೧೨. ಲೋಕಕಾಮಗುಣವಗ್ಗೋ

೧-೨. ಪಠಮಮಾರಪಾಸಸುತ್ತಾದಿವಣ್ಣನಾ

೧೧೪-೧೧೫. ಆವಸತಿ ಏತ್ಥ ಕಿಲೇಸಮಾರೋತಿ ಆವಾಸೋ. ಕಾಮಗುಣಅಜ್ಝತ್ತಿಕಬಾಹಿರಾನಿ ಆಯತನಾನಿ. ಕಿಲೇಸಮಾರಸ್ಸ ಆವಾಸಂ ಗತೋ ವಸಂ ಗತೋ. ತಿವಿಧಸ್ಸಾತಿ ಪಪಞ್ಚಸಞ್ಞಾಸಙ್ಖಾತಸ್ಸ ತಿವಿಧಸ್ಸಪಿ ಮಾರಸ್ಸ. ತತೋ ಏವ ದೇವಪುತ್ತಮಾರಸ್ಸಪಿ ವಸಂ ಗತೋತಿ ಸಕ್ಕಾ ವಿಞ್ಞಾತುಂ.

ಪಠಮಮಾರಪಾಸಸುತ್ತಾದಿವಣ್ಣನಾ ನಿಟ್ಠಿತಾ.

೩. ಲೋಕನ್ತಗಮನಸುತ್ತವಣ್ಣನಾ

೧೧೬. ಲೋಕಿಯನ್ತಿ ಏತ್ಥ ಸತ್ತಕಾಯಭೂತಗಾಮಾದೀತಿ ಲೋಕೋ, ಚಕ್ಕವಾಳೋ. ಸಙ್ಖಾರೋ ಪನ ಲುಜ್ಜನಪಲುಜ್ಜನಟ್ಠೇನ ಲೋಕೋ. ಅನ್ತನ್ತಿ ಓಸಾನಂ. ಸಬ್ಬಞ್ಞುತಞ್ಞಾಣೇನ ಸಂಸನ್ದಿತ್ವಾತಿ ಸಬ್ಬಞ್ಞುತಞ್ಞಾಣಗತಿಯಾ ಸಮಾನೇತ್ವಾ ಅವಿರೋಧೇತ್ವಾ. ಥೋಮೇಸ್ಸಾಮೀತಿ ಪಸಂಸಿಸ್ಸಾಮಿ.

ಏವಂಸಮ್ಪತ್ತಿಕನ್ತಿ ಏವಂಸಮ್ಪಜ್ಜನಕಂ ಏವಂಪಸ್ಸಿತಬ್ಬಂ ಇದಂ ಮಮ ಅಜ್ಝೇಸನಂ. ತೇನಾಹ ‘‘ಈದಿಸನ್ತಿ ಅತ್ಥೋ’’ತಿ. ಜಾನಂ ಜಾನಾತೀತಿ ಸಬ್ಬಞ್ಞುತಞ್ಞಾಣೇನ ಜಾನಿತಬ್ಬಂ ಜಾನಾತಿ ಏವ. ನ ಹಿ ಪದೇಸಞ್ಞಾಣೇ ಠಿತೋ ಜಾನಿತಬ್ಬಂ ಸಬ್ಬಂ ಜಾನಾತಿ. ಉಕ್ಕಟ್ಠನಿದ್ದೇಸೇನ ಹಿ ಅವಿಸೇಸಗ್ಗಹಣೇನ ಚ ‘‘ಜಾನ’’ನ್ತಿ ಇಮಿನಾ ನಿರವಸೇಸಂ ಞೇಯ್ಯಜಾತಂ ಪರಿಗ್ಗಯ್ಹತೀತಿ ತಬ್ಬಿಸಯಾಯ ಜಾನನಕಿರಿಯಾಯ ಸಬ್ಬಞ್ಞುತಞ್ಞಾಣಮೇವ ಕರಣಂ ಭವಿತುಂ ಯುತ್ತಂ. ಪಕರಣವಸೇನ ‘‘ಭಗವಾ’’ತಿ ಪದಸನ್ನಿಧಾನೇನ ಚ ಅಯಮತ್ಥೋ ವಿಭಾವೇತಬ್ಬೋ. ಪಸ್ಸಿತಬ್ಬಮೇವ ಪಸ್ಸತೀತಿ ದಿಬ್ಬಚಕ್ಖು-ಪಞ್ಞಾಚಕ್ಖು-ಧಮ್ಮಚಕ್ಖು-ಬುದ್ಧಚಕ್ಖು-ಸಮನ್ತಚಕ್ಖು-ಸಙ್ಖಾತೇಹಿ ಞಾಣಚಕ್ಖೂಹಿ ಪಸ್ಸಿತಬ್ಬಂ ಪಸ್ಸತಿ ಏವ. ಅಥ ವಾ ಜಾನಂ ಜಾನಾತೀತಿ ಯಥಾ ಅಞ್ಞೇ ಸವಿಪಲ್ಲಾಸಾ ಕಾಮರೂಪಪರಿಞ್ಞಾವಾದಿನೋ ಜಾನನ್ತಾಪಿ ವಿಪಲ್ಲಾಸವಸೇನ ಜಾನನ್ತಿ, ನ ಏವಂ ಭಗವಾ. ಭಗವಾ ಪನ ಪಹೀನವಿಪಲ್ಲಾಸತ್ತಾ ಜಾನನ್ತೋ ಜಾನಾತಿ ಏವ, ದಿಟ್ಠಿದಸ್ಸನಸ್ಸ ಅಭಾವಾ ಪಸ್ಸನ್ತೋ ಪಸ್ಸತಿ ಏವಾತಿ ಅತ್ಥೋ.

