೮. ಸಹಧಮ್ಮಿಕವಗ್ಗೋ

೧. ಸಹಧಮ್ಮಿಕಸಿಕ್ಖಾಪದವಣ್ಣನಾ

೪೩೪. ಸಹಧಮ್ಮಿಕಸಿಕ್ಖಾಪದಂ ಉತ್ತಾನತ್ಥಮೇವ.

೨. ವಿಲೇಖನಸಿಕ್ಖಾಪದವಣ್ಣನಾ

೪೩೮. ಆಪತ್ತಿಞ್ಚ ಸತಿಸಮ್ಮೋಸಾಯಾತಿ ಏತ್ಥ ಚ-ಸದ್ದೋ ಕತ್ತಬ್ಬಞ್ಚ ನ ಕರೋತೀತಿ ದೀಪೇತಿ, ನ ಚತ್ತಾರಿ ಏವಾತಿ ವುತ್ತಂ ಹೋತಿ. ರಟ್ಠೇಕದೇಸೋ ಜನಪದೋ. ಬುದ್ಧಕಾಲೇ ಅರಿಟ್ಠಕಣ್ಟಕಾ ಸಾಸನಪಚ್ಚತ್ಥಿಕಾ. ‘‘ನಾಲಂ ಅನ್ತರಾಯಾಯಾ’’ತಿ ವಚನೇನ ಹಿ ತೇ ಭಗವತೋ ಅಸಬ್ಬಞ್ಞುತಂ ದೀಪೇನ್ತಿ. ಪರಿನಿಬ್ಬುತೇ ಭಗವತಿ ದಸವತ್ಥುದೀಪಕಾ ವಜ್ಜಿಪುತ್ತಕಾ. ತೇ ಹಿ ವಿನಯಸಾಸನಪಚ್ಚತ್ಥಿಕಾ. ಪರೂಪಹಾರಾದಿವಾದಾ ಪನ ಸುತ್ತನ್ತಾಭಿಧಮ್ಮಪ್ಪಚ್ಚತ್ಥಿಕಾ. ಕೇ ಪನ ತೇ? ಏಕಚ್ಚೇ ಮಹಾಸಙ್ಘಿಕಾದಯೋ, ನ ಸಬ್ಬೇತಿ ದೀಪನತ್ಥಂ ‘‘ಪರೂಪಹಾರಾ…ಪೇ… ವಾದಾ’’ತಿ ವಿಸೇಸನವಚನಮಾಹ. ತತ್ಥ ಯೇ ಕುಹಕಾ ಪಾಪಿಚ್ಛಕಾ ಅಭೂತಂ ಉಲ್ಲಪಿತ್ವಾ ಪಟಿಲದ್ಧವರಭೋಜನಾನಿ ಭುಞ್ಜಿತ್ವಾ ಮುಟ್ಠಸ್ಸತೀ ನಿದ್ದಂ ಓಕ್ಕಮಿತ್ವಾ ಸುಕ್ಕವಿಸ್ಸಟ್ಠಿಂ ಪತ್ತಾ, ಅಞ್ಞೇಹಿ ತಂ ದಿಸ್ವಾ ‘‘ಅತ್ಥಿ ಅರಹತೋ ಸುಕ್ಕವಿಸ್ಸಟ್ಠೀ’’ತಿ ವುತ್ತೇ ‘‘ಮಾರಕಾಯಿಕಾ ಉಪಸಂಹರನ್ತೀ’’ತಿ ವತ್ವಾ ಜನಂ ವಞ್ಚೇನ್ತಿ. ಯೇ ಚ ಸಮ್ಮಾಪಟಿಪನ್ನಾ ಅಕುಹಕಾ, ತೇಪಿ ತಂ ವಚನಂ ಸುತ್ವಾ ಕೇಚಿ ತಂದಿಟ್ಠಿಕಾ ಹೋನ್ತಿ ಅಧಿಮಾನಿನೋ ಚ. ಅತ್ತನೋ ಸುಕ್ಕವಿಸ್ಸಟ್ಠಿಂ ಪಸ್ಸಿತ್ವಾಪಿ ನಾಧಿಮುಚ್ಚನ್ತಿ, ಅನಧಿಗತೇ ಅಧಿಕತಸಞ್ಞಿನೋವ ಹೋನ್ತಿ. ತಥಾ ಅತ್ಥಿ ಅರಹತೋ ಅಞ್ಞಾಣಕಙ್ಖಾವಿತರಣಾ ನಾಮಗೋತ್ತಾದೀಸು ವಿಯ ಸಚ್ಚೇಸು ಪರವಿತರಣಾ ಪರೇಹಿ ಪಞ್ಞತ್ತಾ ನಾಮಾನೀತಿ ಅಧಿಪ್ಪಾಯೋ ಯಥಾಸಮ್ಭವಂ ಯೋಜೇತಬ್ಬೋ. ತತ್ಥ ವಿನಯಧರೋ ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ, ಯಂ ಅರಹತೋ ಅಸುಚಿ ಮುಚ್ಚೇಯ್ಯ (ಕಥಾ. ೩೧೩; ಮಹಾವ. ೩೫೩). ದಿಟ್ಠಧಮ್ಮಾ…ಪೇ… ಅಪರಪ್ಪಚ್ಚಯಾ ಸತ್ಥುಸಾಸನೇ’’ತಿಆದೀನಿ (ಮಹಾವ. ೩೦) ಸುತ್ತಪದಾನಿ ದಸ್ಸೇತ್ವಾ ತೇ ಸಾಸನಪಚ್ಚತ್ಥಿಕೇಸು ನಿಗ್ಗಹಿತಂ ನಿಗ್ಗಣ್ಹಾತೀತಿ ಅಧಿಪ್ಪಾಯೋ. ಇತರೇ ‘‘ಪರಿಯತ್ತಿ ಮೂಲ’’ನ್ತಿ ವಾದಿನೋ. ‘‘ಪಾತಿಮೋಕ್ಖೇ ಉದ್ದಿಸ್ಸಮಾನೇ’’ತಿ ನಿದಾನವಸೇನ ವುತ್ತಂ. ತಥಾಗತಸ್ಸ ವಿಭಙ್ಗಪದಾನಿ ಸಿದ್ಧಾನಿ. ಸಿದ್ಧೇಯೇವ ಕಿಂ ಇಮಸ್ಸ ಅಙ್ಗಾನಿ? ಗರಹಿತುಕಾಮತಾ ಉಪಸಮ್ಪನ್ನಸ್ಸ ಸನ್ತಿಕೇ ಸಿಕ್ಖಾಪದವಿವಣ್ಣನಞ್ಚಾತಿ.

ವಿಲೇಖನಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ಮೋಹನಸಿಕ್ಖಾಪದವಣ್ಣನಾ

೪೪೪. ಮೋಹನಸಿಕ್ಖಾಪದಂ ಉತ್ತಾನತ್ಥಮೇವ.

೪. ಪಹಾರಸಿಕ್ಖಾಪದವಣ್ಣನಾ

೪೫೨. ರತ್ತಚಿತ್ತೋತಿ ಕಾಯಸಂಸಗ್ಗರಾಗೇನ. ವಿಹೇಠೇತುಕಾಮಂ ಪನ ದಿಸ್ವಾ ‘‘ಸಚೇ ಅಹಂ ಇಮಂ ಮಾರೇಮಿ, ನತ್ಥಿ ಮೇ ಮೋಕ್ಖೋ’’ತಿ ಚಿನ್ತೇತ್ವಾ ಕುಪಿತೋ ಸತ್ತಸಞ್ಞಂ ಪುರೇಕ್ಖತ್ವಾ ಪಹಾರಂ ದೇತಿ, ತಸ್ಸ ಯಥಾವತ್ಥುಕಮೇವ.

ಪಹಾರಸಿಕ್ಖಾಪದವಣ್ಣನಾ ನಿಟ್ಠಿತಾ.

