೪. ಮಹಕಪಾಟಿಹಾರಿಯಸುತ್ತವಣ್ಣನಾ

೩೪೬. ತೇಸಂ ಅನುಜಾನನ್ತೋತಿ ತೇಸಂ ದಾಸಕಮ್ಮಕರಾನಂ ಸೇಸಕೇ ಯಥಾರುಚಿ ವಿಚಾರಣಂ ಅನುಜಾನನ್ತೋ. ಕುಧಿತನ್ತಿ ಬಲವತಾ ಸೂರಿಯಸನ್ತಾಪೇನ ಸಙ್ಕುಥಿತಂ. ತೇನಾಹ ‘‘ಹೇಟ್ಠಾ’’ತಿಆದಿ. ಅತಿತಿಖಿಣನ್ತಿ ಅತಿವಿಯ ತಿಕ್ಖಧಾತುಕಂ. ಅಸಮ್ಭಿನ್ನಪದನ್ತಿ ಅಞ್ಞತ್ಥ ಅನಾಗತತ್ತಾ ತಿಪಿಟಕೇ ಅವೋಮಿಸ್ಸಕಪದಂ, ಇಧೇವ ಆಗತಪದನ್ತಿ ಅತ್ಥೋ. ಪಟಿಲೀಯಮಾನೇನಾತಿ ಪಟಿಕಂಸೇನ ವಿಸೇಸನೇನ ವಿಲೀಯಮಾನೇನ ಕಾಯೇನ.

ಏತ್ಥ ಚಾತಿ ಏತಸ್ಮಿಂ ಅಧಿಟ್ಠಾನಿದ್ಧಿಕರಣೇ. ಅಬ್ಭಮಣ್ಡಪಂ ಕತ್ವಾತಿ ಸಮನ್ತತೋ ಛಾದನವಸೇನ ಮಣ್ಡಪಂ ವಿಯ ಮೇಘಪಟಲಂ ಉಪ್ಪಾದೇತ್ವಾ. ದೇವೋತಿ ಮೇಘೋ. ಏಕಮೇಕಂ ಫುಸಿತಕಂ ಫುಸಾಯತು ಜಾಲವಿನದ್ಧಂ ವಿಯ ವಸ್ಸತು. ಏವಂ ವುತ್ತಪ್ಪಕಾರೇನ ನಾನಾಪರಿಕಮ್ಮಂ ನಾನಾಧಿಟ್ಠಾನಂ ಏಕತೋ ಪರಿಕಮ್ಮಂ ಏಕತೋ ಅಧಿಟ್ಠಾನನ್ತಿ ಚತುಕ್ಕಮೇತ್ಥ ಸಮ್ಭವತೀತಿ ದಸ್ಸೇತಿ ‘‘ಏತ್ಥ ಚಾ’’ತಿಆದಿನಾ. ಯಥಾ ತಥಾತಿ ಯಥಾವುತ್ತೇಸು ಚತೂಸು ಪಕಾರೇಸು ಯೇನ ವಾ ತೇನ ವಾ ಪಕಾರೇನ ಕರೋನ್ತಸ್ಸ. ಕತಪರಿಕಮ್ಮಸ್ಸಾತಿ ‘‘ಏವಂ ವಾ ಏವಂ ವಾ ಹೋತೂ’’ತಿ ಪವತ್ತಿತಪರಿಕಮ್ಮಚಿತ್ತಸ್ಸ. ‘‘ಪರಿಕಮ್ಮಾನನ್ತರೇನಾತಿ ಅಧಿಟ್ಠಾನಚಿತ್ತುಪ್ಪಾದನತ್ಥಂ ಸಮಾಪನ್ನಪಾದಕಜ್ಝಾನತೋ ವುಟ್ಠಾಯ ಅಧಿಟ್ಠಾನಚಿತ್ತಸ್ಸ ಏಕಾವಜ್ಜನವೀಥಿಯಂ ಪವತ್ತಪರಿಕಮ್ಮಂ ಸನ್ಧಾಯ ವುತ್ತ’’ನ್ತಿ ವದನ್ತಿ.

ಮಹಕಪಾಟಿಹಾರಿಯಸುತ್ತವಣ್ಣನಾ ನಿಟ್ಠಿತಾ.