ಮಹಾವಿಭಙ್ಗಸಙ್ಗಹಕಥಾವಣ್ಣನಾ

೪. ಏವಂ ಸೋತುಜನಂ ಸವನೇ ನಿಯೋಜೇತ್ವಾ ಯಥಾಪಟಿಞ್ಞಾತಂ ಉತ್ತರವಿನಿಚ್ಛಯಂ ದಸ್ಸೇತುಮಾಹ ‘‘ಮೇಥುನ’’ನ್ತಿಆದಿ. ‘‘ಕತಿ ಆಪತ್ತಿಯೋ’’ತಿ ಅಯಂ ದಿಟ್ಠಸಂಸನ್ದನಾ, ಅದಿಟ್ಠಜೋತನಾ, ವಿಮತಿಚ್ಛೇದನಾ, ಅನುಮತಿ, ಕಥೇತುಕಮ್ಯತಾಪುಚ್ಛಾತಿ ಪಞ್ಚನ್ನಂ ಪುಚ್ಛಾನಂ ಕಥೇತುಕಮ್ಯತಾಪುಚ್ಛಾ. ತಿಸ್ಸೋ ಆಪತ್ತಿಯೋ ಫುಸೇತಿ ತಸ್ಸಾ ಸಙ್ಖೇಪತೋ ವಿಸ್ಸಜ್ಜನಂ.

೫. ಏವಂ ಗಣನಾವಸೇನ ದಸ್ಸಿತಾನಂ ‘‘ಭವೇ’’ತಿಆದಿ ಸರೂಪತೋ ದಸ್ಸನಂ. ಖೇತ್ತೇತಿ ತಿಣ್ಣಂ ಮಗ್ಗಾನಂ ಅಞ್ಞತರಸ್ಮಿಂ ಅಲ್ಲೋಕಾಸೇ ತಿಲಬೀಜಮತ್ತೇಪಿ ಪದೇಸೇ. ಮೇಥುನಂ ಪಟಿಸೇವನ್ತಸ್ಸ ಪಾರಾಜಿಕಂ ಭವೇತಿ ಸಮ್ಬನ್ಧೋ. ‘‘ಥುಲ್ಲಚ್ಚಯ’’ನ್ತಿ ವುತ್ತನ್ತಿ ಯೋಜನಾ. ‘‘ಯೇಭುಯ್ಯಕ್ಖಾಯಿತೇ’’ತಿ ಇದಂ ನಿದಸ್ಸನಮತ್ತಂ, ಉಪಡ್ಢಕ್ಖಾಯಿತೇಪಿ ಥುಲ್ಲಚ್ಚಯಸ್ಸ ಹೇಟ್ಠಾ ವುತ್ತತ್ತಾ. ವಟ್ಟಕತೇ ಮುಖೇ ಅಫುಸನ್ತಂ ಅಙ್ಗಜಾತಂ ಪವೇಸೇನ್ತಸ್ಸ ದುಕ್ಕಟಂ ವುತ್ತನ್ತಿ ಯೋಜನಾ.

೬. ‘‘ಅದಿನ್ನಂ ಆದಿಯನ್ತೋ’’ತಿಆದಯೋಪಿ ವುತ್ತನಯಾಯೇವ.

೭. ಪಞ್ಚಮಾಸಗ್ಘನೇ ವಾಪೀತಿ ಪೋರಾಣಕಸ್ಸ ನೀಲಕಹಾಪಣಸ್ಸ ಚತುತ್ಥಭಾಗಸಙ್ಖಾತೇ ಪಞ್ಚಮಾಸೇ, ತದಗ್ಘನಕೇ ವಾ. ಅಧಿಕೇ ವಾತಿ ಅತಿರೇಕಪಞ್ಚಮಾಸಕೇ ವಾ ತದಗ್ಘನಕೇ ವಾ. ಅದಿನ್ನೇ ಪಞ್ಚವೀಸತಿಯಾ ಅವಹಾರಾನಂ ಅಞ್ಞತರೇನ ಅವಹಟೇ ಪರಾಜಯೋ ಹೋತೀತಿ ಅತ್ಥೋ. ಮಾಸೇ ವಾ ಊನಮಾಸೇ ವಾ ತದಗ್ಘನಕೇ ವಾ ದುಕ್ಕಟಂ. ತತೋ ಮಜ್ಝೇತಿ ಪಞ್ಚಮಾಸಕತೋ ಮಜ್ಝೇ. ಪಞ್ಚ ಮಾಸಾ ಸಮಾಹಟಾ, ಪಞ್ಚನ್ನಂ ಮಾಸಾನಂ ಸಮಾಹಾರೋತಿ ವಾ ಪಞ್ಚಮಾಸಂ, ಪಞ್ಚಮಾಸಂ ಅಗ್ಘತೀತಿ ಪಞ್ಚಮಾಸಗ್ಘನಂ, ಪಞ್ಚಮಾಸಞ್ಚ ಪಞ್ಚಮಾಸಗ್ಘನಞ್ಚ ಪಞ್ಚಮಾಸಗ್ಘನಂ, ಏಕದೇಸಸರೂಪೇಕಸೇಸೋಯಂ, ತಸ್ಮಿಂ. ಮಾಸೇ ವಾತಿ ಏತ್ಥಾಪಿ ಮಾಸೋ ಚ ಮಾಸಗ್ಘನಕಞ್ಚ ಮಾಸಮಾಸಗ್ಘನಕೋತಿ ವತ್ತಬ್ಬೇ ‘‘ಮಾಸೇ’’ತಿ ಏಕದೇಸಸರೂಪೇಕಸೇಸೋ, ಉತ್ತರಪದಲೋಪೋ ಚ ದಟ್ಠಬ್ಬೋ.

‘‘ಪಞ್ಚಮಾಸಗ್ಘನೇ’’ತಿ ಸಾಮಞ್ಞೇನ ವುತ್ತೇಪಿ ಪೋರಾಣಕಸ್ಸ ನೀಲಕಹಾಪಣಸ್ಸೇವ ಚತುತ್ಥಭಾಗವಸೇನ ಪಞ್ಚಮಾಸನಿಯಮೋ ಕಾತಬ್ಬೋ. ತಥಾ ಹಿ ಭಗವತಾ ದುತಿಯಪಾರಾಜಿಕಂ ಪಞ್ಞಾಪೇನ್ತೇನ ಭಿಕ್ಖೂಸು ಪಬ್ಬಜಿತಂ ಪುರಾಣವೋಹಾರಿಕಮಹಾಮತ್ತಂ ಭಿಕ್ಖುಂ ‘‘ಕಿತ್ತಕೇನ ವತ್ಥುನಾ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಚೋರಂ ಗಹೇತ್ವಾ ಹನತಿ ವಾ ಬನ್ಧತಿ ವಾ ಪಬ್ಬಾಜೇತಿ ವಾ’’ತಿ ಪುಚ್ಛಿತ್ವಾ ತೇನ ‘‘ಪಾದೇನ ವಾ ಪಾದಾರಹೇನ ವಾ’’ತಿ ವುತ್ತೇ ತೇನೇವ ಪಮಾಣೇನ ಅದಿನ್ನಂ ಆದಿಯನ್ತಸ್ಸ ಪಞ್ಞತ್ತಂ. ಅಟ್ಠಕಥಾಯಞ್ಚ –

‘‘ಪಞ್ಚಮಾಸಕೋ ಪಾದೋತಿ ಪಾಳಿಂ ಉಲ್ಲಿಙ್ಗಿತ್ವಾ ‘ತದಾ ರಾಜಗಹೇ ವೀಸತಿಮಾಸಕೋ ಕಹಾಪಣೋ ಹೋತಿ, ತಸ್ಮಾ ಪಞ್ಚಮಾಸಕೋ ಪಾದೋ’. ಏತೇನ ಲಕ್ಖಣೇನ ಸಬ್ಬಜನಪದೇಸು ಕಹಾಪಣಸ್ಸ ಚತುತ್ಥೋ ಭಾಗೋ ‘ಪಾದೋ’ತಿ ವೇದಿತಬ್ಬೋ. ಸೋ ಚ ಖೋ ಪೋರಾಣಕಸ್ಸ ನೀಲಕಹಾಪಣಸ್ಸ ವಸೇನ, ನ ಇತರೇಸಂ ದುದ್ರದಾಮಕಾದೀನಂ. ತೇನ ಹಿ ಪಾದೇನ ಅತೀತಾ ಬುದ್ಧಾಪಿ ಪಾರಾಜಿಕಂ ಪಞ್ಞಪೇಸುಂ, ಅನಾಗತಾಪಿ ಪಞ್ಞಪೇಸ್ಸನ್ತಿ. ಸಬ್ಬಬುದ್ಧಾನಞ್ಹಿ ಪಾರಾಜಿಕವತ್ಥುಮ್ಹಿ ವಾ ಪಾರಾಜಿಕೇ ವಾ ನಾನತ್ತಂ ನತ್ಥಿ, ಇಮಾನೇವ ಚತ್ತಾರಿ ಪಾರಾಜಿಕವತ್ಥೂನಿ, ಇಮಾನೇವ ಚತ್ತಾರಿ ಪಾರಾಜಿಕಾನಿ, ಇತೋ ಊನಂ ವಾ ಅತಿರೇಕಂ ವಾ ನತ್ಥಿ. ತಸ್ಮಾ ಭಗವಾಪಿ ಧನಿಯಂ ವಿಗರಹಿತ್ವಾ ಪಾದೇನೇವ ದುತಿಯಪಾರಾಜಿಕಂ ಪಞ್ಞಪೇನ್ತೋ ‘ಯೋ ಪನ ಭಿಕ್ಖು ಅದಿನ್ನಂ ಥೇಯ್ಯಸಙ್ಖಾತ’ನ್ತಿಆದಿಮಾಹಾ’’ತಿ (ಪಾರಾ. ಅಟ್ಠ. ೧.೮೮) ವುತ್ತಂ.