ದಸ್ಸನಪರಿಣಾಯಕಟ್ಠೇನಾತಿ ಯಥಾ ಚಕ್ಖು ಸತ್ತಾನಂ ದಸ್ಸನತ್ಥಂ ಪರಿಣೇತಿ ಸಾಧೇತಿ, ಏವಂ ಲೋಕಸ್ಸ ಯಾಥಾವದಸ್ಸನಸಾಧನತೋಪಿ ದಸ್ಸನಕಿಚ್ಚಪರಿಣಾಯಕಟ್ಠೇನ ಚಕ್ಖುಭೂತೋ, ಪಞ್ಞಾಚಕ್ಖುಮಯತ್ತಾ ವಾ ಸಯಮ್ಭೂಞಾಣೇನ ಪಞ್ಞಾಚಕ್ಖುಂ ಭೂತೋ ಪತ್ತೋತಿ ವಾ ಚಕ್ಖುಭೂತೋ. ಞಾಣಭೂತೋತಿ ಏತಸ್ಸ ಚ ಏವಮೇವ ಅತ್ಥೋ ದಟ್ಠಬ್ಬೋ. ಧಮ್ಮಾ ವಾ ಬೋಧಿಪಕ್ಖಿಯಾ, ತೇಹಿ ಉಪ್ಪನ್ನತ್ತಾ ಲೋಕಸ್ಸ ಚ ತದುಪ್ಪಾದನತೋ ಅನಞ್ಞಸಾಧಾರಣಂ ವಾ ಧಮ್ಮಂ ಪತ್ತೋ ಅಧಿಗತೋತಿ ಧಮ್ಮಭೂತೋ. ‘‘ಬ್ರಹ್ಮಾ’’ವುಚ್ಚತಿ ಸೇಟ್ಠಟ್ಠೇನ ಮಗ್ಗಞಾಣಂ, ತೇನ ಉಪ್ಪನ್ನತ್ತಾ ಲೋಕಸ್ಸ ಚ ತದುಪ್ಪಾದನತೋ ತಞ್ಚ ಸಯಮ್ಭೂಞಾಣೇನ ಪತ್ತೋತಿ ಬ್ರಹ್ಮಭೂತೋ. ಚತುಸಚ್ಚಧಮ್ಮಂ ವದತೀತಿ ವತ್ತಾ. ಚಿರಂ ಸಚ್ಚಪಟಿವೇಧಂ ಪವತ್ತೇನ್ತೋ ವದತೀತಿ ಪವತ್ತಾ. ಅತ್ಥಂ ನೀಹರಿತ್ವಾತಿ ದುಕ್ಖಾದಿಅತ್ಥಂ ಉದ್ಧರಿತ್ವಾ. ಪರಮತ್ಥಂ ವಾ ನಿಬ್ಬಾನಂ ಪಾಪಯಿತಾ. ಅಮತಸಚ್ಛಿಕಿರಿಯಂ ಸತ್ತೇಸು ಉಪ್ಪಾದೇನ್ತೋ ಅಮತಂ ದದಾತೀತಿ ಅಮತಸ್ಸ ದಾತಾ. ಬೋಧಿಪಕ್ಖಿಯಧಮ್ಮಾನಂ ತದಾಯತ್ತಭಾವತೋ ಧಮ್ಮಸ್ಸಾಮೀ. ಪುನಪ್ಪುನಂ ಯಾಚಾಪೇನ್ತೋ ಭಾರಿಯಂ ಕರೋನ್ತೋ ಗರುಂ ಕರೋತಿ ನಾಮ, ತಥಾ ದುವಿಞ್ಞೇಯ್ಯಂ ಕತ್ವಾ ಕಥೇನ್ತೋಪಿ.

