೩. ನಗ್ಗವಗ್ಗವಣ್ಣನಾ

೧-೨. ಪಠಮದುತಿಯಸಿಕ್ಖಾಪದವಣ್ಣನಾ

೮೮೩. ನಗ್ಗವಗ್ಗಸ್ಸ ಪಠಮದುತಿಯಾನಿ ಉತ್ತಾನಾನಿ. ಪಠಮೇ ಅಯಂ ವಿಸೇಸೋ – ಭಿಕ್ಖುಸ್ಸ ತಥಾ ನ್ಹಾಯನ್ತಸ್ಸ ದುಕ್ಕಟಂ ಅಞ್ಞತ್ರ ಜನ್ತಾಘರಉದಕಪಟಿಚ್ಛಾದೀಹಿ. ನ ಚ ವಿಗರಹಿ ತತ್ಥ ಭಗವಾ ಅತ್ತನಾವ ಅನನುಞ್ಞಾತತ್ತಾ ಉದಕಸಾಟಿಕಾಯಾತಿ ಪೋರಾಣಾ. ‘‘ಏಕಮೇವ ನಿವಾಸೇತ್ವಾ, ಪಾರುಪಿತ್ವಾ ಚ ನಹಾಯಿತುಂ ನ ವಟ್ಟತೀ’’ತಿ ಪೋರಾಣಗಣ್ಠಿಪದೇ ವುತ್ತಂ.

ಪಠಮದುತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ತತಿಯಸಿಕ್ಖಾಪದವಣ್ಣನಾ

೮೯೪. ತತಿಯೇ ಅನ್ತೋಚತೂಹಪಞ್ಚಾಹಂ ಧುರಂ ನಿಕ್ಖಿಪನ್ತಿಯಾಪಿ ಆಪತ್ತಿ ಏವ. ಲಿಙ್ಗಪರಿವತ್ತೇ ಧುರಂ ನಿಕ್ಖಿಪನ್ತಿಯಾ ದುಕ್ಕಟಂ ತಿಕದುಕ್ಕಟತ್ತಾ. ‘‘ಸಮ್ಬಹುಲಾಹಿ ಭಿಕ್ಖುನೀಹಿ ಸದ್ಧಿನ್ತಿ ಏತ್ಥ ಚತಸ್ಸೋಪಿ ಸಮ್ಬಹುಲಾ’’ತಿ ಪೋರಾಣಗಣ್ಠಿಪದೇ ವುತ್ತಂ.

ತತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೪. ಚತುತ್ಥಸಿಕ್ಖಾಪದವಣ್ಣನಾ

೮೯೮. ಚತುತ್ಥೇ ಸಙ್ಘಾಟಿಚಾರನ್ತಿ ಏತ್ಥ ಸಙ್ಘಾಟಿಆದಿವಸೇನ ಅಧಿಟ್ಠಿತಾನಂಯೇವಾಯಂ ವಿಧಿ, ನೇತರಾಸಂ ಕಿರ. ತತ್ಥ ತಿಚೀವರೇ ಏವ ವಿಪ್ಪವಾಸಪಚ್ಚಯಾ ನಿಸ್ಸಗ್ಗಿಯಂ. ಅನ್ತೋಚೀವರಕಾಲೇಪಿ ಪಞ್ಚಾಹಿಕಂ ಸಙ್ಘಾಟಿಚಾರಂ ಅತಿಕ್ಕಾಮೇನ್ತಿಯಾ ಆಪತ್ತಿಯೇವ. ‘‘ವಿನಾ ಏತೇಹಿ ಚೀವರೇಹಿ ಉಪಸಮ್ಪದಂ ಕಾತುಂ ನ ವಟ್ಟತೀ’’ತಿ ಪೋರಾಣಗಣ್ಠಿಪದೇ ವುತ್ತಂ.

ಚತುತ್ಥಸಿಕ್ಖಾಪದವಣ್ಣನಾ ನಿಟ್ಠಿತಾ.

೫. ಪಞ್ಚಮಸಿಕ್ಖಾಪದವಣ್ಣನಾ

೯೦೬. ಪಞ್ಚಮಸ್ಸ ಅನಾಪತ್ತಿವಾರೇ ತಾಯ ವಾ ಅವಿಪ್ಪವಾಸಾಯಾತಿ ಅತ್ಥತೋ ಲಬ್ಭತಿ.

ಪಞ್ಚಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೯೦೭-೯೧೧. ಛಟ್ಠಸತ್ತಮಾನಿ ಉತ್ತಾನಾನಿ.

೮. ಅಟ್ಠಮಸಿಕ್ಖಾಪದವಣ್ಣನಾ

೯೧೬. ಸೋಕಜ್ಝಾಯಿಕಾ ನಾಮ ಕಿರ ಮಾಯಾಕಾರಾ. ವಿಲುಮ್ಪಕಾ ಭಣ್ಡಕಾತಿ ಚ ಪೋರಾಣಾ.

ಅಟ್ಠಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೯. ನವಮಸಿಕ್ಖಾಪದವಣ್ಣನಾ

೯೨೦. ‘‘ಕಥಞ್ಹಿ ನಾಮ ಅತಿಕ್ಕಾಮೇಸ್ಸತೀ’’ತಿ ವುತ್ತತ್ತಾ ಥುಲ್ಲನನ್ದಾ ಚೀವರಕಾಲಸಮಯಂ ಆಗಮೇಥಾತಿ ಅತಿಕ್ಕಮಾಪೇಸೀತಿ ಸಿದ್ಧಂ ಹೋತಿ.

ನವಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦. ದಸಮಸಿಕ್ಖಾಪದವಣ್ಣನಾ

೯೨೭. ದಸಮೇ ಏಕಕುಲಂ ಏತದವೋಚುನ್ತಿ ಏತ್ಥ ಕುಲಂ ನಾಮ ತಸ್ಮಿಂ ಮನುಸ್ಸಾ, ತಸ್ಮಾ ಬಹುವಚನಂ.

ದಸಮಸಿಕ್ಖಾಪದವಣ್ಣನಾ ನಿಟ್ಠಿತಾ.

ನಗ್ಗವಗ್ಗವಣ್ಣನಾ ನಿಟ್ಠಿತಾ.