೨. ಖಣಸುತ್ತವಣ್ಣನಾ

೧೩೫. ಛಫಸ್ಸಾಯತನಿಕಾತಿ ಛಹಿ ಫಸ್ಸಾಯತನೇಹಿ ಅನಿಟ್ಠಸಂವೇದನಿಯಾ. ಛದ್ವಾರಫಸ್ಸಪಟಿವಿಞ್ಞತ್ತೀತಿ ಛಹಿಪಿ ದ್ವಾರೇಹಿ ಆರಮ್ಮಣಸ್ಸ ಪಟಿಸಂವೇದನಾ ಹೋತಿಯೇವ ಸಬ್ಬಸೋ ದುಕ್ಖಾನುಭವನತ್ಥಂ. ತಾವತಿಂಸಪುರನ್ತಿ ಸುದಸ್ಸನಮಹಾನಗರಂ. ಅಭಾವೋ ನಾಮ ನತ್ಥಿ ಸಬ್ಬಥಾ ಸುಖಾನುಭವನತೋ. ನಿರಯೇತಿ ಇಮಿನಾ ದುಗ್ಗತಿ ಭವಸಾಮಞ್ಞೇನ ಇತರಾಪಾಯಾಪಿ ಗಹಿತಾ ಏವ. ಮಗ್ಗಬ್ರಹ್ಮಚರಿಯವಾಸಂ ವಸಿತುಂ ನ ಸಕ್ಕಾತಿ ಇಮಿನಾ ಪನ ಸಬ್ಬೇಸಮ್ಪಿ ಅಚ್ಛಿನ್ದಿಕಟ್ಠಾನಾನಂ ಗಹಣಂ ದಟ್ಠಬ್ಬಂ. ಇಮೇವಾತಿ ಇಮಸ್ಮಿಂ ಮನುಸ್ಸಲೋಕೇ ಏವ. ಅಪಾಯೋಪಿ ಪಞ್ಞಾಯತಿ ಅಪಾಯದುಕ್ಖಸದಿಸಸ್ಸ ದುಕ್ಖಸ್ಸ ಕದಾಚಿ ಪಟಿಸಂವೇದನತೋ. ಸಗ್ಗೋಪಿ ಪಞ್ಞಾಯತಿ ದೇವಭೋಗಸದಿಸಸಮ್ಪತ್ತಿಯಾ ಕದಾಚಿ ಪಟಿಲಭಿತಬ್ಬತೋ.

ಅಯಂ ಕಮ್ಮಭೂಮೀತಿ ಅಯಂ ಮನುಸ್ಸಲೋಕೋ ಪುರಿಸಥಾಮಕರಣಾಯ ಕಮ್ಮಭೂಮಿ ನಾಮ ತಾಸಂ ಯೋಗ್ಯಟ್ಠಾನಭಾವತೋ. ತತ್ಥ ಪಧಾನಕಮ್ಮಂ ದಸ್ಸೇನ್ತೋ ‘‘ಇಧ ಮಗ್ಗಭಾವನಾ’’ತಿ ಆಹ. ಠಾನಾನೀತಿ ಕಾರಣಾನಿ. ಸಂವೇಜನಿಯಾನೀತಿ ಸಂವೇಗಜನನಾನಿ ಬಹೂನಿ ಜಾತಿಆದೀನಿ. ತಥಾ ಹಿ ಜಾತಿ, ಜರಾ, ಬ್ಯಾಧಿ, ಮರಣಂ, ಅಪಾಯಭವಂ, ತತ್ಥಪಿ ನಿರಯೂಪಪತ್ತಿಹೇತುಕಂ, ತಿರಚ್ಛಾನುಪಪತ್ತಿಹೇತುಕಂ, ಅಸೂರಕಾಯೂಪಪತ್ತಿಹೇತುಕಂ, ಅತೀತೇ ವಟ್ಟಮೂಲಕಂ, ಅನಾಗತೇ ವಟ್ಟಮೂಲಕಂ, ಪಚ್ಚುಪ್ಪನ್ನೇ ಆಹಾರಪರಿಯೇಟ್ಠಿಮೂಲಕನ್ತಿ ಬಹೂನಿ ಸಂವೇಗವತ್ಥೂನಿ ಪಚ್ಚವೇಕ್ಖಿತ್ವಾ ಸಂವೇಗಜಾತೋ ಸಞ್ಜಾತಸಂವೇಗೋ ಯೋನಿಸೋ ಪಧಾನಮನುಯುಞ್ಜಸ್ಸು. ಸಂವೇಗಾತಿ ಸಂವೇಗಮಾಪಜ್ಜಸ್ಸು.

ಖಣಸುತ್ತವಣ್ಣನಾ ನಿಟ್ಠಿತಾ.