ಚಕ್ಖುನಾ ವಿಜ್ಜಮಾನೇನ ಲೋಕಸಞ್ಞೀ ಹೋತಿ, ನ ತಸ್ಮಿಂ ಅಸತಿ. ನ ಹಿ ಅಜ್ಝತ್ತಿಕಾಯತನವಿರಹೇನ ಲೋಕಸಮಞ್ಞಾ ಅತ್ಥಿ. ತೇನಾಹ ‘‘ಚಕ್ಖುಞ್ಹಿ ಲೋಕೋ’’ತಿಆದಿ. ಅಪ್ಪಹೀನದಿಟ್ಠೀತಿ ಅಸಮೂಹತಸಕ್ಕಾಯದಿಟ್ಠಿಕೋ ಘನವಿನಿಬ್ಭೋಗಂ ಕಾತುಂ ಅಸಕ್ಕೋನ್ತೋ ಸಮುದಾಯಂ ವಿಯ ಅವಯವಂ ‘‘ಲೋಕೋ’’ತಿ ಸಞ್ಜಾನಾತಿ ಚೇವ ಮಞ್ಞತಿ ಚ. ತಥಾತಿ ಇಮಿನಾ ‘‘ಲೋಕೋತಿ ಸಞ್ಜಾನಾತಿ ಚೇವ ಮಞ್ಞತಿ ಚಾ’’ತಿ ಪದತ್ತಯಂ ಆಕಡ್ಢತಿ. ತಸ್ಸಾತಿ ಪುಥುಜ್ಜನಸ್ಸ, ಚಕ್ಕವಾಳಲೋಕಸ್ಸ ವಾ. ಚಕ್ಖಾದಿಮೇವ ಹಿ ಸಹೋಕಾಸೇನ ‘‘ಚಕ್ಕವಾಳೋ’’ತಿ ಪುಥುಜ್ಜನೋ ಸಞ್ಜಾನಾತಿ. ಗಮನೇನಾತಿ ಪದಸಾ ಗಮನೇನ. ನ ಸಕ್ಕಾ ತೇಸಂ ಅನನ್ತತ್ತಾ. ಲುಜ್ಜನಟ್ಠೇನಾತಿ ಅಭಿಸಙ್ಖಾರಲೋಕವಸೇನ ಲೋಕಸ್ಸ ಅನ್ತಂ ದಸ್ಸೇತುಂ ವುತ್ತಂ. ತಸ್ಸ ಅನ್ತೋ ನಾಮ ನಿಬ್ಬಾನಂ. ತಂ ಪತ್ತುಂ ಸಕ್ಕಾ ಸಮ್ಮಾಪಟಿಪತ್ತಿಯಾ ಪತ್ತಬ್ಬತ್ತಾ. ಚಕ್ಕವಾಳಲೋಕಸ್ಸ ಪನ ಅನ್ತೋ ನಾಮ, ನತ್ಥಿ ತಸ್ಸ ಗಮನೇನ ಅಪ್ಪತ್ತಬ್ಬತ್ತಾ.

