೪. ಬಕಬ್ರಹ್ಮಸುತ್ತವಣ್ಣನಾ

೧೭೫. ‘‘ಸಸ್ಸತೋ ಅತ್ತಾ ಚ ಲೋಕೋ ಚಾ’’ತಿ ಏವಂ ಪವತ್ತಾ ದಿಟ್ಠಿ ಸಸ್ಸತದಿಟ್ಠಿ. ಸಹ ಕಾಯೇನಾತಿ ಸಹ ತೇನ ಬ್ರಹ್ಮತ್ತಭಾವೇನ. ಬ್ರಹ್ಮಟ್ಠಾನನ್ತಿ ಅತ್ತನೋ ಬ್ರಹ್ಮವತ್ಥುಂ. ಅನಿಚ್ಚಂ ‘‘ನಿಚ್ಚ’’ನ್ತಿ ವದತಿ ಅನಿಚ್ಚತಾಯ ಅತ್ತನೋ ಅಪಞ್ಞಾಯಮಾನತ್ತಾ. ಥಿರನ್ತಿ ದಳ್ಹಂ, ವಿನಾಸಾಭಾವತೋ ಸಾರಭೂತನ್ತಿ ಅತ್ಥೋ. ಉಪ್ಪಾದವಿಪರಿಣಾಮಾಭಾವತೋ ಸದಾ ವಿಜ್ಜಮಾನಂ. ಕೇವಲನ್ತಿ ಪರಿಪುಣ್ಣಂ. ತೇನಾಹ ‘‘ಅಖಣ್ಡ’’ನ್ತಿ. ಕೇವಲನ್ತಿ ವಾ ಜಾತಿಆದೀಹಿ ಅಸಮ್ಮಿಸ್ಸಂ, ವಿರಹಿತನ್ತಿ ಅಧಿಪ್ಪಾಯೋ. ಉಪ್ಪಾದಾದೀನಂ ಅಭಾವತೋ ಏವ ಅಚವನಧಮ್ಮಂ. ಕೋಚಿ ಜಾಯನಕೋ…ಪೇ… ಉಪಪಜ್ಜನಕೋ ವಾ ನತ್ಥಿ ನಿಚ್ಚಭಾವತೋ ಠಾನೇನ ಸದ್ಧಿಂ ತನ್ನಿವಾಸೀನಂ. ನಿಚ್ಚಭಾವಞ್ಹಿ ಸೋ ಪಟಿಜಾನಾತಿ. ತಿಸ್ಸೋ ಝಾನಭೂಮಿಯೋತಿ ದುತಿಯತತಿಯಚತುತ್ಥಜ್ಝಾನಭೂಮಿಯೋ. ಚತುತ್ಥಜ್ಝಾನಭೂಮಿವಿಸೇಸಾ ಹಿ ಅಸಞ್ಞಸುದ್ಧಾವಾಸಾರುಪ್ಪಭವಾ. ನಿಬ್ಬಾನನ್ತಿ ವಾ ಏತ್ಥ ಇತಿ-ಸದ್ದೋ ಆದಿಅತ್ಥೋ, ನ ಪರಿಸಮಾಪನತ್ಥೋ, ತಸ್ಮಾ ‘‘ಸಬ್ಬ’’ನ್ತಿ ಇಮಿನಾ ‘‘ಅಸಞ್ಞ…ಪೇ… ಭವಾ’’ತಿ ವುತ್ತಂ ಸಙ್ಗಣ್ಹಾತಿ. ಪಟಿಬಾಹತೀತಿ ಸನ್ತಂಯೇವ ಸಮಾನಂ ಅಜಾನನ್ತೋವ ‘‘ನತ್ಥೀ’’ತಿ ಪಟಿಕ್ಖಿಪತಿ. ಏಕೇ ಉತ್ತರವಿಹಾರವಾಸಿನೋ.

