ಪಾಚಿತ್ತಿಯಕಥಾ

೮೮೯. ಸಮ್ಪಜಾನಮುಸಾವಾದೇ, ಪಾಚಿತ್ತಿಯಮುದೀರಿತಂ;

ದವಾ ರವಾ ಭಣನ್ತಸ್ಸ, ನ ದೋಸುಮ್ಮತ್ತಕಾದಿನೋ.

೮೯೦. ಅಞ್ಞತ್ಥಾಪತ್ತಿಯೋ ಪಞ್ಚ, ಮುಸಾವಾದಸ್ಸ ಕಾರಣಾ;

ಸಮುಟ್ಠಾನಾದಯೋ ಸಬ್ಬೇ, ಅದಿನ್ನಾದಾನತುಲ್ಯಕಾ.

ಸಮ್ಪಜಾನಮುಸಾವಾದಕಥಾ.

೮೯೧. ಜಾತಿಆದೀಸು ವುತ್ತೇಸು, ದಸಸ್ವಕ್ಕೋಸವತ್ಥುಸು;

ಭೂತೇನ ವಾ ಅಭೂತೇನ, ಯೇನ ಕೇನಚಿ ವತ್ಥುನಾ.

೮೯೨. ಯಾಯ ಕಾಯಚಿ ಭಾಸಾಯ, ಹತ್ಥಮುದ್ದಾಯ ವಾ ಪನ;

ಪಾರಾಜಿಕಮನಾಪನ್ನಂ, ಭಿಕ್ಖುಮಾಪನ್ನಮೇವ ವಾ.

೮೯೩. ಅಞ್ಞತ್ರಞ್ಞಾಪದೇಸೇನ, ಓಮಸನ್ತಸ್ಸ ಭಿಕ್ಖುನೋ;

ತತ್ಥ ಪಾಚಿತ್ತಿಯಾಪತ್ತಿ, ಸಮ್ಬುದ್ಧೇನ ಪಕಾಸಿತಾ.

೮೯೪. ತೇಹೇವಞ್ಞಾಪದೇಸೇನ, ಪಾಳಿಮುತ್ತಪದೇಹಿಪಿ;

ಸಬ್ಬತ್ಥಾನುಪಸಮ್ಪನ್ನಂ, ಅಕ್ಕೋಸನ್ತಸ್ಸ ದುಕ್ಕಟಂ.

೮೯೫. ಅನಕ್ಕೋಸಿತುಕಾಮಸ್ಸ, ಕೇವಲಂ ದವಕಮ್ಯತಾ;

ವದತೋ ಪನ ಸಬ್ಬತ್ಥ, ದುಬ್ಭಾಸಿತಮುದೀರಿತಂ.

೮೯೬. ಪವಿಟ್ಠಾನುಪಸಮ್ಪನ್ನ-ಟ್ಠಾನೇ ಇಧ ಚ ಭಿಕ್ಖುನೀ;

ಅನಾಪತ್ತಿ ಪುರಕ್ಖತ್ವಾ, ಅತ್ಥಧಮ್ಮಾನುಸಾಸನಿಂ.

೮೯೭. ವದತೋ ಪನ ಭಿಕ್ಖುಸ್ಸ, ಸಮುಟ್ಠಾನಾದಯೋ ನಯಾ;

ಅನನ್ತರಸಮಾ ವುತ್ತಾ, ದುಕ್ಖಾ ಹೋತೇತ್ಥ ವೇದನಾ.

ಓಮಸವಾದಕಥಾ.

೮೯೮. ಆಪತ್ತಿ ಭಿಕ್ಖುಪೇಸುಞ್ಞೇ, ದುವಿಧಾಕಾರತೋ ಸಿಯಾ;

ಅತ್ತನೋ ಪಿಯಕಾಮಸ್ಸ, ಪರಭೇದತ್ಥಿನೋಪಿ ವಾ.

