೭. ಆಣಿಸುತ್ತವಣ್ಣನಾ

೨೨೯. ಅಞ್ಞೇ ರಾಜಾನೋ ಚ ಭಾಗಂ ಗಣ್ಹನ್ತಾ ಇಮೇ ವಿಯ ದಸಭಾಗಂ ಗಣ್ಹನ್ತೀತಿ ತೇಸಮಯಂ ಅನುಗತಿ ಪಞ್ಞಾಯತಿ. ಮಹಾಜನಸ್ಸ ಆನಯನತೋ ಆನಕೋತಿ ಆಹ ‘‘ಏವಂಲದ್ಧನಾಮೋ’’ತಿ. ಇದಾನಿ ತಂ ಆದಿತೋ ಪಟ್ಠಾಯ ಆಗಮನಾನುಕ್ಕಮಂ ದಸ್ಸೇತುಂ ‘‘ಹಿಮವನ್ತೇ ಕಿರಾ’’ತಿಆದಿಮಾಹ. ಕರೇಣುನ್ತಿ ಕರೇಣುಕಂ, ಹತ್ಥಿನಿನ್ತಿ ಅತ್ಥೋ. ಸಕ್ಕರಿಂಸೂತಿ ಅನತ್ಥಪರಿಹರಣವಸೇನ ಪಸತ್ಥೂಪಹಾರವಸೇನ ಚ ಪೂಜೇಸುಂ. ಓತರೀತಿ ಕುಳೀರದಹಂ ಪಾವಿಸಿ. ಪಟಿಕ್ಕಮಿತ್ವಾ ಠಪನವಸೇನ ಅಪಕ್ಕಮಿತ್ವಾ ಪತಿ.

ಸುವಣ್ಣರಜತಾದಿಮಯನ್ತಿ ಕಿಸ್ಮಿಞ್ಚಿ ಛಿದ್ದೇ ಸುವಣ್ಣಮಯಂ, ಕಿಸ್ಮಿಞ್ಚಿ ರಜತಮಯಂ, ಕಿಸ್ಮಿಞ್ಚಿ ಫಲಿಕಮಯಂ ಆಣಿಂ ಘಟಯಿಂಸು ಬನ್ಧಿಂಸು. ಪುಬ್ಬೇ ಫರಿತ್ವಾ ತಿಟ್ಠನ್ತಸ್ಸ ದ್ವಾದಸ ಯೋಜನಾನಿ ಪಮಾಣೋ ಏತಸ್ಸಾತಿ ದ್ವಾದಸಯೋಜನಪ್ಪಮಾಣೋ, ಸದ್ದೋ. ಅಥಸ್ಸ ಅನೇಕಸತಕಾಲೇ ಗಚ್ಛನ್ತೇ ಅನ್ತೋಸಾಲಾಯಮ್ಪಿ ದುಕ್ಖೇನ ಸುಯ್ಯಿತ್ಥ ಆಣಿಸಙ್ಘಾಟಮತ್ತತ್ತಾ.