೫. ತಲಸತ್ತಿಕಸಿಕ್ಖಾಪದವಣ್ಣನಾ

೪೫೬. ‘‘ಕಾಯಂ ವಾ ಕಾಯಪಟಿಬದ್ಧಂ ವಾ’’ತಿ (ಪಾಚಿ. ೪೫೬) ವಚನತೋ ಕಾಯಾದೀಸು ಯಂ ಉಚ್ಚಾರೇತಿ, ತಂ ತಲಂ ನಾಮ. ತಲಮೇವ ತಲಸತ್ತಿಕಂ. ಪೋಥನಸಮತ್ಥಟ್ಠೇನ ಸತ್ತಿಕನ್ತಿ ಏಕೇ. ತಂ ‘‘ಉಪ್ಪಲಪತ್ತಮ್ಪೀ’’ತಿ ಇಮಿನಾ ನಿಯಮೇತಿ. ಏವಂ ಕುಪಿತಾ ಹಿ ಕೋಪವಸೇನ ಪೋಥನಾಸಮತ್ಥತಂ ಅವಿಚಾರೇತ್ವಾ ಯಂ ಕಿಞ್ಚಿ ಹತ್ಥಗತಂ ಪಟಿಕ್ಖಿಪನ್ತಿ, ಸುಖಸಮ್ಫಸ್ಸಮ್ಪಿ ಹೋತು, ಪಾಚಿತ್ತಿಯಮೇವ. ಯಸ್ಮಾ ಪಹರಿತುಕಾಮತಾಯ ಪಹಟೇ ಪುರಿಮೇನ ಪಾಚಿತ್ತಿಯಂ. ಕೇವಲಂ ಉಚ್ಚಾರೇತುಕಾಮತಾಯ ಉಗ್ಗಿರಣಮತ್ತೇ ಕತೇ ಇಮಿನಾ ಪಾಚಿತ್ತಿಯಂ. ಇಮಿನಾ ಪನ ವಿರಜ್ಝಿತ್ವಾ ಪಹಾರೋ ದಿನ್ನೋ, ತಸ್ಮಾ ನ ಪಹರಿತುಕಾಮತಾಯ ದಿನ್ನತ್ತಾ ದುಕ್ಕಟಂ. ಕಿಮಿದಂ ದುಕ್ಕಟಂ ಪಹಾರಪಚ್ಚಯಾ, ಉದಾಹು ಉಗ್ಗಿರಣಪಚ್ಚಯಾತಿ? ಪಹಾರಪಚ್ಚಯಾ ಏವ ದುಕ್ಕಟಂ. ಪುರಿಮಂ ಉಗ್ಗಿರಣಪಚ್ಚಯಾ ಪಾಚಿತ್ತಿಯನ್ತಿ ಸದುಕ್ಕಟಂ ಪಾಚಿತ್ತಿಯಂ ಯುಜ್ಜತಿ. ಪುರಿಮಞ್ಹಿ ಉಗ್ಗಿರಣಂ, ಪಚ್ಛಾ ಪಹಾರೋ. ನ ಚ ಪಚ್ಛಿಮಪಹಾರಂ ನಿಸ್ಸಾಯ ಪುರಿಮಂ ಉಗ್ಗಿರಣಂ ಅನಾಪತ್ತಿವತ್ಥುಕಂ ಭವಿತುಮರಹತೀತಿ ನೋ ತಕ್ಕೋತಿ ಆಚರಿಯೋ. ‘‘ತೇನ ಪಹಾರೇನ ಹತ್ಥಾದೀಸು ಯಂ ಕಿಞ್ಚಿ ಭಿಜ್ಜತಿ, ದುಕ್ಕಟಮೇವಾ’’ತಿ ಇಮಿನಾಪಿ ಪಹಾರಪಚ್ಚಯಾ ದುಕ್ಕಟಂ. ಉಗ್ಗಿರಣಂ ಯಥಾವತ್ಥುಕಮೇವಾತಿ ಸಿದ್ಧಂ, ಸುಟ್ಠು ವೀಮಂಸಿತಬ್ಬಂ. ‘‘ತಿರಚ್ಛಾನಾದೀನಂ ಅಸುಚಿಕರಣಾದೀನಿ ದಿಸ್ವಾ ಕುಜ್ಝಿತ್ವಾಪಿ ಉಗ್ಗಿರನ್ತಸ್ಸ ಮೋಕ್ಖಾಧಿಪ್ಪಾಯೋ ಏವಾ’’ತಿ ವದನ್ತಿ.

