೯. ಸಙ್ಕಾಸನಸುತ್ತವಣ್ಣನಾ

೧೦೮೯. ಅತ್ಥಸಂವಣ್ಣನೇ ವಣ್ಣೀಯನ್ತೇತಿ ವಣ್ಣಾ. ತೇಯೇವ ಪರಿಯಾಯೇನ ಅಕ್ಖರಣತೋ ಅಕ್ಖರಾನಿ. ಅತ್ಥಂ ಬ್ಯಞ್ಜೇನ್ತೀತಿ ಬ್ಯಞ್ಜನಾನಿ. ಯಸ್ಮಾ ಪನ ಅಕಾರಾದಿಕೇ ಸರಸಮಞ್ಞಾ, ಕಕಾರಾದಿಕೇ ಬ್ಯಞ್ಜನಸಮಞ್ಞಾ, ಉಭಯತ್ಥ ವಣ್ಣಸಮಞ್ಞಾ, ತಸ್ಮಾ ವುತ್ತಂ ‘‘ವಣ್ಣಾನಂ ವಾ ಏಕದೇಸಾ ಯದಿದಂ ಬ್ಯಞ್ಜನಾ ನಾಮಾ’’ತಿ. ನೇತ್ತಿಯಂ ಪನ ವಾಕ್ಯೇ ಬ್ಯಞ್ಜನಸಮಞ್ಞಾ. ಬ್ಯಞ್ಜನಗ್ಗಹಣೇನೇವ ಚೇತ್ಥ ಆಕಾರನಿರುತ್ತಿನಿದ್ದೇಸಾ ಗಹಿತಾ ಏವಾತಿ ದಟ್ಠಬ್ಬಂ. ಸಙ್ಕಾಸನಾತಿ ಅತ್ಥಸ್ಸ ಞಾಪನಾ ಭಾಗಸೋ. ತೇನಾಹ ‘‘ವಿಭತ್ತಿಯೋ’’ತಿ. ಸಙ್ಕಾಸನಗ್ಗಹಣೇನೇವ ಚೇತ್ಥ ಪಕಾಸನಾ ವುತ್ತಾ ಹೋತಿ. ವಿಭತ್ತಿಯೋ ಹಿ ಅತ್ಥವಚನೇನೇವ ವಿವರನ್ತಿ, ತಾಹಿ ಕಾರಣಪಞ್ಞತ್ತಿಯೋ ವುತ್ತಾಯೇವಾತಿ, ತಾಹಿಪಿ ಅತ್ಥಪದಾನಿ ಗಹಿತಾನೇವ ಹೋನ್ತಿ. ಅಯಮೇತ್ಥ ಸಙ್ಖೇಪೋ, ವಿತ್ಥಾರೋ ಪನ ವಿಸುದ್ಧಿಮಗ್ಗವಣ್ಣನಾಯಂ ನೇತ್ತಿಅಟ್ಠಕಥಾಯಞ್ಚ ವುತ್ತನಯೇನ ವೇದಿತಬ್ಬೋ. ಸಬ್ಬಾಕಾರೇನಾತಿ ಸಭಾಗಾದಿವಿಭಾವನಾಕಾರೇನ. ವಣ್ಣಾದೀನನ್ತಿ ತಸ್ಮಿಂ ಪನ ವಿತ್ಥಾರೇ ಪವತ್ತವಣ್ಣಾದೀನಂ. ತಸ್ಮಾತಿ ವಣ್ಣಾದೀನಂ ಅನ್ತಅಭಾವತೋ. ಏವಮಾಹಾತಿ ‘‘ಅಪರಿಮಾಣಾ ವಣ್ಣಾ ಬ್ಯಞ್ಜನಾ ಸಙ್ಕಾಸನಾ’’ತಿ ಏವಮಾಹ.