೮೯೯. ಅಕ್ಕೋಸನ್ತಸ್ಸ ಪರಿಯಾಯ-ಪಾಳಿಮುತ್ತನಯೇಹಿ ಚ;

ವಚನಸ್ಸುಪಸಂಹಾರೇ, ಹೋತಿ ಆಪತ್ತಿ ದುಕ್ಕಟಂ.

೯೦೦. ತಥಾ ಅನುಪಸಮ್ಪನ್ನ-ಅಕ್ಕೋಸಂ ಹರತೋಪಿ ಚ;

ಠಿತಾ ಅನುಪಸಮ್ಪನ್ನ-ಟ್ಠಾನೇ ಇಧ ಚ ಭಿಕ್ಖುನೀ.

೯೦೧. ನ ಚೇವ ಪಿಯಕಾಮಸ್ಸ, ನ ಚ ಭೇದತ್ಥಿನೋಪಿ ವಾ;

ಪಾಪಾನಂ ಗರಹತ್ಥಾಯ, ವದನ್ತಸ್ಸ ಚ ಭಿಕ್ಖುನೋ.

೯೦೨. ತಥಾ ಉಮ್ಮತ್ತಕಾದೀನಂ, ಅನಾಪತ್ತೀತಿ ದೀಪಿತಾ;

ಸಮುಟ್ಠಾನಾದಯೋ ಸಬ್ಬೇ, ಅದಿನ್ನಾದಾನಸಾದಿಸಾ.

ಪೇಸುಞ್ಞಕಥಾ.

೯೦೩. ಠಪೇತ್ವಾ ಭಿಕ್ಖುನಿಂ ಭಿಕ್ಖುಂ, ಅಞ್ಞೇನ ಪಿಟಕತ್ತಯಂ;

ಧಮ್ಮಂ ಸಹ ಭಣನ್ತಸ್ಸ, ತಸ್ಸ ಪಾಚಿತ್ತಿಯಂ ಸಿಯಾ.

೯೦೪. ರಾಜೋವಾದಾದಯೋ ವುತ್ತಾ, ಮಹಾಪಚ್ಚರಿಯಾದಿಸು;

ಅನಾರುಳ್ಹೇಸು ಸಙ್ಗೀತಿಂ, ಆಪತ್ತಿಜನಕಾತಿ ಹಿ.

೯೦೫. ದುಕ್ಕಟಂ ಹೋತಿ ಭಿಕ್ಖುಸ್ಮಿಂ, ತಥಾ ಭಿಕ್ಖುನಿಯಾಪಿ ಚ;

ಭಿಕ್ಖುಸ್ಸಾನುಪಸಮ್ಪನ್ನ-ಸಞ್ಞಿನೋ ವಿಮತಿಸ್ಸ ವಾ.

೯೦೬. ಏಕತೋ ಉದ್ದಿಸಾಪೇತಿ, ಸಜ್ಝಾಯಂ ವಾ ಕರೋತಿ ಯೋ;

ಭಣನ್ತಂ ಪಗುಣಂ ಗನ್ಥಂ, ಓಪಾತೇತಿ ಚ ಯೋ ಪನ.

೯೦೭. ತಸ್ಸ ಚಾನುಪಸಮ್ಪನ್ನ-ಸನ್ತಿಕೇ ಗಣ್ಹತೋಪಿ ಚ;

ಉದ್ದೇಸಂ ತು ಅನಾಪತ್ತಿ, ಭಣನೇ ತೇನ ಏಕತೋ.

೯೦೮. ವಾಚತೋ ಚ ಸಮುಟ್ಠಾತಿ, ವಾಚಾಚಿತ್ತದ್ವಯಾಪಿ ಚ;

ಸಮುಟ್ಠಾನಮಿದಂ ವುತ್ತಂ, ಪದಸೋಧಮ್ಮಸಞ್ಞಿತಂ.

ಪದಸೋಧಮ್ಮಕಥಾ.

