ಯ, ಖಾದನಂ ಭೋಜನಮ್ಪಿ ವಾ;

ಗಹಣೇ ದುಕ್ಕಟಂ ಭೋಗೇ, ಪಾಟಿದೇಸನಿಯಂ ಸಿಯಾ.

೧೮೩೨. ರಥಿಕಾಯಪಿ ವಾ ಬ್ಯೂಹೇ, ಸನ್ಧಿಸಿಙ್ಘಾಟಕೇಸು ವಾ;

ಹತ್ಥಿಸಾಲಾದಿಕೇ ಠತ್ವಾ, ಗಣ್ಹತೋಪಿ ಅಯಂ ನಯೋ.

೧೮೩೩. ರಥಿಕಾಯ ಸಚೇ ಠತ್ವಾ, ದೇತಿ ಭಿಕ್ಖುನಿ ಭೋಜನಂ;

ಆಪತ್ತಿ ಅನ್ತರಾರಾಮೇ, ಠತ್ವಾ ಗಣ್ಹಾತಿ ಭಿಕ್ಖು ಚೇ.

೧೮೩೪. ಏತ್ಥನ್ತರಘರಂ ತಸ್ಸಾ, ಪವಿಟ್ಠಾಯ ಹಿ ವಾಕ್ಯತೋ;

ಭಿಕ್ಖುಸ್ಸ ಚ ಠಿತಟ್ಠಾನಂ, ನಪ್ಪಮಾಣನ್ತಿ ವಣ್ಣಿತಂ.

೧೮೩೫. ತಸ್ಮಾ ಭಿಕ್ಖುನಿಯಾ ಠತ್ವಾ, ಆರಾಮಾದೀಸು ದೇನ್ತಿಯಾ;

ವೀಥಿಯಾದೀಸು ಚೇ ಠತ್ವಾ, ನ ದೋಸೋ ಪಟಿಗಣ್ಹತೋ.

೧೮೩೬. ಯಾಮಕಾಲಿಕಸತ್ತಾಹ-ಕಾಲಿಕಂ ಯಾವಜೀವಿಕಂ;

ಆಹಾರತ್ಥಾಯ ಗಹಣೇ, ಅಜ್ಝೋಹಾರೇ ಚ ದುಕ್ಕಟಂ.

೧೮೩೭. ಆಮಿಸೇನ ಅಸಮ್ಭಿನ್ನ-ರಸಂ ಸನ್ಧಾಯ ಭಾಸಿತಂ;

ಪಾಟಿದೇಸನಿಯಾಪತ್ತಿ, ಸಮ್ಭಿನ್ನೇಕರಸೇ ಸಿಯಾ.

೧೮೩೮. ಏಕತೋಉಪಸಮ್ಪನ್ನ-ಹತ್ಥತೋ ಪಟಿಗಣ್ಹತೋ;

ಕಾಲಿಕಾನಂ ಚತುನ್ನಮ್ಪಿ, ಆಹಾರತ್ಥಾಯ ದುಕ್ಕಟಂ.

೧೮೩೯. ಞಾತಿಕಾಯಪಿ ಅಞ್ಞಾತಿ-ಸಞ್ಞಿನೋ ವಿಮತಿಸ್ಸ ವಾ;

ದುಕ್ಕಟಂ ಞಾತಿಸಞ್ಞಿಸ್ಸ, ತಥಾ ಅಞ್ಞಾತಿಕಾಯ ವಾ.

೧೮೪೦. ದಾಪೇನ್ತಿಯಾ ಅನಾಪತ್ತಿ, ದದಮಾನಾಯ ವಾ ಪನ;

ನಿಕ್ಖಿಪಿತ್ವಾನ್ತರಾರಾಮಾ-ದೀಸು ಠತ್ವಾಪಿ ದೇನ್ತಿಯಾ.

೧೮೪೧. ಗಾಮತೋ ನೀಹರಿತ್ವಾ ವಾ, ದೇತಿ ಚೇ ಬಹಿ ವಟ್ಟತಿ;

‘‘ಪಚ್ಚಯೇ ಸತಿ ಭುಞ್ಜಾ’’ತಿ, ದೇತಿ ಚೇ ಕಾಲಿಕತ್ತಯಂ.

೧೮೪೨. ಹತ್ಥತೋ ಸಾಮಣೇರೀನಂ, ಸಿಕ್ಖಮಾನಾಯ ವಾ ತಥಾ;

ಇದಂ ಏಳಕಲೋಮೇನ, ಸಮುಟ್ಠಾನಂ ಸಮಂ ಮತಂ.

ಪಠಮಪಾಟಿದೇಸನೀಯಕಥಾ.

೧೮೪೩. ಅವುತ್ತೇ ‘‘ಅಪಸಕ್ಕಾ’’ತಿ, ಏಕೇನಾಪಿ ಚ ಭಿಕ್ಖುನಾ;

ಸಚೇಜ್ಝೋಹರಣತ್ಥಾಯ, ಆಮಿಸಂ ಪಟಿಗಣ್ಹತಿ.

