೩. ಭಿಕ್ಖುನುಪಸ್ಸಯಸಿಕ್ಖಾಪದವಣ್ಣನಾ

೧೬೨. ‘‘ಏಕರತ್ತಮ್ಪಿ ವಸನ್ತೀ’’ತಿ (ಪಾಚಿ. ೧೬೧) ವಚನತೋ ಯತ್ಥ ರತ್ತಿಯಂ ನ ವಸನ್ತಿ, ತತ್ಥ ಗನ್ತ್ವಾ ಓವದಿತುಂ ವಟ್ಟತೀತಿ ಏಕೇ. ಯದಿ ಏವಂ ಸಙ್ಕೇತಟ್ಠಾನಂ ಗನ್ತ್ವಾ ಓವದಿತುಂ ವಟ್ಟತೀತಿ ಸಿದ್ಧಂ. ‘‘ತತೋ ಅದ್ಧಯೋಜನೇಯೇವ ಸಭಿಕ್ಖುಕೋ ಆವಾಸೋ ಇಚ್ಛಿತಬ್ಬೋ’’ತಿ ನ ವತ್ತಬ್ಬಂ. ಭಿಕ್ಖುನೋವಾದಕೋ ಚೇ ಅದ್ಧಯೋಜನಂ ಗನ್ತ್ವಾ ಓವದಿತುಕಾಮೋ ಹೋತಿ, ಭಿಕ್ಖುನಿಸಙ್ಘೋ ಚ ಅದ್ಧಯೋಜನಂ ಗನ್ತ್ವಾ ಸೋತುಕಾಮೋ, ‘‘ವಟ್ಟತೀ’’ತಿ ವತ್ತಬ್ಬಂ ಸಿಯಾ, ತಞ್ಚ ನ ವುತ್ತಂ, ತಸ್ಮಾ ನ ವಟ್ಟತಿ. ಹೇಟ್ಠಿಮಪರಿಚ್ಛೇದೇನ ಪನ ‘‘ಏಕರತ್ತಮ್ಪೀ’’ತಿ ವುತ್ತಂ. ತತೋ ಪಟ್ಠಾಯ ಉಪಸ್ಸಯಂ ಹೋತಿ, ನ ಉಪಸ್ಸಯಸಙ್ಖೇಪೇನ ಕತಮತ್ತೇನಾತಿ ವುತ್ತಂ ಹೋತಿ. ಯತ್ಥ ವಾಸೂಪಗತಾ ಭಿಕ್ಖುನಿಯೋ, ಸೋ ಉಪಸ್ಸಯಸಙ್ಖ್ಯಂ ಗಚ್ಛತಿ, ತತ್ಥ ನ ಗನ್ತ್ವಾ ಓವಾದೋ ದಾತಬ್ಬೋ. ಏಕಾವಾಸೇ ದಿವಾ ವಟ್ಟತೀತಿ ಏಕೇ, ವಿಚಾರೇತ್ವಾ ಯುತ್ತತರಂ ಗಹೇತಬ್ಬಂ.

ಭಿಕ್ಖುನುಪಸ್ಸಯಸಿಕ್ಖಾಪದವಣ್ಣನಾ ನಿಟ್ಠಿತಾ.