೯೦೯. ಸಬ್ಬಚ್ಛನ್ನಪರಿಚ್ಛನ್ನೇ, ನಿಪಜ್ಜೇಯ್ಯ ಸಚೇ ಪನ;

ಯೇಭುಯ್ಯೇನ ಪರಿಚ್ಛನ್ನೇ, ಛನ್ನೇ ಸೇನಾಸನೇಪಿ ವಾ.

೯೧೦. ತಿಸ್ಸನ್ನಂ ಪನ ರತ್ತೀನಂ, ಉದ್ಧಂ ಯೋ ಪನ ರತ್ತಿಯಂ;

ಠಪೇತ್ವಾ ಭಿಕ್ಖುಂ ಅಞ್ಞೇನ, ತಸ್ಸ ಪಾಚಿತ್ತಿಯಂ ಸಿಯಾ.

೯೧೧. ವತ್ಥುಂ ಯಂ ಪನ ನಿದ್ದಿಟ್ಠಂ, ಮೇಥುನಸ್ಸ ಪಹೋನಕಂ;

ಆಪತ್ಯನ್ತಮಸೋ ತೇನ, ತಿರಚ್ಛಾನಗತೇನಪಿ.

೯೧೨. ನಿಪನ್ನೇ ಉಪಸಮ್ಪನ್ನೇ, ಇತರೋ ಚೇ ನಿಪಜ್ಜತಿ;

ಇತರಸ್ಮಿಂ ನಿಪನ್ನೇ ವಾ, ಸಚೇ ಭಿಕ್ಖು ನಿಪಜ್ಜತಿ.

೯೧೩. ಉಭಿನ್ನಂ ಉಟ್ಠಹಿತ್ವಾ ವಾ, ನಿಪಜ್ಜನಪಯೋಗತೋ;

ಆಪತ್ತಾನುಪಸಮ್ಪನ್ನ-ಗಣನಾಯಪಿ ವಾ ಸಿಯಾ.

೯೧೪. ಸಚೇ ಪಿಧಾಯ ವಾ ಗಬ್ಭಂ, ನಿಪಜ್ಜತಿಪಿಧಾಯ ವಾ;

ಆಪತ್ತತ್ಥಙ್ಗತೇ ಸೂರಿಯೇ, ಚತುತ್ಥದಿವಸೇ ಸಿಯಾ.

೯೧೫. ದಿಯಡ್ಢಹತ್ಥುಬ್ಬೇಧೇನ, ಪಾಕಾರಚಯನಾದಿನಾ;

ಪರಿಕ್ಖಿತ್ತಮ್ಪಿ ತಂ ಸಬ್ಬಂ, ಪರಿಕ್ಖಿತ್ತನ್ತಿ ವುಚ್ಚತಿ.

೯೧೬. ಭಿಕ್ಖುಸ್ಸನ್ತಮಸೋ ದುಸ್ಸ-ಕುಟಿಯಂ ವಸತೋಪಿ ಚ;

ಸಹಸೇಯ್ಯಾಯ ಆಪತ್ತಿ, ಹೋತೀತಿ ಪರಿದೀಪಿತೋ.

೯೧೭. ಸಬ್ಬಚ್ಛನ್ನಪರಿಚ್ಛನ್ನ-ಯೇಭುಯ್ಯಾದಿಪ್ಪಭೇದತೋ;

ಸತ್ತ ಪಾಚಿತ್ತಿಯಾನೇತ್ಥ, ದಟ್ಠಬ್ಬಾನಿ ಸುಬುದ್ಧಿನಾ.

೯೧೮. ಅಡ್ಢಚ್ಛನ್ನಪರಿಚ್ಛನ್ನೇ, ದುಕ್ಕಟಂ ಪರಿದೀಪಿತಂ;

ಸಬ್ಬಚೂಳಪರಿಚ್ಛನ್ನ-ಛನ್ನಾದೀಹಿಪಿ ಪಞ್ಚಧಾ.

