ಖನ್ಧಕಪುಚ್ಛಾವಾರವಣ್ಣನಾ

ಪುಚ್ಛಾವಿಸ್ಸಜ್ಜನಾವಣ್ಣನಾ

೩೨೦. ನಿದಾನಂ ನಾಮ ಕಾಲಞ್ಚ ನಗರಞ್ಚ ದೇಸೋ ಚ ಭಗವಾ ಚ. ವತ್ಥುಪುಗ್ಗಲಾದಿ ನಿದ್ದೇಸೋ. ಯಾನಿ ತತ್ಥ ಉಪಸಮ್ಪದಕ್ಖನ್ಧಕೇ ‘‘ನ, ಭಿಕ್ಖವೇ, ಊನವೀಸತಿವಸ್ಸೋ ಪುಗ್ಗಲೋ ಉಪಸಮ್ಪಾದೇತಬ್ಬೋ’’ತಿಆದಿನಾ ನಯೇನ ಉತ್ತಮಾನಿ ಪದಾನಿ ವುತ್ತಾನೀತಿ ಸಮ್ಬನ್ಧೋ. ಸಾ ಸಾ ತಸ್ಸ ತಸ್ಸ ಪದಸ್ಸ ಆಪತ್ತೀತಿ ವುಚ್ಚತೀತಿ ಯಾ ‘‘ನ, ಭಿಕ್ಖವೇ, ಊನವೀಸತಿವಸ್ಸೋ ಪುಗ್ಗಲೋ ಉಪಸಮ್ಪಾದೇತಬ್ಬೋ’’ತಿ ಪದೇನ ಪಞ್ಞತ್ತಾ ಆಪತ್ತಿ, ಸಾ ತಸ್ಸ ಪದಸ್ಸಾತಿ ಅಧಿಪ್ಪಾಯೋ. ಚಮ್ಮಸಂಯುತ್ತೇತಿ ಚಮ್ಮಕ್ಖನ್ಧಕೇ.