೬. ಸಗಾಥಾಸುತ್ತವಣ್ಣನಾ

೧೦೦. ‘‘ಧಾತುಸೋ ಸಂಸನ್ದನ್ತೀ’’ತಿ ಇದಂ ಅಜ್ಝಾಸಯತೋ ಸರಿಕ್ಖತಾದಸ್ಸನಂ, ನ ಕಾಯೇನ ಮಿಸ್ಸೀಭಾವದಸ್ಸನನ್ತಿ ಆಹ ‘‘ಸಮುದ್ದನ್ತರೇ’’ತಿಆದಿ. ನಿರನ್ತರೋತಿ ನಿಬ್ಬಿಸೇಸೋ. ಸಂಸಗ್ಗಾತಿ ಪಞ್ಚವಿಧಸಂಸಗ್ಗಹೇತು. ಸಂಸಗ್ಗಗಹಣೇನ ಚೇತ್ಥ ಸಂಸಗ್ಗವತ್ಥುಕಾ ತಣ್ಹಾ ಗಹಿತಾ. ತೇನಾಹ ‘‘ದಸ್ಸನ…ಪೇ… ಸ್ನೇಹೇನಾ’’ತಿ.

ವನತಿ ಭಜತಿ ಸಜ್ಜತಿ ತೇನಾತಿ ವನಂ, ವನಥೋತಿ ಚ ಕಿಲೇಸೋ ವುಚ್ಚತೀತಿ ಆಹ ‘‘ವನಥೋ ಜಾತೋತಿ ಕಿಲೇಸವನಂ ಜಾತ’’ನ್ತಿ. ಇತರೇ ಸಂಸಗ್ಗಮೂಲಕಾತಿ ತಮೇವ ಪಟಿಕ್ಖಿಪನ್ತೋ ಆಹ ‘‘ಅದಸ್ಸನೇನಾ’’ತಿ. ಸಾಧುಜೀವೀತಿ ಸಾಧು ಸುಟ್ಠು ಜೀವೀ, ತಂಜೀವನಸೀಲೋ. ತೇನಾಹ ‘‘ಪರಿಸುದ್ಧಜೀವಿತಂ ಜೀವಮಾನೋ’’ತಿ.

ಸಗಾಥಾಸುತ್ತವಣ್ಣನಾ ನಿಟ್ಠಿತಾ.