೯೧೯. ಅನಾಪತ್ತಿ ದಿರತ್ತಂ ವಾ, ತಿರತ್ತಂ ವಸತೋ ಸಹ;

ಅರುಣಸ್ಸ ಪುರೇಯೇವ, ತತಿಯಾಯ ಚ ರತ್ತಿಯಾ.

೯೨೦. ನಿಕ್ಖಮಿತ್ವಾ ವಸನ್ತಸ್ಸ, ಪುನ ಸದ್ಧಿಞ್ಚ ಭಿಕ್ಖುನೋ;

ತಥಾ ಸಬ್ಬಪರಿಚ್ಛನ್ನ-ಸಬ್ಬಚ್ಛನ್ನಾದಿಕೇಪಿ ಚ.

೯೨೧. ಏವಂ ಅನುಪಸಮ್ಪನ್ನೇ, ನಿಪನ್ನೇಪಿ ನಿಸೀದತೋ;

ಸೇಸಾ ಏಳಕಲೋಮೇನ, ಸಮುಟ್ಠಾನಾದಯೋ ಸಮಾ.

ಸಹಸೇಯ್ಯಕಥಾ.

೯೨೨. ಸಚೇ ತದಹುಜಾತಾಯ, ಅಪಿ ಯೋ ಮಾನುಸಿತ್ಥಿಯಾ;

ಸಹಸೇಯ್ಯಂ ಪಕಪ್ಪೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾ.

೯೨೩. ದಿಸ್ಸಮಾನಕರೂಪಾಯ, ಯಕ್ಖಿಯಾ ಪೇತಿಯಾ ಸಹ;

ರತ್ತಿಯಂ ಯೋ ನಿಪಜ್ಜೇಯ್ಯ, ದೇವಿಯಾ ಪಣ್ಡಕೇನ ವಾ.

೯೨೪. ಮೇಥುನವತ್ಥುಭೂತಾಯ, ತಿರಚ್ಛಾನಗತಿತ್ಥಿಯಾ;

ವತ್ಥೂನಂ ಗಣನಾಯಸ್ಸ, ಹೋತಿ ಆಪತ್ತಿ ದುಕ್ಕಟಂ.

೯೨೫. ಇಧೇಕದಿವಸೇನೇವ, ಆಪತ್ತಿ ಪರಿದೀಪಿತಾ;

ಸೇಸೋ ಅನನ್ತರೇ ವುತ್ತ-ಸದಿಸೋವ ವಿನಿಚ್ಛಯೋ.

ದುತಿಯಸಹಸೇಯ್ಯಕಥಾ.

೯೨೬. ಉದ್ಧಂ ಛಪ್ಪಞ್ಚವಾಚಾಹಿ, ವಿಞ್ಞುಂ ಪುರಿಸವಿಗ್ಗಹಂ;

ವಿನಾ ಧಮ್ಮಂ ಭಣನ್ತಸ್ಸ, ಹೋತಿ ಪಾಚಿತ್ತಿ ಇತ್ಥಿಯಾ.

೯೨೭. ಗಾಥಾಪಾದೋ ಪನೇಕೋವ, ಏಕವಾಚಾತಿ ಸಞ್ಞಿತೋ;

ಪದಸೋಧಮ್ಮಂ ನಿದ್ದಿಟ್ಠಂ, ಧಮ್ಮಮಟ್ಠಕಥಮ್ಪಿ ವಾ.

೯೨೮. ಛನ್ನಂ ಉಪರಿ ವಾಚಾನಂ, ಪದಾದೀನಂ ವಸಾ ಪನ;

ದೇಸೇನ್ತಸ್ಸ ಸಿಯಾಪತ್ತಿ, ಪದಾದಿಗಣನಾಯ ಚ.