ತಲಸತ್ತಿಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೬. ಅಮೂಲಕಸಿಕ್ಖಾಪದವಣ್ಣನಾ

೪೬೨. ಉಪಸಮ್ಪನ್ನೇ ಅನುಪಸಮ್ಪನ್ನಸಞ್ಞೀ ಅಮೂಲಕೇನ ಸಙ್ಘಾದಿಸೇಸೇನಾತಿ ಸುಕ್ಕವಿಸ್ಸಟ್ಠಿಕಾಯಸಂಸಗ್ಗಾದಿನಾ ಸಙ್ಘಾದಿಸೇಸಾಪತ್ತಿಯಾ ವತ್ಥುನಾತಿ ವೇದಿತಬ್ಬಂ. ನ ಹಿ ಅನುಪಸಮ್ಪನ್ನಸ್ಸ ಸಙ್ಘಾದಿಸೇಸಾಪತ್ತಿ ನಾಮ ಅತ್ಥಿ.

ಅಮೂಲಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೭. ಸಞ್ಚಿಚ್ಚಸಿಕ್ಖಾಪದವಣ್ಣನಾ

೪೬೮. ಊನವೀಸತಿವಸ್ಸೋ ಮಞ್ಞೇತಿ ಏತ್ಥ ಸಯಂ ಸಞ್ಞಾಯ ತಥಾ ಅಮಞ್ಞನ್ತೋ ಕುಕ್ಕುಚ್ಚುಪ್ಪಾದನತ್ಥಂ ‘‘ಮಞ್ಞೇ’’ತಿ ವದನ್ತೋ ಕಿಂ ಮುಸಾವಾದೇನ ಕಾರೇತಬ್ಬೋತಿ? ನ ಸಿಯಾ ಅಙ್ಗಸಮ್ಪತ್ತಿಯಾ, ನ ಚ ಕೇವಲಂ ‘‘ಮಞ್ಞೇ’’ತಿ ಇಮಿನಾ ನಿಯಮತೋ ಅಙ್ಗಸಮ್ಪತ್ತಿ ಹೋತಿ. ಪರಮತ್ಥವಿಹಿತಂ ಕತ್ಥಚಿ ಹೋತಿ. ‘‘ಉದಕಂ ಮಞ್ಞೇ ಆದಿತ್ತ’’ನ್ತಿಆದಿಮ್ಹಿ ಪರೋ ಕುಕ್ಕುಚ್ಚಂ ಉಪ್ಪಾದೇತು ವಾ, ಮಾ ವಾ, ತಂ ಅಪ್ಪಮಾಣನ್ತಿ ಮಾತಿಕಾಟ್ಠಕಥಾಯಂ (ಕಙ್ಖಾ. ಅಟ್ಠ. ಸಞ್ಚಿಚ್ಚಸಿಕ್ಖಾಪದವಣ್ಣನಾ) ‘‘ಕುಕ್ಕುಚ್ಚುಪ್ಪಾದನ’’ನ್ತಿ ತಸ್ಸ ಅಧಿಪ್ಪಾಯವಸೇನ ವುತ್ತನ್ತಿ.

ಸಞ್ಚಿಚ್ಚಸಿಕ್ಖಾಪದವಣ್ಣನಾ ನಿಟ್ಠಿತಾ.

೮. ಉಪಸ್ಸುತಿಸಿಕ್ಖಾಪದವಣ್ಣನಾ

೪೭೩. ಇಮೇಸಂ ಸುತ್ವಾತಿ ಏತ್ಥ ‘‘ವಚನ’’ನ್ತಿ ಪಾಠಸೇಸೋ. ಏಕಪರಿಚ್ಛೇದಾನೀತಿ ಸಿಯಾ ಕಿರಿಯಾ ಸಿಯಾ ಅಕಿರಿಯಾತಿ ಇಮಿನಾ ನಯೇನ ಏಕಪರಿಚ್ಛೇದಾನಿ. ಏತ್ಥ ಕಿಞ್ಚಾಪಿ ಅಞ್ಞವಾದಕಪಚ್ಚಯಾಪತ್ತಿ ಕಿರಿಯಾ ಚ ವಿಹೇಸಕಪಚ್ಚಯಾಪತ್ತಿ ಅಕಿರಿಯಾ ಚ, ತದುಭಯಂ ಪನ ಏಕಸಿಕ್ಖಾಪದನ್ತಿ ಕತ್ವಾ ತಂ ಅಞ್ಞವಾದಕಸಙ್ಖಾತಂ ಸಿಕ್ಖಾಪದಂ ಸಿಯಾ ಕಿರಿಯಾ ಪಠಮಸ್ಸ ವಸೇನ, ಸಿಯಾ ಅಕಿರಿಯಾ ದುತಿಯಸ್ಸ ವಸೇನಾತಿ ಏವಮತ್ಥೋ ದಟ್ಠಬ್ಬೋ.

