೨. ಪುಪ್ಫಸುತ್ತವಣ್ಣನಾ

೯೪. ವಿವದತೀತಿ ವಿವಾದಂ ಕರೋತಿ. ವದನ್ತೋತಿ ಅಯಥಾಸಭಾವೇನ ವದನ್ತೋ. ವಿವದತಿ ಧಮ್ಮತಾಯ ವಿರುದ್ಧಂ ಕತ್ವಾ ವದತಿ. ಲೋಕಧಮ್ಮೋತಿ ಲುಜ್ಜನಸಭಾವಧಮ್ಮೋ. ಕೋ ಪನ ಸೋತಿ ಆಹ ‘‘ಖನ್ಧಪಞ್ಚಕ’’ನ್ತಿ. ತೇನಾಹ ‘‘ತಂ ಹೀ’’ತಿಆದಿ. ಕಥಂ ಕರೋಮೀತಿ ಕೇನ ಪಕಾರೇನಾಹಂ ಬಾಲಂ ಅಜಾನನ್ತಂ ಕರೋಮಿ. ತೇನಾಹ ‘‘ಮಯ್ಹಂ ಹೀ’’ತಿಆದಿ. ತಥಾ ಚಾಹ ‘‘ಅಕ್ಖಾತೋ ವೋ ಮಯಾ ಮಗ್ಗೋ’’ತಿಆದಿ (ಧ. ಪ. ೨೭೫). ‘‘ತಯೋ ಲೋಕಾ ಕಥಿತಾ’’ತಿ ವತ್ವಾ ತಂ ವಿವರಿತುಂ ‘‘ನಾಹಂ, ಭಿಕ್ಖವೇ’’ತಿಆದಿಮಾಹ.

ಪುಪ್ಫಸುತ್ತವಣ್ಣನಾ ನಿಟ್ಠಿತಾ.