೪. ಚತುತ್ಥವಗ್ಗೋ

೧-೪. ಭಿನ್ದಿಸುತ್ತಾದಿವಣ್ಣನಾ

೧೮೦-೧೮೩. ದೇವದತ್ತೋ ಸಗ್ಗೇ ವಾ ನಿಬ್ಬತ್ತೇಯ್ಯಾತಿಆದಿ ಪರಿಕಪ್ಪವಚನಂ. ನ ಹಿ ಪಚ್ಚೇಕಬೋಧಿಯಂ ನಿಯತಗತಿಕೋ ಅನ್ತರಾ ಮಗ್ಗಫಲಾನಿ ಅಧಿಗನ್ತುಂ ಭಬ್ಬೋತಿ. ಸೋತಿ ಅನವಜ್ಜಧಮ್ಮೋ. ಅಸ್ಸಾತಿ ದೇವದತ್ತಸ್ಸ. ಸಮುಚ್ಛೇದಮಗಮಾ ಕತೂಪಚಿತಸ್ಸ ಮಹತೋ ಪಾಪಧಮ್ಮಸ್ಸ ಬಲೇನ ತಸ್ಮಿಂ ಅತ್ತಭಾವೇ ಸಮುಚ್ಛೇದಭಾವತೋ, ನ ಅಚ್ಚನ್ತಾಯ. ಅಕುಸಲಂ ನಾಮೇತಂ ಅಬಲಂ, ಕುಸಲಂ ವಿಯ ನ ಮಹಾಬಲಂ, ತಸ್ಮಾ ತಸ್ಮಿಂಯೇವ ಅತ್ತಭಾವೇ ತಾದಿಸಾನಂ ಪುಗ್ಗಲಾನಂ ಅತೇಕಿಚ್ಛತಾ, ಅಞ್ಞಥಾ ಸಮ್ಮತ್ತನಿಯಾಮೋ ವಿಯ ಮಿಚ್ಛತ್ತನಿಯಾಮೋ ಅಚ್ಚನ್ತಿಕೋ ಸಿಯಾ. ಯದಿ ಏವಂ ವಟ್ಟಖಾಣುಕಜೋತನಾ ಕಥನ್ತಿ? ಆಸೇವನಾವಸೇನ, ತಸ್ಮಾ ಯಥಾ ‘‘ಸಕಿಂ ನಿಮುಗ್ಗೋ ನಿಮುಗ್ಗೋ ಏವ ಬಾಲೋ’’ತಿ ವುತ್ತಂ, ಏವಂ ವಟ್ಟಖಾಣುಕಜೋತನಾ. ಯಾದಿಸೇ ಹಿ ಪಚ್ಚಯೇ ಪಟಿಚ್ಚ ಪುಗ್ಗಲೋ ತಂ ದಸ್ಸನಂ ಗಣ್ಹಿ, ತಥಾ ಚ ಪಟಿಪನ್ನೋ, ಪುನ ಅಚಿನ್ತಪ್ಪತಿವತ್ತೇ ಪಚ್ಚಯೇ ಪತಿತತೋ ಸೀಸುಕ್ಖಿಪನಮಸ್ಸ ನ ಹೋತೀತಿ ನ ವತ್ತಬ್ಬಂ.

ಭಿನ್ದಿಸುತ್ತಾದಿವಣ್ಣನಾ ನಿಟ್ಠಿತಾ.

೫. ಅಚಿರಪಕ್ಕನ್ತಸುತ್ತವಣ್ಣನಾ

೧೮೪. ಕಾಲೇ ಸಮ್ಪತ್ತೇತಿ ಗಬ್ಭಸ್ಸ ಪರಿಪಾಕಗತತ್ತಾ ವಿಜಾಯನಕಾಲೇ ಸಮ್ಪತ್ತೇ. ಪೋತನ್ತಿ ಅಸ್ಸತರಿಯಾ ಪುತ್ತಂ. ಏತನ್ತಿ ‘‘ಗಬ್ಭೋ ಅಸ್ಸತರಿಂ ಯಥಾ’’ತಿ ಏತಂ ವಚನಂ.

ಅಚಿರಪಕ್ಕನ್ತಸುತ್ತವಣ್ಣನಾ ನಿಟ್ಠಿತಾ.

೬. ಪಞ್ಚರಥಸತಸುತ್ತವಣ್ಣನಾ

೧೮೫. ಅಭಿಹರೀಯತೀತಿ ಅಭಿಹಾರೋ, ಭತ್ತಂಯೇವ ಅಭಿಹಾರೋ ಭತ್ತಾಭಿಹಾರೋತಿ ಆಹ ‘‘ಅಭಿಹರಿತಬ್ಬಂ ಭತ್ತ’’ನ್ತಿ. ಮಚ್ಛಪಿತ್ತನ್ತಿ ವಾಳಮಚ್ಛಪಿತ್ತಂ. ಪಕ್ಖಿಪೇಯ್ಯುನ್ತಿ ಉರಗಾದಿನಾ ಓಸಿಞ್ಚೇಯ್ಯುಂ.

ಪಞ್ಚರಥಸತಸುತ್ತವಣ್ಣನಾ ನಿಟ್ಠಿತಾ.

೭-೧೩. ಮಾತುಸುತ್ತಾದಿವಣ್ಣನಾ

೧೮೬-೧೮೭. ಮಾತುಪಿ ಹೇತೂತಿ ಅತ್ತನೋ ಮಾತುಯಾ ಉಪ್ಪನ್ನಅನತ್ಥಾವಹಸ್ಸ ಪಹಾನಹೇತುಪಿ. ಇತೋ ಪರೇಸೂತಿ ‘‘ಪಿತುಪಿ ಹೇತೂ’’ತಿ ಏವಮಾದೀಸು.

ಮಾತುಸುತ್ತಾದಿವಣ್ಣನಾ ನಿಟ್ಠಿತಾ.

ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ

ಲಾಭಸಕ್ಕಾರಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.