ಉಪಸ್ಸುತಿಸಿಕ್ಖಾಪದವಣ್ಣನಾ ನಿಟ್ಠಿತಾ.

೯. ಕಮ್ಮಪಟಿಬಾಹನಸಿಕ್ಖಾಪದವಣ್ಣನಾ

೪೭೪. ‘‘ಧಮ್ಮಿಕಾನಂ ಕಮ್ಮಾನ’’ನ್ತಿ (ಪಾಚಿ. ೪೭೫) ವಚನತೋ ಏಕಚ್ಚೇ ಭಿಕ್ಖೂ ಧಮ್ಮಿಕಾನಂ ಕಮ್ಮಾನಂ ‘‘ಛನ್ದಂ ದಮ್ಮೀ’’ತಿ ಛನ್ದಂ ದೇನ್ತಿ, ತಂ ತೇಸಂ ಮತಿಮತ್ತಮೇವ, ನ ಪಟಿಪತ್ತಿ. ಅಧಮ್ಮಂ ನಿಸ್ಸಾಯ ಖಿಯ್ಯತಿ, ತಂ ವಾ ಉಕ್ಕೋಟೇತಿ, ಅನಾಪತ್ತಿ ನೇವ ಹೋತೀತಿ? ನ, ತಥಾ ಛನ್ದದಾನಕಾಲೇ ಅಕತ್ವಾ ಪಚ್ಛಾ ಅಧಮ್ಮಕಮ್ಮಖಿಯ್ಯನಾದಿಪಚ್ಚಯಾ ಅನಾಪತ್ತಿವಾರೇ ವುತ್ತತ್ತಾ. ಅಧಮ್ಮೇನ ವಾ ವಗ್ಗೇನ ವಾ ನ ಕಮ್ಮಾರಹಸ್ಸ ವಾ ಕಮ್ಮಕರಣಪಚ್ಚಯಾ ಆಪತ್ತಿಮೋಕ್ಖಕರಣತೋ ಅವಿಸೇಸಮೇವ ತಥಾವಚನನ್ತಿ ಚೇ? ನ, ಛನ್ದದಾನಕಾಲೇ ಅಧಮ್ಮಕಮ್ಮಕರಣಾನುಮತಿಯಾ ಅಭಾವತೋ, ಕಾರಕಸ್ಸೇವ ವಜ್ಜಪ್ಪಸಙ್ಗತೋ ಚ. ಗಣಸ್ಸ ದುಕ್ಕಟನ್ತಿ ಚೇ? ಪಾರಿಸುದ್ಧಿಛನ್ದದಾಯಕಾವ ತೇ, ನ ಗಣೋ ಅಕಮ್ಮಪ್ಪತ್ತತ್ತಾ, ಪರಿವಾರೇಪಿ (ಪರಿ. ೪೮೨ ಆದಯೋ) ಕಮ್ಮವಗ್ಗೇ ಕಮ್ಮಪ್ಪತ್ತಛನ್ದದಾಯಕಾ ವಿಸುಂ ವುತ್ತಾ. ತಥಾಪಿ ಅಧಮ್ಮಕಮ್ಮಸ್ಸ ಛನ್ದೋ ನ ದಾತಬ್ಬೋ ದೇನ್ತೇ ಅಕಪ್ಪಿಯಾನುಮತಿದುಕ್ಕಟತೋ. ತತ್ಥ ಹಿ ಯೋಜನದುಕ್ಕಟತೋ ನ ಮುಚ್ಚನ್ತೀತಿ ನೋ ತಕ್ಕೋತಿ ಆಚರಿಯೋ.