೧೮೪೪. ಗಹಣೇ ದುಕ್ಕಟಂ ಭೋಗೇ, ಪಾಟಿದೇಸನಿಯಂ ಸಿಯಾ;

ಏಕತೋಉಪಸಮ್ಪನ್ನಂ, ನ ವಾರೇನ್ತಸ್ಸ ದುಕ್ಕಟಂ.

೧೮೪೫. ತಥೇವಾನುಪಸಮ್ಪನ್ನಾ-ಯುಪಸಮ್ಪನ್ನಸಞ್ಞಿನೋ;

ತತ್ಥ ವೇಮತಿಕಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೧೮೪೬. ಅನಾಪತ್ತಿತ್ತನೋ ಭತ್ತಂ, ಪದಾಪೇತಿ ನ ದೇತಿ ಚೇ;

ತಥಾ ಅಞ್ಞಸ್ಸ ಭತ್ತಂ ವಾ, ನ ದಾಪೇತಿ ಪದೇತಿ ಚೇ.

೧೮೪೭. ಯಂ ನ ದಿನ್ನಂ ತಂ ದಾಪೇತಿ, ನ ದಿನ್ನಂ ಯತ್ಥ ವಾಪಿ ಚ;

ತತ್ಥ ತಮ್ಪಿ ಚ ಸಬ್ಬೇಸಂ, ಸಮಂ ದಾಪೇತಿ ಭಿಕ್ಖುನೀ.

೧೮೪೮. ವೋಸಾಸನ್ತೀ ಠಿತಾ ಸಿಕ್ಖ-ಮಾನಾ ವಾ ಸಾಮಣೇರಿಕಾ;

ಭೋಜನಾನಿ ಚ ಪಞ್ಚೇವ, ವಿನಾ, ಉಮ್ಮತ್ತಕಾದಿನೋ.

೧೮೪೯. ಕಥಿನೇನ ಸಮುಟ್ಠಾನಂ, ಸಮಾನನ್ತಿ ಪಕಾಸಿತಂ;

ಕ್ರಿಯಾಕ್ರಿಯಮಿದಂ ವುತ್ತಂ, ತಿಚಿತ್ತಞ್ಚ ತಿವೇದನಂ.

ದುತಿಯಪಾಟಿದೇಸನೀಯಕಥಾ.

೧೮೫೦. ಸೇಕ್ಖನ್ತಿ ಸಮ್ಮತೇ ಭಿಕ್ಖು, ಲದ್ಧಸಮ್ಮುತಿಕೇ ಕುಲೇ;

ಘರೂಪಚಾರೋಕ್ಕಮನಾ, ಪುಬ್ಬೇವ ಅನಿಮನ್ತಿತೋ.

೧೮೫೧. ಅಗಿಲಾನೋ ಗಹೇತ್ವಾ ಚೇ, ಪರಿಭುಞ್ಜೇಯ್ಯ ಆಮಿಸಂ;

ಗಹಣೇ ದುಕ್ಕಟಂ ಭೋಗೇ, ಪಾಟಿದೇಸನಿಯಂ ಸಿಯಾ.

೧೮೫೨. ಯಾಮಕಾಲಿಕಸತ್ತಾಹ-ಕಾಲಿಕೇ ಯಾವಜೀವಿಕೇ;

ಗಹಣೇ ಪರಿಭೋಗೇ ಚ, ಹೋತಿ ಆಪತ್ತಿ ದುಕ್ಕಟಂ.

೧೮೫೩. ಅಸೇಕ್ಖಸಮ್ಮತೇ ಸೇಕ್ಖ-ಸಮ್ಮತನ್ತಿ ಚ ಸಞ್ಞಿನೋ;

ತತ್ಥ ವೇಮತಿಕಸ್ಸಾಪಿ, ತಥೇವ ಪರಿದೀಪಿತಂ.

೧೮೫೪. ಅನಾಪತ್ತಿ ಗಿಲಾನಸ್ಸ, ಗಿಲಾನಸ್ಸಾವಸೇಸಕೇ;

ನಿಮನ್ತಿತಸ್ಸ ವಾ ಭಿಕ್ಖಾ, ಅಞ್ಞೇಸಂ ತತ್ಥ ದೀಯತಿ.

೧೮೫೫. ಘರತೋ ನೀಹರಿತ್ವಾ ವಾ, ದೇನ್ತಿ ಚೇ ಯತ್ಥ ಕತ್ಥಚಿ;

ನಿಚ್ಚಭತ್ತಾದಿಕೇ ವಾಪಿ, ತಥಾ ಉಮ್ಮತ್ತಕಾದಿನೋ.

೧೮೫೬. ಅನಾಗತೇ ಹಿ ಭಿಕ್ಖುಮ್ಹಿ, ಘರತೋ ಪಠಮಂ ಪನ;

ನೀಹರಿತ್ವಾ ಸಚೇ ದ್ವಾರೇ, ಸಮ್ಪತ್ತೇ ದೇನ್ತಿ ವಟ್ಟತಿ.