ಹೇಟ್ಠೂಪಪತ್ತಿಕೋತಿ ಹೇಟ್ಠಾ ಭೂಮೀಸು ಉಪ್ಪನ್ನಉಪಪತ್ತಿಕೋ. ಇದಾನಿ ತಮತ್ಥಂ ವಿವರಿತುಂ ‘‘ಅನುಪ್ಪನ್ನೇ’’ತಿಆದಿ ವುತ್ತಂ. ಹೇಟ್ಠುಪಪತ್ತಿಕಂ ಕತ್ವಾತಿ ಯಥಾಠಿತಭೂಮಿತೋ ಹೇಟ್ಠಾ ತತಿಯಜ್ಝಾನಭೂಮಿಯಂ ಉಪಪತ್ತಿಝಾನಂ ಕತ್ವಾ, ನ ಉಪರಿಝಾನಸ್ಸ ವಿಯ ಪತ್ಥನಾಮತ್ತನ್ತಿ ಅಧಿಪ್ಪಾಯೋ. ಪಠಮಕಾಲೇತಿ ತಸ್ಮಿಂ ಭವೇ ಪಠಮಕಾಲೇ. ಅಞ್ಞಾಸಿ ಆಸನ್ನಭಾವತೋ. ಉಭಯನ್ತಿ ತಂ ತಂ ಅತ್ತನಾ ಕತಕಮ್ಮಞ್ಚೇವ ನಿಬ್ಬತ್ತಟ್ಠಾನಞ್ಚಾತಿ ಉಭಯಂ. ಪಮುಸ್ಸಿತ್ವಾ ನಿಬ್ಬತ್ತಿಂ ಅನುಪಧಾರೇನ್ತೋ.

ಅವಿಜ್ಜಾಯ ಗತೋತಿ ಅವಿಜ್ಜಾಯ ಸಹ ಪವತ್ತೋ. ಸಹಯೋಗೇ ಹಿ ಇದಂ ಕರಣವಚನಂ. ತೇನಾಹ ‘‘ಸಮನ್ನಾಗತೋ’’ತಿ. ಅಞ್ಞಾಣೀತಿ ಅವಿದ್ವಾ. ಪಞ್ಞಾಚಕ್ಖುವಿರಹತೋ ಅನ್ಧೀಭೂತೋ, ಅನ್ಧಭಾವಂ ಆಪನ್ನೋತಿ ಅತ್ಥೋ. ಅನಾಗತೇ ಸದ್ದೋ ಹೋತಾಯಂ ‘‘ವಕ್ಖತೀ’’ತಿ ಯತ್ರಸದ್ದಪಯೋಗೇನ, ಅತ್ಥೋ ಪನ ವತ್ತಮಾನಕಾಲಿಕೋ. ತೇನಾಹ ‘‘ಭಣತೀ’’ತಿ. ತೇನಾಹ ‘‘ಯತ್ರಾ’’ತಿಆದಿ.

ಮಗ್ಗಚೋರೋತಿ ಮಗ್ಗಪರಿಬುನ್ಧಕಚೋರೋ. ಸನ್ತಜ್ಜಿಯಮಾನೋತಿ ‘‘ಅವಿಜ್ಜಾಗತೋ ವತ, ಭೋ, ಬಕೋ ಬ್ರಹ್ಮಾ’’ತಿಆದಿನಾ ಸನ್ತಜ್ಜಿಯಮಾನೋ. ಸತಿಂ ಲಭಿತ್ವಾತಿ ತೇನೇವ ಸನ್ತಜ್ಜನೇನ ಯೋನಿಸೋ ಉಮ್ಮುಜ್ಜಿತ್ವಾ ಪುರಿಮಜಾತಿವಿಸಯಂ ಸತಿಂ ಲಭಿತ್ವಾ. ನಿಪ್ಪೀಳಿತುಕಾಮೋತಿ ಘಂಸೇತುಕಾಮೋ ದೋಸಂ ದಸ್ಸೇತುಕಾಮೋ ‘‘ಇದಂ ಪಸ್ಸ ಯಾವಞ್ಚ ತೇ ಅಪರದ್ಧ’’ನ್ತಿ. ಪುಞ್ಞಕಮ್ಮಾತಿ ಪುಞ್ಞಕಾರಿನೋ. ವೇದೇಹಿ ಞಾಣೇಹಿ ಗತತ್ತಾ ಪವತ್ತತ್ತಾ. ಅನ್ತಿಮಾ ಬ್ರಹ್ಮುಪಪತ್ತೀತಿ ಸಬ್ಬಪಚ್ಛಿಮಾ ಬ್ರಹ್ಮಭಾವಪ್ಪತ್ತಿ. ಅಸ್ಮಾಭಿಜಪ್ಪನ್ತೀತಿ ಅಸ್ಮೇ ಅಭಿಜಪ್ಪನ್ತಿ. ಆಯುವಣ್ಣಾದಿವಸೇನ ಬ್ರೂಹಿತಗುಣತ್ತಾ ಬ್ರಹ್ಮಾ. ಅಞ್ಞೇಹಿ ಮಹನ್ತಾ ಬ್ರಹ್ಮಾ ಮಹಾಬ್ರಹ್ಮಾ. ಅಭಿಭೂತಿ ತಂ ಬ್ರಹ್ಮಲೋಕಂ ಜೇಟ್ಠಕಭಾವೇನ ಅಭಿಭವಿತ್ವಾ ಠಿತೋ. ಅನಭಿಭೂತೋತಿ ಅಞ್ಞೇಹಿ ನ ಅಭಿಭೂತೋ. ಅಞ್ಞದತ್ಥೂತಿ ಏಕಂಸವಚನಮೇತಂ. ದಸ್ಸನವಸೇನ ದಸೋ, ಸಬ್ಬಂ ಪಸ್ಸತೀತಿ ಅಧಿಪ್ಪಾಯೋ. ವಸವತ್ತೀತಿ ಸಬ್ಬಜನಂ ವಸೇ ವತ್ತೇತಿ. ಇಸ್ಸರೋತಿ ಲೋಕೇ ಇಸ್ಸರೋ. ಕತ್ತಾ ನಿಮ್ಮಾತಾತಿ ಲೋಕಸ್ಸ ಕತ್ತಾ ನಿಮ್ಮಾತಾ. ಸೇಟ್ಠೋ ಸಜಿತಾತಿ ಅಯಂ ಲೋಕಸ್ಸ ಉತ್ತಮೋ ಸಂವಿಭಜಿತಾ ಚ. ವಸೀ ಪಿತಾ ಭೂತಭಬ್ಯಾನನ್ತಿ ಆಚಿಣ್ಣವಸಿತ್ತಾ ವಸೀ, ಅಯಂ ಪಿತಾ ಭೂತಾನಂ ನಿಬ್ಬತ್ತಾನಂ ಭಬ್ಯಾನಂ ಸಮ್ಭವೇಸೀನನ್ತಿ ಪತ್ಥೇನ್ತಿ ವಿಕತ್ಥೇನ್ತಿ ಪಿಹೇನ್ತಿ ಮಾನೇನ್ತಿ.