ಸಾರತ್ಥದೀಪನಿಯಞ್ಚ –

‘‘ಚತುತ್ಥೋ ಭಾಗೋ ಪಾದೋತಿ ವೇದಿತಬ್ಬೋತಿ ಇಮಿನಾವ ಸಬ್ಬಜನಪದೇಸು ಕಹಾಪಣಸ್ಸೇವ ವೀಸತಿಮೋ ಭಾಗೋಮಾಸಕೋತಿ ಇದಞ್ಚ ವುತ್ತಮೇವ ಹೋತೀತಿ ದಟ್ಠಬ್ಬಂ. ಪೋರಾಣಸತ್ಥಾನುರೂಪಂ ಲಕ್ಖಣಸಮ್ಪನ್ನಾ ಉಪ್ಪಾದಿತಾ ನೀಲಕಹಾಪಣಾತಿ ವೇದಿತಬ್ಬಾ. ದುದ್ರದಾಮೇನ ಉಪ್ಪಾದಿತೋ ದುದ್ರದಾಮಕೋ. ಸೋ ಕಿರ ನೀಲಕಹಾಪಣಸ್ಸ ತಿಭಾಗಂ ಅಗ್ಘತೀ’ತಿ ವತ್ವಾ ‘ಯಸ್ಮಿಂ ಪದೇಸೇ ನೀಲಕಹಾಪಣಾ ನ ಸನ್ತಿ, ತತ್ಥಾಪಿ ನೀಲಕಹಾಪಣವಸೇನೇವ ಪರಿಚ್ಛೇದೋ ಕಾತಬ್ಬೋ. ಕಥಂ? ನೀಲಕಹಾಪಣಾನಂ ವಳಞ್ಜನಟ್ಠಾನೇ ಚ ಅವಳಞ್ಜನಟ್ಠಾನೇ ಚ ಸಮಾನಅಗ್ಘವಸೇನ ಪವತ್ತಮಾನಂ ಭಣ್ಡಂ ನೀಲಕಹಾಪಣೇನ ಸಮಾನಗ್ಘಂ ಗಹೇತ್ವಾ ತಸ್ಸ ಚತುತ್ಥಭಾಗಗ್ಘನಕಂ ನೀಲಕಹಾಪಣಸ್ಸ ಪಾದಗ್ಘನಕನ್ತಿ ಪರಿಚ್ಛಿನ್ದಿತ್ವಾ ವಿನಿಚ್ಛಯೋ ಕಾತಬ್ಬೋ’’ತಿ (ಸಾರತ್ಥ. ಟೀ. ೨.೮೮) ಅಯಮತ್ಥೋವ ವುತ್ತೋ.

ಏತ್ಥ ಕಹಾಪಣಂ ನಾಮ ಕರೋನ್ತಾ ಸುವಣ್ಣೇನಪಿ ಕರೋನ್ತಿ ರಜತೇನಪಿ ತಮ್ಬೇನಪಿ ಸುವಣ್ಣರಜತತಮ್ಬಮಿಸ್ಸಕೇನಪಿ. ತೇಸು ಕತರಂ ಕಹಾಪಣಂ ನೀಲಕಹಾಪಣನ್ತಿ? ಕೇಚಿ ತಾವ ‘‘ಸುವಣ್ಣಕಹಾಪಣ’’ನ್ತಿ. ಕೇಚಿ ‘‘ಮಿಸ್ಸಕಕಹಾಪಣ’’ನ್ತಿ. ತತ್ಥ ‘‘ಸುವಣ್ಣಕಹಾಪಣ’’ನ್ತಿ ವದನ್ತಾನಂ ಅಯಮಧಿಪ್ಪಾಯೋ – ಪಾರಾಜಿಕವತ್ಥುನಾ ಪಾದೇನ ಸಬ್ಬತ್ಥ ಏಕಲಕ್ಖಣೇನ ಭವಿತಬ್ಬಂ, ಕಾಲದೇಸಪರಿಭೋಗಾದಿವಸೇನ ಅಗ್ಘನಾನತ್ತಂ ಪಾದಸ್ಸೇವ ಭವಿತಬ್ಬಂ. ಭಗವತಾ ಹಿ ಧಮ್ಮಿಕರಾಜೂಹಿ ಹನನಬನ್ಧನಪಬ್ಬಾಜನಾನುರೂಪೇನೇವ ಅದಿನ್ನಾದಾನೇ ಪಾರಾಜಿಕಂ ಪಞ್ಞತ್ತಂ, ನ ಇತರಥಾ. ತಸ್ಮಾ ಏಸಾ ಸಬ್ಬದಾ ಸಬ್ಬತ್ಥ ಅಬ್ಯಭಿಚಾರೀತಿ ಸುವಣ್ಣಮಯಸ್ಸ ಕಹಾಪಣಸ್ಸ ಚತುತ್ಥೇನ ಪಾದೇನ ಭವಿತಬ್ಬನ್ತಿ.

‘‘ಮಿಸ್ಸಕಕಹಾಪಣ’’ನ್ತಿ ವದನ್ತಾನಂ ಪನ ಅಯಮಧಿಪ್ಪಾಯೋ –

ಅಟ್ಠಕಥಾಯಂ –

‘‘ತದಾ ರಾಜಗಹೇ ವೀಸತಿಮಾಸಕೋ ಕಹಾಪಣೋ ಹೋತಿ, ತಸ್ಮಾ ಪಞ್ಚಮಾಸಕೋ ಪಾದೋ. ಏತೇನ ಲಕ್ಖಣೇನ ಸಬ್ಬಜನಪದೇಸು ಕಹಾಪಣಸ್ಸ ಚತುತ್ಥೋ ಭಾಗೋ ‘ಪಾದೋ’ತಿ ವೇದಿತಬ್ಬೋ. ಸೋ ಚ ಖೋ ಪೋರಾಣಕಸ್ಸ ನೀಲಕಹಾಪಣಸ್ಸ ವಸೇನ, ನ ಇತರೇಸಂ ದುದ್ರದಾಮಕಾದೀನ’’ನ್ತಿ (ಪಾರಾ. ಅಟ್ಠ. ೧.೮೮) –

ವುತ್ತತ್ತಾ, ಸಾರತ್ಥದೀಪನಿಯಞ್ಚ –

‘‘ಪೋರಾಣಸತ್ಥಾನುರೂಪಂ ಲಕ್ಖಣಸಮ್ಪನ್ನಾ ಉಪ್ಪಾದಿತಾ ನೀಲಕಹಾಪಣಾತಿ ವೇದಿತಬ್ಬಾ’’ತಿ (ಸಾರತ್ಥ. ಟೀ. ೨.೮೮) –

ವುತ್ತತ್ತಾ ಚ ‘‘ವಿನಯವಿನಿಚ್ಛಯಂ ಪತ್ವಾ ಗರುಕೇ ಠಾತಬ್ಬ’’ನ್ತಿ ವಚನತೋ ಚ ಮಿಸ್ಸಕಕಹಾಪಣೋಯೇವ ನೀಲಕಹಾಪಣೋ. ತತ್ಥೇವ ಹಿ ಪೋರಾಣಸತ್ಥವಿಹಿತಂ ಲಕ್ಖಣಂ ದಿಸ್ಸತಿ. ಕಥಂ? ಪಞ್ಚ ಮಾಸಾ ಸುವಣ್ಣಸ್ಸ, ತಥಾ ರಜತಸ್ಸ, ದಸ ಮಾಸಾ ತಮ್ಬಸ್ಸಾತಿ ಏತೇ ವೀಸತಿ ಮಾಸೇ ಮಿಸ್ಸೇತ್ವಾ ಬನ್ಧನತ್ಥಾಯ ವೀಹಿಮತ್ತಂ ಲೋಹಂ ಪಕ್ಖಿಪಿತ್ವಾ ಅಕ್ಖರಾನಿ ಚ ಹತ್ಥಿಆದೀನಮಞ್ಞತರಞ್ಚ ರೂಪಂ ದಸ್ಸೇತ್ವಾ ಕತೋ ನಿದ್ದೋಸತ್ತಾ ನೀಲಕಹಾಪಣೋ ನಾಮ ಹೋತೀತಿ.

ಸಿಕ್ಖಾಭಾಜನವಿನಿಚ್ಛಯೇ ಚ ಕೇಸುಚಿ ಪೋತ್ಥಕೇಸು ‘‘ಪಾದೋ ನಾಮ ಪಞ್ಚ ಮಾಸಾ ಸುವಣ್ಣಸ್ಸಾ’’ತಿ ಪುರಿಮಪಕ್ಖವಾದೀನಂ ಮತೇನ ಪಾಠೋ ಲಿಖಿತೋ. ಕೇಸುಚಿ ಪೋತ್ಥಕೇಸು ದುತಿಯಪಕ್ಖವಾದೀನಂ ಮತೇನ ‘‘ಪಞ್ಚ ಮಾಸಾ ಹಿರಞ್ಞಸ್ಸಾ’’ತಿ ಪಾಠೋ ಲಿಖಿತೋ. ಸೀಹಳಭಾಸಾಯ ಪೋರಾಣಕೇಹಿ ಲಿಖಿತಾಯ ಸಾಮಣೇರಸಿಕ್ಖಾಯ ಪನ –

‘‘ಪೋರಾಣಕಸ್ಸ ನೀಲಕಹಾಪಣಸ್ಸಾತಿ ವುತ್ತಅಟ್ಠಕಥಾವಚನಸ್ಸ, ಪೋರಾಣಕೇ ರತನಸುತ್ತಾಭಿಧಾನಕಸುತ್ತೇ ವುತ್ತಕಹಾಪಣಲಕ್ಖಣಸ್ಸ ಚ ಅನುರೂಪತೋ ‘ಸುವಣ್ಣರಜತತಮ್ಬಾನಿ ಮಿಸ್ಸೇತ್ವಾ ಉಟ್ಠಾಪೇತ್ವಾ ಕತಕಹಾಪಣಂ ಕಹಾಪಣಂ ನಾಮಾ’ತಿ ಚ ‘ಸಾಮಣೇರಾನಮುಪಸಮ್ಪನ್ನಾನಞ್ಚ ಅದಿನ್ನಾದಾನಪಾರಾಜಿಕವತ್ಥುಮ್ಹಿ ಕೋ ವಿಸೇಸೋ’ತಿ ಪುಚ್ಛಂ ಕತ್ವಾ ‘ಸಾಮಣೇರಾನಂ ದಸಿಕಸುತ್ತೇನಾಪಿ ಪಾರಾಜಿಕೋ ಹೋತಿ, ಉಪಸಮ್ಪನ್ನಾನಂ ಪನ ಸುವಣ್ಣಸ್ಸ ವೀಸತಿವೀಹಿಮತ್ತೇನಾ’’ತಿ –

ಚ ವಿಸೇಸೋ ದಸ್ಸಿತೋ.