೧೮೫೭. ಭಿಕ್ಖುಂ ಪನ ಚ ದಿಸ್ವಾವ, ನೀಹರಿತ್ವಾನ ಗೇಹತೋ;

ನ ವಟ್ಟತಿ ಸಚೇ ದೇನ್ತಿ, ಸಮುಟ್ಠಾನೇಳಕೂಪಮಂ.

ತತಿಯಪಾಟಿದೇಸನೀಯಕಥಾ.

೧೮೫೮. ಗಹಟ್ಠೇನಾಗಹಟ್ಠೇನ, ಇತ್ಥಿಯಾ ಪುರಿಸೇನ ವಾ;

ಆರಾಮಂ ಉಪಚಾರಂ ವಾ, ಪವಿಸಿತ್ವಾ ಸಚೇ ಪನ.

೧೮೫೯. ‘‘ಇತ್ಥನ್ನಾಮಸ್ಸ ತೇ ಭತ್ತಂ, ಯಾಗು ವಾ ಆಹರೀಯತಿ’’;

ಏವಮಾರೋಚಿತಂ ವುತ್ತಂ, ಪಟಿಸಂವಿದಿತನ್ತಿ ಹಿ.

೧೮೬೦. ಆಹರೀಯತು ತಂ ಪಚ್ಛಾ, ಯಥಾರೋಚಿತಮೇವ ವಾ;

ತಸ್ಸ ವಾ ಪರಿವಾರಮ್ಪಿ, ಅಞ್ಞಂ ಕತ್ವಾ ಬಹುಂ ಪನ.

೧೮೬೧. ಯಾಗುಯಾ ವಿದಿತಂ ಕತ್ವಾ, ಪೂವಂ ಭತ್ತಂ ಹರನ್ತಿ ಚೇ;

ಇದಮ್ಪಿ ವಿದಿತಂ ವುತ್ತಂ, ವಟ್ಟತೀತಿ ಕುರುನ್ದಿಯಂ.

೧೮೬೨. ಕುಲಾನಿ ಪನ ಅಞ್ಞಾನಿ, ದೇಯ್ಯಧಮ್ಮಂ ಪನತ್ತನೋ;

ಹರನ್ತಿ ತೇನ ಸದ್ಧಿಂ ಚೇ, ಸಬ್ಬಂ ವಟ್ಟತಿ ತಮ್ಪಿ ಚ.

೧೮೬೩. ಅನಾರೋಚಿತಮೇವಂ ಯಂ, ಯಂ ಆರಾಮಮನಾಭತಂ;

ತಂ ಅಸಂವಿದಿತಂ ನಾಮ, ಸಹಧಮ್ಮಿಕಞಾಪಿತಂ.

೧೮೬೪. ಯಂ ಅಸಂವಿದಿತಂ ಕತ್ವಾ, ಆಭತಂ ಪನ ತಂ ಬಹಿ;

ಆರಾಮಂ ಪನ ಪೇಸೇತ್ವಾ, ಕಾರಾಪೇತ್ವಾ ತಮಾಹರೇ.

೧೮೬೫. ಗನ್ತ್ವಾ ವಾ ಅನ್ತರಾಮಗ್ಗೇ, ಗಹೇತಬ್ಬಂ ತು ಭಿಕ್ಖುನಾ;

ಸಚೇ ಏವಮಕತ್ವಾ ತಂ, ಆರಾಮೇ ಉಪಚಾರತೋ.

೧೮೬೬. ಗಹೇತ್ವಾಜ್ಝೋಹರನ್ತಸ್ಸ, ಗಹಣೇ ದುಕ್ಕಟಂ ಸಿಯಾ;

ಅಜ್ಝೋಹಾರಪಯೋಗೇಸು, ಪಾಟಿದೇಸನಿಯಂ ಮತಂ.

೧೮೬೭. ಪಟಿಸಂವಿದಿತೇಯೇವ, ಅಸಂವಿದಿತಸಞ್ಞಿನೋ;

ತತ್ಥ ವೇಮತಿಕಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೧೮೬೮. ಪಟಿಸಂವಿದಿತೇ ತಸ್ಸ, ಗಿಲಾನಸ್ಸಾವಸೇಸಕೇ;

ಬಹಾರಾಮೇ ಗಹೇತ್ವಾ ವಾ, ಅನ್ತೋಯೇವಸ್ಸ ಭುಞ್ಜತೋ.

೧೮೬೯. ತತ್ಥಜಾತಫಲಾದೀನಿ, ಅನಾಪತ್ತೇವ ಖಾದತೋ;

ಸಮುಟ್ಠಾನಾದಯೋ ಸಬ್ಬೇ, ಕಥಿನೇನ ಸಮಾ ಮತಾ.

ಚತುತ್ಥಪಾಟಿದೇಸನೀಯಕಥಾ.

ಇತಿ ವಿನಯವಿನಿಚ್ಛಯೇ ಪಾಟಿದೇಸನೀಯಕಥಾ ನಿಟ್ಠಿತಾ.