೫. ಅಚೇಲಕವಗ್ಗೋ

೧. ಅಚೇಲಕಸಿಕ್ಖಾಪದವಣ್ಣನಾ

೨೬೯. ವಿಘಾಸಾದಾನಂ ಅನ್ತರಾ ಪೂವಲಾಭೇನ ಅಞ್ಞತರಾ ಪರಿಬ್ಬಾಜಿಕಾ ಪವಿಸಿತ್ವಾ ಠಿತಾ. ದಾಪೇತೀತಿ ಅನುಪಸಮ್ಪನ್ನೇನ.

ಅಚೇಲಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೨. ಉಯ್ಯೋಜನಸಿಕ್ಖಾಪದವಣ್ಣನಾ

೨೭೬. ವಿಜಹನ್ತಸ್ಸಾತಿ ಅನಾದರತ್ಥೇ ಸಾಮಿವಚನಂ. ಉಯ್ಯೋಜಕಸ್ಸ ವಿಜಹನ್ತಸ್ಸ ಸತೋ ಆಪತ್ತಿ ದುಕ್ಕಟಸ್ಸಾತಿಪಿ ಅತ್ಥೋ. ಇಧ ಅನುಪಸಮ್ಪನ್ನೋ ನಾಮ ಸಾಮಣೇರೋವಾಧಿಪ್ಪೇತೋ.

ಉಯ್ಯೋಜನಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ಸಭೋಜನಸಿಕ್ಖಾಪದವಣ್ಣನಾ

೨೮೦. ಸಭೋಜನೇತಿ ಏತ್ಥ ಪಠಮವಿಕಪ್ಪೋ ‘‘ಇತ್ಥೀ ಚ ಪುರಿಸೋ ಚಾ’’ತಿ ಇಮಿನಾ ತತಿಯಪದೇನ ಯುಜ್ಜತಿ, ದುತಿಯವಿಕಪ್ಪೋ ಪಠಮೇಹಿ ದ್ವೀಹಿ. ಕುಲೇತಿ ಘರೇ. ಅನುಪವಿಸಿತ್ವಾ ನಿಸೀದನಚಿತ್ತೇನ ಸಚಿತ್ತಕಂ.

ಸಭೋಜನಸಿಕ್ಖಾಪದವಣ್ಣನಾ ನಿಟ್ಠಿತಾ.

೪. ರಹೋಪಟಿಚ್ಛನ್ನಸಿಕ್ಖಾಪದವಣ್ಣನಾ

೨೮೪. ಇಧ ಪಞ್ಚಮಂ ಉಪನನ್ದಸ್ಸ ಚತುತ್ಥಂ ಹೋತಿ, ತಸ್ಮಾ ಭಿಕ್ಖುನಿವಗ್ಗಸ್ಸ ದಸಮಟ್ಠಕಥಾಯಂ ಉಪರಿ ಉಪನನ್ದಸ್ಸ ‘‘ತತಿಯಸಿಕ್ಖಾಪದೇನಾ’’ತಿ ನ ಪಾಠೋ, ‘‘ಚತುತ್ಥೇನಾ’’ತಿ ಪಾಠೋತಿ ವೇದಿತಬ್ಬೋ.

ರಹೋಪಟಿಚ್ಛನ್ನಸಿಕ್ಖಾಪದವಣ್ಣನಾ ನಿಟ್ಠಿತಾ.

೫. ರಹೋನಿಸಜ್ಜಸಿಕ್ಖಾಪದವಣ್ಣನಾ

೨೮೯. ರಹೋನಿಸಜ್ಜಸಿಕ್ಖಾಪದಂ ಉತ್ತಾನತ್ಥಮೇವ.

೬. ಚಾರಿತ್ತಸಿಕ್ಖಾಪದವಣ್ಣನಾ

೨೯೪. ಸಭತ್ತೋತಿ ನಿಮನ್ತನಭತ್ತೋತಿ ಪೋರಾಣಾ.

ಪುರೇಭತ್ತಞ್ಚ ಪಿಣ್ಡಾಯ, ಚರಿತ್ವಾ ಯದಿ ಭುಞ್ಜತಿ;

ಸಿಯಾ ಪರಮ್ಪರಾಪತ್ತಿ, ಪಚ್ಛಾಭತ್ತಂ ನ ಸಾ ಸಿಯಾ.

ಪಚ್ಛಾಭತ್ತಞ್ಚ ಗಮಿಕೋ, ಪುಬ್ಬಗೇಹಂ ಯದಿ ಗಚ್ಛೇ;

ಏಕೇ ಆಪತ್ತಿಯೇವಾತಿ, ಅನಾಪತ್ತೀತಿ ಏಕಚ್ಚೇ.

ಕುಲನ್ತರಸ್ಸೋಕ್ಕಮನೇ, ಆಪತ್ತಿಮತಯೋ ಹಿ ತೇ;

ಸಮಾನಭತ್ತಪಚ್ಚಾಸಾ, ಇತಿ ಆಹು ಇಧಾಪರೇ.

ಮತಾ ಗಣಿಕಭತ್ತೇನ, ಸಮೇನ್ತಿ ನಂ ನಿಮನ್ತನೇ;

ವಿಸ್ಸಜ್ಜನಂ ಸಮಾನನ್ತಿ, ಏಕೇ ಸಮ್ಮುಖತಾಪರೇ.