ತಂ ಪನ ಸುವಣ್ಣಮಾಸಕವಸೇನ ಅಡ್ಢತಿಯಮಾಸಕಂ ಹೋತಿ, ಪಞ್ಚಮಾಸಕೇನ ಚ ಭಗವತಾ ಪಾರಾಜಿಕಂ ಪಞ್ಞತ್ತಂ. ತಸ್ಮಾ ತಸ್ಸ ಯಥಾವುತ್ತಲಕ್ಖಣಸ್ಸ ಕಹಾಪಣಸ್ಸ ಸಬ್ಬದೇಸೇಸು ಅಲಬ್ಭಮಾನತ್ತಾ ಸಬ್ಬದೇಸಸಾಧಾರಣೇನ ತಸ್ಸ ಮಿಸ್ಸಕಕಹಾಪಣಸ್ಸ ಪಞ್ಚಮಾಸಪಾದಗ್ಘನಕೇನ ಸುವಣ್ಣೇನೇವ ಪಾರಾಜಿಕವತ್ಥುಮ್ಹಿ ನಿಯಮಿತೇ ಸಬ್ಬದೇಸವಾಸೀನಂ ಉಪಕಾರಾಯ ಹೋತೀತಿ ಏವಂ ಸುವಣ್ಣೇನೇವ ಪಾರಾಜಿಕವತ್ಥುಪರಿಚ್ಛೇದೋ ಕತೋ. ಅಯಮೇವ ನಿಯಮೋ ಸೀಹಳಾಚರಿಯವಾದೇಹಿ ಸಾರೋತಿ ಗಹಿತೋ. ತಸ್ಮಾ ಸಿಕ್ಖಾಗರುಕೇಹಿ ಸಬ್ಬತ್ಥ ಪೇಸಲೇಹಿ ವಿನಯಧರೇಹಿ ಅಯಮೇವ ವಿನಿಚ್ಛಯೋ ಸಾರತೋ ಪಚ್ಚೇತಬ್ಬೋ. ಹೋನ್ತಿ ಚೇತ್ಥ –

‘‘ಹೇಮರಜತತಮ್ಬೇಹಿ, ಸತ್ಥೇ ನಿದ್ದಿಟ್ಠಲಕ್ಖಣಂ;

ಅಹಾಪೇತ್ವಾ ಕತೋ ವೀಸ-ಮಾಸೋ ನೀಲಕಹಾಪಣೋ.

ಹೇಮಪಾದಂ ಸಜ್ಝುಪಾದಂ, ತಮ್ಬಪಾದದ್ವಯಞ್ಹಿ ಸೋ;

ಮಿಸ್ಸೇತ್ವಾ ರೂಪಮಪ್ಪೇತ್ವಾ, ಕಾತುಂ ಸತ್ಥೇಸು ದಸ್ಸಿತೋ.

‘ಏಲಾ’ತಿ ವುಚ್ಚತೇ ದೋಸೋ, ನಿದ್ದೋಸತ್ತಾ ತಥೀರಿತೋ;

ತಸ್ಸ ಪಾದೋ ಸುವಣ್ಣಸ್ಸ, ವೀಸವೀಹಗ್ಘನೋ ಮತೋ.

ಯಸ್ಮಿಂ ಪನ ಪದೇಸೇ ಸೋ, ನ ವತ್ತತಿ ಕಹಾಪಣೋ;

ವೀಸಸೋವಣ್ಣವೀಹಗ್ಘಂ, ತಪ್ಪಾದಗ್ಘನ್ತಿ ವೇದಿಯಂ.

ವೀಸಸೋವಣ್ಣವೀಹಗ್ಘಂ, ಥೇನೇನ್ತಾ ಭಿಕ್ಖವೋ ತತೋ;

ಚವನ್ತಿ ಸಾಮಞ್ಞಗುಣಾ, ಇಚ್ಚಾಹು ವಿನಯಞ್ಞುನೋ’’ತಿ.

೯. ಓಪಾತನ್ತಿ ಆವಾಟಂ. ದುಕ್ಖೇ ಜಾತೇತಿ ಯೋಜನಾ.

೧೦. ಉತ್ತರಿಂ ಧಮ್ಮನ್ತಿ ಏತ್ಥ ‘‘ಉತ್ತರಿಮನುಸ್ಸಧಮ್ಮ’’ನ್ತಿ ವತ್ತಬ್ಬೇ ನಿರುತ್ತಿನಯೇನ ಮಜ್ಝಪದಲೋಪಂ, ನಿಗ್ಗಹೀತಾಗಮಞ್ಚ ಕತ್ವಾ ‘‘ಉತ್ತರಿಂ ಧಮ್ಮ’’ನ್ತಿ ವುತ್ತಂ. ಉತ್ತರಿಮನುಸ್ಸಾನಂ ಝಾಯೀನಞ್ಚೇವ ಅರಿಯಾನಞ್ಚ ಧಮ್ಮಂ ಉತ್ತರಿಮನುಸ್ಸಧಮ್ಮಂ. ಅತ್ತುಪನಾಯಿಕನ್ತಿ ಅತ್ತನಿ ತಂ ಉಪನೇತಿ ‘‘ಮಯಿ ಅತ್ಥೀ’’ತಿ ಸಮುದಾಚರನ್ತೋ, ಅತ್ತಾನಂ ವಾ ತತ್ಥ ಉಪನೇತಿ ‘‘ಅಹಂ ಏತ್ಥ ಸನ್ದಿಸ್ಸಾಮೀ’’ತಿ ಸಮುದಾಚರನ್ತೋತಿ ಅತ್ತುಪನಾಯಿಕೋ, ತಂ ಅತ್ತುಪನಾಯಿಕಂ, ಏವಂ ಕತ್ವಾ ವದನ್ತೋತಿ ಸಮ್ಬನ್ಧೋ.

೧೧. ಪರಿಯಾಯೇತಿ ‘‘ಯೋ ತೇ ವಿಹಾರೇ ವಸತಿ, ಸೋ ಭಿಕ್ಖು ಅರಹಾ’’ತಿಆದಿನಾ (ಪರಿ. ೨೮೭) ಪರಿಯಾಯಭಣನೇ. ಞಾತೇತಿ ಯಂ ಉದ್ದಿಸ್ಸ ಭಣತಿ, ತಸ್ಮಿಂ ವಿಞ್ಞುಮ್ಹಿ ಮನುಸ್ಸಜಾತಿಕೇ ಅಚಿರೇನ ಞಾತೇ. ನೋ ಚೇತಿ ನೋ ಚೇ ಜಾನಾತಿ.

ಇತಿ ಉತ್ತರೇ ಲೀನತ್ಥಪಕಾಸನಿಯಾ

ಪಾರಾಜಿಕಕಥಾವಣ್ಣನಾ ನಿಟ್ಠಿತಾ.

೧೩. ಚೇತೇತಿ, ಉಪಕ್ಕಮತಿ, ಮುಚ್ಚತಿ, ಏವಂ ಅಙ್ಗತ್ತಯೇ ಪುಣ್ಣೇ ಗರುಕಂ ವುತ್ತಂ. ದ್ವಙ್ಗೇ ಚೇತೇತಿ, ಉಪಕ್ಕಮತಿ ಯದಿ ನ ಮುಚ್ಚತಿ, ಏವಂ ಅಙ್ಗದ್ವಯೇ ಥುಲ್ಲಚ್ಚಯನ್ತಿ ಯೋಜನಾ. ಪಯೋಗೇತಿ ಪಯೋಜೇತ್ವಾ ಉಪಕ್ಕಮಿತುಂ ಅಙ್ಗಜಾತಾಮಸನಂ, ಪರಸ್ಸ ಆಣಾಪನನ್ತಿ ಏವರೂಪೇ ಸಾಹತ್ಥಿಕಾಣತ್ತಿಕಪಯೋಗೇ.

೧೪. ವುತ್ತನಯೇನೇವ ಉಪರೂಪರಿ ಪಞ್ಹಾಪುಚ್ಛನಂ ಞಾತುಂ ಸಕ್ಕಾತಿ ತಂ ಅವತ್ತುಕಾಮೋ ಆಹ ‘‘ಇತೋ ಪಟ್ಠಾಯಾ’’ತಿಆದಿ. ಮಯಮ್ಪಿ ಯದೇತ್ಥ ಪುಬ್ಬೇ ಅವುತ್ತಮನುತ್ತಾನತ್ಥಞ್ಚ, ತದೇವ ವಣ್ಣಯಿಸ್ಸಾಮ.

೧೫. ಕಾಯೇನಾತಿ ಅತ್ತನೋ ಕಾಯೇನ. ಕಾಯನ್ತಿ ಇತ್ಥಿಯಾ ಕಾಯಂ. ಏಸ ನಯೋ ‘‘ಕಾಯಬದ್ಧ’’ನ್ತಿ ಏತ್ಥಾಪಿ.

೧೬. ಅತ್ತನೋ ಕಾಯೇನ ಪಟಿಬದ್ಧೇನ ಇತ್ಥಿಯಾ ಕಾಯಪಟಿಬದ್ಧೇ ಫುಟ್ಠೇ ತು ದುಕ್ಕಟನ್ತಿ ಯೋಜನಾ.

೧೭. ತಿಸ್ಸೋ ಆಪತ್ತಿಯೋ ಸಿಯುನ್ತಿ ಯೋಜನಾ. ದ್ವಿನ್ನಂ ಮಗ್ಗಾನನ್ತಿ ವಚ್ಚಮಗ್ಗಪಸ್ಸಾವಮಗ್ಗಾನಂ.

೧೮. ವಣ್ಣಾದಿಭಞ್ಞೇತಿ ವಣ್ಣಾದಿನಾ ಭಣನೇ. ಕಾಯಪಟಿಬದ್ಧೇ ವಣ್ಣಾದಿನಾ ಭಞ್ಞೇ ದುಕ್ಕಟನ್ತಿ ಯೋಜನಾ.

೧೯. ಅತ್ತಕಾಮಚರಿಯಾಯಾತಿ ಅತ್ತಕಾಮಪಾರಿಚರಿಯಾಯ.