ಇಮೇಹಿ ಪದೇಹೀತಿ ಇಮೇಹಿ ವಾಕ್ಯವಿಭಾಗೇಹಿ ಪದೇಹಿ. ತಾನಿ ಪನ ಅಕ್ಖರಸಮುದಾಯಲಕ್ಖಣಾನೀತಿ ಆಹ ‘‘ಅಕ್ಖರಸಮ್ಪಿಣ್ಡನೇಹೀ’’ತಿ. ಪಾಟಿಯೇಕ್ಕಅಕ್ಖರೇಹೀತಿ ತಸ್ಮಿಂ ತಸ್ಮಿಂ ಪದೇ ಪಟಿನಿಯತಸನ್ನಿವೇಸೇಹಿ ವಿಸುಂ ವಿಸುಂ ಚಿತ್ತೇನ ಗಯ್ಹಮಾನೇಹಿ ಅಕ್ಖರೇಹೀತಿ ಅತ್ಥೋ.

ಗಮನಟ್ಠೇನ ‘‘ಪಣ್ಡಾ’’ ವುಚ್ಚತಿ ಪಞ್ಞಾ, ತಾಯ ಇತೋ ಗತೋ ಪತ್ತೋತಿ ಪಣ್ಡಿತೋ, ಪಞ್ಞವಾ. ಮಹಾಪಞ್ಞತಾ ನಾಮ ಪಟಿಸಮ್ಭಿದಾವಸೇನ ವೇದಿತಬ್ಬಾತಿ ಆಹ ‘‘ಮಹನ್ತೇ ಅತ್ಥೇ’’ತಿಆದಿ. ಯಥಾ ತನ್ತಿ ಏತ್ಥ ತನ್ತಿ ನಿಪಾತಮತ್ತಂ ಪಠಮವಿಕಪ್ಪೇ, ದುತಿಯವಿಕಪ್ಪೇ ಪನ ಪಚ್ಚಾಮಸನನ್ತಿ ಆಹ ‘‘ತಂ ಬ್ಯಾಕತ’’ನ್ತಿ.

ಲೋಕನ್ತಗಮನಸುತ್ತವಣ್ಣನಾ ನಿಟ್ಠಿತಾ.

೪. ಕಾಮಗುಣಸುತ್ತವಣ್ಣನಾ

೧೧೭. ಚೇತಸೋತಿ ಕರಣೇ ಸಾಮಿವಚನಂ. ಚಿತ್ತೇನ ಸಂಫುಸನಂ ನಾಮ ಅನುಭವೋತಿ ಆಹ ‘‘ಚಿತ್ತೇನ ಅನುಭೂತಪುಬ್ಬಾ’’ತಿ. ಉತುತ್ತಯಾನುರೂಪತಾವಸೇನ ಪಾಸಾದತ್ತಯಂ, ತಂ ವಸೇನ ತಿವಿಧನಾಟಕಭೇದೋ. ಮನೋರಮ್ಮತಾಮತ್ತೇನ ಕಾಮಗುಣಂ ಕತ್ವಾ ದಸ್ಸಿತಂ, ನ ಕಾಮವಸೇನ. ನ ಹಿ ಅಭಿನಿಕ್ಖಮನತೋ ಉದ್ಧಂ ಬೋಧಿಸತ್ತಸ್ಸ ಕಾಮವಿತಕ್ಕಾ ಭೂತಪುಬ್ಬಾ. ತೇನಾಹ ಮಾರೋ ಪಾಪಿಮಾ –

‘‘ಸತ್ತ ವಸ್ಸಾನಿ ಭಗವನ್ತಂ, ಅನುಬನ್ಧಿಂ ಪದಾಪದಂ;

ಓತಾರಂ ನಾಧಿಗಚ್ಛಿಸ್ಸಂ, ಸಮ್ಬುದ್ಧಸ್ಸ ಸತೀಮತೋ’’ತಿ. (ಸು. ನಿ. ೪೪೮);

