೧೪. ದೇವದಹವಗ್ಗೋ

೧. ದೇವದಹಸುತ್ತವಣ್ಣನಾ

೧೩೪. ಮನಂ ರಮಯನ್ತಾತಿ ಆಪಾಥಗತಾ ಮನಸ್ಸ ರಮಣವಸೇನ ಪಿಯಾಯಿತಬ್ಬತಾವಸೇನ ಪವತ್ತನ್ತಾ.

೨. ಖಣಸುತ್ತವಣ್ಣನಾ

೧೩೫. ಛಫಸ್ಸಾಯತನಿಕಾತಿ ಛಹಿ ಫಸ್ಸಾಯತನೇಹಿ ಅನಿಟ್ಠಸಂವೇದನಿಯಾ. ಛದ್ವಾರಫಸ್ಸಪಟಿವಿಞ್ಞತ್ತೀತಿ ಛಹಿಪಿ ದ್ವಾರೇಹಿ ಆರಮ್ಮಣಸ್ಸ ಪಟಿಸಂವೇದನಾ ಹೋತಿಯೇವ ಸಬ್ಬಸೋ ದುಕ್ಖಾನುಭವನತ್ಥಂ. ತಾವತಿಂಸಪುರನ್ತಿ ಸುದಸ್ಸನಮಹಾನಗರಂ. ಅಭಾವೋ ನಾಮ ನತ್ಥಿ ಸಬ್ಬಥಾ ಸುಖಾನುಭವನತೋ. ನಿರಯೇತಿ ಇಮಿನಾ ದುಗ್ಗತಿ ಭವಸಾಮಞ್ಞೇನ ಇತರಾಪಾಯಾಪಿ ಗಹಿತಾ ಏವ. ಮಗ್ಗಬ್ರಹ್ಮಚರಿಯವಾಸಂ ವಸಿತುಂ ನ ಸಕ್ಕಾತಿ ಇಮಿನಾ ಪನ ಸಬ್ಬೇಸಮ್ಪಿ ಅಚ್ಛಿನ್ದಿಕಟ್ಠಾನಾನಂ ಗಹಣಂ ದಟ್ಠಬ್ಬಂ. ಇಮೇವಾತಿ ಇಮಸ್ಮಿಂ ಮನುಸ್ಸಲೋಕೇ ಏವ. ಅಪಾಯೋಪಿ ಪಞ್ಞಾಯತಿ ಅಪಾಯದುಕ್ಖಸದಿಸಸ್ಸ ದುಕ್ಖಸ್ಸ ಕದಾಚಿ ಪಟಿಸಂವೇದನತೋ. ಸಗ್ಗೋಪಿ ಪಞ್ಞಾಯತಿ ದೇವಭೋಗಸದಿಸಸಮ್ಪತ್ತಿಯಾ ಕದಾಚಿ ಪಟಿಲಭಿತಬ್ಬತೋ.

ಅಯಂ ಕಮ್ಮಭೂಮೀತಿ ಅಯಂ ಮನುಸ್ಸಲೋಕೋ ಪುರಿಸಥಾಮಕರಣಾಯ ಕಮ್ಮಭೂಮಿ ನಾಮ ತಾಸಂ ಯೋಗ್ಯಟ್ಠಾನಭಾವತೋ. ತತ್ಥ ಪಧಾನಕಮ್ಮಂ ದಸ್ಸೇನ್ತೋ ‘‘ಇಧ ಮಗ್ಗಭಾವನಾ’’ತಿ ಆಹ. ಠಾನಾನೀತಿ ಕಾರಣಾನಿ. ಸಂವೇಜನಿಯಾನೀತಿ ಸಂವೇಗಜನನಾನಿ ಬಹೂನಿ ಜಾತಿಆದೀನಿ. ತಥಾ ಹಿ ಜಾತಿ, ಜರಾ, ಬ್ಯಾಧಿ, ಮರಣಂ, ಅಪಾಯಭವಂ, ತತ್ಥಪಿ ನಿರಯೂಪಪತ್ತಿಹೇತುಕಂ, ತಿರಚ್ಛಾನುಪಪತ್ತಿಹೇತುಕಂ, ಅಸೂರಕಾಯೂಪಪತ್ತಿಹೇತುಕಂ, ಅತೀತೇ ವಟ್ಟಮೂಲಕಂ, ಅನಾಗತೇ ವಟ್ಟಮೂಲಕಂ, ಪಚ್ಚುಪ್ಪನ್ನೇ ಆಹಾರಪರಿಯೇಟ್ಠಿಮೂಲಕನ್ತಿ ಬಹೂನಿ ಸಂವೇಗವತ್ಥೂನಿ ಪಚ್ಚವೇಕ್ಖಿತ್ವಾ ಸಂವೇಗಜಾತೋ ಸಞ್ಜಾತಸಂವೇಗೋ ಯೋನಿಸೋ ಪಧಾನಮನುಯುಞ್ಜಸ್ಸು. ಸಂವೇಗಾತಿ ಸಂವೇಗಮಾಪಜ್ಜಸ್ಸು.

ಖಣಸುತ್ತವಣ್ಣನಾ ನಿಟ್ಠಿತಾ.