ಏತನ್ತಿ ವಿಪರೀತಸಞ್ಞಾವಸೇನ ‘‘ಇದಂ ನಿಚ್ಚಂ ಇದಂ ಧುವಂ ಇದಂ ಸಸ್ಸತ’’ನ್ತಿಆದಿನಾ ವುತ್ತಂ ಏತಂ ಅಪ್ಪಂ ಪರಿತ್ತಕನ್ತಿ ತಂ ಭಗವಾ ಪರಿಚ್ಛಿನ್ದಿತ್ವಾ ದಸ್ಸೇತಿ. ತಂ ಪನ ‘‘ಏಕಸ್ಮಿಂ ಕೋಸಲಕೇ ತಿಲವಾಹೇ ವಸ್ಸಸತೇ ವಸ್ಸಸತೇ ಏಕೇಕತಿಲುದ್ಧಾರೇ ಕಯಿರಮಾನೇ ತಿಲಾನಿ ಪರಿಕ್ಖಯಂ ಗಚ್ಛನ್ತಿ, ನ ತ್ವೇವ ಅಬ್ಬುದೇ ಆಯೂ’’ತಿ ಏವಂ ವುತ್ತೋ ಅಬ್ಬುದೋ, ತಂವಸೇನ ವೀಸತಿಗುಣಂ ನಿರಬ್ಬುದೋ, ತೇಸಂ ನಿರಬ್ಬುದಾನಂ ವಸೇನ ನಿರಬ್ಬುದಸತಸಹಸ್ಸಂ. ಅಯಮೇತ್ಥ ಸಙ್ಖೇಪೋ, ವಿತ್ಥಾರತೋ ಪನ ಪದುಮೇ ಆಯುನೋ ವಸ್ಸಗಣನಾ ಇಮಸ್ಮಿಂಯೇವ ಸಂಯುತ್ತೇ ಪರತೋ ಆಗಮಿಸ್ಸತಿ. ಅನನ್ತದಸ್ಸೀತಿ ಅನನ್ತಸ್ಸ ಞೇಯ್ಯಸ್ಸ ಅನವಸೇಸತೋ ದಸ್ಸೀ. ವತಸೀಲವತ್ತನ್ತಿ ಸಮಾದಾನವಸೇನ ವತಭೂತಂ ಚಾರಿತ್ತಸೀಲವಸೇನ ಸಮಾಚಿಣ್ಣತ್ತಾ ಸೀಲವತ್ತಂ. ತಂ ಪನ ಏಕಮೇವಾತಿ ಆಹ ‘‘ಸೀಲಮೇವಾ’’ತಿ.

