೬. ಧನುಗ್ಗಹಸುತ್ತವಣ್ಣನಾ

೨೨೮. ದಳ್ಹಧನುನೋತಿ ಥಿರತರಧನುನೋ. ಇದಾನಿ ತಸ್ಸ ಥಿರತರಭಾವಂ ಪರಿಚ್ಛೇದತೋ ದಸ್ಸೇತುಂ ‘‘ದಳ್ಹಧನೂ’’ತಿಆದಿ ವುತ್ತಂ. ತತ್ಥ ದ್ವಿಸಹಸ್ಸಥಾಮನ್ತಿ ಪಲಾನಂ ದ್ವಿಸಹಸ್ಸಥಾಮಂ. ವುತ್ತಮೇವತ್ಥಂ ಪಾಕಟತರಂ ಕತ್ವಾ ದಸ್ಸೇತುಂ ‘‘ಯಸ್ಸಾ’’ತಿಆದಿಮಾಹ. ತತ್ಥ ಯಸ್ಸಾತಿ ಧನುನೋ. ಆರೋಪಿತಸ್ಸಾತಿ ಜಿಯಂ ಆರೋಪಿತಸ್ಸ. ಜಿಯಾಬದ್ಧೋತಿ ಜಿಯಾಯ ಬದ್ಧೋ. ಪಥವಿತೋ ಮುಚ್ಚತಿ, ಏತಂ ‘‘ದ್ವಿಸಹಸ್ಸಥಾಮ’’ನ್ತಿ ವೇದಿತಬ್ಬಂ. ಲೋಹಸೀಸಾದೀನನ್ತಿ ಕಾಳಲೋಹತಮ್ಬಲೋಹಸೀಸಾದೀನಂ. ಭಾರೋತಿ ಪುರಿಸಭಾರೋ, ಸೋ ಪನ ಮಜ್ಝಿಮಪುರಿಸಸ್ಸ ವಸೇನ ಏದಿಸಂ ತಸ್ಸ ಬಲಂ ದಟ್ಠಬ್ಬಂ. ಉಗ್ಗಹಿತಸಿಪ್ಪಾ ಧನುವೇದಸಿಕ್ಖಾವಸೇನ. ಚಿಣ್ಣವಸೀಭಾವಾ ಲಕ್ಖೇಸು ಅವಿರಜ್ಝನಸರಕ್ಖೇಪವಸೇನ. ಕತಂ ರಾಜಕುಲಾದೀಸು ಉಪಗನ್ತ್ವಾ ಅಸನಂ ಸರಕ್ಖೇಪೋ ಏತೇಹೀತಿ ಕತೂಪಸನಾತಿ ಆಹ ‘‘ರಾಜಕುಲಾದೀಸು ದಸ್ಸಿತಸಿಪ್ಪಾ’’ತಿ.

‘‘ಬೋಧಿಸತ್ತೋ ಚತ್ತಾರಿ ಕಣ್ಡಾನಿ ಆಹರೀ’’ತಿ ವತ್ವಾ ತಮೇವ ಅತ್ಥಂ ವಿತ್ಥಾರತೋ ದಸ್ಸೇನ್ತೋ ‘‘ತದಾ ಕಿರಾ’’ತಿಆದಿಮಾಹ. ತತ್ಥ ಜವಿಸ್ಸಾಮಾತಿ ಧಾವಿಸ್ಸಾಮ. ಅಗ್ಗಿ ಉಟ್ಠಹೀತಿ ಸೀಘಪತನಸನ್ತಾಪೇನ ಚ ಸೂರಿಯರಸ್ಮಿಸನ್ತಾಪಸ್ಸ ಆಸನ್ನಭಾವೇನ ಚ ಉಸುಮಾ ಉಟ್ಠಹಿ. ಪಕ್ಖಪಞ್ಜರೇನಾತಿ ಪಕ್ಖಜಾಲನ್ತರೇನ.

ನಿವತ್ತಿತ್ವಾತಿ ‘‘ನಿಪ್ಪಯೋಜನಮಿದಂ ಜವನ’’ನ್ತಿ ನಿವತ್ತಿತ್ವಾ. ಪತ್ತಕಟಾಹೇನ ಓತ್ಥಟಪತ್ತೋ ವಿಯಾತಿ ಪಿಹಿತಪತ್ತೋ ವಿಯ ಅಹೋಸಿ, ವೇಗಸಾ ಪತನೇನ ನಗರಸ್ಸ ಉಪರಿ ಆಕಾಸಸ್ಸ ನಿರಿಕ್ಖಣಂ ಅಹೋಸಿ. ಸಞ್ಚಾರಿತತ್ತಾ ಅನೇಕಹಂಸಸಹಸ್ಸಸದಿಸೋ ಪಞ್ಞಾಯಿ ಸೇಯ್ಯಥಾಪಿ ಬೋಧಿಸತ್ತಸ್ಸ ಧನುಗ್ಗಹಕಾಲೇ ಸರಕೂಟಾದಿದಸ್ಸನೇ.