ಗಮ್ಭೀರಾತಿ ಅಗಾಧಾ ದುಕ್ಖೋಗಾಳ್ಹಾ. ಸಲ್ಲಸುತ್ತಞ್ಹಿ ‘‘ಅನಿಮಿತ್ತಮನಞ್ಞಾತ’’ನ್ತಿಆದಿನಾ ಪಾಳಿವಸೇನ ಗಮ್ಭೀರಂ, ನ ಅತ್ಥಗಮ್ಭೀರಂ. ತಥಾ ಹಿ ತತ್ಥ ತಾ ತಾ ಗಾಥಾ ದುವಿಞ್ಞೇಯ್ಯರೂಪಾ ತಿಟ್ಠನ್ತಿ, ದುವಿಞ್ಞೇಯ್ಯಂ ಞಾಣೇನ ದುಕ್ಖೋಗಾಹನ್ತಿ ಕತ್ವಾ ‘‘ಗಮ್ಭೀರ’’ನ್ತಿ ವುಚ್ಚತಿ. ಪುಬ್ಬಾಪರಮ್ಪೇತ್ಥ ಕಾಸಞ್ಚಿ ಗಾಥಾನಂ ದುವಿಞ್ಞೇಯ್ಯತಾಯ ದುಕ್ಖೋಗಾಹಮೇವ, ತಸ್ಮಾ ತಂ ಪಾಳಿವಸೇನ ‘‘ಗಮ್ಭೀರ’’ನ್ತಿ ವುತ್ತಂ ‘‘ಪಾಳಿವಸೇನ ಗಮ್ಭೀರಾ ಸಲ್ಲಸುತ್ತಸದಿಸಾ’’ತಿ. ಇಮಿನಾ ನಯೇನ ‘‘ಅತ್ಥವಸೇನ ಗಮ್ಭೀರಾ’’ತಿ ಏತ್ಥ ಅತ್ಥೋ ವೇದಿತಬ್ಬೋ. ಮಹಾವೇದಲ್ಲಸುತ್ತಸ್ಸ ಅತ್ಥವಸೇನ ಗಮ್ಭೀರತಾ ಪಾಕಟಾಯೇವ. ಲೋಕಂ ಉತ್ತರತೀತಿ ಲೋಕುತ್ತರೋ, ನವವಿಧಅಪ್ಪಮಾಣಧಮ್ಮೋ, ಸೋ ಅತ್ಥಭೂತೋ ಏತೇಸಂ ಅತ್ಥೀತಿ ಲೋಕುತ್ತರಾ. ತೇನಾಹ ‘‘ಲೋಕುತ್ತರಅತ್ಥದೀಪಕಾ’’ತಿ. ಸತ್ತಸುಞ್ಞತಧಮ್ಮಮತ್ತಮೇವಾತಿ ಸತ್ತೇನ ಅತ್ತನಾ ಸುಞ್ಞತಂ ಕೇವಲಂ ಧಮ್ಮಮತ್ತಮೇವ. ಉಗ್ಗಹೇತಬ್ಬಂ ಪರಿಯಾಪುಣಿತಬ್ಬನ್ತಿ ಚ ಲಿಙ್ಗವಚನವಿಪಲ್ಲಾಸೇನ ವುತ್ತನ್ತಿ ಆಹ ‘‘ಉಗ್ಗಹೇತಬ್ಬೇ ಚ ಪರಿಯಾಪುಣಿತಬ್ಬೇ ಚಾ’’ತಿ. ಕವಿತಾತಿ ಕವಿನೋ ಕಮ್ಮಂ ಕವಿಕತಾ. ಯಸ್ಸ ಪನ ಯಂ ಕಮ್ಮಂ, ತಂ ತೇನ ಕತನ್ತಿ ವುಚ್ಚತೀತಿ ಆಹ ‘‘ಕವಿತಾತಿ ಕವೀಹಿ ಕತಾ’’ತಿ. ಇತರಂ ‘‘ಕಾವೇಯ್ಯಾ’’ತಿ ಪದಂ, ಕಬ್ಬನ್ತಿ ವುತ್ತಂ ಹೋತಿ. ‘‘ಕಬ್ಬ’’ನ್ತಿ ಚ ಕವಿನಾ ವುತ್ತನ್ತಿ ಅತ್ಥೋ. ತೇನಾಹ ‘‘ತಸ್ಸೇವ ವೇವಚನ’’ನ್ತಿ. ಚಿತ್ತಕ್ಖರಾತಿ ವಿಚಿತ್ರಾಕಾರಅಕ್ಖರಾ. ಸಾಸನತೋ ಬಹಿಭೂತಾತಿ ನ ಸಾಸನಾವಚರಾ. ತೇಸಂ ಸಾವಕೇಹೀತಿ ‘‘ಬುದ್ಧಾನಂ ಸಾವಕಾ’’ತಿ ಅಪಞ್ಞಾತಾನಂ ಯೇಸಂ ಕೇಸಞ್ಚಿ ಸಾವಕೇಹಿ. ಅನುಗ್ಗಯ್ಹಮಾನಾತಿ ನ ಉಗ್ಗಯ್ಹಮಾನಾ ಸವನಧಾರಣಪರಿಚಯಅತ್ಥೂಪಪರಿಕ್ಖಾದಿವಸೇನ ಅನುಗ್ಗಯ್ಹಮಾನಾ. ಅನ್ತರಧಾಯನ್ತಿ ಅದಸ್ಸನಂ ಗಚ್ಛನ್ತಿ.

ಆಣಿಸುತ್ತವಣ್ಣನಾ ನಿಟ್ಠಿತಾ.