ಅಧಿಕರಣಪಚ್ಚಯಕಥಾವಣ್ಣನಾ

೨೮೫. ವಿವಾದಾಧಿಕರಣಮ್ಹಾತಿ ‘‘ಅಧಮ್ಮಂ ‘ಧಮ್ಮೋ’ತಿ ದೀಪೇತೀ’’ತಿಆದಿನಯಪ್ಪವತ್ತಾ ಅಟ್ಠಾರಸಭೇದಕರವತ್ಥುನಿಸ್ಸಿತಾ ವಿವಾದಾಧಿಕರಣಮ್ಹಾ.

೨೮೬. ಉಪಸಮ್ಪನ್ನಂ ಓಮಸತೋ ಭಿಕ್ಖುಸ್ಸ ಪಾಚಿತ್ತಿ ಹೋತೀತಿ ಯೋಜನಾ.

೨೮೭. ಅನುವಾದಾಧಿಕರಣಪಚ್ಚಯಾತಿ ಚೋದನಾಪರನಾಮಧೇಯ್ಯಂ ಅನುವಾದಾಧಿಕರಣಮೇವ ಪಚ್ಚಯೋ, ತಸ್ಮಾ, ಅನುವಾದನಾಧಿಕರಣಹೇತೂತಿ ಅತ್ಥೋ.

೨೮೯. ‘‘ತಥಾ’’ತಿ ಇಮಿನಾ ಅಮೂಲಕತ್ತಂ ಅತಿದಿಸತಿ.

೨೯೦. ಆಪತ್ತಿಪಚ್ಚಯಾತಿ ಆಪತ್ತಾಧಿಕರಣಪಚ್ಚಯಾ.

೨೯೩. ಕಿಚ್ಚಾಧಿಕರಣಪಚ್ಚಯಾತಿ ಅಪಲೋಕನಾದಿಚತುಬ್ಬಿಧಕಮ್ಮಸಙ್ಖಾತಕಿಚ್ಚಾಧಿಕರಣಹೇತು.

೨೯೪. ಅಚ್ಚಜನ್ತೀವಾತಿ ಅತ್ತನೋ ಲದ್ಧಿಂ ಅಪರಿಚ್ಚಜನ್ತೀ ಏವ.

೨೯೭. ಪಾಪಿಕಾಯ ದಿಟ್ಠಿಯಾ ಪರಿಚ್ಚಜನತ್ಥಾಯ ಕತಾಯ ಯಾವತತಿಯಕಂ ಸಮನುಭಾಸನಾಯ ತಂ ದಿಟ್ಠಿಂ ಅಚ್ಚಜನ್ತಿಯಾ ತಸ್ಸಾ ಭಿಕ್ಖುನಿಯಾ, ತಸ್ಸ ಭಿಕ್ಖುಸ್ಸ ಚ ಅಚ್ಚಜತೋ ಪಾಚಿತ್ತಿ ಹೋತೀತಿ ಯೋಜನಾ.

ಇತಿ ಉತ್ತರೇ ಲೀನತ್ಥಪಕಾಸನಿಯಾ

ಅಧಿಕರಣಪಚ್ಚಯಕಥಾವಣ್ಣನಾ ನಿಟ್ಠಿತಾ.