ಮೇತ್ತೇಯ್ಯೋ ನಾಮಾತಿಆದಿ ಅನಾಗತಾರಮ್ಮಣದಸ್ಸನಮತ್ತಂ, ನ ಬೋಧಿಸತ್ತಸ್ಸ ಏವಂ ಉಪ್ಪಜ್ಜತೀತಿ. ಅತ್ತಾ ಪಿಯಾಯಿತಬ್ಬರೂಪೋ ಏತಸ್ಸಾತಿ ಅತ್ತರೂಪೋ, ಉತ್ತರಪದೇ ಪುರಿಮಪದಲೋಪೇನಾತಿ ‘‘ಅತ್ತನೋ ಹಿತಕಾಮಜಾತಿಕೇನಾ’’ತಿ ಅತ್ಥೋ ವುತ್ತೋ. ಅತ್ತರೂಪೇನಾತಿ ವಾ ಪೀತಿಸೋಮನಸ್ಸೇಹಿ ಗಹಿತಸಭಾವೇನ ತುಟ್ಠಪಹಟ್ಠೇನ ಉದಗ್ಗುದಗ್ಗೇನ. ಅಪ್ಪಮಾದೋತಿ ಅಪ್ಪಮಜ್ಜನಂ ಕುಸಲಧಮ್ಮೇಸು ಅಖಣ್ಡಕಾರಿತಾತಿ ಆಹ ‘‘ಸಾತಚ್ಚಕಿರಿಯಾ’’ತಿ. ಅವೋಸ್ಸಗ್ಗೋತಿ ಚಿತ್ತಸ್ಸ ಕಾಮಗುಣೇಸು ಅವೋಸ್ಸಜ್ಜನಂ ಪಕ್ಖನ್ದಿತುಂ ಅಪ್ಪದಾನಂ. ಪುರಿಮೋ ವಿಕಪ್ಪೋ ಕುಸಲಾನಂ ಧಮ್ಮಾನಂ ಕರಣವಸೇನ ದಸ್ಸಿತೋ, ಪಚ್ಛಿಮೋ ಅಕುಸಲಾನಂ ಅಕರಣವಸೇನ. ದ್ವೇ ಧಮ್ಮಾತಿ ಅಪ್ಪಮಾದೋ ಸತೀತಿ ದ್ವೇ ಧಮ್ಮಾ. ಅಪ್ಪಮಾದೋ ಸತಿ ಚ ತಥಾ ಪವತ್ತಾ ಚತ್ತಾರೋ ಕುಸಲಧಮ್ಮಕ್ಖನ್ಧಾ ವೇದಿತಬ್ಬಾ. ಕತ್ತಬ್ಬಾತಿ ಪವತ್ತೇತಬ್ಬಾ.

ತಸ್ಮಿಂ ಆಯತನೇತಿ ತಸ್ಮಿಂ ನಿಬ್ಬಾನಸಞ್ಞಿತೇ ಕಾರಣೇ ಪಟಿವೇಧೇ. ತಂ ಕಾರಣನ್ತಿ ಛನ್ನಂ ಆಯತನಾನಂ ಕಾರಣಂ. ಸಳಾಯತನಂ ನಿರುಜ್ಝತಿ ಏತ್ಥಾತಿ ಸಳಾಯತನನಿರೋಧೋ ವುಚ್ಚತಿ ನಿಬ್ಬಾನಂ. ತೇನಾಹ ‘‘ನಿಬ್ಬಾನಂ. ತಂ ಸನ್ಧಾಯಾ’’ತಿಆದಿ. ನಿಬ್ಬಾನಸ್ಮಿನ್ತಿ ನಿಬ್ಬಾನಮ್ಹಿ.

ಕಾಮಗುಣಸುತ್ತವಣ್ಣನಾ ನಿಟ್ಠಿತಾ.