ಸನ್ನಿಟ್ಠಾನತ್ಥಿಕೇಹೇವ, ವಿಚಾರೇತಬ್ಬಭೇದತೋ;

ವಿಞ್ಞೂ ಚಾರಿತ್ತಮಿಚ್ಚೇವ, ಸಿಕ್ಖಾಪದಮಿದಂ ವಿದೂತಿ.

ಚಾರಿತ್ತಸಿಕ್ಖಾಪದವಣ್ಣನಾ ನಿಟ್ಠಿತಾ.

೭. ಮಹಾನಾಮಸಿಕ್ಖಾಪದವಣ್ಣನಾ

೩೧೦. ಕಾಲನ್ತಿ ಸೋ. ಯಸ್ಮಾ ಸಙ್ಘಪವಾರಣಾಯಮೇವಾಯಂ ವಿಧಿ, ತಸ್ಮಾ ‘‘ಞಾತಕಾನಂ ಪವಾರಿತಾನ’’ನ್ತಿ ವುತ್ತಂ. ‘‘ಇಮಿನಾ ಹಿ ತಯಾ ಪವಾರಿತಮ್ಹ, ಅಮ್ಹಾಕಞ್ಚ ಇಮಿನಾ ಚ ಇಮಿನಾ ಚ ಅತ್ಥೋ’’ತಿ ಯಥಾಭೂತಂ ಆಚಿಕ್ಖಿತ್ವಾ ವಿಞ್ಞಾಪೇತುಂ ಗಿಲಾನೋವ ಲಭತಿ. ಯಂ ಪನ ವುತ್ತಂ ಪಣೀತಭೋಜನಸಿಕ್ಖಾಪದೇ ‘‘ಮಹಾನಾಮಸಿಕ್ಖಾಪದೇನ ಕಾರೇತಬ್ಬೋ’’ತಿ, ತಂ ಸಙ್ಘವಸೇನ ಪವಾರಿತಂ, ಭೇಸಜ್ಜತ್ಥಾಯ ಸಪ್ಪಿಆದಿಭೇಸಜ್ಜಪಞ್ಚಕಂ ವಿಞ್ಞಾಪೇತಿ ಚೇ, ‘‘ನ ಭೇಸಜ್ಜೇನ ಕರಣೀಯೇನ ಭೇಸಜ್ಜಂ ವಿಞ್ಞಾಪೇತೀ’ತಿ ವಚನೇನ ಪಾಚಿತ್ತಿಯನ್ತಿ ಅತ್ಥೋ’’ತಿ (ಪಾಚಿ. ೩೦೯) ಲಿಖಿತಂ.

ಮಹಾನಾಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೮. ಉಯ್ಯುತ್ತಸೇನಾಸಿಕ್ಖಾಪದವಣ್ಣನಾ

೩೧೧-೫. ಮಂ ದಿಟ್ಠೇನಾತಿ ಮಯಾ ದಿಟ್ಠೇನ, ಮಮ ದಸ್ಸನೇನ ವಾ. ಏಕಮ್ಪಿ ಸರಹತ್ಥಂ ಪುರಿಸನ್ತಿ ಅಙ್ಗಪರಿಯಾಪನ್ನಂ.

ಉಯ್ಯುತ್ತಸೇನಾಸಿಕ್ಖಾಪದವಣ್ಣನಾ ನಿಟ್ಠಿತಾ.

೯. ಸೇನಾವಾಸಸಿಕ್ಖಾಪದವಣ್ಣನಾ

೩೧೯. ನವಮೇ ಸೇನಾಪರಿಕ್ಖೇಪೇನ ವಾ ಪರಿಕ್ಖೇಪಾರಹಟ್ಠಾನೇನ ವಾ ಸಞ್ಚರಣಟ್ಠಾನಪರಿಯನ್ತೇನ ವಾ ಪರಿಚ್ಛಿನ್ದಿತಬ್ಬಾ.

ಸೇನಾವಾಸಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦. ಉಯ್ಯೋಧಿಕಸಿಕ್ಖಾಪದವಣ್ಣನಾ

೩೨೪. ದಸಮೇ ಏಕಮೇಕಂ ದಸ್ಸನಾಯ ಗಚ್ಛತಿ, ಆಪತ್ತಿ ದುಕ್ಕಟಸ್ಸ. ಯತ್ಥ ಠಿತೋ ಪಸ್ಸತಿ, ಆಪತ್ತಿ ಪಾಚಿತ್ತಿಯಸ್ಸಾತಿಆದಿ. ಅಟ್ಠಮೇ ಪನ ಏಕಮೇಕಂ ದಸ್ಸನಾಯ ಗಚ್ಛತಿ, ಆಪತ್ತಿ ದುಕ್ಕಟಸ್ಸ. ಯತ್ಥ ಠಿತೋ ಪಸ್ಸತಿ, ಆಪತ್ತಿ ದುಕ್ಕಟಸ್ಸಾತಿ ಪಾಳಿ. ಕಸ್ಮಾ? ಅಙ್ಗಪ್ಪಮಾಣಾಭೇದೇಪಿ ಅನೀಕವಿಸೇಸತೋ. ದಸಮೇ ಪನ ಅಟ್ಠಮಙ್ಗಸ್ಸ ದಸ್ಸನೇನ ದುಕ್ಕಟಂ ಸಿಯಾತಿ.

ಉಯ್ಯೋಧಿಕಸಿಕ್ಖಾಪದವಣ್ಣನಾ ನಿಟ್ಠಿತಾ.

ಸಮತ್ತೋ ವಣ್ಣನಾಕ್ಕಮೇನ ಅಚೇಲಕವಗ್ಗೋ ಪಞ್ಚಮೋ.