೪. ತುವಟ್ಟವಗ್ಗವಣ್ಣನಾ

೧. ಪಠಮಸಿಕ್ಖಾಪದವಣ್ಣನಾ

೯೩೪-೫. ಏಕಾಯ ನಿಪನ್ನಾಯ ಅಪರಾ ನಿಪಜ್ಜತಿ, ಆಪತ್ತಿ ಪಾಚಿತ್ತಿಯಸ್ಸಾತಿ ‘‘ಉಭಿನ್ನಮ್ಪಿ ಪಠಮನಿಪನ್ನಾಯ ಅನುಟ್ಠಾಪನಾ’’ತಿ ವತ್ವಾ ಏತ್ಥ ಕಿರಿಯಾಕಿರಿಯನ್ತಿ ಏಕೇ, ತಂ ಅಟ್ಠಕಥಾಯ ವಿರುಜ್ಝತಿ. ‘‘ಕಿರಿಯ’’ನ್ತಿ ಹಿ ಅಟ್ಠಕಥಾಯಂ ವುತ್ತಂ. ಅಥ ಕಸ್ಸಾ ಆಪತ್ತೀತಿ? ಉಭಿನ್ನಮ್ಪಿ ನಿಪಜ್ಜನಕಿರಿಯಂ ಪಟಿಚ್ಚ. ಇಮಸ್ಸ ಅನಾಪತ್ತಿವಾರೇ ‘‘ವವತ್ಥಾನಂ ದಸ್ಸೇತ್ವಾ’’ತಿ ನತ್ಥಿ, ತಸ್ಮಾ ವವತ್ಥಾನಂ ಕತ್ವಾ ನಿಪಜ್ಜಿತುಂ ನ ವಟ್ಟತೀತಿ ಏಕೇ. ವಿಪುಲತರೇ ವಟ್ಟತೀತಿ ಏಕೇ. ‘‘ಅನ್ತರಂ ಕತ್ವಾ ನಿಪಜ್ಜಿತುಂ ವಟ್ಟತೀ’’ತಿ ಪೋರಾಣಗಣ್ಠಿಪದೇ ಲಿಖಿತಂ.

ಪಠಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೨. ದುತಿಯಸಿಕ್ಖಾಪದವಣ್ಣನಾ

೯೪೦. ವವತ್ಥಾನಂ ದಸ್ಸೇತ್ವಾತಿ ಏತ್ಥ ಉಪರಿ ಪಾರುಪನಮ್ಪಿ ಮಜ್ಝೇ ಓಭೋಗಂ ಕತ್ವಾ ಉಭಿನ್ನಂ ಅನ್ತರೇ ಓತಾರೇತಿ, ವಟ್ಟತೀತಿ ಏಕೇ. ವವತ್ಥಾನಞ್ಚ ಯಥಾ ಠಾನೇ ನ ತಿಟ್ಠತಿ, ತಥಾ ಅತಿಕ್ಕಮಿತ್ವಾ ತುವಟ್ಟೇನ್ತಿಯಾ ಆಪತ್ತಿಯೇವಾತಿ. ‘‘ಕಿರಿಯಾಕಿರಿಯ’’ನ್ತಿ ಚ ಪೋರಾಣಗಣ್ಠಿಪದೇ ವುತ್ತಂ.

ದುತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ತತಿಯಸಿಕ್ಖಾಪದವಣ್ಣನಾ

೯೪೧. ಅತ್ತನೋ ಸಜ್ಝಾಯನಟ್ಠಾನೇ ಚೇ ವುಡ್ಢತರಾ ಆಗಚ್ಛತಿ, ವನ್ದನಕಾಲೇ ವಾ, ಆಪುಚ್ಛನಕಿಚ್ಚಂ ನತ್ಥಿ. ಏಕಸ್ಮಿಂ ಓವರಕೇ ಆಪುಚ್ಛಿತಬ್ಬಂ. ‘‘ಅಥ ಓವರಕೇ ಮಹಾಥೇರೀ ವಸತಿ, ಸಮ್ಮುಖೇ ಇತರಾ, ಆಪುಚ್ಛಿತಬ್ಬಾ ತಸ್ಸಾ ಉಪಚಾರತ್ತಾ’’ತಿ ಪೋರಾಣಗಣ್ಠಿಪದೇ ವುತ್ತಂ.

ತತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೯೪೬-೯೫೦. ಚತುತ್ಥಪಞ್ಚಮಸಿಕ್ಖಾಪದಂ ಉತ್ತಾನತ್ಥಮೇವ.

೬. ಛಟ್ಠಸಿಕ್ಖಾಪದವಣ್ಣನಾ

೯೫೬. ಗಹಪತಿ ನಾಮ ಠಪೇತ್ವಾ ಸಹಧಮ್ಮಿಕೇ ವೇದಿತಬ್ಬೋ, ತಸ್ಮಾ ಭಿಕ್ಖುನಾ ವಾ ಸಾಮಣೇರೇನ ವಾ ಅನನುಲೋಮಿಕೇನ ಸಂಸಗ್ಗೇನ ಸಂಸಟ್ಠಾಪಿ ನ ಸಮನುಭಾಸಿತಬ್ಬಾತಿ ಸಮ್ಭವತಿ ಏವ.