೫-೬. ಸಕ್ಕಪಞ್ಹಸುತ್ತಾದಿವಣ್ಣನಾ

೧೧೮-೧೧೯. ದಿಟ್ಠೇತಿ ಪಚ್ಚಕ್ಖಭೂತೇ. ಧಮ್ಮೇತಿ ಉಪಾದಾನಕ್ಖನ್ಧಧಮ್ಮೇ. ತತ್ಥ ಹಿ ಅತ್ತಾತಿ ಭವತಿ ಸಞ್ಞಾ ದಿಟ್ಠಿ ಚಾತಿ ಅತ್ತಭಾವಸಞ್ಞಾ. ತೇನಾಹ – ‘‘ದಿಟ್ಠೇವ ಧಮ್ಮೇತಿ ಇಮಸ್ಮಿಂಯೇವ ಅತ್ತಭಾವೇ’’ತಿ. ‘‘ತನ್ನಿಸ್ಸಿತ’’ನ್ತಿ ಏತ್ಥ ತಂ-ಸದ್ದೇನ ಹೇಟ್ಠಾ ಅಭಿನನ್ದನಾದಿಪರಿಯಾಯೇನ ವುತ್ತಾ ತಣ್ಹಾ ಪಚ್ಚಾಮಟ್ಠಾತಿ ಆಹ – ‘‘ತಣ್ಹಾನಿಸ್ಸಿತ’’ನ್ತಿ. ತಂ ಉಪಾದಾನಂ ಏತಸ್ಸಾತಿ ತದುಪಾದಾನಂ. ತೇನಾಹ – ‘‘ತಂಗಹಣ’’ನ್ತಿಆದಿ. ತಣ್ಹುಪಾದಾನಸಙ್ಖಾತಂ ಗಹಣಂ ಏತಸ್ಸಾತಿ ತಂಗಹಣಂ. ಛಟ್ಠಂ ಉತ್ತಾನಮೇವ ಪಞ್ಚಮೇ ವುತ್ತನಯತ್ತಾ.

ಸಕ್ಕಪಞ್ಹಸುತ್ತಾದಿವಣ್ಣನಾ ನಿಟ್ಠಿತಾ.

೭. ಸಾರಿಪುತ್ತಸದ್ಧಿವಿಹಾರಿಕಸುತ್ತವಣ್ಣನಾ

೧೨೦. ಘಟೇಸ್ಸತೀತಿ ಪುಬ್ಬೇನಾಪರಂ ಘಟಿತಂ ಸಮ್ಬನ್ಧಂ ಕರಿಸ್ಸತಿ. ವಿಚ್ಛೇದನ್ತಿ ಬ್ರಹ್ಮಚರಿಯಸ್ಸ ವಿರೋಧಿಪಚ್ಚಯಸಮುಪ್ಪತ್ತಿಯಾ ಉಚ್ಛೇದಂ.

೮. ರಾಹುಲೋವಾದಸುತ್ತವಣ್ಣನಾ

೧೨೧. ಯೇ ಧಮ್ಮಾ ಸಮ್ಮದೇವ ಭಾವಿತಾ ಬಹುಲೀಕತಾ ವಿಮುತ್ತಿಯಾ ಅರಹತ್ತಸ್ಸ ಸಚ್ಛಿಕಿರಿಯಾಯ ಸಂವತ್ತನ್ತಿ, ತೇ ಸದ್ಧಾದಯೋ ಸಮ್ಭಾರಾ ವಿಮುತ್ತಿಪರಿಪಾಚನಿಯಾತಿ ಅಧಿಪ್ಪೇತಾ. ಪರಿಪಾಚೇನ್ತೀತಿ ಪರಿಪಾಕಂ ಪರಿಣಾಮಂ ಗಮೇನ್ತಿ. ಧಮ್ಮಾತಿ ಕಾರಣಭೂತಾ ಧಮ್ಮಾ. ವಿಸುದ್ಧಿಕಾರಣವಸೇನಾತಿ ವಿಸುದ್ಧಿಕಾರಣತಾವಸೇನ, ಸಾ ಪನ ಸದ್ಧಿನ್ದ್ರಿಯಾದೀನಂ ಕಾರಣತೋ ವಿಸುದ್ಧಿ. ಯಥಾ ನಾಮ ಜಾತಿಸಮ್ಪನ್ನಸ್ಸ ಖತ್ತಿಯಕುಮಾರಸ್ಸ ವಿಪಕ್ಖವಿಗಮೇನ ಪಕ್ಖಸಙ್ಗಹೇನ ಪವತ್ತಿಟ್ಠಾನಸಮ್ಪತ್ತಿಯಾ ಚ ಪರಿಸುದ್ಧಿ ಹೋತಿ, ಏವಮೇವಂ ದಟ್ಠಬ್ಬಾತಿ ದಸ್ಸೇನ್ತೋ ‘‘ವುತ್ತಂ ಹೇತ’’ನ್ತಿಆದಿಮಾಹ.