೨೦. ಪಣ್ಡಕಸ್ಸ ಸನ್ತಿಕೇಪಿ ಅತ್ತಕಾಮಪಾರಿಚರಿಯಾಯ ವಣ್ಣಂ ವದತೋ ತಸ್ಸ ಭಿಕ್ಖುನೋತಿ ಯೋಜನಾ. ತಿರಚ್ಛಾನಗತಸ್ಸಾಪಿ ಸನ್ತಿಕೇತಿ ಏತ್ಥಾಪಿ ಏಸೇವ ನಯೋ.

೨೧. ಇತ್ಥಿಪುರಿಸಾನಮನ್ತರೇ ಸಞ್ಚರಿತ್ತಂ ಸಞ್ಚರಣಭಾವಂ ಸಮಾಪನ್ನೇ ಭಿಕ್ಖುಮ್ಹಿ ಪಟಿಗ್ಗಣ್ಹನವೀಮಂಸಾಪಚ್ಚಾಹರಣಕತ್ತಿಕೇ ಸಮ್ಪನ್ನೇ ತಸ್ಸ ಬುಧೋ ಗರುಕಂ ನಿದ್ದಿಸೇತಿ ಯೋಜನಾ.

೨೨. ದ್ವಙ್ಗಸಮಾಯೋಗೇತಿ ತೀಸ್ವೇತೇಸು ದ್ವಿನ್ನಂ ಅಙ್ಗಾನಂ ಯಥಾಕಥಞ್ಚಿ ಸಮಾಯೋಗೇ. ಅಙ್ಗೇ ಸತಿ ಪನೇಕಸ್ಮಿನ್ತಿ ತಿಣ್ಣಮೇಕಸ್ಮಿಂ ಪನ ಅಙ್ಗೇ ಸತಿ.

೨೪. ಪಯೋಗೇತಿ ‘‘ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಕುಟಿಂ, ಅದೇಸಿತವತ್ಥುಕಂ ಮಹಲ್ಲಕವಿಹಾರಞ್ಚ ಕಾರೇಸ್ಸಾಮೀ’’ತಿ ಉಪಕರಣತ್ಥಂ ಅರಞ್ಞಗಮನತೋ ಪಟ್ಠಾಯ ಸಬ್ಬಪಯೋಗೇ. ಏಕಪಿಣ್ಡೇ ಅನಾಗತೇತಿ ಸಬ್ಬಪರಿಯನ್ತಿಮಂ ಪಿಣ್ಡಂ ಸನ್ಧಾಯ ವುತ್ತಂ.

೨೫. ಇಧ ಯೋ ಭಿಕ್ಖು ಅಮೂಲಕೇನ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇತೀತಿ ಯೋಜನಾ.

೨೬. ಓಕಾಸಂ ನ ಚ ಕಾರೇತ್ವಾತಿ ‘‘ಕರೋತು ಮೇ, ಆಯಸ್ಮಾ, ಓಕಾಸಂ, ಅಹಂ ತೇ ವತ್ತುಕಾಮೋ’’ತಿ ಏವಂ ತೇನ ಭಿಕ್ಖುನಾ ಓಕಾಸಂ ಅಕಾರಾಪೇತ್ವಾ.

೨೮. ಅಞ್ಞಭಾಗಿಯೇತಿ ಅಞ್ಞಭಾಗಿಯಪದೇನ ಉಪಲಕ್ಖಿತಸಿಕ್ಖಾಪದೇ. ಏವಂ ಅಞ್ಞತ್ರಪಿ ಈದಿಸೇಸು ಠಾನೇಸು ಅತ್ಥೋ ವೇದಿತಬ್ಬೋ.

೨೯. ‘‘ಸಮನುಭಾಸನಾಯ ಏವಾ’’ತಿ ಪದಚ್ಛೇದೋ. ನ ಪಟಿನಿಸ್ಸಜನ್ತಿ ಅಪ್ಪಟಿನಿಸ್ಸಜನ್ತೋ.

೩೦. ಞತ್ತಿಯಾ ದುಕ್ಕಟಂ ಆಪನ್ನೋ ಸಿಯಾ, ದ್ವೀಹಿ ಕಮ್ಮವಾಚಾಹಿ ಥುಲ್ಲತಂ ಆಪನ್ನೋ ಸಿಯಾ, ಕಮ್ಮವಾಚಾಯ ಓಸಾನೇ ಗರುಕಂ ಆಪನ್ನೋ ಸಿಯಾತಿ ಯೋಜನಾ. ‘‘ಥುಲ್ಲತ’’ನ್ತಿ ಇದಂ ಥುಲ್ಲಚ್ಚಯಾಪತ್ತಿಉಪಲಕ್ಖಣವಚನಂ.

೩೧. ಚತೂಸು ಯಾವತತಿಯಕೇಸು ಪಠಮೇ ಆಪತ್ತಿಪರಿಚ್ಛೇದಂ ದಸ್ಸೇತ್ವಾ ಇತರೇಸಂ ತಿಣ್ಣಂ ತೇನಪಿ ಏಕಪರಿಚ್ಛೇದತ್ತಾ ತತ್ಥ ವುತ್ತನಯಮೇವ ತೇಸು ಅತಿದಿಸನ್ತೋ ಆಹ ‘‘ಭೇದಾನುವತ್ತಕೇ’’ತಿಆದಿ.

ಇತಿ ಉತ್ತರೇ ಲೀನತ್ಥಪಕಾಸನಿಯಾ

ಸಙ್ಘಾದಿಸೇಸಕಥಾವಣ್ಣನಾ ನಿಟ್ಠಿತಾ.

೩೨. ಅತಿರೇಕಚೀವರನ್ತಿ ಅನಧಿಟ್ಠಿತಂ, ಅವಿಕಪ್ಪಿತಂ ವಿಕಪ್ಪನುಪಗಪಮಾಣಂ ಚೀವರಂ ಲದ್ಧಾ ದಸಾಹಂ ಅತಿಕ್ಕಮನ್ತೋ ಏಕಮೇವ ನಿಸ್ಸಗ್ಗಿಯಂ ಪಾಚಿತ್ತಿಯಂ ಆಪಜ್ಜತಿ. ತಿಚೀವರೇನ ಏಕರತ್ತಿಮ್ಪಿ ವಿನಾ ವಸನ್ತೋ ಏಕಮೇವ ನಿಸ್ಸಗ್ಗಿಯಂ ಪಾಚಿತ್ತಿಯಂ ಆಪಜ್ಜತಿ. ಇದಞ್ಚ ಜಾತಿವಸೇನ ಏಕತ್ತಂ ಸನ್ಧಾಯ ವುತ್ತಂ ವತ್ಥುಗಣನಾಯ ಆಪತ್ತೀನಂ ಪರಿಚ್ಛಿನ್ದಿತಬ್ಬತ್ತಾ.

೩೩. ಗಹೇತ್ವಾಕಾಲಚೀವರನ್ತಿ ಅಕಾಲಚೀವರಂ ಪಟಿಗ್ಗಹೇತ್ವಾ. ಮಾಸನ್ತಿ ಸತಿಯಾ ಪಚ್ಚಾಸಾಯ ನಿಕ್ಖಿಪಿತುಂ ಅನುಞ್ಞಾತಂ ಮಾಸಂ. ಅತಿಕ್ಕಮನ್ತೋತಿ ಸತಿಯಾಪಿ ಪಚ್ಚಾಸಾಯ ವೀತಿಕ್ಕಮನ್ತೋ ಅನ್ತೋಮಾಸೇ ಅನಧಿಟ್ಠಹಿತ್ವಾ, ಅವಿಕಪ್ಪೇತ್ವಾ ವಾ ತಿಂಸದಿವಸಾನಿ ಅತಿಕ್ಕಮನ್ತೋ, ಚೀವರುಪ್ಪಾದದಿವಸಂ ಅರುಣಂ ಆದಿಂ ಕತ್ವಾ ಏಕತಿಂಸಮಂ ಅರುಣಂ ಉಟ್ಠಾಪೇನ್ತೋತಿ ಅತ್ಥೋ. ಏಕಂ ನಿಸ್ಸಗ್ಗಿಯಂ ಆಪತ್ತಿಂ ಆಪಜ್ಜತೀತಿ ಉದೀರಿತನ್ತಿ ಯೋಜನಾ.

೩೪. ಅಞ್ಞಾತಿಕಾಯ ಭಿಕ್ಖುನಿಯಾ. ಯಂಕಿಞ್ಚಿ ಪುರಾಣಚೀವರನ್ತಿ ಏಕವಾರಮ್ಪಿ ಪರಿಭುತ್ತಂ ಸಙ್ಘಾಟಿಆದೀನಮಞ್ಞತರಂ ಚೀವರಂ.

೩೫. ಪಯೋಗಸ್ಮಿನ್ತಿ ‘‘ಧೋವಾ’’ತಿಆದಿಕೇ ಭಿಕ್ಖುನೋ ಆಣತ್ತಿಕಪಯೋಗೇ, ಏವಂ ಆಣತ್ತಾಯ ಚ ಭಿಕ್ಖುನಿಯಾ ಉದ್ಧನಾದಿಕೇ ಸಬ್ಬಸ್ಮಿಂ ಪಯೋಗೇ ಚ. ‘‘ನಿಸ್ಸಗ್ಗಿಯಾವ ಪಾಚಿತ್ತಿ ಹೋತೀತಿ ನಿಸ್ಸಗ್ಗಿಯಾ ಪಾಚಿತ್ತಿ ಚ ಹೋತೀತಿ ಯೋಜನಾ.

೩೬. ಪಟಿಗಣ್ಹತೋತಿ ಏತ್ಥ ‘‘ಅಞ್ಞತ್ರ ಪಾರಿವತ್ತಕಾ’’ತಿ ಯೋಜನಾ.

೩೮. ಪಯೋಗಸ್ಮಿನ್ತಿ ವಿಞ್ಞಾಪನಪಯೋಗೇ. ವಿಞ್ಞಾಪಿತೇತಿ ವಿಞ್ಞಾಪಿತಚೀವರೇ ಪಟಿಲದ್ಧೇ.

೩೯. ಭಿಕ್ಖೂತಿ ಅಚ್ಛಿನ್ನಚೀವರೋ ವಾ ನಟ್ಠಚೀವರೋ ವಾ ಭಿಕ್ಖು. ತದುತ್ತರಿನ್ತಿ ಸನ್ತರುತ್ತರಪರಮತೋ ಉತ್ತರಿಂ.