ಕಮ್ಮಪಟಿಬಾಹನಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦. ಛನ್ದಂಅದತ್ವಾಗಮನಸಿಕ್ಖಾಪದವಣ್ಣನಾ

೪೮೧. ಸನ್ನಿಪಾತಂ ಅನಾಗನ್ತ್ವಾ ಚೇ ಛನ್ದಂ ನ ದೇತಿ, ಅನಾಪತ್ತೀತಿ ಏಕೇ. ದುಕ್ಕಟನ್ತಿ ಏಕೇ ಧಮ್ಮಕಮ್ಮನ್ತರಾಯಕರಣಾಧಿಪ್ಪಾಯತ್ತಾ. ಸಙ್ಘಮಜ್ಝೇ ಛನ್ದಂ ದಾತುಂ ಲಭತೀತಿ ಕೇಚಿ. ದಿನ್ನಛನ್ದೇ ಸಙ್ಘಮಜ್ಝಂ ಪವಿಸಿತ್ವಾ ಪುನ ಗತೇಪಿ ಛನ್ದೋ ನ ಪಟಿಪ್ಪಸ್ಸಮ್ಭೇಯ್ಯಾತಿ ಚೇ? ಪಟಿಪ್ಪಸ್ಸಮ್ಭತಿ. ಕಸ್ಮಾ? ‘‘ಅಹತ್ಥಪಾಸೋ ಛನ್ದಾರಹೋ’’ತಿಆದೀಹಿ ವಿರುಜ್ಝನತೋ. ಪಾಳಿಯಂ ಪನ ದಾತುಕಾಮತಾಯ ಹತ್ಥಪಾಸಂ ಅತಿಕ್ಕಮನ್ತಂ ಸನ್ಧಾಯ ವುತ್ತನ್ತಿ ಕೇಚಿ.

ಛನ್ದಂಅದತ್ವಾಗಮನಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೧. ದುಬ್ಬಲಸಿಕ್ಖಾಪದವಣ್ಣನಾ

೪೮೪-೫. ಅದಾಸೀತಿ ಅಪಲೋಕೇತ್ವಾ ಅದಾಸಿ. ಭಿಕ್ಖೂತಿ ಏತ್ಥ ತೇ ಛಬ್ಬಗ್ಗಿಯಾ ಅತ್ತಾನಂ ಪರಿವಜ್ಜಯಿತ್ವಾ ‘‘ಸಙ್ಘೋ’’ತಿ ಅವತ್ವಾ ‘‘ಭಿಕ್ಖೂ’’ತಿ ಆಹಂಸು. ಪರಿಣಾಮೇನ್ತೀತಿ ನೇನ್ತಿ. ತತ್ಥ ಲಾಭೋತಿ ಪದುದ್ಧಾರಕರಣಂ ಇಧ ಅನಧಿಪ್ಪೇತಸ್ಸಪಿ ಯಸ್ಸ ಕಸ್ಸಚಿ ಅತ್ಥುದ್ಧಾರವಸೇನ ಲಾಭದೀಪನತ್ಥಂ. ಚೀವರಮೇವ ಹಿ ಇಧಾಧಿಪ್ಪೇತಂ, ತೇನೇವ ‘‘ಅಞ್ಞಂ ಪರಿಕ್ಖಾರಂ ದಿನ್ನಂ ಖೀಯತಿ, ಆಪತ್ತಿ ದುಕ್ಕಟಸ್ಸಾ’’ತಿ ವುತ್ತಂ. ದಿನ್ನನ್ತಿ ಚ ಪರಿಕ್ಖಾರನ್ತಿ ಚ ಭುಮ್ಮತ್ಥೇ ಉಪಯೋಗವಚನಂ.

ದುಬ್ಬಲಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೨. ಪರಿಣಾಮನಸಿಕ್ಖಾಪದವಣ್ಣನಾ

೪೯೧. ಞಾತಕಮ್ಪಿ ಪರಸ್ಸ ದಾತುಕಾಮಂ ಅಞ್ಞಸ್ಸ ದಾಪೇತಿ, ಆಪತ್ತಿ ಏವ. ಸಬ್ಬತ್ಥ ಆಪುಚ್ಛಿತ್ವಾ ದಾತುಕಾಮಂ ಯಥಾಸುಖಂ ವಿಚಾರೇತುಂ ಲಭತಿ.

ಪರಿಣಾಮನಸಿಕ್ಖಾಪದವಣ್ಣನಾ ನಿಟ್ಠಿತಾ.

ಸಮತ್ತೋ ವಣ್ಣನಾಕ್ಕಮೇನ ಸಹಧಮ್ಮಿಕವಗ್ಗೋ ಅಟ್ಠಮೋ.