೨. ತಿಸ್ಸಸುತ್ತವಣ್ಣನಾ

೮೪. ಮಧುರಕಂ ವುಚ್ಚತಿ ಕಾಯೇ ವಿಭಾರನ್ತಿ ಆಹ – ‘‘ಮಧುರಕಜಾತೋ ವಿಯಾತಿ ಸಞ್ಜಾತಗರುಭಾವೋ ವಿಯಾ’’ತಿ. ಗರುಭಾವೇ ಸತಿ ಲಹುತಾ ಅನೋಕಾಸಾವ, ತಥಾ ಮುದುತಾ ಕಮ್ಮಞ್ಞತಾ ಚಾತಿ ವುತ್ತಂ ‘‘ಅಕಮ್ಮಞ್ಞೋ’’ತಿ. ‘‘ಕಾಯೇ’’ತಿ ಆನೇತ್ವಾ ವತ್ತಬ್ಬಂ. ನ ಪಕ್ಖಾಯನ್ತೀತಿ ಪಕಾಸಾ ಹುತ್ವಾ ನ ಖಾಯನ್ತಿ. ತೇನಾಹ ‘‘ನ ಪಾಕಟಾ ಹೋನ್ತೀ’’ತಿ. ಉಪಟ್ಠಹನ್ತೀತಿ ಉಪತಿಟ್ಠನ್ತಿ. ನ ದಿಸ್ಸತೀತಿ ಗಹಣಂ ನ ಗಚ್ಛತಿ. ಮಹಾವಿಚಿಕಿಚ್ಛಾತಿ ಅಟ್ಠವತ್ಥುಕಾ ಸೋಳಸವತ್ಥುಕಾ ಚ ವಿಮತಿ. ನ ಹಿ ಉಪ್ಪಜ್ಜತಿ ಪರಿಪಕ್ಕಕುಸಲಮೂಲತ್ತಾ.

ಕಾಮಾನಮೇತಂ ಅಧಿವಚನನ್ತಿ ಪದಂ ಉದ್ಧರಿತ್ವಾ ಯೇನ ಅಧಿಪ್ಪಾಯೇನ ಭಗವತಾ ನಿನ್ನಂ ಪಲ್ಲಲಂ ಕಾಮಾನಂ ನಿದಸ್ಸನಭಾವೇನ ಆಭತಂ, ತಂ ಅಧಿಪ್ಪಾಯಂ ವಿಭಾವೇತುಂ ‘‘ಯಥಾ ಹೀ’’ತಿಆದಿ ವುತ್ತಂ.

ತಿಸ್ಸಸುತ್ತವಣ್ಣನಾ ನಿಟ್ಠಿತಾ.