೫. ಅಞ್ಞತರಬ್ರಹ್ಮಸುತ್ತವಣ್ಣನಾ

೧೭೬. ತೇಜೋಕಸಿಣಪರಿಕಮ್ಮಂ ಕತ್ವಾತಿ ‘‘ತೇಜೋಕಸಿಣಪರಿಕಮ್ಮಜ್ಝಾನಂ ಸಮಾಪಜ್ಜಿಸ್ಸಾಮೀ’’ತಿ ಚಿತ್ತುಪ್ಪಾದೋ ಏವೇತ್ಥ ತೇಜೋಕಸಿಣಪರಿಕಮ್ಮಂ. ನ ಹಿ ಬುದ್ಧಾನಂ ಅಞ್ಞೇಸಂ ವಿಯ ತತ್ಥ ಝಾನಸಮಾಪಜ್ಜನೇನ ಪರಿಕಮ್ಮಪಪಞ್ಚೋ ಅತ್ಥಿ ಸಬ್ಬತ್ಥೇವ ಚಿಣ್ಣವಸೀಭಾವಸ್ಸ ಪರಮುಕ್ಕಂಸಭಾವಪ್ಪತ್ತತ್ತಾ. ತಸ್ಸ ಕಿರ ಬ್ರಹ್ಮುನೋ ‘‘ಯಥಾಹಂ ಏವಂ ಮಹಾನುಭಾವೋ ಅಞ್ಞೋ ನತ್ಥೀ’’ತಿ ಲದ್ಧಿ, ಯಂ ಸನ್ಧಾಯ ವುತ್ತಂ – ‘‘ನತ್ಥಿ ಸೋ ಸಮಣೋ ವಾ ಬ್ರಾಹ್ಮಣೋ ವಾ, ಯೋ ಇಧ ಆಗಚ್ಛೇಯ್ಯಾ’’ತಿ. ಭಗವಾ ತಸ್ಸ ತಂ ಲದ್ಧಿಂ ವಿಸ್ಸಜ್ಜೇತುಂ ತೇಜೋಧಾತುಂ ಸಮಾಪಜ್ಜಿತ್ವಾ ತಸ್ಸ ಉಪರಿ ಆಕಾಸೇ ನಿಸೀದಿ. ತೇನ ವುತ್ತಂ ‘‘ತೇಜೋಧಾತುಂ…ಪೇ… ತಥಾಗತಂ ದಿಸ್ವಾ’’ತಿ. ಅಟ್ಠಿವೇಧಂ ವಿಯಂ ವಿಜ್ಝಿತಬ್ಬೋ ಅಟ್ಠಿವೇಧೀ, ಯಥಾ ಅಟ್ಠಿಂ ವಿಜ್ಝಿತ್ವಾ ಅಟ್ಠಿಮಿಞ್ಜಂ ಆಹಚ್ಚ ತಿಟ್ಠತಿ, ಏವಂ ವಿಜ್ಝಿತಬ್ಬೋತಿ ಅತ್ಥೋ. ಅಯಂ ಪನ ಅಟ್ಠಿವೇಧೀ ವಿಯ ಅಟ್ಠಿವೇಧೀ, ಯಥಾ ಸೋ ಲದ್ಧಿಂ ವಿಸ್ಸಜ್ಜೇತಿ, ಏವಂ ಪಟಿಪಜ್ಜಿತಬ್ಬೋತಿ ಅತ್ಥೋ. ಸೇಸಾನನ್ತಿ ಮಹಾಕಸ್ಸಪಮಹಾಕಪ್ಪಿನಅನುರುದ್ಧತ್ಥೇರಾನಂ.

ಅಞ್ಞಬ್ರಹ್ಮಸರೀರವಿಮಾನಾಲಙ್ಕಾರಾದೀನಂ ಪಭಾತಿ ಬ್ರಹ್ಮಾನಂ ಸರೀರಪ್ಪಭಾ ವಿಮಾನಪ್ಪಭಾ ಅಲಙ್ಕಾರವತ್ಥಾದೀನಂ ಪಭಾತಿ ಇಮಸ್ಮಿಂ ಬ್ರಹ್ಮಲೋಕೇ ಇಮಾ ಸಬ್ಬಾ ಪಭಾ ಅತ್ತನೋ ಪಭಸ್ಸರಭಾವೇನ ಅಭಿಭವನ್ತಂ. ನತ್ಥಿ ಮೇ ಸಾತಿ ಇದಾನಿ ಮೇ ಸಾ ದಿಟ್ಠಿ ನತ್ಥಿ, ‘‘ನತ್ಥಿ ಸೋ ಸಮಣೋ ವಾ ಬ್ರಾಹ್ಮಣೋ ವಾ, ಯೋ ಇಧ ಆಗಚ್ಛೇಯ್ಯಾ’’ತಿ ಅಯಂ ಲದ್ಧಿ ನತ್ಥಿ. ತೇನಾಹ ‘‘ತತ್ರಾಸ್ಸ…ಪೇ… ಪಹೀನಾ’’ತಿ. ಏತ್ಥಾತಿ ಏತಸ್ಮಿಂ ಸಮಾಗಮೇ. ಯಥಾ ತಸ್ಸ ಬ್ರಹ್ಮುನೋ ಸಬ್ಬಸೋ ದಿಟ್ಠಿಗತಂ ವಿಮುಚ್ಚತಿ ಧಮ್ಮಚಕ್ಖು ಉಪ್ಪಜ್ಜತಿ, ಏವಂ ಮಹನ್ತಂ ಧಮ್ಮದೇಸನಂ ದೇಸೇಸಿ.

‘‘ಅಜ್ಜಾಪಿ ತೇ, ಆವುಸೋ’’ತಿಆದಿನಾ ವುತ್ತೇನ ತತ್ತಕೇನೇವ. ಸರೂಪೇನ ವುತ್ತಾತಿ ಪಠಮೇನ ಪಾದೇನ ಚತಸ್ಸೋ, ದುತಿಯೇನ ಏಕನ್ತಿ ಏವಂ ಪಞ್ಚ ಅಭಿಞ್ಞಾ ಸರೂಪೇನ ವುತ್ತಾ. ಕಸ್ಮಾ ಏತ್ಥ ದಿಬ್ಬಸೋತಂ ನಾಗತನ್ತಿ? ಆಹ ‘‘ತಾಸಂ ವಸೇನ ಆಗತಮೇವಾ’’ತಿ. ಯೇನ ಇಮಾ ಲೋಕುತ್ತರಾ ಅಭಿಞ್ಞಾ ಅಧಿಗತಾ, ನ ತಸ್ಸ ದಿಬ್ಬಸೋತಸಮ್ಪಾದನಂ ಭಾರಿಯಂ ಪಟಿಪಕ್ಖವಿಗಮೇನ ಸುಖೇನೇವ ಇಜ್ಝನತೋ.

ಅಞ್ಞತರಬ್ರಹ್ಮಸುತ್ತವಣ್ಣನಾ ನಿಟ್ಠಿತಾ.