೬. ಓವಾದಸುತ್ತವಣ್ಣನಾ

೧೪೯. ಅತ್ತನೋ ಠಾನೇತಿ ಸಬ್ರಹ್ಮಚಾರೀನಂ ಓವಾದಕವಿಞ್ಞಾಪಕಭಾವೇನ ಅತ್ತನೋ ಮಹಾಸಾವಕಟ್ಠಾನೇ ಠಪನತ್ಥಂ. ಅಥ ವಾ ಯಸ್ಮಾ ‘‘ಅಹಂ ದಾನಿ ನ ಚಿರಂ ಠಸ್ಸಾಮಿ, ತಥಾ ಸಾರಿಪುತ್ತಮೋಗ್ಗಲ್ಲಾನಾ, ಅಯಂ ಪನ ವೀಸಂವಸ್ಸತಾಯುಕೋ, ಓವದನ್ತೋ ಅನುಸಾಸನ್ತೋ ಮಮಚ್ಚಯೇನ ಭಿಕ್ಖೂನಂ ಮಯಾ ಕಾತಬ್ಬಕಿಚ್ಚಂ ಕರಿಸ್ಸತೀ’’ತಿ ಅಧಿಪ್ಪಾಯೇನ ಭಗವಾ ಇಮಂ ದೇಸನಂ ಆರಭಿ. ತಸ್ಮಾ ಅತ್ತನೋ ಠಾನೇತಿ ಸತ್ಥಾರಾ ಕಾತಬ್ಬಓವಾದದಾಯಕಟ್ಠಾನೇ. ತೇನಾಹ ‘‘ಏವಂ ಪನಸ್ಸಾ’’ತಿಆದಿ. ಯಥಾಹ ಭಗವಾ ‘‘ಓವದ, ಕಸ್ಸಪ…ಪೇ… ತ್ವಂ ವಾ’’ತಿ. ದುಕ್ಖೇನ ವತ್ತಬ್ಬಾ ಅಪ್ಪದಕ್ಖಿಣಗ್ಗಾಹಿಭಾವತೋ. ದುಬ್ಬಚಭಾವಕರಣೇಹೀತಿ ಕೋಧೂಪನಾಹಾದೀಹಿ. ಅನುಸಾಸನಿಯಾ ಪದಕ್ಖಿಣಗ್ಗಹಣಂ ನಾಮ ಅನುಧಮ್ಮಚರಣಂ, ಛಿನ್ನಪಟಿಪತ್ತಿ ಕತಾ ವಾಮಗ್ಗಾಹೋ ನಾಮಾತಿ ಆಹ ‘‘ಅನುಸಾಸನಿ’’ನ್ತಿಆದಿ. ಅತಿಕ್ಕಮ್ಮ ವದನ್ತೇತಿ ಅಞ್ಞಮಞ್ಞಂ ಅತಿಕ್ಕಮಿತ್ವಾ ಅತಿಮಞ್ಞಿತ್ವಾ ವದನ್ತೇ. ಬಹುಂ ಭಾಸಿಸ್ಸತೀತಿ ಧಮ್ಮಂ ಕಥೇನ್ತೋ ಕೋ ವಿಪುಲಂ ಕತ್ವಾ ಕಥೇಸ್ಸತಿ. ಅಸಹಿತನ್ತಿ ಪುಬ್ಬೇನಾಪರಂ ನಸಹಿತಂ ಹೇತುಪಮಾವಿರಹಿತಂ. ಅಮಧುರನ್ತಿ ನ ಮಧುರಂ ನ ಕಣ್ಣಸುಖಂ ನ ಪೇಮನೀಯಂ. ಲಹುಞ್ಞೇವ ಉಟ್ಠಾತಿ ಅಪ್ಪವತ್ತನೇನ ಕೂಲಟ್ಠಾನಂ ವಿಯ ತಸ್ಸ ಕಥನಂ.

ಓವಾದಸುತ್ತವಣ್ಣನಾ ನಿಟ್ಠಿತಾ.