೪೧. ಪಯೋಗೇತಿ ವಿಕಪ್ಪನಾಪಜ್ಜನಪಯೋಗೇ.

೪೨. ದುವೇತಿ ದುಕ್ಕಟಪಾಚಿತ್ತಿಯವಸೇನ ದುವೇ ಆಪತ್ತಿಯೋ ಫುಸೇತಿ ಯೋಜೇತಬ್ಬಂ.

೪೪. ಪಯೋಗೇತಿ ಅನುಞ್ಞಾತಪಯೋಗತೋ ಅತಿರೇಕಾಭಿನಿಪ್ಫಾದನಪಯೋಗೇ. ಲಾಭೇತಿ ಚೀವರಸ್ಸ ಪಟಿಲಾಭೇ.

ಕಥಿನವಗ್ಗವಣ್ಣನಾ ಪಠಮಾ.

೪೫. ಕೋಸಿಯವಗ್ಗಸ್ಸ ಆದೀಸು ಪಞ್ಚಸು ಸಿಕ್ಖಾಪದೇಸು ದ್ವೇ ದ್ವೇ ಆಪತ್ತಿಯೋತಿ ಯೋಜನಾ. ಪಯೋಗೇತಿ ಕರಣಕಾರಾಪನಪಯೋಗೇ. ಲಾಭೇತಿ ಕತ್ವಾ ವಾ ಕಾರೇತ್ವಾ ವಾ ಪರಿನಿಟ್ಠಾಪನೇ.

೪೬. ‘‘ಗಹೇತ್ವಾ ಏಳಕಲೋಮಾನೀ’’ತಿ ಪದಚ್ಛೇದೋ. ಅತಿಕ್ಕಮನ್ತಿ ಅತಿಕ್ಕಮನ್ತೋ.

೪೭. ಅಞ್ಞಾಯಾತಿ ಅಞ್ಞಾತಿಕಾಯ ಭಿಕ್ಖುನಿಯಾ. ‘‘ಧೋವಾಪೇತಿ ಏಳಲೋಮಕ’’ನ್ತಿ ಪದಚ್ಛೇದೋ. ಏಳಲೋಮಕನ್ತಿ ಏಳಕಲೋಮಾನಿ. ನಿರುತ್ತಿನಯೇನ ಕ-ಕಾರಸ್ಸ ವಿಪರಿಯಾಯೋ. ಪಯೋಗೇತಿ ಧೋವಾಪನಪಯೋಗೇ.

೪೮. ಪಯೋಗೇತಿ ಪಟಿಗ್ಗಣ್ಹನಪಯೋಗೇ.

೪೯. ನಾನಾಕಾರನ್ತಿ ನಾನಪ್ಪಕಾರಂ. ಸಮಾಪಜ್ಜನ್ತಿ ಸಮಾಪಜ್ಜನ್ತೋ ಭಿಕ್ಖು. ಸಮಾಪನ್ನೇತಿ ಸಂವೋಹಾರೇ ಸಮಾಪನ್ನೇ ಸತಿ. ಪಯೋಗೇತಿ ಸಮಾಪಜ್ಜನಪಯೋಗೇ.

೫೦. ಪಯೋಗೇತಿ ಕಯವಿಕ್ಕಯಾಪಜ್ಜನಪಯೋಗೇ. ತಸ್ಮಿಂ ಕತೇತಿ ತಸ್ಮಿಂ ಭಣ್ಡೇ ಅತ್ತನೋ ಸನ್ತಕಭಾವಂ ನೀತೇ.

ಕೋಸಿಯವಗ್ಗವಣ್ಣನಾ ದುತಿಯಾ.

೫೧. ಅತಿರೇಕಕನ್ತಿ ಅನಧಿಟ್ಠಿತಂ, ಅವಿಕಪ್ಪಿತಂ ವಾ ಪತ್ತಂ. ದಸಾಹಂ ಅತಿಕ್ಕಮೇನ್ತಸ್ಸ ತಸ್ಸ ಭಿಕ್ಖುನೋ ಏಕಾವ ನಿಸ್ಸಗ್ಗಿಯಾಪತ್ತಿ ಹೋತೀತಿ ಯೋಜನಾ.

೫೨-೩. ನತ್ಥಿ ಏತಸ್ಸ ಪಞ್ಚ ಬನ್ಧನಾನೀತಿ ಅಪಞ್ಚಬನ್ಧನೋ, ತಸ್ಮಿಂ, ಊನಪಞ್ಚಬನ್ಧನೇ ಪತ್ತೇತಿ ಅತ್ಥೋ. ಪಯೋಗೇತಿ ವಿಞ್ಞಾಪನಪಯೋಗೇ. ತಸ್ಸ ಪತ್ತಸ್ಸ ಲಾಭೇ ಪಟಿಲಾಭೇ.

೫೪. ಭೇಸಜ್ಜನ್ತಿ ಸಪ್ಪಿಆದಿಕಂ.

೫೫. ಪಯೋಗೇತಿ ಪರಿಯೇಸನಪಯೋಗೇ.

೫೬. ಪಯೋಗೇತಿ ಅಚ್ಛಿನ್ದನಅಚ್ಛಿನ್ದಾಪನಪಯೋಗೇ. ಹಟೇತಿ ಅಚ್ಛಿನ್ದಿತ್ವಾ ಗಹಿತೇ.

೫೭. ದ್ವೇ ಪನಾಪತ್ತಿಯೋ ಫುಸೇತಿ ವಾಯಾಪನಪಯೋಗೇ ದುಕ್ಕಟಂ, ವಿಕಪ್ಪನುಪಗಪಚ್ಛಿಮಚೀವರಪಮಾಣೇನ ವೀತೇ ನಿಸ್ಸಗ್ಗಿಯನ್ತಿ ದ್ವೇ ಆಪತ್ತಿಯೋ ಆಪಜ್ಜತೀತಿ ಅತ್ಥೋ.

೫೮-೯. ಯೋ ಪನ ಭಿಕ್ಖು ಅಪ್ಪವಾರಿತೋ ಅಞ್ಞಾತಕಸ್ಸೇವ ತನ್ತವಾಯೇ ಸಮೇಚ್ಚ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜನ್ತೋ ಹೋತಿ. ಸೋತಿ ಸೋ ಭಿಕ್ಖು. ದ್ವೇ ಆಪತ್ತಿಯೋ ಆಪಜ್ಜತಿ, ನ ಸಂಸಯೋತಿ ಯೋಜನಾ. ಪಯೋಗೇತಿ ವಿಕಪ್ಪಾಪಜ್ಜನಪಯೋಗೇ.

೬೦. ಅಚ್ಚೇಕಸಞ್ಞಿತಂ ಚೀವರಂ ಪಟಿಗ್ಗಹೇತ್ವಾತಿ ಯೋಜನಾ. ಕಾಲನ್ತಿ ಚೀವರಕಾಲಂ.

೬೧. ತಿಣ್ಣಮಞ್ಞತರಂ ವತ್ಥನ್ತಿ ತಿಣ್ಣಂ ಚೀವರಾನಂ ಅಞ್ಞತರಂ ಚೀವರಂ. ಘರೇತಿ ಅನ್ತರಘರೇ. ನಿದಹಿತ್ವಾತಿ ನಿಕ್ಖಿಪಿತ್ವಾ. ತೇನ ಚೀವರೇನ ವಿನಾ ಛಾರತ್ತತೋ ಅಧಿಕಂ ದಿವಸಂ ಯಸ್ಸ ಆರಞ್ಞಕಸ್ಸ ವಿಹಾರಸ್ಸ ಗೋಚರಗಾಮೇ ತಂ ಚೀವರಂ ನಿಕ್ಖಿತ್ತಂ, ತಮ್ಹಾ ವಿಹಾರಾ ಅಞ್ಞತ್ರ ವಸನ್ತೋ ನಿಸ್ಸಗ್ಗಿಯಂ ಫುಸೇತಿ ಯೋಜನಾ.

೬೨. ಸಙ್ಘಿಕಂ ಲಾಭಂ ಪರಿಣತಂ ಜಾನಂ ಜಾನನ್ತೋ.

೬೩. ಪಯೋಗೇತಿ ಪರಿಣಾಮನಪಯೋಗೇ. ಸಬ್ಬತ್ಥಾತಿ ಪಾರಾಜಿಕಾದೀಸು ಸಬ್ಬಸಿಕ್ಖಾಪದೇಸು. ಅಪ್ಪನಾವಾರಪರಿಹಾನೀತಿ ಪರಿವಾರೇ ಪಠಮಂ ವುತ್ತಕತ್ಥಪಞ್ಞತ್ತಿವಾರಸ್ಸ ಪರಿಹಾಪನಂ, ಇಧ ಅವಚನನ್ತಿ ಅತ್ಥೋ, ತಸ್ಸ ವಾರಸ್ಸ ಪರಿವಾರೇ ಸಬ್ಬಪಠಮತ್ತಾ ಪಠಮಂ ವತ್ತಬ್ಬಭಾವೇಪಿ ತತ್ಥ ವತ್ತಬ್ಬಂ ಪಚ್ಛಾ ಗಣ್ಹಿತುಕಾಮೇನ ಮಯಾ ತಂ ಠಪೇತ್ವಾ ಪಠಮಂ ಆಪತ್ತಿದಸ್ಸನತ್ಥಂ ತದನನ್ತರೋ ಕತಾಪತ್ತಿವಾರೋ ಪಠಮಂ ವುತ್ತೋತಿ ಅಧಿಪ್ಪಾಯೋ.

ಪತ್ತವಗ್ಗವಣ್ಣನಾ ತತಿಯಾ.

ಇತಿ ಉತ್ತರೇ ಲೀನತ್ಥಪಕಾಸನಿಯಾ

ತಿಂಸನಿಸ್ಸಗ್ಗಿಯಕಥಾವಣ್ಣನಾ ನಿಟ್ಠಿತಾ.

೬೪. ಮನುಸ್ಸುತ್ತರಿಧಮ್ಮೇತಿ ಉತ್ತರಿಮನುಸ್ಸಧಮ್ಮೇ. ಅಭೂತಸ್ಮಿಂ ಉತ್ತರಿಮನುಸ್ಸಧಮ್ಮೇ ಸಮುಲ್ಲಪಿತೇ ಪರಾಜಯೋ ಪಾರಾಜಿಕಾಪತ್ತಿ.

