೧೦. ವೇಪುಲ್ಲಪಬ್ಬತಸುತ್ತವಣ್ಣನಾ

೧೪೩. ಏಕಂ ಅಪದಾನಂ ಆಹರಿತ್ವಾ ದಸ್ಸೇತಿ ‘‘ಏವಂ ಸಂವೇಗಂ ಜನೇತ್ವಾ ಭಿಕ್ಖೂ ವಿಸೇಸಂ ಪಾಪೇಸ್ಸಾಮೀ’’ತಿ. ಚತೂಹೇನ ಆರೋಹನ್ತಿ ಚತುಯೋಜನುಬ್ಬೇಧತ್ತಾ. ದ್ವಿನ್ನಂ ಬುದ್ಧಾನನ್ತಿ ಕಕುಸನ್ಧಸ್ಸ ಕೋಣಾಗಮನಸ್ಸ ಚಾತಿ ಇಮೇಸಂ ದ್ವಿನ್ನಂ ಬುದ್ಧಾನಂ. ‘‘ತಿವರಾ ರೋಹಿತಸ್ಸಾ ಸುಪ್ಪಿಯಾ’’ತಿ ಮನುಸ್ಸಾನಂ ತಸ್ಮಿಂ ತಸ್ಮಿಂ ಕಾಲೇ ಸಮಞ್ಞಾ ತತ್ಥ ದೇಸನಾಮವಸೇನ ಜಾತಾತಿ ವೇದಿತಬ್ಬಾ, ಯಥಾ ಏತರಹಿ ಮಾಗಧಾತಿ.

ಪುನ ವಸ್ಸಸತನ್ತಿ ಪಠಮವಸ್ಸಸತತೋ ಉಪರಿವಸ್ಸಸತಂ ಜೀವನಕೋ ನಾಮ ಮನುಸ್ಸೋ ನತ್ಥಿ. ಪರಿಹೀನಸದಿಸಂ ಕತಂ ದೇಸನಾಯ. ವಡ್ಢಿತ್ವಾತಿ ದಸವಸ್ಸಾಯುಕಭಾವತೋ ಪಟ್ಠಾಯ ಯಾವ ಅಸಙ್ಖ್ಯೇಯ್ಯಾಯುಕಭಾವಾ ವಡ್ಢಿತ್ವಾ. ‘‘ಪರಿಹೀನ’’ನ್ತಿ ವತ್ವಾ ತಂ ಪರಿಹೀನಭಾವಂ ದಸ್ಸೇನ್ತೋ ‘‘ಕಥ’’ನ್ತಿಆದಿಮಾಹ. ಯಂ ಆಯುಪ್ಪಮಾಣೇಸೂತಿ ಯತ್ತಕಂ ಆಯುಪ್ಪಮಾಣೇಸೂತಿ.

ವೇಪುಲ್ಲಪಬ್ಬತಸುತ್ತವಣ್ಣನಾ ನಿಟ್ಠಿತಾ.

ದುತಿಯವಗ್ಗವಣ್ಣನಾ ನಿಟ್ಠಿತಾ.

ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ

ಅನಮತಗ್ಗಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.