೨. ಉಜ್ಜಗ್ಘಿಕವಗ್ಗವಣ್ಣನಾ

೫೮೬. ಹಸನೀಯಸ್ಮಿನ್ತಿ ಹೇತ್ವತ್ಥೇ ಭುಮ್ಮಂ, ಹಸಿತಬ್ಬವತ್ಥುಕಾರಣಾತಿ ಅತ್ಥೋ. ಅನ್ತರಘರೇ ಉಚ್ಚಾಸದ್ದೇನ ಅನುಮೋದನಾದಿಂ ಕರೋನ್ತಸ್ಸ ಅನಾಪತ್ತಿ ಕಿರ. ತಥಾ ಹಿ ಮಹಿನ್ದತ್ಥೇರೋಪಿ ಹತ್ಥಿಸಾಲಾದೀಸು ಮಹಾಜನಸ್ಸ ಕಥೇಸಿ.

೫೯೧. ಕೇಚಿ ಭಿಕ್ಖೂ ‘‘ಪರಿಕ್ಖಾರಟ್ಠಪನಮತ್ತೇನ ವಾಸೂಪಗತೋ ಹೋತೀ’’ತಿ ವದನ್ತಿ, ತಂ ತೇಸಂ ಮತಿಮತ್ತಮೇವ. ಭಿಕ್ಖುನಿಯೋ ಚೇ ವಾಸೂಪಗಾ ಹೋನ್ತಿ, ಭಿಕ್ಖುನುಪಸ್ಸಯೋವ ಕಪ್ಪಿಯಭೂಮಿ. ‘‘ಯತ್ಥ ಭಿಕ್ಖುನಿಯೋ ಏಕರತ್ತಮ್ಪಿ ವಸನ್ತಿ, ಅಯಂ ಭಿಕ್ಖುನುಪಸ್ಸಯೋ’’ತಿ (ಪಾಚಿ. ೧೬೧) ವಚನತೋ ತಾಸಂ ಸಮೀಪಂ ವಾ ತಾಹಿ ಗಹಿತವಾಸಾಗಾರಂ ವಾ ‘‘ಗಚ್ಛಾಮೀ’’ತಿ ಗಚ್ಛತೋ ಯಥಾಸುಖಂ ಗನ್ತುಂ ವಟ್ಟತಿ. ನ ಹಿ ತಾವತಾ ತಂ ಘರಂ ಅನ್ತರಘರಸಙ್ಖ್ಯಂ ಗಚ್ಛತೀತಿ ನೋ ತಕ್ಕೋತಿ ಆಚರಿಯೋ.

ಉಜ್ಜಗ್ಘಿಕವಗ್ಗವಣ್ಣನಾ ನಿಟ್ಠಿತಾ.