ಛಟ್ಠಸಿಕ್ಖಾಪದವಣ್ಣನಾ ನಿಟ್ಠಿತಾ.

೯೬೧-೫. ಸತ್ತಮಅಟ್ಠಮ ಸಿಕ್ಖಾಪದಂ ಉತ್ತಾನತ್ಥಮೇವ.

೯. ನವಮಸಿಕ್ಖಾಪದವಣ್ಣನಾ

೯೬೯. ಏಕಿನ್ದ್ರಿಯನ್ತಿ ಕಾಯಿನ್ದ್ರಿಯೇನೇವ ಏಕಿನ್ದ್ರಿಯಂ, ನಿಗಣ್ಠಾನಂ ಅಚೇಲಕಾನಂ ಮತಂ. ಕಾಪಿಲಾ ಪನ ‘‘ಪಞ್ಚಿನ್ದ್ರಿಯಾ’’ತಿ ಮಞ್ಞನ್ತಾ ಏವಂ ವದನ್ತಿ ‘‘ಸಚಕ್ಖುಕತ್ತಾ ಅಲಾಬುಮಾಲುವಾದಯೋ ಯತ್ಥ ಆಲಮ್ಬನಂ, ತತ್ಥ ಗಚ್ಛನ್ತಿ. ಸಸೋತಕತ್ತಾ ಕದಲಿಯೋ ಮೇಘಗಜ್ಜಿತಂ ಸುತ್ವಾ ಗಬ್ಭಂ ಗಣ್ಹನ್ತಿ. ಸಘಾನಕತ್ತಾ ಪನಸಾದಯೋ ಕುಣಪಗನ್ಧೇನ ಫಲನ್ತಿ. ಸಜಿವ್ಹಕತ್ತಾ ಉದಕಂ ಪಿವನ್ತಿ ಯೇನ, ಸಬ್ಬೇಪಿ ‘ಪಾದಪಾ’ತಿ ವುಚ್ಚನ್ತಿ. ಸಕಾಯಪಸಾದತ್ತಾ ಇತ್ಥಿಸಮ್ಫಸ್ಸೇನ ಅಸೋಕರುಕ್ಖಾ ಪುಪ್ಫನ್ತೀ’’ತಿ. ಸಙ್ಘಾತನ್ತಿ ವಿನಾಸಂ.

೯೭೦. ಇಧ ಚ ವಸ್ಸಚ್ಛೇದೇನ ದುಕ್ಕಟಂ. ಪಠಮಂ ಆವಸಿತ್ವಾ ಪಚ್ಛಾ ಚಾರಿಕಾ ಚರಣಪಚ್ಚಯಾ ಪಾಚಿತ್ತಿಯಂ ಆಪಜ್ಜತೀತಿ ವೇದಿತಬ್ಬಂ. ಅಥ ವಸ್ಸಂ ಅವಸಿತ್ವಾ ಚರತಿ, ಅವಸ್ಸುಪಗಮನಪಚ್ಚಯಾ ದುಕ್ಕಟಂ ಆಪಜ್ಜತಿ. ಪೋರಾಣಗಣ್ಠಿಪದೇ ಪನ ‘‘ಅನ್ತೋಸತ್ತಾಹೇ ಅನ್ತೋವಸ್ಸೇ ಚಾರಿಕಂ ಚರನ್ತಿಯಾ ಪಾಚಿತ್ತಿಯಂ. ಸತ್ತಾಹಕರಣೀಯೇನ ಪನ ವಟ್ಟತಿ, ಭಿಕ್ಖುನೋ ದುಕ್ಕಟಂ ಹೋತೀ’’ತಿ ವುತ್ತಂ.

೯೭೨. ಕೇನಚಿ ಉಬ್ಬಾಳ್ಹಾತಿ ವಸ್ಸಚ್ಛೇದಕಾರಣೇನಾತಿ ನೋ ತಕ್ಕೋತಿ ಆಚರಿಯೋ. ಕಿತ್ತಾವತಾ ಚಾರಿಕಾ ಹೋತೀತಿ? ಇದಂ ನ ಸಬ್ಬತ್ಥ ವಿಚಾರಿತಂ. ಅನನ್ತರಸಿಕ್ಖಾಪದೇ ‘‘ಅನ್ತಮಸೋ ಛಪ್ಪಞ್ಚಯೋಜನಾನಿಪೀ’’ತಿ ವುತ್ತತ್ತಾ ಸೋ ಚ ಮಞ್ಞೇ ಹೇಟ್ಠಿಮಪರಿಚ್ಛೇದೋತಿ.

ನವಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦. ದಸಮಸಿಕ್ಖಾಪದವಣ್ಣನಾ

೯೭೩. ದಸಮೇ ‘‘ಆಹುನ್ದರಿಕಾ’’ತಿ ಪಠನ್ತಿ ಕಿರ.

ದಸಮಸಿಕ್ಖಾಪದವಣ್ಣನಾ ನಿಟ್ಠಿತಾ.

ತುವಟ್ಟವಗ್ಗವಣ್ಣನಾ ನಿಟ್ಠಿತಾ.