೭. ಅರಹನ್ತವಗ್ಗೋ

೧. ಉಪಾದಿಯಮಾನಸುತ್ತವಣ್ಣನಾ

೬೩. ಗಣ್ಹಮಾನೋತಿ ‘‘ಏತಂ ಮಮಾ’’ತಿಆದಿನಾ ಗಣ್ಹಮಾನೋ. ಪಾಸೇನಾತಿ ರಾಗಪಾಸೇನ. ತಞ್ಹಿ ಮಾರೋ ಮಾರಪಾಸೋತಿ ಮಞ್ಞತಿ. ತೇನಾಹ ‘‘ಅನ್ತಲಿಕ್ಖಚರೋ ಪಾಸೋ, ಯ್ವಾಯಂ ಚರತಿ ಮಾನಸೋ’’ತಿ (ಸಂ. ನಿ. ೧.೧೫೧; ಮಹಾವ. ೩೩). ಮುತ್ತೋ ನಾಮ ಹೋತಿ ಅನುಪಾದಿಯತೋ ಸಬ್ಬಸೋ ಖನ್ಧಸ್ಸ ಅಭಾವತೋ.

ಉಪಾದಿಯಮಾನಸುತ್ತವಣ್ಣನಾ ನಿಟ್ಠಿತಾ.

೨-೬. ಮಞ್ಞಮಾನಸುತ್ತಾದಿವಣ್ಣನಾ

೬೪-೬೮. ‘‘ಏತಂ ಮಮಾ’’ತಿಆದಿನಾ. ಮಞ್ಞನಾ ಅಭಿನನ್ದನಾ ಚ. ತಣ್ಹಾಛನ್ದೋತಿ ತಣ್ಹಾ ಏವ ಛನ್ದೋ. ಸಾ ಹಿ ತಣ್ಹಾಯನಟ್ಠೇನ ತಣ್ಹಾ, ಛನ್ದಿಕತಟ್ಠೇನ ಛನ್ದೋ. ಚತುತ್ಥಂ ಅನಿಚ್ಚಲಕ್ಖಣಮುಖೇನ ವುತ್ತಂ, ಪಞ್ಚಮಂ ದುಕ್ಖಲಕ್ಖಣಮುಖೇನ, ಛಟ್ಠಂ ಅನತ್ತಲಕ್ಖಣಮುಖೇನ. ಸೇಸಂ ತೀಸುಪಿ ಸದಿಸಮೇವಾತಿ ವುತ್ತಂ ‘‘ಏಸೇವ ನಯೋ’’ತಿ.

ಮಞ್ಞಮಾನಸುತ್ತಾದಿವಣ್ಣನಾ ನಿಟ್ಠಿತಾ.

೭. ಅನತ್ತನಿಯಸುತ್ತವಣ್ಣನಾ

೬೯. ಅನತ್ತನಿಯನ್ತಿ ನ ಅತ್ತನಿಯಂ. ತೇನಾಹ ‘‘ನ ಅತ್ತನೋ ಸನ್ತಕ’’ನ್ತಿ.

ಅನತ್ತನಿಯಸುತ್ತವಣ್ಣನಾ ನಿಟ್ಠಿತಾ.

೮-೧೦. ರಜನೀಯಸಣ್ಠಿತಸುತ್ತಾದಿವಣ್ಣನಾ

೭೦-೭೨. ರಜನೀಯೇನಾತಿ ರಜನೀಯೇನ ರಾಗುಪ್ಪಾದಕೇನ. ತೇನಾಹ ‘‘ರಾಗಸ್ಸ ಪಚ್ಚಯಭಾವೇನಾ’’ತಿ. ರಾಹುಲಸಂಯುತ್ತೇ ರಾಹುಲತ್ಥೇರಸ್ಸ ಪುಚ್ಛಾವಸೇನ ಆಗತಾ. ಇಧ ರಾಧತ್ಥೇರಸ್ಸ ಸುರಾಧತ್ಥೇರಸ್ಸ ಚ ಪುಚ್ಛಾವಸೇನ, ಪಾಳಿ ಪನ ಸಬ್ಬತ್ಥ ಸದಿಸಾ. ತೇನಾಹ ‘‘ವುತ್ತನಯೇನೇವ ವೇದಿತಬ್ಬಾನೀ’’ತಿ.

ರಜನೀಯಸಣ್ಠಿತಸುತ್ತಾದಿವಣ್ಣನಾ ನಿಟ್ಠಿತಾ.

ಅರಹನ್ತವಗ್ಗವಣ್ಣನಾ ನಿಟ್ಠಿತಾ.