೩. ಪಠಮರೂಪಾರಾಮಸುತ್ತವಣ್ಣನಾ

೧೩೬. ಸಮ್ಮುದಿತಾ ಸಮ್ಮೋದಪ್ಪತ್ತಾ, ಪಮೋದಿತಾ ಸಞ್ಜಾತಪಮೋದಾ. ದುಕ್ಖಾತಿ ದುಕ್ಖವನ್ತೋ ಸಞ್ಜಾತದುಕ್ಖಾ. ತೇನಾಹ ‘‘ದುಕ್ಖಿತಾ’’ತಿ. ಸುಖಂ ಏತಸ್ಸ ಅತ್ಥೀತಿ ಸುಖೋ, ಸುಖೀ. ತೇನಾಹ ‘‘ಸುಖಿತೋ’’ತಿ. ಯತ್ತಕಾ ರೂಪಾದಯೋ ಧಮ್ಮಾ ಲೋಕೇ ಅತ್ಥೀತಿ ವುಚ್ಚತಿ. ಪಸ್ಸನ್ತಾನನ್ತಿ ಸಚ್ಚಪಟಿವೇಧೇನ ಸಮ್ಮದೇವ ಪಸ್ಸನ್ತಾನಂ. ‘‘ಪಚ್ಚನೀಕಂ ಹೋತೀ’’ತಿ ವತ್ವಾ ತಂ ಪಚ್ಚನೀಕಭಾವಂ ದಸ್ಸೇತುಂ ‘‘ಲೋಕೋ ಹೀ’’ತಿಆದಿ ವುತ್ತಂ. ಅಸುಭಾತಿ ‘‘ಆಹೂ’’ತಿಪದಂ ಆನೇತ್ವಾ ಸಮ್ಬನ್ಧೋ. ಸಬ್ಬಮೇತನ್ತಿ ‘‘ಸುಖಂ ದಿಟ್ಠಮರಿಯೇಭಿ…ಪೇ… ತದರಿಯಾ ಸುಖತೋ ವಿದೂ’’ತಿ ಚ ವುತ್ತಂ. ಸಬ್ಬಮೇತಂ ನಿಬ್ಬಾನಮೇವ ಸನ್ಧಾಯ ವುತ್ತಂ. ನಿಬ್ಬಾನಮೇವ ಹಿ ಏಕನ್ತತೋ ಸುಖಂ ನಾಮ.

ಪಞ್ಚನವುತಿಪಾಸಣ್ಡಿನೋ ತೇಸಞ್ಚ ಪಾಸಣ್ಡಿಭಾವೋ ಪಪಞ್ಚಸೂದನಿಟ್ಠಕಥಾಯಂ ಪಕಾಸಿತೋ ಏವ. ಕಿಲೇಸನೀವರಣೇನ ನಿವುತಾನನ್ತಿ ಕಿಲೇಸಖನ್ಧಾ ಕಿಲೇಸನೀವರಣಂ, ತೇನ ನಿವಾರಿತಾನಂ. ನಿಬ್ಬಾನದಸ್ಸನಂ ನಾಮ ಅರಿಯಮಗ್ಗೋ, ತೇನ ತಸ್ಸ ಪಟಿವಿಜ್ಝನಞ್ಚ ಕಾಳಮೇಘಅವಚ್ಛಾದಿತಂ ವಿಯ ಚನ್ದಮಣ್ಡಲಂ.

ಪರಿಚ್ಛಿನ್ದಿತ್ವಾತಿ ಅಸುಭಭಾವಪರಿಚ್ಛಿನ್ದನೇನ ಸಮ್ಮಾವಿಞ್ಞಾಣದಸ್ಸನೇನ ಚ ಪರಿಚ್ಛಿನ್ದಿತ್ವಾ. ಮಗ್ಗಧಮ್ಮಸ್ಸಾತಿ ಅರಿಯಮಗ್ಗಧಮ್ಮಸ್ಸ.

ಅನುಪನ್ನೇಹೀತಿ ಅನು ಅನು ಅವಿಹಾಯ ಪಟಿಪನ್ನೇಹಿ. ಕೋ ನು ಅಞ್ಞೋ ಜಾನಿತುಂ ಅರಹತಿ, ಅಞ್ಞೋ ನ ಜಾನಾತೀತಿ ದಸ್ಸೇತಿ.

ಪಠಮರೂಪಾರಾಮಸುತ್ತವಣ್ಣನಾ ನಿಟ್ಠಿತಾ.

೪-೧೨. ದುತಿಯರೂಪಾರಾಮಸುತ್ತಾದಿವಣ್ಣನಾ

೧೩೭-೧೪೫. ಸುದ್ಧಿಕಂ ಕತ್ವಾ ಗಾಥಾಬನ್ಧನೇನ ವಿನಾ ಕೇವಲಂ ಚುಣ್ಣಿಯಪದವಸೇನೇವ. ತಥಾ ತಥಾತಿ ಅಜ್ಝತ್ತಿಕಾನಿ ಬಾಹಿರಾನಿ ಚ ಆಯತನಾನಿ ಅನಿಚ್ಚಲಕ್ಖಣೇನ ದುಕ್ಖಾನತ್ತಲಕ್ಖಣೇಹಿ ಚ ಯೋಜೇತ್ವಾ ದಸ್ಸನವಸೇನ.

ದುತಿಯರೂಪಾರಾಮಸುತ್ತಾದಿವಣ್ಣನಾ ನಿಟ್ಠಿತಾ.

ದೇವದಹವಗ್ಗವಣ್ಣನಾ ನಿಟ್ಠಿತಾ.