೯೨೯. ನಿಮ್ಮಿನಿತ್ವಾ ಠಿತೇನಾಪಿ, ಸದ್ಧಿಂ ಪುರಿಸವಿಗ್ಗಹಂ;

ಯಕ್ಖೇನಪಿ ಚ ಪೇತೇನ, ತಿರಚ್ಛಾನಗತೇನಪಿ.

೯೩೦. ಠಿತಸ್ಸ ಮಾತುಗಾಮಸ್ಸ, ಧಮ್ಮಂ ಯೋ ಪನ ಭಾಸತಿ;

ಛನ್ನಂ ಉಪರಿ ವಾಚಾನಂ, ತಸ್ಸ ಪಾಚಿತ್ತಿಯಂ ಸಿಯಾ.

೯೩೧. ಪುರಿಸೇ ಇತ್ಥಿಸಞ್ಞಿಸ್ಸ, ವಿಮತಿಸ್ಸ ಚ ಪಣ್ಡಕೇ;

ಉತ್ತರಿ ಛಹಿ ವಾಚಾಹಿ, ವದತೋ ಹೋತಿ ದುಕ್ಕಟಂ.

೯೩೨. ಇತ್ಥಿರೂಪಂ ಗಹೇತ್ವಾನ, ಠಿತಾನಂ ಭಾಸತೋಪಿ ಚ;

ದುಕ್ಕಟಂ ಯಕ್ಖಿಪೇತೀನಂ, ತಿರಚ್ಛಾನಗತಿತ್ಥಿಯಾ.

೯೩೩. ಪುರಿಸೇ ಸತಿ ವಿಞ್ಞುಸ್ಮಿಂ, ಸಯಂ ಉಟ್ಠಾಯ ವಾ ಪುನ;

ದೇಸೇನ್ತಸ್ಸ ನಿಸೀದಿತ್ವಾ, ಮಾತುಗಾಮಸ್ಸ ವಾ ತಥಾ.

೯೩೪. ಅಞ್ಞಿಸ್ಸಾ ಪುನ ಅಞ್ಞಿಸ್ಸಾ, ಇತ್ಥಿಯಾ ಭಣತೋಪಿ ಚ;

ಛಹಿ ಪಞ್ಚಹಿ ವಾಚಾಹಿ, ಅನಾಪತ್ತಿ ಪಕಾಸಿತಾ.

೯೩೫. ಪದಸೋಧಮ್ಮತುಲ್ಯಾವ, ಸಮುಟ್ಠಾನಾದಯೋ ಮತಾ;

ಅಯಮೇವ ವಿಸೇಸೋತಿ, ಕ್ರಿಯಾಕ್ರಿಯಮಿದಂ ಪನ.

ಧಮ್ಮದೇಸನಾಕಥಾ.

೯೩೬. ಮಹಗ್ಗತಂ ಪಣೀತಂ ವಾ, ಆರೋಚೇನ್ತಸ್ಸ ಭಿಕ್ಖುನೋ;

ಠಪೇತ್ವಾ ಭಿಕ್ಖುನಿಂ ಭಿಕ್ಖುಂ, ಭೂತೇ ಪಾಚಿತ್ತಿಯಂ ಸಿಯಾ.

೯೩೭. ನೋ ಚೇ ಜಾನಾತಿ ಸೋ ವುತ್ತಂ, ಆರೋಚೇನ್ತಸ್ಸ ಭಿಕ್ಖುನೋ;

ಪರಿಯಾಯವಚನೇ ಚಸ್ಸ, ಹೋತಿ ಆಪತ್ತಿ ದುಕ್ಕಟಂ.

೯೩೮. ಅನಾಪತ್ತಿ ತಥಾರೂಪೇ, ಕಾರಣೇ ಸತಿ ಭಾಸತೋ;

ಸಬ್ಬಸ್ಸಪಿ ಚ ಸೀಲಾದಿಂ, ವದತೋ ಆದಿಕಮ್ಮಿನೋ.

