೬. ಘೋಸಿತಸುತ್ತವಣ್ಣನಾ

೧೨೯. ರೂಪಾ ಚ ಮನಾಪಾತಿ ನೀಲಾದಿಭೇದಾ ರೂಪಧಮ್ಮಾ ಚ ಮನಸಾ ಮನುಞ್ಞಾ ಪಿಯರೂಪಾ ಸಂವಿಜ್ಜನ್ತಿ, ಇದಞ್ಚ ಸುಖವೇದನೀಯಸ್ಸ ಫಸ್ಸಸ್ಸ ಸಭಾವದಸ್ಸನತ್ಥಂ. ಏವಂ ‘‘ರೂಪಾ ಚ ಮನಾಪಾ ಉಪೇಕ್ಖಾವೇದನಿಯಾ’’ತಿ ಏತ್ಥಾಪಿ ಯಥಾರಹಂ ವತ್ತಬ್ಬಂ. ಚಕ್ಖುವಿಞ್ಞಾಣ…ಪೇ… ಫಸ್ಸನ್ತಿ ವುತ್ತಂ. ಉಪನಿಸ್ಸಯಕೋಟಿಯಾ ಹಿ ಚಕ್ಖುವಿಞ್ಞಾಣಸಮ್ಪಯುತ್ತಫಸ್ಸೋ ಸುಖವೇದನೀಯೋ, ನ ಸಹಜಾತಕೋಟಿಯಾ. ತೇನಾಹ – ‘‘ಏಕಂ ಫಸ್ಸಂ ಪಟಿಚ್ಚ ಜವನವಸೇನ ಸುಖವೇದನಾ ಉಪ್ಪಜ್ಜತೀ’’ತಿ. ಸೇಸಪದೇಸೂತಿ ‘‘ಸಂವಿಜ್ಜತಿ ಖೋ, ಗಹಪತಿ, ಸೋತಧಾತೂ’’ತಿ ಆಗತೇಸು ಪಞ್ಚಸು ಕೋಟ್ಠಾಸೇಸು.

ತೇವೀಸತಿ ಧಾತುಯೋ ಕಥಿತಾ ಛನ್ನಂ ದ್ವಾರಾನಂ ವಸೇನ ವಿಭಜ್ಜಗಹಣೇನ. ವತ್ಥುನಿಸ್ಸಿತನ್ತಿ ಹದಯವತ್ಥುನಿಸ್ಸಿತಂ. ಪಞ್ಚದ್ವಾರೇ ವೀಸತಿ, ಮನೋದ್ವಾರೇ ತಿಸ್ಸೋ ಏವಂ ತೇವೀಸತಿ.

ಘೋಸಿತಸುತ್ತವಣ್ಣನಾ ನಿಟ್ಠಿತಾ.