ದುಕ್ಕರನ್ತಿ ತಸ್ಸ ಅದಸ್ಸನಂ ಸನ್ಧಾಯಾಹ, ನ ಅತ್ತನೋ ಪತನಂ. ಸೂರಿಯಮಣ್ಡಲಞ್ಹಿ ಅತಿಸೀಘೇನ ಜವೇನ ಗಚ್ಛನ್ತಮ್ಪಿ ಪಞ್ಞಾಸಯೋಜನಾಯಾಮವಿತ್ಥತಂ ಅತ್ತನೋ ವಿಪುಲತಾಯ ಪಭಸ್ಸರತಾಯ ಚ ಸತ್ತಾನಂ ಚಕ್ಖುಸ್ಸ ಗೋಚರಭಾವಂ ಗಚ್ಛತಿ, ಜವನಹಂಸೋ ಪನ ತಾದಿಸೇನ ಸೂರಿಯೇನ ಸದ್ಧಿಂ ಜವೇನ ಗಚ್ಛನ್ತೋ ನ ಪಞ್ಞಾಯೇಯ್ಯ. ತಸ್ಮಾ ವುತ್ತಂ ‘‘ನ ಸಕ್ಕಾ ತಯಾ ಪಸ್ಸಿತು’’ನ್ತಿ. ಚತ್ತಾರೋ ಅಕ್ಖಣವೇಧಿನೋ. ಗನ್ತ್ವಾ ಗಹಿತೇ ಸೋತುಂ ಘಣ್ಡಂ ಪಿಳನ್ಧಾಪೇತ್ವಾ ಸಯಂ ಪುರತ್ಥಾಭಿಮುಖೋ ನಿಸಿನ್ನೋ. ಪುರತ್ಥಿಮದಿಸಾಭಿಮುಖಂ ಗತಕಣ್ಡಂ ಸನ್ಧಾಯಾಹ ‘‘ಪಠಮಕಣ್ಡೇನೇವ ಸದ್ಧಿಂ ಉಪ್ಪತಿತ್ವಾ’’ತಿ. ತೇ ಚತ್ತಾರಿ ಕಣ್ಡಾನಿ ಏಕಕ್ಖಣೇಯೇವ ಖಿಪಿಂಸು.

ಆಯುಂ ಸಙ್ಖರೋತಿ ಏತೇನಾತಿ ಆಯುಸಙ್ಖಾರೋ. ಯಥಾ ಹಿ ಕಮ್ಮಜರೂಪಾನಂ ಪವತ್ತಿ ಜೀವಿತಿನ್ದ್ರಿಯಪಟಿಬದ್ಧಾ, ಏವಂ ಅತ್ತಭಾವಸ್ಸ ಪವತ್ತಿ ತಪ್ಪಟಿಬದ್ಧಾತಿ. ಬಹುವಚನನಿದ್ದೇಸೋ ಪನ ಪಾಳಿಯಂ ಏಕಸ್ಮಿಂ ಖಣೇ ಅನೇಕಸತಸಙ್ಖಸ್ಸ ಜೀವಿತಿನ್ದ್ರಿಯಸ್ಸ ಉಪಲಬ್ಭನತೋ. ತಂ ಜೀವಿತಿನ್ದ್ರಿಯಂ. ತತೋ ಯಥಾವುತ್ತದೇವತಾನಂ ಜವತೋ ಸೀಘತರಂ ಖೀಯತಿ ಇತ್ತರಖಣತ್ತಾ. ವುತ್ತಞ್ಹೇತಂ –

‘‘ಜೀವಿತಂ ಅತ್ತಭಾವೋ ಚ, ಸುಖದುಕ್ಖಾ ಚ ಕೇವಲಾ;

ಏಕಚಿತ್ತಸಮಾಯುತ್ತಾ, ಲಹುಸೋ ವತ್ತತೇ ಖಣೋ’’ತಿ. (ಮಹಾನಿ. ೧೦);

ಭೇದೋತಿ ಭಙ್ಗೋ. ನ ಸಕ್ಕಾ ಪಞ್ಞಾಪೇತುಂ ತತೋಪಿ ಅತಿವಿಯ ಇತ್ತರಖಣತ್ತಾ.

ಧನುಗ್ಗಹಸುತ್ತವಣ್ಣನಾ ನಿಟ್ಠಿತಾ.