೯೩೯. ಉಮ್ಮತ್ತಕಪದಂ ಏತ್ಥ, ನ ವುತ್ತಂ ತದಸಮ್ಭವಾ;

ಭೂತಾರೋಚನಕಂ ನಾಮ, ಸಮುಟ್ಠಾನಮಿದಂ ಮತಂ.

೯೪೦. ಕಾಯತೋ ವಾಚತೋ ಕಾಯ-ವಾಚತೋ ಚ ತಿಧಾ ಸಿಯಾ;

ಕುಸಲಾಬ್ಯಾಕತೇಹೇವ, ದ್ವಿಚಿತ್ತಞ್ಚ ದ್ವಿವೇದನಂ.

ಭೂತಾರೋಚನಕಥಾ.

೯೪೧. ಆಪತ್ತಿಂ ಪನ ದುಟ್ಠುಲ್ಲಂ, ಆರೋಚೇನ್ತಸ್ಸ ಭಿಕ್ಖುನೋ;

ಆಪತ್ತಾನುಪಸಮ್ಪನ್ನೇ, ಠಪೇತ್ವಾ ಭಿಕ್ಖುಸಮ್ಮುತಿಂ.

೯೪೨. ಸಙ್ಘಾದಿಸೇಸಮಾಪನ್ನೋ, ಮೋಚೇತ್ವಾ ಅಸುಚಿಂ ಅಯಂ;

ಘಟೇತ್ವಾ ವತ್ಥುನಾಪತ್ತಿಂ, ವದನ್ತಸ್ಸೇವ ವಜ್ಜತಾ.

೯೪೩. ಇಧ ಸಙ್ಘಾದಿಸೇಸಾವ, ದುಟ್ಠುಲ್ಲಾಪತ್ತಿಯೋ ಮತಾ;

ತಸ್ಮಾ ಸುದ್ಧಸ್ಸ ದುಟ್ಠುಲ್ಲಂ, ವದಂ ಪಾಚಿತ್ತಿಯಂ ಫುಸೇ.

೯೪೪. ಅದುಟ್ಠುಲ್ಲಾಯ ದುಟ್ಠುಲ್ಲ-ಸಞ್ಞಿನೋ ವಿಮತಿಸ್ಸ ವಾ;

ಆಪತ್ತಿಯೋಪಿ ವಾ ಸೇಸಾ, ಆರೋಚೇನ್ತಸ್ಸ ದುಕ್ಕಟಂ.

೯೪೫. ತಥಾ ಅನುಪಸಮ್ಪನ್ನೇ, ದುಟ್ಠುಲ್ಲಂ ಪಞ್ಚಧಾ ಮತಂ;

ಅಜ್ಝಾಚಾರಮದುಟ್ಠುಲ್ಲಂ, ಆರೋಚೇತುಂ ನ ವಟ್ಟತಿ.

೯೪೬. ವತ್ಥುಂ ವಾ ಪನ ಆಪತ್ತಿಂ, ಆರೋಚೇನ್ತಸ್ಸ ಕೇವಲಂ;

ಅನಾಪತ್ತೀತಿ ಞಾತಬ್ಬಂ, ಭಿಕ್ಖುಸಮ್ಮುತಿಯಾ ತಥಾ.

೯೪೭. ಏವಮುಮ್ಮತ್ತಕಾದೀನಂ, ಸಮುಟ್ಠಾನಾದಯೋ ನಯಾ;

ಅದಿನ್ನಾದಾನತುಲ್ಯಾವ, ವೇದನಾ ದುಕ್ಖವೇದನಾ.

ದುಟ್ಠುಲ್ಲಾರೋಚನಕಥಾ.

೯೪೮. ಖಣೇಯ್ಯ ವಾ ಖಣಾಪೇಯ್ಯ, ಪಥವಿಂ ಯೋ ಅಕಪ್ಪಿಯಂ;

ಭೇದಾಪೇಯ್ಯ ಚ ಭಿನ್ದೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾ.