ಅಪಾಯೇಸೀತಿ ಏತ್ಥ ಯದಾ ಸೋ ಪಿಪಾಸಿತೇ ಮನುಸ್ಸೇ ಪಾನೀಯಂ ಪಾಯೇಸಿ, ತಂ ಸಮುದಾಗಮತೋ ಪಟ್ಠಾಯ ದಸ್ಸೇತುಂ ‘‘ತತ್ರಾ’’ತಿಆದಿ ಆರದ್ಧಂ. ಪುಬ್ಬೇತಿ ಪುರಿಮಜಾತಿಯಂ. ಏಸ ಬ್ರಹ್ಮಾ ‘‘ಜರಾಮರಣಸ್ಸ ಅನ್ತಂ ಕರಿಸ್ಸಾಮೀ’’ತಿ ಅಜ್ಝಾಸಯವಸೇನ ಝಾನಂ ನಿಬ್ಬತ್ತೇತ್ವಾ ಬ್ರಹ್ಮಲೋಕೇ ನಿಬ್ಬತ್ತಿ, ಸೋ ತತ್ಥ ನಿಬ್ಬಾನಸಞ್ಞೀ ಅಹೋಸಿ. ಝಾನರತಿಯಾ ವೀತಿನಾಮೇತೀತಿ ತದಾ ತಸ್ಸಾ ಕಿರಿಯಾಯ ಅವಿಚ್ಛೇದತೋ ಪವತ್ತಿಂ ಉಪಾದಾಯ ವತ್ತಮಾನಪಯೋಗೋ. ರತ್ತನ್ಧಕಾರೇ ಪುರತೋ ಪುರತೋ ಗಚ್ಛನ್ತಸ್ಸ ಸಕಟಸ್ಸ ಅನುಸ್ಸರಣವಸೇನ ಗಚ್ಛನ್ತಾನಂ ಸಕಟಾನಂ ನಿವತ್ತನಂ ಹೋತೀತಿ ‘‘ಸಬ್ಬಸಕಟಾನಿ ತಥೇವ ನಿವತ್ತಿತ್ವಾ’’ತಿ ವುತ್ತಂ.

ಕಮ್ಮಸಜ್ಜಾತಿ ಯುದ್ಧಸಜ್ಜಾ. ವಿಲೋಪನ್ತಿ ವಿಲುತ್ತಭಣ್ಡಂ. ಏಣಿಕೂಲಸ್ಮಿನ್ತಿ ಏತ್ಥ ‘‘ಪನಿಹತಾಯ ನಿಚ್ಚಗಙ್ಗಾಯ ನಾಮ’’ನ್ತಿ ಕೇಚಿ. ‘‘ಏಣಿಮಿಗಬಹುಲತಾಯ ಸೋ ಗಙ್ಗಾಯ ತೀರಪ್ಪದೇಸೋ ಏಣಿಕೂಲನ್ತಿ ವುತ್ತ’’ನ್ತಿ ಅಪರೇ. ಗಙ್ಗೇಯ್ಯಕೋತಿ ಗಙ್ಗಾಸನ್ನಿವಾಸೀ.

ಬದ್ಧಚರೋತಿ ಪಟಿಬದ್ಧಚರಿಯೋ. ತೇನಾಹ ‘‘ಅನ್ತೇವಾಸಿಕೋ’’ತಿ. ಯಸ್ಮಾ ಬುದ್ಧೋ ಸಬ್ಬಞ್ಞೂ, ತಸ್ಮಾ ಅಞ್ಞಾಸಿ, ಇಧ ಮಯ್ಹಂ ಪಮುಟ್ಠಞ್ಚ ಸಬ್ಬಂ ಜಾನಾಸೀತಿ ಅಧಿಪ್ಪಾಯೋ. ಸಬ್ಬಂ ಬ್ರಹ್ಮಲೋಕಂ ಓಭಾಸಯನ್ತೋ ಸಬ್ಬಮ್ಪಿಮಂ ಬ್ರಹ್ಮಲೋಕಂ ಭಗವಾ ಓಭಾಸಂ ಅಭಿಭವಿತ್ವಾ ಅನಞ್ಞಸಾಧಾರಣಂ ಅತ್ತನೋ ಓಭಾಸಂ ಓಭಾಸೇನ್ತೋ ತಿಟ್ಠತಿ.

ಬಕಬ್ರಹ್ಮಸುತ್ತವಣ್ಣನಾ ನಿಟ್ಠಿತಾ.