೮. ಕಲಿಙ್ಗರಸುತ್ತವಣ್ಣನಾ

೨೩೦. ಕಲಿಙ್ಗರಂ ವುಚ್ಚತಿ ಖುದ್ದಕದಾರುಖಣ್ಡಂ, ತಂ ಉಪಧಾನಂ ಏತೇಸನ್ತಿ ಕಲಿಙ್ಗರೂಪಧಾನಾ. ಲಿಚ್ಛವೀ ಪನ ಖದಿರದಣ್ಡಂ ಉಪಧಾನಂ ಕತ್ವಾ ತದಾ ವಿಹರಿಂಸು. ತಸ್ಮಾ ವುತ್ತಂ ‘‘ಖದಿರಘಟಿಕಾಸೂ’’ತಿಆದಿ. ಪಕತಿವಿಜ್ಜುಸಞ್ಞಿತೋ ನತ್ಥಿ ಏತೇಸಂ ಖಣೋ ವಿಜ್ಝನೇತಿ ಅಕ್ಖಣವೇಧಿನೋ ತತೋ ಸೀಘತರಂ ವಿಜ್ಝನತೋ. ‘‘ಅಕ್ಖಣ’’ನ್ತಿ ವಿಜ್ಜು ವುಚ್ಚತಿ ಇತ್ತರಖಣತ್ತಾ. ಅಕ್ಖಣೋಭಾಸೇನ ಲಕ್ಖಣವೇಧಕಾ ಅಕ್ಖಣವೇಧಿನೋ. ಅನೇಕಧಾ ಭಿನ್ನಸ್ಸ ವಾಲಸ್ಸ ವಿಜ್ಝನೇನ ವಾಲವೇಧಿನೋ. ವಾಲೇಕದೇಸೋ ಹಿ ಇಧ ‘‘ವಾಲೋ’’ತಿ ಗಹಿತೋ.

ಬಹುದೇವ ದಿವಸಭಾಗಂ ಪಧಾನಾನುಯೋಗತೋ ಉಪ್ಪನ್ನದರಥಪರಿಸ್ಸಮವಿನೋದನತ್ಥಂ ನ್ಹಾಯಿತ್ವಾ. ತೇ ಸನ್ಧಾಯಾತಿ ತೇ ತಥಾರೂಪೇ ಪಧಾನಕಮ್ಮಿಕಭಿಕ್ಖೂ ಸನ್ಧಾಯ. ಇದಂ ಇದಾನಿ ವುಚ್ಚಮಾನಂ ಅತ್ಥಜಾತಂ ವುತ್ತಂ ಪೋರಾಣಟ್ಠಕಥಾಯಂ. ಅಯಮ್ಪಿ ದೀಪೋತಿ ತಮ್ಬಪಣ್ಣಿದೀಪಮಾಹ. ಪಧಾನಾನುಯುಞ್ಜನವೇಲಾಯ ನಿವೇದನವಸೇನ ತತ್ಥ ತತ್ಥ ಏಕಜ್ಝಂ ಪಹತಘಣ್ಡಿನಿಗ್ಘೋಸೇನೇವ ಏಕಘಣ್ಡಿನಿಗ್ಘೋಸೋ, ತತ್ಥ ತತ್ಥ ಪಣ್ಣಸಾಲಾದೀಸು ವಸನ್ತಾನಂ ಭಿಕ್ಖೂನಂ ವಸೇನ ಏಕಪಧಾನಭೂತೋ. ನಾನಾಮುಖೋತಿ ಅನುರಾಧಪುರಸ್ಸ ಪಚ್ಛಿಮದಿಸಾಯಂ ಏಕೋ ವಿಹಾರೋ, ಪಿಲಿಚ್ಛಿಕೋಳಿನಗರಸ್ಸ ಪುರತ್ಥಿಮದಿಸಾಯಂ. ಉಭಯತ್ಥ ಪವತ್ತಘಣ್ಡಿಸದ್ದಾ ಅನ್ತರಾಪವತ್ತಘಣ್ಡಿಸದ್ದೇಹಿ ಮಿಸ್ಸೇತ್ವಾ ಓಸರನ್ತಿ. ಕಲ್ಯಾಣಿಯಂ ಪವತ್ತಘಣ್ಡಿಸದ್ದೋ ತಥಾ ನಾಗದೀಪೇ.

ಕಲಿಙ್ಗರಸುತ್ತವಣ್ಣನಾ ನಿಟ್ಠಿತಾ.