೬. ಅನುಪಖಜ್ಜಸಿಕ್ಖಾಪದವಣ್ಣನಾ

೧೨೧. ಛಬ್ಬಗ್ಗಿಯೇಸುಯೇವ ಥೇರಾ ಭಿಕ್ಖೂತಿ ಕೇಚಿ. ಪಾದೇ ಧೋವಿತ್ವಾತಿಆದಿಮ್ಹಿ ಪವಿಸನ್ತಸ್ಸ ವಾ ಪಾದಧೋವನಪಾಸಾಣತೋ ಯಾವ ಮಞ್ಚಪೀಠಂ ಪಸ್ಸಾವತ್ಥಾಯ ನಿಕ್ಖಮನ್ತಸ್ಸ ವಾ ಯಾವ ಪಸ್ಸಾವಟ್ಠಾನನ್ತಿ ಯೋಜನಾ ಕಾತಬ್ಬಾ. ಏವಂ ಸನ್ತೇ ‘‘ಪಸ್ಸಾವತ್ಥಾಯ ನಿಕ್ಖಮನ್ತಸ್ಸ ವಾ’’ತಿ ನ ವತ್ತಬ್ಬಂ, ‘‘ಪಸ್ಸಾವಟ್ಠಾನತೋ ನಿಕ್ಖಮನ್ತಸ್ಸ ವಾ’’ತಿ ವತ್ತಬ್ಬಂ. ಪಸ್ಸಾವಟ್ಠಾನನ್ತಿ ಕತ್ಥಚಿ ಪೋತ್ಥಕೇ. ತಥಾ ಹಿ ಮಾತಿಕಾಟ್ಠಕಥಾಯಂ (ಕಙ್ಖಾ. ಅಟ್ಠ. ಅನುಪಖಜ್ಜಸಿಕ್ಖಾಪದವಣ್ಣನಾ) ‘‘ಪವಿಸನ್ತಸ್ಸ ಪಾದಧೋವನಪಾಸಾಣತೋ ಯಾವ ಮಞ್ಚಪೀಠಂ ನಿಕ್ಖಮನ್ತಸ್ಸ ಮಞ್ಚಪೀಠತೋ ಯಾವ ಪಸ್ಸಾವಟ್ಠಾನಂ, ತಾವ ಉಪಚಾರೋ’’ತಿ ವುತ್ತಂ, ತಸ್ಮಾ ‘‘ಪಾದೇ ಧೋವಿತ್ವಾ ಪವಿಸನ್ತಸ್ಸ, ಪಸ್ಸಾವತ್ಥಾಯ ನಿಕ್ಖಮನ್ತಸ್ಸ ಚ ದ್ವಾರೇ ನಿಕ್ಖಿತ್ತಪಾದಧೋವನಪಾಸಾಣತೋ, ಪಸ್ಸಾವಟ್ಠಾನತೋ ಚ ಮಞ್ಚಪೀಠ’’ನ್ತಿ ಕತ್ಥಚಿ ಪೋತ್ಥಕೇ ಪಾಠೋ, ಸೋ ಅಪಾಠೋ. ಕಸ್ಮಾ? ಮಞ್ಚಪೀಠಾನಂ ಉಪಚಾರಸ್ಸ ವುತ್ತತ್ತಾ. ಪವಿಸನ್ತಸ್ಸ ಯಾವ ಮಞ್ಚಪೀಠಾನಂ ಉಪಚಾರೋ, ನಿಕ್ಖಮನ್ತಸ್ಸ ತತೋ ಪಟ್ಠಾಯ ಯಾವ ಪಸ್ಸಾವಟ್ಠಾನಂ ವಚ್ಚಕುಟಿಚಙ್ಕಮಟ್ಠಾನನ್ತಿ ಇಮಿನಾ ಅತ್ಥೇನ ಯಥಾ ಸಂಸನ್ದತಿ, ತಥಾವಿಧೋ ಪಾಠೋತಿ ಆಚರಿಯೋ.

೧೨೨. ಉಪಚಾರಂ ಠಪೇತ್ವಾತಿ ಇಧ ವುತ್ತಉಪಚಾರಂ ಠಪೇತ್ವಾ. ‘‘ದಸ್ಸನಸವನೂಪಚಾರೇಪಿ ಸನ್ಥರನ್ತಸ್ಸಾ’’ತಿ ಲಿಖಿತಂ.

ಅನುಪಖಜ್ಜಸಿಕ್ಖಾಪದವಣ್ಣನಾ ನಿಟ್ಠಿತಾ.