೯೪೯. ಸಯಮೇವ ಖಣನ್ತಸ್ಸ, ಪಥವಿಂ ಪನ ಭಿಕ್ಖುನೋ;

ಪಹಾರಸ್ಮಿಂ ಪಹಾರಸ್ಮಿಂ, ಪಾಚಿತ್ತಿಯಮುದೀರಿತಂ.

೯೫೦. ಆಣಾಪೇನ್ತಸ್ಸ ಏಕಾವ, ದಿವಸಂ ಖಣತೋಪಿ ಚ;

ಪುನಪ್ಪುನಾಣಾಪೇನ್ತಸ್ಸ, ವಾಚತೋ ವಾಚತೋ ಸಿಯಾ.

೯೫೧. ‘‘ಖಣ ಪೋಕ್ಖರಣಿಂ ವಾಪಿಂ, ಆವಾಟಂ ಖಣ ಕೂಪಕಂ’’;

ಇಚ್ಚೇವಂ ತು ವದನ್ತಸ್ಸ, ಕೋಚಿ ದೋಸೋ ನ ವಿಜ್ಜತಿ.

೯೫೨. ‘‘ಇಮಂ ಖಣ ಚ ಓಕಾಸಂ, ಇಧ ಪೋಕ್ಖರಣಿಂ ಖಣ;

ಇಮಸ್ಮಿಂ ಖಣ ಓಕಾಸೇ’’, ವತ್ತುಮೇವಂ ನ ವಟ್ಟತಿ.

೯೫೩. ‘‘ಕನ್ದಂ ಖಣ ಕುರುನ್ದಂ ವಾ, ಥೂಣಂ ಖಣ ಚ ಖಾಣುಕಂ;

ಮೂಲಂ ಖಣ ಚ ತಾಲಂ ವಾ’’, ಏವಂ ವದತಿ ವಟ್ಟತಿ.

೯೫೪. ‘‘ಇಮಂ ಮೂಲಂ ಇಮಂ ವಲ್ಲಿಂ, ಇಮಂ ತಾಲಂ ಇಮಂ ನಳಂ;

ಖಣಾ’’ತಿ ನಿಯಮೇತ್ವಾನ, ವತ್ತುಂ ಪನ ನ ವಟ್ಟತಿ.

೯೫೫. ಉಸ್ಸಿಞ್ಚಿತುಂ ಸಚೇ ಸಕ್ಕಾ, ಘಟೇಹಿ ತನುಕದ್ದಮೋ;

ಭಿಕ್ಖುನಾ ಅಪನೇತಬ್ಬೋ, ಬಹಲಂ ನ ಚ ವಟ್ಟತಿ.

೯೫೬. ಭಿಜ್ಜಿತ್ವಾ ನದಿಯಾದೀನಂ, ಪತಿತಂ ತೋಯಸನ್ತಿಕೇ;

ತಟಂ ವಟ್ಠಂ ವಿಕೋಪೇತುಂ, ಚಾತುಮಾಸಮ್ಪಿ ವಟ್ಟತಿ.

೯೫೭. ಸಚೇ ಪತತಿ ತೋಯಸ್ಮಿಂ, ದೇವೇ ವುಟ್ಠೇಪಿ ವಟ್ಟತಿ;

ಚಾತುಮಾಸಮತಿಕ್ಕನ್ತೇ, ತೋಯೇ ದೇವೋ ಹಿ ವಸ್ಸತಿ.

೯೫೮. ಪಾಸಾಣಪಿಟ್ಠಿಯಂ ಸೋಣ್ಡಿಂ, ಖಣನ್ತಿ ಯದಿ ತತ್ಥ ತು;

ರಜಂ ಪತತಿ ಚೇ ಪುಬ್ಬಂ, ಪಚ್ಛಾ ದೇವೋಭಿವಸ್ಸತಿ.