೬೫. ಅಮೂಲನ್ತಿಮವತ್ಥುನಾ ಅಮೂಲಕೇನ ಪಾರಾಜಿಕೇನ ಧಮ್ಮೇನ ಭಿಕ್ಖುಂ ಚೋದನಾಯ ಗರು ಸಙ್ಘಾದಿಸೇಸೋ ಹೋತೀತಿ ಯೋಜನಾ. ಪರಿಯಾಯವಚನೇತಿ ‘‘ಯೋ ತೇ ವಿಹಾರೇ ವಸತೀ’’ತಿಆದಿನಾ (ಪರಿ. ೨೮೭) ಪರಿಯಾಯೇನ ಕಥನೇ. ಞಾತೇತಿ ಯಸ್ಸ ಕಥೇತಿ, ತಸ್ಮಿಂ ವಚನಾನನ್ತರಮೇವ ಞಾತೇ.

೬೬. ನೋ ಚೇ ಪನ ವಿಜಾನಾತೀತಿ ಅಥ ತಂ ಪರಿಯಾಯೇನ ವುತ್ತಂ ವಚನಾನನ್ತರಮೇವ ಸಚೇ ನ ಜಾನಾತಿ. ಸಮುದಾಹಟನ್ತಿ ಕಥಿತಂ.

೬೭. ಓಮಸತೋ ಭಿಕ್ಖುಸ್ಸ ದುವೇ ಆಪತ್ತಿಯೋ ವುತ್ತಾ. ಉಪಸಮ್ಪನ್ನಂ ಓಮಸತೋ ಪಾಚಿತ್ತಿ ಸಿಯಾ. ಇತರಂ ಅನುಪಸಮ್ಪನ್ನಂ ಓಮಸತೋ ದುಕ್ಕಟಂ ಸಿಯಾತಿ ಯೋಜನಾ.

೬೮. ಪೇಸುಞ್ಞಹರಣೇಪಿ ದ್ವೇ ಆಪತ್ತಿಯೋ ಹೋನ್ತಿ.

೬೯. ಪಯೋಗೇತಿ ಪದಸೋ ಧಮ್ಮಂ ವಾಚೇನ್ತಸ್ಸ ವಚನಕಿರಿಯಾರಮ್ಭತೋ ಪಟ್ಠಾಯ ಯಾವ ಪದಾದೀನಂ ಪರಿಸಮಾಪನಂ, ಏತ್ಥನ್ತರೇ ಅಕ್ಖರುಚ್ಚಾರಣಪಯೋಗೇ ದುಕ್ಕಟಂ. ಪದಾನಂ ಪರಿಸಮತ್ತಿಯಂ ಪಾಚಿತ್ತಿಯಂ.

೭೦. ‘‘ತಿರತ್ತಾ ಅನುಪಸಮ್ಪನ್ನಸಹಸೇಯ್ಯಾಯಾ’’ತಿ ಪದಚ್ಛೇದೋ. ಅನುಪಸಮ್ಪನ್ನೇನ ಸಹಸೇಯ್ಯಾ ಅನುಪಸಮ್ಪನ್ನಸಹಸೇಯ್ಯಾ, ತಾಯ. ತಿರತ್ತಾ ಉತ್ತರಿಂ ಅನುಪಸಮ್ಪನ್ನಸಹಸೇಯ್ಯಾಯಾತಿ ಯೋಜನಾ. ಪಯೋಗೇತಿ ಸಯನತ್ಥಾಯ ಸೇಯ್ಯಾಪಞ್ಞಾಪನಕಾಯಾವಜ್ಜನಾದಿಪುಬ್ಬಪಯೋಗೇ. ಪನ್ನೇತಿ ಕಾಯಪಸಾರಣಲಕ್ಖಣೇನ ಸಯನೇನ ನಿಪನ್ನೇ.

೭೧. ಯೋ ಪನ ಭಿಕ್ಖು ಏಕರತ್ತಿಯಂ ಮಾತುಗಾಮೇನ ಸಹಸೇಯ್ಯಂ ಕಪ್ಪೇತಿ. ದುಕ್ಕಟಾದಯೋತಿ ‘‘ಪಯೋಗೇ ದುಕ್ಕಟಂ, ನಿಪನ್ನೇ ಪಾಚಿತ್ತಿಯ’’ನ್ತಿ ಯಥಾವುತ್ತದ್ವೇಆಪತ್ತಿಯೋ ಆಪಜ್ಜತೀತಿ ಯೋಜನಾ.

೭೨. ಪಯೋಗೇತಿ ಯಥಾವುತ್ತಲಕ್ಖಣಪಯೋಗೇ.

೭೩. ಅನುಪಸಮ್ಪನ್ನೇತಿ ಸಮೀಪತ್ಥೇ ಚೇತಂ ಭುಮ್ಮಂ. ಅನುಪಸಮ್ಪನ್ನಸ್ಸ ಸನ್ತಿಕೇ ಭೂತಂ ಉತ್ತರಿಮನುಸ್ಸಧಮ್ಮಂ ಯೋ ಸಚೇ ಆರೋಚೇತೀತಿ ಯೋಜನಾ. ದುಕ್ಕಟಾದಯೋತಿ ಯಸ್ಸ ಆರೋಚೇತಿ, ಸೋ ನಪ್ಪಟಿವಿಜಾನಾತಿ, ದುಕ್ಕಟಂ, ಪಟಿವಿಜಾನಾತಿ, ಪಾಚಿತ್ತಿಯನ್ತಿ ಏವಂ ದ್ವೇ ಆಪತ್ತಿಯೋ ತಸ್ಸ ಹೋನ್ತಿ.

೭೪. ಅಞ್ಞತೋ ಅಞ್ಞಸ್ಸ ಉಪಸಮ್ಪನ್ನಸ್ಸ ದುಟ್ಠುಲ್ಲಸ್ಸ ಆಪತ್ತಿಂ ಅನುಪಸಮ್ಪನ್ನೇ ಅನುಪಸಮ್ಪನ್ನಸ್ಸ ಸನ್ತಿಕೇ ವದಂ ವದನ್ತೋತಿ ಯೋಜನಾ. ಪಯೋಗೇತಿ ಆರಮ್ಭತೋ ಪಟ್ಠಾಯ ಪುಬ್ಬಪಯೋಗೇ ದುಕ್ಕಟಂ ಆಗಚ್ಛತಿ ದುಕ್ಕಟಂ ಆಪಜ್ಜತಿ. ಆರೋಚಿತೇ ಪಾಚಿತ್ತಿ ಸಿಯಾತಿ ಯೋಜನಾ.

೭೫. ಪಯೋಗೇತಿ ‘‘ಅಕಪ್ಪಿಯಪಥವಿಂ ಖಣಿಸ್ಸಾಮೀ’’ತಿ ಕುದಾಲ ಪರಿಯೇಸನಾದಿಸಬ್ಬಪಯೋಗೇತಿ.

ಮುಸಾವಾದವಗ್ಗವಣ್ಣನಾ ಪಠಮಾ.

೭೬. ಪಾತೇನ್ತೋತಿ ವಿಕೋಪೇನ್ತೋ. ತಸ್ಸಾತಿ ಭೂತಗಾಮಸ್ಸ. ಪಾತೇತಿ ವಿಕೋಪನೇ.

೭೭. ಅಞ್ಞವಾದಕವಿಹೇಸಕಾನಂ ಏಕಯೋಗನಿದ್ದಿಟ್ಠತ್ತಾ ತತ್ಥ ವುತ್ತನಯೇನೇವ ವಿಹೇಸಕೇ ಚ ಞಾತುಂ ಸಕ್ಕಾತಿ ತತ್ಥ ವಿಸುಂ ಆಪತ್ತಿಭೇದೋ ನ ವುತ್ತೋ.

೭೮. ಪರನ್ತಿ ಅಞ್ಞಂ ಸಙ್ಘೇನ ಸಮ್ಮತಸೇನಾಸನಪಞ್ಞಾಪಕಾದಿಕಂ ಉಪಸಮ್ಪನ್ನಂ. ಉಜ್ಝಾಪೇನ್ತೋತಿ ತಸ್ಸ ಅಯಸಂ ಉಪ್ಪಾದೇತುಕಾಮತಾಯ ಭಿಕ್ಖೂಹಿ ಅವಜಾನಾಪೇತುಂ ‘‘ಛನ್ದಾಯ ಇತ್ಥನ್ನಾಮೋ ಇದಂ ನಾಮ ಕರೋತೀ’’ತಿಆದೀನಿ ವತ್ವಾ ಅವಞ್ಞಾಯ ಓಲೋಕಾಪೇನ್ತೋ, ಲಾಮಕತೋ ವಾ ಚಿನ್ತಾಪೇನ್ತೋ. ಪಯೋಗೇತಿ ಉಜ್ಝಾಪನತ್ಥಾಯ ತಸ್ಸ ಅವಣ್ಣಭಣನಾದಿಕೇ ಪುಬ್ಬಪಯೋಗೇ.

೮೩. ಸಙ್ಘಿಕೇ ವಿಹಾರೇ ಪುಬ್ಬೂಪಗತಂ ಭಿಕ್ಖುಂ ಜಾನಂ ಜಾನನ್ತೋ ಅನುಪಖಜ್ಜ ಸೇಯ್ಯಂ ಕಪ್ಪೇತಿ, ತಸ್ಸೇವಂ ಸೇಯ್ಯಂ ಕಪ್ಪಯತೋತಿ ಯೋಜನಾ. ಪಯೋಗೇದುಕ್ಕಟಾದಯೋತಿ ಏತ್ಥ ಅಲುತ್ತಸಮಾಸೋ. ಆದಿ-ಸದ್ದೇನ ಸೇಯ್ಯಾಕಪ್ಪನೇ ಪಾಚಿತ್ತಿಯಂ ಸಙ್ಗಣ್ಹಾತಿ.