ಅಸ್ಸದ್ಧಾದಯೋಪಿ ಪುಗ್ಗಲಾ ಸದ್ಧಾದೀನಂ ಯಾವದೇವ ಪರಿಹಾನಾಯ ಹೋನ್ತಿ, ಸದ್ಧಾದಯೋ ಪಾರಿಪೂರಿಯಾವ, ತಥಾ ಪಸಾದನಿಯಸುತ್ತನ್ತಾದಿಪಚ್ಚವೇಕ್ಖಣಾ, ಪಸಾದನಿಯಸುತ್ತನ್ತಾ ನಾಮ ಸಮ್ಪಸಾದನೀಯಸುತ್ತಾದಯೋ. ಸಮ್ಮಪ್ಪಧಾನೇತಿ ಸಮ್ಮಪ್ಪಧಾನಸುತ್ತನ್ತೇ. ಸತಿಪಟ್ಠಾನೇತಿ ಚತ್ತಾರೋ ಸತಿಪಟ್ಠಾನೇ. ಝಾನವಿಮೋಕ್ಖೇತಿ ಝಾನಾನಿ ಚೇವ ವಿಮೋಕ್ಖೇ ಚ ಉದ್ದಿಸ್ಸ ಪವತ್ತಸುತ್ತನ್ತೇ. ಗಮ್ಭೀರಞಾಣಚರಿಯೇತಿ ಖನ್ಧಾಯತನಧಾತುಪಟಿಚ್ಚಸಮುಪ್ಪಾದಪಟಿಸಂಯುತ್ತಸುತ್ತನ್ತೇ.

ಕಲ್ಯಾಣಮಿತ್ತತಾದಯೋತಿ ಕಲ್ಯಾಣಮಿತ್ತತಾ ಸೀಲಸಂವರೋ ಅಭಿಸಲ್ಲೇಖಕಥಾ ವೀರಿಯಾರಮ್ಭೋ ನಿಬ್ಬೇಧಿಕಪಞ್ಞಾತಿ ಇಮೇ ಕಲ್ಯಾಣಮಿತ್ತಾದಯೋ ಪಞ್ಚ ಧಮ್ಮಾ, ಯೇ ‘‘ಇಧ, ಮೇಘಿಯ, ಭಿಕ್ಖು ಕಲ್ಯಾಣಮಿತ್ತೋ ಹೋತೀ’’ತಿಆದಿನಾ ಉದಾನೇ (ಉದಾ. ೩೧) ಕಥಿತಾ. ಲೋಕಂ ವೋಲೋಕೇನ್ತಸ್ಸಾತಿ ಆಯಸ್ಮತೋ ರಾಹುಲಸ್ಸ ತಾಸಞ್ಚ ದೇವತಾನಂ ಇನ್ದ್ರಿಯಪರಿಪಾಕಂ ಪಸ್ಸನ್ತಸ್ಸ. ತತೋ ಯೇನ ಅನ್ಧವನಂ, ತತ್ಥ ದಿವಾವಿಹಾರಾಯ ಮಹಾಸಮಾಗಮೋ ಭವಿಸ್ಸತೀತಿ. ತಥಾ ಹಿ ವಕ್ಖತಿ ‘‘ಏತ್ತಕಾತಿ ಗಣನಾವಸೇನ ಪರಿಚ್ಛೇದೋ ನತ್ಥೀ’’ತಿ.

ರುಕ್ಖಪಬ್ಬತನಿಸ್ಸಿತಾ ಭೂಮಟ್ಠಕಾ, ಆಕಾಸಚಾರಿವಿಮಾನವಾಸಿನೋ ಅನ್ತಲಿಕ್ಖಟ್ಠಕಾ. ಧಮ್ಮಚಕ್ಖುನ್ತಿ ವೇದಿತಬ್ಬಾನಿ ಚತುಸಚ್ಚಧಮ್ಮಾನಂ ದಸ್ಸನಟ್ಠೇನ.

ರಾಹುಲೋವಾದಸುತ್ತವಣ್ಣನಾ ನಿಟ್ಠಿತಾ.

ಲೋಕಕಾಮಗುಣವಗ್ಗವಣ್ಣನಾ ನಿಟ್ಠಿತಾ.