೮೪. ಪಯೋಗೇತಿ ‘‘ನಿಕ್ಕಡ್ಢಥ ಇಮ’’ನ್ತಿಆದಿಕೇ ಆಣತ್ತಿಕೇ ವಾ ‘‘ಯಾಹಿ ಯಾಹೀ’’ತಿಆದಿಕೇ ವಾಚಸಿಕೇ ವಾ ಹತ್ಥೇನ ತಸ್ಸ ಅಙ್ಗಪರಾಮಸನಾದಿವಸೇನ ಕತೇ ಕಾಯಿಕೇ ವಾ ನಿಕ್ಕಡ್ಢನಪಯೋಗೇ. ಸೇಸನ್ತಿ ಪಾಚಿತ್ತಿಯಂ.

೮೫. ‘‘ವೇಹಾಸಕುಟಿಯಾ ಉಪರೀ’’ತಿ ಪದಚ್ಛೇದೋ. ಆಹಚ್ಚಪಾದಕೇತಿ ಏತ್ಥ ‘‘ಮಞ್ಚೇ ವಾ ಪೀಠೇ ವಾ’’ತಿ ಸೇಸೋ. ಸೀದನ್ತಿ ನಿಸೀದನ್ತೋ. ದುಕ್ಕಟಾದಯೋತಿ ಪಯೋಗೇ ದುಕ್ಕಟಂ, ನಿಪಜ್ಜಾಯ ಪಾಚಿತ್ತಿಯನ್ತಿ ಇಮಾ ಆಪತ್ತಿಯೋ ಫುಸೇತಿ ಅತ್ಥೋ.

೮೬. ಅಸ್ಸ ಪಜ್ಜಸ್ಸ ಪಠಮಪಾದಂ ದಸಕ್ಖರಪಾದಕಂ ಛನ್ದೋವಿಚಿತಿಯಂ ವುತ್ತಗಾಥಾ, ‘‘ಗಾಥಾಛನ್ದೋ ಅತೀತದ್ವಯ’’ನ್ತಿ ಇಮಿನಾ ಛನ್ದೋವಿಚಿತಿಲಕ್ಖಣೇನ ಗಾಥಾಛನ್ದತ್ತಾ ಅಧಿಟ್ಠಿತ್ವಾ ದ್ವತ್ತಿಪರಿಯಾಯೇತಿ ಏತ್ಥ ಅಕ್ಖರದ್ವಯಂ ಅಧಿಕಂ ವುತ್ತನ್ತಿ ದಟ್ಠಬ್ಬಂ. ಪಯೋಗೇತಿ ಅಧಿಟ್ಠಾನಪಯೋಗೇ. ಅಧಿಟ್ಠಿತೇತಿ ದ್ವತ್ತಿಪರಿಯಾಯಾನಂ ಉಪರಿ ಅಧಿಟ್ಠಾನೇ ಕತೇ.

೮೭. ಪಯೋಗೇತಿ ಸಿಞ್ಚನಸಿಞ್ಚಾಪನಪಯೋಗೇ. ಸಿತ್ತೇತಿ ಸಿಞ್ಚನಕಿರಿಯಪರಿಯೋಸಾನೇ.

ಭೂತಗಾಮವಗ್ಗವಣ್ಣನಾ ದುತಿಯಾ.

೮೮. ದುಕ್ಕಟಂ ಫುಸೇತಿ ಯೋಜನಾ. ಓವದಿತೇ ಪಾಚಿತ್ತಿ ಸಿಯಾತಿ ಯೋಜನಾ.

೮೯. ವಿಭಾಗೋಯೇವ ವಿಭಾಗತಾ.

೯೦. ಅಞ್ಞಾತಿಕಾಯ ಭಿಕ್ಖುನಿಯಾ ಅಞ್ಞತ್ರ ಪಾರಿವತ್ತಕಾ ಚೀವರಂ ದೇನ್ತೋ ಭಿಕ್ಖು ದುವೇ ಆಪತ್ತಿಯೋ ಫುಸೇತಿ ಯೋಜನಾ. ಪಯೋಗೇತಿ ದಾನಪಯೋಗೇ.

೯೩. ‘‘ನಾವಂ ಏಕ’’ನ್ತಿ ಪದಚ್ಛೇದೋ. ಪಯೋಗೇತಿ ಅಭಿರುಹಣಪಯೋಗೇ. ದುಕ್ಕಟಾದಯೋತಿ ಆದಿ-ಸದ್ದೇನ ಅಭಿರುಳ್ಹೇ ಪಾಚಿತ್ತಿಯಂ ಸಙ್ಗಣ್ಹಾತಿ.

೯೪. ‘‘ದುವಿಧಂ ಆಪತ್ತಿ’’ನ್ತಿ ಪದಚ್ಛೇದೋ.

೯೬. ಭಿಕ್ಖುನಿಯಾ ಸದ್ಧಿಂ ರಹೋ ನಿಸಜ್ಜಂ ಕಪ್ಪೇನ್ತೋ ಭಿಕ್ಖು ಪಯೋಗೇದುಕ್ಕಟಾದಯೋ ದ್ವೇಪಿ ಆಪತ್ತಿಯೋ ಫುಸೇತಿ ಯೋಜನಾ.

ಓವಾದವಗ್ಗವಣ್ಣನಾ ತತಿಯಾ.

೯೭. ತದುತ್ತರಿನ್ತಿ ತತೋ ಭುಞ್ಜಿತುಂ ಅನುಞ್ಞಾತಏಕದಿವಸತೋ ಉತ್ತರಿಂ ದುತಿಯದಿವಸತೋ ಪಟ್ಠಾಯ. ಅನನ್ತರಸ್ಸ ವಗ್ಗಸ್ಸಾತಿ ಓವಾದವಗ್ಗಸ್ಸ. ನವಮೇನಾತಿ ಭಿಕ್ಖುನಿಯಾ ಪರಿಪಾಚಿತಪಿಣ್ಡಪಾತಸಿಕ್ಖಾಪದೇನ.

೯೯. ದ್ವತ್ತಿಪತ್ತೇತಿ ದ್ವತ್ತಿಪತ್ತಪೂರೇ. ತದುತ್ತರಿನ್ತಿ ದ್ವತ್ತಿಪತ್ತಪೂರತೋ ಉತ್ತರಿಂ. ಪಯೋಗೇತಿ ಪಟಿಗ್ಗಹಣಪಯೋಗೇ.

೧೦೧. ಅಭಿಹಟ್ಠುನ್ತಿ ಅಭಿಹರಿತ್ವಾ.

೧೦೨. ತಸ್ಸಾತಿ ಅಭಿಹರನ್ತಸ್ಸ. ಪಿಟಕೇತಿ ವಿನಯಪಿಟಕೇ.

೧೦೩. ದಸಮೇಪೀತಿ ಏತ್ಥ ‘‘ದಸಮೇ ಅಪೀ’’ತಿ ಪದಚ್ಛೇದೋ.

ಭೋಜನವಗ್ಗವಣ್ಣನಾ ಚತುತ್ಥಾ.

೧೦೪. ಅಚೇಲಕಾದಿನೋತಿ ಆದಿ-ಸದ್ದೇನ ‘‘ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ’’ತಿ (ಪಾಚಿ. ೨೭೦) ವುತ್ತೇ ಸಙ್ಗಣ್ಹಾತಿ. ಭೋಜನಾದಿಕನ್ತಿ ಆದಿ-ಸದ್ದೇನ ಖಾದನೀಯಂ ಸಙ್ಗಣ್ಹಾತಿ. ಪಯೋಗೇತಿ ಸಹತ್ಥಾ ದಾನಪಯೋಗೇ.

೧೦೫. ದಾಪೇತ್ವಾ ವಾ ಅದಾಪೇತ್ವಾ ವಾ ಕಿಞ್ಚಿ ಆಮಿಸಂ. ಪಯೋಗೇತಿ ಉಯ್ಯೋಜನಪಯೋಗೇ. ತಸ್ಮಿನ್ತಿ ತಸ್ಮಿಂ ಭಿಕ್ಖುಮ್ಹಿ. ಉಯ್ಯೋಜಿತೇ ಪಾಚಿತ್ತಿ ಸಿಯಾತಿ ಯೋಜನಾ.

೧೦೯. ಉಮ್ಮಾರಾತಿಕ್ಕಮೇತಿ ಇನ್ದಖೀಲಾತಿಕ್ಕಮೇ.

೧೧೦. ತದುತ್ತರಿನ್ತಿ ತತೋ ಪರಿಚ್ಛಿನ್ನರತ್ತಿಪರಿಯನ್ತತೋ ವಾ ಪರಿಚ್ಛಿನ್ನಭೇಸಜ್ಜಪರಿಯನ್ತತೋ ವಾ ಉತ್ತರಿಂ.

೧೧೧. ಉಯ್ಯುತ್ತಂ ದಸ್ಸನತ್ಥಾಯ ಗಚ್ಛನ್ತೋ ದ್ವೇ ಆಪತ್ತಿಯೋ ಫುಸೇತಿ ಯೋಜನಾ.

ಅಚೇಲಕವಗ್ಗವಣ್ಣನಾ ಪಞ್ಚಮಾ.

೧೧೪. ಮೇರೇಯ್ಯನ್ತಿ ಮೇರಯಂ. ನಿರುತ್ತಿನಯೇನ ಅ-ಕಾರಸ್ಸ ಏ-ಕಾರೋ, ಯ-ಕಾರಸ್ಸ ಚ ದ್ವಿತ್ತಂ. ಮೇರಯ-ಸದ್ದಪರಿಯಾಯೋ ವಾ ಮೇರೇಯ್ಯ-ಸದ್ದೋ. ಮುನೀತಿ ಭಿಕ್ಖು.

೧೧೫. ‘‘ಭಿಕ್ಖು ಅಙ್ಗುಲಿಪತೋದೇನಾ’’ತಿ ಪದಚ್ಛೇದೋ. ಪಯೋಗೇತಿ ಹಾಸಾಪನಪಯೋಗೇ. ತಸ್ಸಾತಿ ಹಾಸಾಪೇನ್ತಸ್ಸ.

೧೧೬. ಗೋಪ್ಫಕಾ ಹೇಟ್ಠಾ ಉದಕೇ ದುಕ್ಕಟಂ. ಗೋಪ್ಫಕತೋ ಉಪರಿ ಉಪರಿಗೋಪ್ಫಕಂ, ಉದಕಂ, ತಸ್ಮಿಂ, ಗೋಪ್ಫಕತೋ ಅಧಿಕಪ್ಪಮಾಣೇ ಉದಕೇತಿ ಅತ್ಥೋ.

೧೧೭. ಅನಾದರಿಯನ್ತಿ ಪುಗ್ಗಲಾನಾದರಿಯಂ, ಧಮ್ಮಾನಾದರಿಯಂ ವಾ. ಪಯೋಗೇತಿ ಅನಾದರಿಯವಸೇನ ಪವತ್ತೇ ಕಾಯಪಯೋಗೇ ವಾ ವಚೀಪಯೋಗೇ ವಾ. ಕತೇ ಅನಾದರಿಯೇ.

೧೧೮. ಪಯೋಗೇತಿ ಭಿಂಸಾಪನಪಯೋಗೇ.

೧೧೯. ಜೋತಿನ್ತಿ ಅಗ್ಗಿಂ. ಸಮಾದಹಿತ್ವಾನಾತಿ ಜಾಲೇತ್ವಾ. ‘‘ವಿಸಿಬ್ಬೇನ್ತೋ’’ತಿ ಇಮಿನಾ ಫಲೂಪಚಾರೇನ ಕಾರಣಂ ವುತ್ತಂ. ವಿಸಿಬ್ಬನಕಿರಿಯಾ ಹಿ ಸಮಾದಹನಕಿರಿಯಾಯ ಫಲನ್ತಿ ವಿಸಿಬ್ಬನಕಿರಿಯಾವೋಹಾರೇನ ಸಮಾದಹನಕಿರಿಯಾವ. ತಸ್ಮಾ ವಿಸಿಬ್ಬೇನ್ತೋತಿ ಏತ್ಥ ಸಮಾದಹನ್ತೋತಿ ಅತ್ಥೋ. ಪಯೋಗೇತಿ ಸಮಾದಹನಸಮಾದಹಾಪನಪಯೋಗೇ. ವಿಸೀವಿತೇತಿ ವುತ್ತನಯೇನ ಸಮಾದಹಿತೇತಿ ಅತ್ಥೋ.

೧೨೦. ಪಯೋಗೇತಿ ಚುಣ್ಣಮತ್ತಿಕಾಭಿಸಙ್ಖರಣಾದಿಸಬ್ಬಪಯೋಗೇ. ಇತರನ್ತಿ ಪಾಚಿತ್ತಿಯಂ.

೧೨೧. ತಿಣ್ಣಂ ದುಬ್ಬಣ್ಣಕರಣಾನನ್ತಿ ಕಂಸನೀಲಪತ್ತನೀಲಕದ್ದಮಸಙ್ಖಾತಾನಂ ತಿಣ್ಣಂ ದುಬ್ಬಣ್ಣಕರಣಾನಂ. ಏಕಂ ಅಞ್ಞತರಂ ಅನಾದಿಯ ಅದತ್ವಾ. ಚೀವರನ್ತಿ ನವಚೀವರಂ.

೧೨೨. ನತ್ಥಿ ಏತಸ್ಸ ಉದ್ಧಾರನ್ತಿ ಅನುದ್ಧಾರೋ, ತಂ ಅನುದ್ಧಾರನ್ತಿ ವತ್ತಬ್ಬೇ ಗಾಥಾಬನ್ಧವಸೇನ ರಸ್ಸತ್ತಂ, ಅಕತಪಚ್ಚುದ್ಧಾರನ್ತಿ ಅತ್ಥೋ.

೧೨೩. ಅಪನಿಧೇನ್ತೋತಿ ಅಪನೇತ್ವಾ ನಿಧೇನ್ತೋ ನಿಕ್ಖಿಪೇನ್ತೋ. ಪತ್ತಾದಿಕನ್ತಿ ಆದಿ-ಸದ್ದೇನ ಚೀವರನಿಸೀದನಸೂಚಿಘರಕಾಯಬನ್ಧನಾನಂ ಗಹಣಂ. ಪಯೋಗೇತಿ ಅಪನಿಧಾನಪಯೋಗೇ. ತಸ್ಮಿಂ ಪತ್ತಾದಿಕೇ ಪಞ್ಚವಿಧೇ ಪರಿಕ್ಖಾರೇ. ಅಪನಿಹಿತೇ ಸೇಸಾ ಪಾಚಿತ್ತಿಯಾಪತ್ತಿ ಸಿಯಾತಿ ಯೋಜನಾ.

ಸುರಾಪಾನವಗ್ಗವಣ್ಣನಾ ಛಟ್ಠಾ.

೧೨೪. ತಪೋಧನೋತಿ ಪಾತಿಮೋಕ್ಖಸಂವರಸೀಲಸಙ್ಖಾತಂ ತಪೋಧನಮಸ್ಸಾತಿ ತಪೋಧನೋ, ಭಿಕ್ಖು.

೧೨೫. ತಸ್ಮಿಂ ಓಪಾತೇ.

೧೨೬. ಮನುಸ್ಸವಿಗ್ಗಹೋ ಮನುಸ್ಸಸರೀರೋ. ತಿರಚ್ಛಾನಗತೋ ನಾಗೋ ವಾ ಸುಪಣ್ಣೋ ವಾ. ತಸ್ಸ ಓಪಾತಖಣಕಸ್ಸ.

೧೨೭. ಪಟುಬುದ್ಧಿನಾತಿ ಸಬ್ಬೇಸು ಞೇಯ್ಯಧಮ್ಮೇಸು ನಿಪುನಞಾಣೇನ ಭಗವತಾ.

೧೨೮. ಪಯೋಗೇತಿ ಪರಿಭೋಗತ್ಥಾಯ ಗಹಣಾದಿಕೇ ಪಯೋಗೇ. ತಸ್ಸಾತಿ ಭಿಕ್ಖುಸ್ಸ.

೧೨೯. ಉಕ್ಕೋಟೇನ್ತೋತಿ ಉಚ್ಚಾಲೇನ್ತೋ ಯಥಾಠಾನೇ ಠಾತುಂ ಅದೇನ್ತೋ. ಪಯೋಗೇತಿ ಉಕ್ಕೋಟನಪಯೋಗೇ. ಉಕ್ಕೋಟಿತೇ ಪಾಚಿತ್ತಿಯಂ ಸಿಯಾತಿ ಯೋಜನಾ.

೧೩೦. ದುಟ್ಠುಲ್ಲಂ ವಜ್ಜಕನ್ತಿ ಸಙ್ಘಾದಿಸೇಸಾದಿಕೇ. ಏಕಂ ಪಾಚಿತ್ತಿಯಂ ಆಪತ್ತಿಂ ಆಪಜ್ಜತಿ ಇತಿ ದೀಪಿತನ್ತಿ ಯೋಜನಾ.

೧೩೧. ಪಯೋಗೇತಿ ಗಣಪರಿಯೇಸನಾದಿಪಯೋಗೇ. ದುಕ್ಕಟಂ ಪತ್ತೋ ಸಿಯಾ ದುಕ್ಕಟಾಪತ್ತಿಂ ಆಪನ್ನೋ ಭವೇಯ್ಯಾತಿ ಅತ್ಥೋ. ಸೇಸಾತಿ ಪಾಚಿತ್ತಿಯಾಪತ್ತಿ ಉಪಸಮ್ಪಾದಿತೇ ಸಿಯಾ. ಗಾಥಾಬನ್ಧವಸೇನ ಉಪಸಗ್ಗಲೋಪೋ.

೧೩೨-೩. ಜಾನಂ ಥೇಯ್ಯಸತ್ಥೇನ ಸಹ ಸಂವಿಧಾಯ ಮಗ್ಗಂ ಪಟಿಪಜ್ಜತೋ ಚ ತಥೇವ ಮಾತುಗಾಮೇನ ಸಹ ಸಂವಿಧಾಯ ಮಗ್ಗಂ ಪಟಿಪಜ್ಜತೋ ಚಾತಿ ಯೋಜನಾ. ಪಯೋಗೇತಿ ಸಂವಿಧಾಯ ಗನ್ತುಂ ಪಟಿಪುಚ್ಛಾದಿಕರಣಪಯೋಗೇ. ಪಟಿಪನ್ನೇತಿ ಮಗ್ಗಪಟಿಪನ್ನೇ. ಅನನ್ತರನ್ತಿ ಅದ್ಧಯೋಜನಗಾಮನ್ತರಾತಿಕ್ಕಮನಾನನ್ತರಂ.

೧೩೪. ಞತ್ತಿಯಾ ಓಸಾನೇ ದುಕ್ಕಟಂ ಫುಸೇತಿ ಯೋಜನಾ.

೧೩೫. ಅಕತಾನುಧಮ್ಮೇನಾತಿ ಅನುಧಮ್ಮೋ ವುಚ್ಚತಿ ಆಪತ್ತಿಯಾ ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ವಾ ಧಮ್ಮೇನ ವಿನಯೇನ ಸತ್ಥುಸಾಸನೇನ ಉಕ್ಖಿತ್ತಕಸ್ಸ ಅನುಲೋಮವತ್ತಂ ದಿಸ್ವಾ ಕತ್ವಾ ಓಸಾರಣಾ, ಸೋ ಓಸಾರಣಸಙ್ಖಾತೋ ಅನುಧಮ್ಮೋ ಯಸ್ಸ ನ ಕತೋ, ಅಯಂ ಅಕತಾನುಧಮ್ಮೋ ನಾಮ, ತಾದಿಸೇನ ಭಿಕ್ಖುನಾ ಸದ್ಧಿನ್ತಿ ಅತ್ಥೋ. ಸಮ್ಭುಞ್ಜನ್ತೋತಿ ಆಮಿಸಸಮ್ಭೋಗಂ ಕರೋನ್ತೋ ಭಿಕ್ಖು. ಪಯೋಗೇತಿ ಭುಞ್ಜಿತುಂ ಆಮಿಸಪಟಿಗ್ಗಹಣಾದಿಪಯೋಗೇ. ಭುತ್ತೇತಿ ಸಮ್ಭುತ್ತೇ, ಉಭಯಸಮ್ಭೋಗೇ, ತದಞ್ಞತರೇ ವಾ ಕತೇತಿ ಅತ್ಥೋ.

೧೩೬. ಉಪಲಾಪೇನ್ತೋತಿ ಪತ್ತಚೀವರಉದ್ದೇಸಪರಿಪುಚ್ಛನಾದಿವಸೇನ ಸಙ್ಗಣ್ಹನ್ತೋ. ಪಯೋಗೇತಿ ಉಪಲಾಪನಪಯೋಗೇ.